Tou Fakahā Te Logo Lelei ʼAki Te Telefoni
1 ʼE tou leleiʼia age tatatou faka mafola fakahagatonu te logo lelei ki te hahaʼi, kae ʼe ʼi ai te ʼu ʼaluʼaga ʼe lagi tonu ai ke tou fakaʼaogaʼi te telefoni moʼo fakahoko ia te faʼahi ʼaia. Ko te ʼu kaugā fai faka mafola ʼaē ʼe mole feala tanatou ʼolo ʼo fai faka mafola ʼi te ʼu ʼapi, ʼuhi heʼe nātou mahahaki peʼe nātou māʼimoa, ʼe feala ke nātou fakaʼaogaʼi lelei te telefoni moʼo fagonogono ʼo te logo lelei. Tahi ʼaē meʼa, ʼe feala ke fua lelei ʼaupito te ʼu palalau ʼaki te telefoni moʼo faka felogoi mo te hahaʼi ʼaē ʼe nonofo ʼi te ʼu falefata ʼaē ʼe mole feala te hū kiai, ʼi te ʼu malaʼe ʼaē ʼe tau ai te ʼu motokā, peʼe ko he tahi ʼu koga meʼa ʼe mole feala te hū kiai he tahi mo kapau ʼe mole fakagafua age. Ko te fakaʼaogaʼi ʼo te telefoni moʼo fai fagonogono ʼe ʼi ai tona ʼu faigataʼaʼia, kae kapau ʼe kita teuteuʼi lelei pea mo fakatuʼutuʼu lelei, pea ʼe feala te tauʼi ʼo te ʼu faigataʼaʼia ʼaia.
2 ʼI ʼihi temi, ʼe feala ke tou maʼu te ʼu higoa ʼe tuʼu ʼi te ʼu hūʼaga ʼo te ʼu falefata peʼe ʼi te ʼu kesi ʼaiʼaga tohi. ʼE feala ke tou fakaʼaogaʼi te tohi ʼaē ʼe tuʼu ai te ʼu numelo telefoni ke tou ʼiloʼi ai tonatou ʼu numelo telefoni. Ko te faʼahi ʼaia ʼe tonu anai ke fakahā ki te tagata taupau ki te gāue, ke feala ai he fai ʼo he telituale ʼo te ʼu numelo telefoni pea mo taupau he tosie ki te faʼahi ʼaia.
3 E feafeaʼi tatatou teuteu ki te faʼahi ʼaia: Ke feala he fua lelei ʼo te fai faka mafola ʼaki te telefoni, ʼe ʼaoga ke hā ʼi totatou leʼo ʼe tou fiafia pea mo tou leleiʼia te fai palalau. Ke ʼaua naʼa tou telefoni ka kei uhuuhu, peʼe ʼi te pōʼuli, peʼe ʼi te temi kai. ʼE mole ʼaoga ke loaloaga te fakatatagi ʼo te telefoni. Kapau ʼe koutou telefoni atu pea ʼe tali mai e te meʼa puke leʼo telefoni, ʼe feala ke koutou ʼui fēnei: “Ko toku higoa ko . . . , pea ʼe ʼau fia fakahā atu te ʼamanaki ʼaē ʼe tuʼu ʼi te Tohi-Tapu ʼo ʼuhiga mo te ka haʼu. ʼE ʼau toe telefoni atu anai.” ʼI tatatou mole maʼu he tahi ʼi tatatou telefoni ʼe lagi lelei ke tou toe telefoni ʼi he tahi temi.
4 ʼE lelei ke liuliuga te teuteuʼi ʼo takotou ʼu palalau ʼi muʼa ʼo takotou fai telefoni, ke ʼaua naʼa hage kia ia ʼe koutou lau he moʼi pepa. Koutou faiga ke logoʼi e ia ʼaē ʼe palalau mo koutou ʼe koutou tokaga moʼoni kia ia, ʼo koutou faiga ke kau mo ia ki te fai palalau. Ka koutou telefoni, koutou ʼuluaki fakahā tokotou higoa, pea mo koutou fakaʼaogaʼi tona higoa ʼi takolua felogoi.
5 Koutou palalau māmālie pea mo fakaʼaveʼave lelei takotou ʼu palalau, kae ke ʼaua naʼa tuʼu takotou palalau ka mole heʼeki koutou fai he fehuʼi, heʼe ko te tuʼu ʼo te palalau ʼe feala ke faka ʼuhiga ʼe ko he fehuʼi. ʼE feala ke koutou ʼui age, “Ko toku higoa ko . . . , pea ʼe ʼau telefoni atu koteʼuhi ʼe mole feala haku felāveʼi mo koe.” Pea ke ʼaua naʼa tuʼu takotou palalau, kae ke hoko atu ʼo fēnei: “ ʼE ʼau telefoni atu heʼe ʼau fia ʼiloʼi tau manatu ʼo ʼuhiga mo te fehuʼi ʼaenī. Neʼe mole heʼeki ke fai koa la te fehuʼi ʼaenī . . . ?” ʼE feala ke koutou fetogi te fehuʼi ʼo koutou ʼui age fēnei, “Neʼe mole heʼeki ke manatu koa la pe koʼe . . . ?” peʼe “Kua ke fakakaukau koa la pe koʼe . . . ?” ʼE lelei te ʼu fehuʼi ʼaia, heʼe feala ai ke koutou fai palalau mo ia ʼaē neʼe koutou telefoni ki ai. Ke ʼaua naʼa koutou fai te ʼu palalau ʼaenī, “ ʼE lagi ʼe ʼau fakalelu atu ki te meʼa ʼaē ʼe ke fai” peʼe koutou ʼui fēnei “ ʼE lagi ke maʼumaʼua.” Koutou fakahā age te meʼa ʼaē neʼe koutou fia palalau kiai, gata pe mokā ʼe fakafisi atu.
6 Kapau ʼe ina fehuʼi atu, “ ʼE koutou kau ki te kautahi fea?” koutou ʼui age fēnei, “Ko ʼau ko te Fakamoʼoni ʼa Sehova, pea ʼe ʼau telefoni atu heʼe ʼau fia ʼiloʼi tau manatu ʼo ʼuhiga mo te fehuʼi maʼuhiga ʼaenī. Neʼe mole heʼeki ke fai koa la te fehuʼi ʼaenī . . . ?” Kapau ʼe ina fehuʼi atu, “Neʼe koutou maʼu ʼifea toku numelo telefoni?” ʼe feala takotou tali age, “Neʼe ʼau maʼu ʼi te tohi ʼaē ʼe tuʼu ai te ʼu numelo telefoni, pea ʼe ʼau telefoni atu heʼe ʼau fia ʼiloʼi tau manatu ʼo ʼuhiga mo te fehuʼi maʼuhiga ʼaenī. Neʼe mole heʼeki ke manatu koa la pe koʼe. . . ?”
7 Ko ʼihi neʼe nātou maʼu te ʼu fua lelei ʼi tanatou ʼui age kia ia ʼaē ʼe nātou telefoni ki ai, ʼe nātou maʼu tonatou temi ke nātou tali ki te ʼu fehuʼi faka Tohi-Tapu, pea mo fakahā age he ʼu kupu tāfito ʼo te tohi Te ʼAtamai Mālama. Peʼe feala ke koutou ʼui age fēnei, “Mai tona ʼaluʼaga ʼaē ʼe mole feala taku hū atu ki tou fale ʼuhi ko tona puipui ʼaē ki te ʼu fai fakapō, koia ʼe ʼau telefoni atu heʼe ʼau fia ʼiloʼi tau manatu ʼo ʼuhiga mo te faʼahi ʼaenī. He koʼe ʼe lahi ʼaupito te fai fakapō ia ʼaho nei?”
8 ʼI he fale lahi neʼe mole feala te hū kiai, neʼe hoki fua lelei te fai faka mafola ʼaki te fakaʼaogaʼi ʼo te telefoni. Neʼe kamata ai te ʼu ako Tohi-Tapu e 14. Koia, ko te ʼu falefata ʼaē ʼe leʼo tona hūʼaga ʼe moʼoni ʼe mole feala tatatou hū kiai, pea ʼe hage ʼe faigataʼa. Kae ke tou ʼiloʼi papau, ʼe tokoni anai ia Sehova kia tatou, ke fua lelei tatatou faka mafola te logo lelei ʼaki te telefoni.—2 Tim. 4:5.