“Ko Te Faka ʼUhiga ʼAenī ʼo Te Maʼuli Heʼegata”
1 ʼE tonu ke tou mahino lelei ki te ʼu palalau ʼa Sesu ʼaē ʼe tuʼu ia Soane 17:3. Neʼe ina ʼui fēnei—ko te faka ʼuhiga ʼo te maʼuli heʼegata ʼe ko te ʼiloʼi ʼo te ʼAtua pea mo Kilisito! Kae ʼe tou maʼu anai koa te maʼuli heʼegata ʼuhi pe ko tatatou mālama kia Sehova pea mo Sesu? Kailoa. Neʼe ʼiloʼi e te kau Iselaelite ko Sehova neʼe ko tonatou ʼAtua, kae neʼe mole hā te faʼahi ʼaia ʼi tonatou maʼuli. Koia la ʼaē, neʼe mole nātou maʼu ai tona ʼofa. (Os. 4:1, 2, 6) Ko te lauʼi miliona hahaʼi ia ʼaho nei ʼe lagi “nātou tauhi fakamalotoloto ki te ʼAtua, kae ʼe mole nātou fai ʼaki te ʼatamai mālama totonu.” (Loma 10:2) ʼE tonu ke nātou ʼiloʼi ia Sehova, “te ʼAtua moʼoni pe ʼaē e tahi,” pea ke nātou ako peʼe koteā te tauhi ʼaē ʼe ina leleiʼia. ʼO ʼuhiga mo te faʼahi ʼaia, ʼe tou tufa anai lolotoga te māhina ʼo Novepeli te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Koteā anai te faʼahiga palalau ʼaē ka koutou fai moʼo fakahā ʼo te tohi Te ʼAtamai Mālama? Koʼeni he ʼu manatu ʼe feala anai ke tokoni kia koutou.
2 Mai tona ʼuhiga ʼaē ʼe foʼou ki te tokolahi te manatu ʼo ʼuhiga mo te maʼuli heʼegata ʼi te kele, koia ko te ʼuluaki palalau ʼaenī ʼe feala ke uga ai tanatou fia logo:
◼ “ ʼE mātou fai te fehuʼi ʼaenī ki ʼomātou vāhaʼa fale. Kapau neʼe fakaafe koe ke ke maʼuli ʼo heʼegata ʼi he mālama ohage ko te mālama ʼaenī, ʼe ke tali anai koa te fakaafe ʼaia? [Fakahā age te paki ʼo te pasina 4 ki te 5 ʼi te tohi Te ʼAtamai Mālama. Tuku ke fai atu hana tali.] Ko te faʼahi ʼaenī ʼe feala ke hoko moʼoni kia koe. Kae ʼi tau manatu, koteā te meʼa ʼaē ʼe tonu ke ke fai ke hoko moʼoni te faʼahi ʼaenī kia koe? [Tuku ke fai atu hana tali.] Fakatokagaʼi te meʼa ʼaē ʼe fakamaʼuaʼi mai ia Soane 17:3. [Lau.] Ko te tohi ʼaenī ʼe tokoni ki te tokolahi ke nātou maʼu te faʼahiga ʼatamai mālama ʼaenī pea ʼe ʼau fia tuku atu te tohi ki te 150. ʼE ke fia fai koa ki hau tohi ke ke lau? [Tuku ke fai atu hana tali.] ʼI taku toe liliu mai, ʼe feala ke tā talanoa fakatahi pe koʼe ʼe fakapotopoto te manatu ʼaē, ʼe feala hatatou maʼu te maʼuli heʼegata ʼi te kele.”
3 Mokā koutou liliu ʼo ʼaʼahi ia nātou ʼaē neʼe palalau fakatahi mo koutou ʼo ʼuhiga mo Soane 17:3, ʼe feala ke koutou ʼui age fēnei:
◼ “ ʼI taku haʼu talu mai ai, neʼe ʼau lau atu te ʼu palalau fakaloto mālohi ʼa Sesu ʼaē ʼe tuʼu ia Soane 17:3, ʼaē neʼe ina fakamoʼoni mai ai kia tatou ko te maʼu ʼo te ʼatamai mālama ʼo ʼuhiga mo te ʼAtua pea mo ia ʼe ko te faka ʼuhiga ʼaia ʼo te maʼuli heʼegata. Kae ko te tokolahi ʼe nātou tui ko te maʼuli fīmālie, ʼe hoki maʼu ʼi selo. Koteā tau manatu ʼo ʼuhiga mo te faʼahi ʼaia? [Tuku ke fai atu hana tali.] Kapau ʼe ke nofo mo te tohi ʼaē neʼe ʼau tuku atu, ʼe ʼau fia fakahā atu he ʼu vaega faka Tohi-Tapu ʼe nātou fakamoʼoni mai ʼe fakatuʼu anai te Palatiso ʼi te kele. [Fai palalau ki te palakalafe 11 ki te 16 ʼo te pasina 9 ki te 10 ʼi te tohi Te ʼAtamai Mālama.] ʼI taku toe liliu mai, ʼe ʼau fia fakahā atu anai pe koʼe ʼe feala ke ke falala ki te ʼu fakapapau ʼaia ʼaē ʼe tuʼu ʼi te Tohi-Tapu. Lolotoga te temi ʼaia, ʼe lagi feala ke ke lau te kapite 2 ʼi tau tohi.”
4 Koʼeni te faʼifaʼitaki ʼe feala ke koutou fakaʼaogaʼi mokā koutou palalau mo te hahaʼi ʼaē ʼe ʼi ai hanatou lotu:
◼ “ ʼE mātou palalau mo te hahaʼi ʼo ʼuhiga mo te lahi ʼaupito ʼo te ʼu lotu kehekehe ʼi te malamanei. Ko te ʼu lotu e 10 000 tupu ʼi te malamanei katoa. Kae, ʼe ko te Tohi-Tapu pe e tahi. ʼI tau manatu, he koʼe ʼe lahi feiā te ʼu lotu? [Tuku ke fai atu hana tali. Koutou avahi te tohi ʼAtamai Mālama ʼi te kapite 5, pea koutou lau te palakalafe 1.] ʼE ke maʼu anai he ʼu tali lelei ki te ʼu fehuʼi ʼaia, mokā ke lau anai te kapite ʼaenī. ʼE ʼau fia tuku atu te tohi ke ke lau.” Kapau ʼe ina toʼo te tohi, koutou fai he ʼu fakatuʼutuʼu ke koutou toe liliu ʼo ʼaʼahi ia ia, pea mo koutou ʼui age: “ ʼI taku toe liliu mai, ʼe lagi feala anai ke tā vakaʼi peʼe tonu te ʼui ʼaē ko te ʼu lotu fuli ʼe ko he ʼu ala kehekehe ʼe fakatau pe ki he faʼahi e tahi.”
5 Mokā koutou liliu ʼo hoko atu te fai palalau pe koʼe ʼe lahi te ʼu lotu, ʼe feala ke koutou ʼui age fēnei:
◼ “ ʼI tatā palalau talu mai ai, neʼe ʼau fehuʼi atu peʼe ko te ʼu lotu kehekehe fuli ʼe fakatau koa ki he faʼahi pe e tahi. Koteā koa tau manatu ki te faʼahi ʼaia? [Tuku ke fai atu hana tali.] ʼE ʼau fia fakahā atu kia koe ʼi te tohi ʼaē neʼe ʼau tuku atu, pe koteā te meʼa ʼaē neʼe ʼui e Sesu ʼo ʼuhiga mo te faʼahi ʼaia. [Koutou fuli ki te kapite 5 ʼo te tohi Te ʼAtamai Mālama, pea koutou lau te palakalafe 6 ki te 7, ʼo kau ai mo Mateo 7:21-23.] ʼE lagi ʼe ke feʼekeʼaki pe koʼe ʼe maʼuhiga te ʼiloʼi lelei ʼo te finegalo ʼo te ʼAtua. ʼE ke fakatokagaʼi anai ʼe lahi te ʼu manatu ʼaē ʼe talanoa kiai te ʼu palakalafe fakaʼosi. ʼE feala ke ke lau te fakamanatu ʼo te kapite ʼaenī. ʼI taku toe liliu mai, ʼe ʼau fakahā atu anai te maʼuhiga ʼaē ke ke maʼu te ʼatamai mālama ʼo te Tohi-Tapu.”
6 ʼI ʼihi temi, ʼe lelei ke fakahā fakahagatonu age kia ia ʼaē ʼe palalau mo koutou, ʼe feala te fai ʼo hana ako Tohi-Tapu. Koʼeni te ʼuluaki palalau ʼe tuʼu ʼi te pasina 12 ʼo te tohi “Comment raisonner”:
◼ “ ʼE mātou fakahā ki ʼomātou ʼu vāhaʼa fale te tohi ʼaenī moʼo ako ʼo te Tohi-Tapu. (Tou fakahā age ki ai te tohi Te ʼAtamai Mālama.) Neʼe kua ke lau koa la te tohi ʼaenī? . . . Kapau ʼe fealagia tou temi, pea ʼe ʼau fia fakahā atu peʼe feafeaʼi hau fakaʼaogaʼi te tohi ʼaenī ke feala ai hau vakaʼi tau Tohi-Tapu.”
7 Koʼeni te tahi faʼahiga palalau fakahagatonu ʼe fua lelei pea ʼe feala ke koutou fai moʼo kamata ʼo he ʼu ako Tohi-Tapu:
◼ “ ʼE ʼau felāveʼi mo te tokolahi ʼe nātou fia ʼiloʼi lelei te Folafola ʼa te ʼAtua, ia te Tohi-Tapu. ʼE lagi feiā mo koe. Ko te tohi ʼaenī ʼe ko te tohi ʼaē ʼe mātou fakaʼaogaʼi moʼo ako ʼo te Tohi-Tapu. [Fakahā age te tohi ʼAtamai Mālama.] Ko te ako ʼe feala pe ke fai ʼi he ʼu kiʼi māhina, pea ʼe ina tali ki te ʼu fehuʼi ohage la ko te ʼu fehuʼi ʼaenī: He koʼe koa ʼe fakagafua e te ʼAtua ia te ʼu mamahi? He koʼe ʼe tou matutuʼa pea tou mamate? Koteā te meʼa ʼe hoko ki te ʼu mate ʼaē ʼe tou ʼoʼofa mamahi ai? Pea ʼe lava feafeaʼi hatatou fakaōvi ki te ʼAtua?” Pea tou fehuʼi age ki ai, “ ʼE feala koa haku fakahā atu peʼe feafeaʼi te fai ʼo te ako ʼaia?” Kapau ʼe mole ina tali te ako, koutou ʼui age ki ai peʼe ina fia lau te tohi ʼAtamai Mālama.
8 Ko te ʼatamai mālama ʼo ʼuhiga mo te ʼAtua pea mo Kilisito ʼe ko he koloā ʼe feala ke maʼu e te hahaʼi fuli! Ko te maʼu ʼo te faʼahi ʼaia ʼe ko tona faka ʼuhiga moʼoni, ke tou maʼuʼuli ʼo heʼegata ʼi te ʼu ʼaluʼaga haohaoa. Tou fakaʼaogaʼi te ʼu fealagia fuli lolotoga te māhina ʼo Novepeli, moʼo fakahā ki te hahaʼi te ʼatamai ʼaē ʼe ina taki ki te maʼuli heʼegata.