Ko Ai ʼAē Ka Fakalogo Anai Ki Tatatou Logo?
1 ʼI te temi nei, ʼe lahi te ʼu logo ʼaē ʼe fakahā ki te hahaʼi, kae ʼe mole faʼa maʼuhiga pea ʼe fakahēʼi ai ia nātou. Ko te meʼa ʼaē ʼe hoko, ʼe mole kei ʼiloʼi e te tokolahi pe koteā te meʼa ʼaē ʼe tonu ke nātou manatu kiai, pea ʼe ko he meʼa faigataʼa kia tatou te uga ʼo nātou ke nātou fakalogo ki te logo ʼo te Puleʼaga ʼo te ʼAtua. ʼE mole nātou mahino ki te fua lelei ʼaē ʼe feala ke nātou maʼu mo kapau ʼe nātou fakalogo ki te Folafola ʼa te ʼAtua.—Luka 11:28.
2 ʼE tou fiafia heʼe lahi te ʼu potu ʼo te malamanei, ko te lauʼi afe hahaʼi ʼe nātou fakalogo ki te logo ʼaia, pea ʼe nātou tali ke fai hanatou ako Tohi-Tapu. Kae, ʼi te tahi ʼu telituale, ʼe faigataʼa te maʼu ʼo te hahaʼi ʼaē neʼe kua ʼosi tou fetaulaki mo nātou, koteʼuhi ʼi te temi ʼaē ʼe tou ʼaʼahi ai ia nātou ʼe mole tou maʼu atu nātou ʼi tonatou ʼapi.
3 ʼE tonu ke tou tokakaga ke ʼaua naʼa tou lotovaivai. Neʼe fakamahino fēnei e Paulo: “ ‘Ko ʼaē ia ʼe fetapā ki te huafa ʼo Sehova ʼe hāo anai ia.’ Ka ʼe nātou fetapā feafeaʼi anai kia ia . . . ʼaē ʼe mole heʼeki nātou logo ki he talanoa ʼo ʼuhiga mo ia? Pea ʼe nātou logo feafeaʼi anai, mo kapau ʼe mole he tahi ʼe fai faka mafola? . . . Ohage ko te meʼa ʼe tuʼu ʼi te Tohi: ‘ ʼE matalelei te ʼu vaʼe ʼo nātou ʼaē ʼe nātou fagonogono te logo lelei ʼo te ʼu meʼa lelei!’ ” (Loma 10:13-15) Kapau ʼe tou tūtū fakalelei te ʼu pulapula ʼo te Puleʼaga, pea ʼe fakatuputupu anai e te ʼAtua ʼi te loto ʼo te hahaʼi faitotonu.—1 Ko. 3:6.
4 Ko Te Puani Tāfito ʼe Ko Te Fai Tuʼumaʼu ʼo Te ʼu ʼAʼahi: ʼE tonu ke tou tokakaga tāfito ke tou fakatuputupu te fia logo ʼa te hahaʼi, tatau aipe pe neʼe tou tuku he tohi peʼe kailoa. ʼE mole tonu ke tou ʼui fakavilivili ʼe mole ʼi ai anai hona ʼu fua. Mokā tou tūtū te pulapula, ʼe mole tou ʼiloʼi peʼe ko te faʼahi fea ʼaē ka maʼuli ai. (Tnk. 11:6) Kapau ʼe tou teuteu lelei ke feala hatatou fakahā te meʼa ʼaē ʼe tuʼu ʼi te Tohi-Tapu, tatau aipe peʼe nounou te manatu, ʼe lagi feala anai ke tou fakaaʼu te logo lelei ki te loto ʼo ia ʼaē neʼe tou ʼaʼahi. ʼE feala ke tou tuku he kiʼi pepa lotu peʼe ko he ʼu nusipepa foʼou. Ki muli age, ʼe feala ke tou fakahā age kia ia peʼe feafeaʼi te fai ʼo he ako Tohi-Tapu. ʼE tou punamaʼuli anai ʼi tatatou sio ki te tapuakinaʼi e Sehova tatatou ʼu faiga.—Pes. 126:5, 6.
5 Neʼe tuku te kiʼi pepa lotu ki te fafine neʼe ina fakahā tana fia logo ki te moʼoni. Neʼe maʼu atu ia ia ki tona ʼapi ʼi te hili ʼo māhina e lua, pea neʼe kei maʼumaʼua aipe, ʼo mole feala ai te fai palalau. Neʼe toe tuku kia ia te kiʼi pepa lotu pe ʼaia. Logope la te ʼu faiga mālohi ʼa te kaugā fai faka mafola ke ina maʼu atu ia ia ki tona ʼapi, neʼe hoki toe maʼu atu ia ia hili kiai māhina e tolu, kae neʼe ina maʼu atu ʼe mahaki. Neʼe toe ʼaʼahi ia ia e te tuagaʼane ʼaia ʼi te vāhaʼa ki muli mai, pea neʼe hoko atu ai te fai palalau nounou ʼo ʼuhiga mo te kiʼi pepa lotu. ʼI te liliu ʼa te tuagaʼane ʼi te vāhaʼa ki muli mai, neʼe fakahā age e te fafine tana fia logo fakamalotoloto ki te logo ʼo te Puleʼaga. Ko te fetogi ʼo te agaaga ʼo tona maʼuli, neʼe tupu ai te mahino ʼa te fafine ki te ʼaoga ʼaē kia ia te ʼu meʼa fakalaumālie. Neʼe kamata ai te ako Tohi-Tapu, pea ki muli mai neʼe fiafia ʼi tana ako te Tohi-Tapu ʼi te vāhaʼa fuli.
6 Ohage ko he meʼa ʼe tou loto ke tuputupu, peʼe ko te ʼu fisiʼi teu, pe ko te ʼu lauʼakau, peʼe ko te fia logo ki te logo lelei ʼo te Puleʼaga, ʼe ʼaoga ke tou gāueʼi. Ko te faʼahi ʼaia ʼe ʼaoga kiai te temi, te faiga mālohi, te tokaga, pea mo te fakatuʼutuʼu ʼaē ke hoko tuʼumaʼu atu tatatou gāue. ʼI te taʼu ʼaenī kua hili, ko te hahaʼi ʼaē neʼe kamata tūtū kiai te ʼu pulapula ʼo te Puleʼaga neʼe papitema ʼo fakalaka ʼi te tahi ki te tolu miliona! Kapau ʼe tou haga fai faka mafola, pea ʼe mahino papau ia, ʼe tou maʼu anai te hahaʼi tokolahi ʼe nātou fia fakalogo ki te logo ʼaē ʼe tou fakahā age kia nātou.—Vakaʼi ia Kalate 6:9.