Tou Haga Fai Tatatou ʼu Gāue Faka Teokalatike ʼi Te ʼu Temi Mālōlō
1 Mokā hoko mai te ʼu temi mālōlō, pea ʼe feala ai ke tou fai he ʼu gāue kehekehe. Ko te tokolahi ia tatou ʼe tou fia fakaʼaogaʼi te ʼu temi ʼaia moʼo fai he tahi ʼu meʼa pea mo mālōlō. Kae ʼe tonu ke tou tokakaga ʼo haga fai tatatou ʼu gāue faka teokalatike.−Filp. 3:16.
2 Kua koutou fakatuʼutuʼu koa ke koutou kau ki te Fakatahi Makehe ʼAho Tahi ʼo te taʼu ʼaenī? ʼE koutou ʼiloʼi koa he tahi ʼi tokotou kokelekasio ʼe ʼaoga ki ai he faʼahiga tokoni? ʼAki te agaʼofa ʼaia, ʼe tou lava maʼu ai he ʼu tapuakina.
3 Kapau ʼe maʼu hokotou temi, ohage ko te ʼu temi mālōlō ʼo te ako, kua koutou fakakaukauʼi koa ke lahi age takotou kau ki te minisitelio? Maʼa te tokolahi ʼe ko he faigamālie ke nātou pionie vaeluaʼi temi. ʼAki te selevisi ʼaia, neʼe nātou maʼu ai te tahi ʼu pilivilesio lahi ʼo ʼuhiga mo te gāue. ʼE feala ki te ʼu famili ke nātou maʼu he fiafia moʼoni, mokā ʼe nātou fakaʼaogaʼi honatou ʼu ʼaho katoa ki te minisitelio. Ei, ʼe feala koa ke koutou fakalahi age te temi ʼaē ʼe koutou fakaʼaogaʼi ki te fai faka mafola? ʼAki te ʼu temi lelei ʼaia pea mo loaloaga, ʼe feala ke tou tokolahi ʼi te fai faka mafola ʼi te ʼu afiafi.
4 ʼE koutou ʼolo anai koa ʼo mālōlō ʼi he tahi koga meʼa? Kapau ʼe hoko, ʼe koutou fakatuʼutuʼu koa ke koutou ʼolo ki te ʼu fono ʼo te koga meʼa ʼaia? ʼE koutou ʼolo anai koa ʼo fai faka mafola mo te ʼu tēhina ʼo te koga meʼa ʼaia? Ko te ʼu fakatuʼutuʼu ʼaia ʼi te ʼu ʼaho mālōlō, ʼe fakafiafia anai kia koutou pea mo ʼihi. (Loma 1:11, 12) Tahi ʼaē meʼa, ʼe feala ʼi takotou folau, ke koutou fai he fagonogono faigamālie. Koutou ʼave mo koutou hakotou Tohi-Tapu pea mo he ʼu tohi faka Tohi-Tapu. Koutou fakaʼaogaʼi he ʼu lakaga ʼo tokotou ʼu temi mālōlō moʼo lau pea mo ako te Tohi-Tapu. Koutou manatuʼi, tatau aipe peʼe ʼi ai he ʼu temi ʼe tou fia mālōlō ai, kae ʼe mole tou fia tuku tatatou tauhi ʼaē kia Sehova.
5 Ei, ʼe feala ke tou maʼumaʼua ʼi te ʼu temi mālōlō. Kae ʼe feala ki te ʼu fakafiafia ke nātou fakatupu kovi ki tatatou agamāhani lelei ʼaē ko te gāue ki te Puleʼaga. Tou fakaʼaogaʼi fakalelei te ʼu faigamālie ʼo te ʼu temi mālōlō. Tou fakamuʼamuʼa te ʼu meʼa fakalaumālie ʼaē ʼe fua lelei kia tatou, pea mo tou haga pipiki maʼu kiai.−Filp. 1:10.