Tou ʼUi Age Ki Te Hahaʼi Ke Natou Ako Te Tohi-Tapu
1. Koteā ʼaē ʼe tonu ke tou fai moʼo fakahoko ia te fakatotonu ʼa Sesu ʼaē iā Mateo 28:19, 20?
1 Neʼe fai mai e Sesu kiā tātou ia te fakatotonu ʼaē ke tou “fai ni ʼu tisipulo . . . , ʼo [tou] akoʼi ia nātou.” (Mat. 28:19, 20) Koia, ʼi te temi fuli pē, ʼe tou fia ʼui age ki te hahaʼi ke fai hanatou ako Tohi-Tapu, kae mole gata pē ʼi te ʼaho ʼo te vāhaʼa ʼaē kua fakatuʼutuʼu tāfito kiai. ʼE lagi ʼaoga anai kiā koutou ia te ʼu manatu ʼaenī ʼe hoa mai.
2. Ko ai ʼaē ʼe feala ke tou fakaafe ke natou ako te Tohi-Tapu?
2 Tou ʼUi Age Ki Te Hahaʼi Ke Natou Ako Te Tohi-Tapu: Kapau ʼe lahi tatatou ʼui age ki te hahaʼi ke natou ako te Tohi-Tapu, pea ʼe lahi anai ia te ʼu faigamālie ʼaē kā tou maʼu moʼo kamata he ako Tohi-Tapu. (Tnk. 11:6) Neʼe kua kotou ʼahiʼahi koa ʼo fehuʼi fakahagatonu age ki te hahaʼi ke fai hanatou ako Tohi-Tapu? Ko te kōkelekāsio ʼi Amelika neʼe faiga tāfito ke natou fai te faʼahi ʼaia lolotoga ia te māhina kātoa. Neʼe natou fiafia ʼaupitō ʼi tanatou kamata ia te ʼu ako Tohi-Tapu e 42! ʼAua naʼa kotou manatu ko te hahaʼi ʼaē ʼe kotou ʼaʼahi, kua natou ʼiloʼi ʼe kotou fai he ʼu ako Tohi-Tapu. Kā kotou toe ʼaʼahi te hahaʼi ʼaia, he koʼē ʼe mole kotou ʼui age kiā nātou ke fai hanatou ako Tohi-Tapu? Kapau ʼe natou fakafisi kiai, pea ʼe mole he meʼa ia ʼe kovi. Kae ʼe feala pē ke kotou hoko atu takotou tōkakaga ʼaē ʼo taupau fakalelei ia tana fia logo ki te logo lelei. Neʼe kua kotou kole age koa ki tokotou ʼu vāhaʼa fale, mo tokotou ʼu kāiga, mo tokotou ʼu kaugā gāue, pea mo tokotou ʼu kaugā ako peʼe natou fia ako ia te Tohi-Tapu mo koutou? ʼE feala ke kotou kole ki takotou kau ako Tohi-Tapu peʼe ʼi ai honatou ʼu kaumeʼa peʼe ko honatou ʼu kāiga ʼe natou fia ako ia te Tohi-Tapu.
3. Koteā te meʼa gāue ʼaoga ʼe tou maʼu moʼo kamata ʼaki ai he ʼu ako Tohi-Tapu, pea ko te temi fea ʼaē ʼe feala ai ke tou fakaʼaogaʼi ai?
3 Ko He Meʼa Gāue ʼe ʼAoga: Ko he meʼa gāue ʼe ʼaoga moʼo kamata ʼaki he ʼu ako Tohi-Tapu, ʼe ko te kiʼi pepa lotu ʼE Kotou Fia ʼIloʼi Koa Te Moʼoni? ʼE feala ke kotou foaki age ki te hahaʼi ʼaē ʼe kotou maʼu atu ki ʼonatou ʼapi mokā neʼe natou tali hanatou tohi peʼe kailoa. ʼE feala ke fakaʼaogaʼi ia te kiʼi pepa lotu ʼaia mokā kotou fai fakamafola ʼi te ʼu matani gāue, mokā kotou fai fagonogono ʼi te ala, mokā kotou faitohi ki he tahi, pea mokā kotou fai takotou ʼu ʼaʼahi. ʼE feala ke toe tuku ia te pepa lotu ʼaia ʼi te ʼu ʼapi ʼaē neʼe mole kotou maʼu atu he tahi kiai. He koʼē ʼe mole kotou toʼo he kiʼi pepa lotu mokā kotou toʼo te kā, mokā kotou faifakatau, pea mokā kotou gāue? ʼI te tuʼa pāsina ʼo te kiʼi pepa lotu, ʼe fakamahino fakanounou ai tatatou fai he ʼu ako Tohi-Tapu pea mo fakahā ai ia te tohi Te Ako Mai Te Tohi-Tapu.
4. Moʼo kamata ia he ako Tohi-Tapu, ʼe kotou lava fakaʼaogaʼi feafeaʼi te kiʼi pepa lotu ʼE Kotou Fia ʼIloʼi Koa Te Moʼoni?
4 ʼI takotou kua ʼosi foaki age ki he tahi hana kiʼi pepa lotu, ʼe feala ke kotou fai age ki ai te ʼu fehuʼi ʼaē ʼi te ʼuluaki pāsina pea mo kole fēnei age: “Ko te fehuʼi fea ʼaē ʼe lagi ke fia ʼiloʼi tona tali?” Pea kolua vakaʼi fakatahi ia te tali ʼaē ʼe tuʼu ʼi te kiʼi pepa lotu, pea mo kotou lau peʼe kotou talanoa fakanounou ki te tuʼa pāsina, ʼaē ʼe fakamahino ai tatatou fai ia te ako Tohi-Tapu. ʼE feala ai leva ke kotou fakahā age kiā ia peʼe lava feafeaʼi hana maʼu he tahi ʼu manatu ʼaki te tohi Te Ako Mai Te Tohi-Tapu, kotou foaki age hana tohi, pea kotou fai he ʼu fakatuʼutuʼu ke kotou toe liliu ki ai pea mo hoko atu ia te fai palalau.
5. He koʼē ʼe tonu ke tou ʼui age ki te hahaʼi ke natou ako te Tohi-Tapu?
5 ʼE kei tou maʼu ʼi tatatou telituale ia te hahaʼi ʼe natou loto ʼaupitō ke natou ʼiloʼi pe koteā ʼaē ʼe akoʼi moʼoni mai ʼi te Tohi-Tapu. Kapau ʼe tou ʼui age ki te hahaʼi ke fai hanatou ako Tohi-Tapu, pea ʼe toe lahi anai mo te ʼu faigamālie ʼaē ʼe tou maʼu ke tou fiafia ai ʼi te tokoni ki te hahaʼi ke natou haʼele ʼi te ala ʼaē ʼe ina taki ki te maʼuli.—Mat. 7:13, 14.