Kotou Haga Fai Ni Tisipulo
1. Kotea ʼae ʼe tonu ke fai e te hahaʼi ke haofaki ai natou?
1 ʼE ha ʼi te tanaki gaue ʼo te taʼu 2014 ia te faʼafai ʼa te hahaʼi ʼa te ʼAtua moʼo fakamafola te logo lelei ʼo te Puleʼaga. (Mat. 24:14) ʼUhi ko tatatou faifakamafola ʼi te ʼu ʼapi, mo kau ki te tufa ʼo te ʼu pepa lotu mo te ʼu pepa fakaafe pea mo tatatou faifakamafola faigamalie, ʼe tou maʼu ai he tokolahi ʼaki te logo ʼo te Tohi-Tapu ʼo laka age ʼi te ʼu temi ki muʼa atu. Kaʼe, ʼe tonu ke tou tokoni ki te hahaʼi ke natou liliu ko te ʼu tisipulo ʼa Sesu ʼaki tatatou ako te Tohi-Tapu mo natou, ke feala ai honatou haofaki.—1 Tim. 2:4.
2. Ko te ʼu fehuʼi fea ʼe feala ke tou fai kia tatou totonu ʼe tokoni mai anai ke tou kole ki he tahi pe ʼe feala ke fai hana ako Tohi-Tapu?
2 Kole Age Pe ʼe Feala Ke Fai Hana Ako Tohi-Tapu: Kapau ʼe fia logo he tahi, ʼe kotou faiga koa ke kotou maʼu tona tuʼasila ke feala ai hakotou toe liliu mai ki ai mo te fakatuʼutuʼu ʼae ke kamata he ako Tohi-Tapu? Ko ʼanafea ʼae neʼe kotou faiga ai ke kotou kamata he ako Tohi-Tapu ʼi he ʼuluaki faipalalau? Ko ʼanafea ʼae neʼe kotou kole ai kia natou ʼae ʼe kotou tufa tuʼumaʼu ki ai ʼakotou nusipepa ke fai hanatou ako Tohi-Tapu? ʼE kua kotou fakaha koa ki ʼokotou kaugā gaue, mo ʼokotou kaugā ako, mo ʼokotou vahaʼa fale, mo ʼokotou famili pea mo ʼihi atu ia te ʼu ʼata viteo He Ko ʼe ʼe Lelei Ke Ke Ako Te Tohi-Tapu?, ʼE Feafeaʼi Te Fai ʼo He Ako Tohi-Tapu? Moka kotou faifakamafola mo te laupapa, ʼe kotou faiga koa ke kotou fakaha kia natou ʼae ʼe natou toʼo he tohi ʼe feala ke fai hana ako Tohi-Tapu ʼe mole totogi?
3. Kotea ʼae ʼe tonu ke tou fai ke fua lelei ai tatatou akoʼi te moʼoni?
3 Te Tokoni Mai Ia Sehova Mo Sesu: ʼI tana kamata ia tana fakatotonu ʼae “fai ni tisipulo” ʼaki tana fakaʼaogaʼi te kupu “olo,” neʼe fakaha ai e Sesu ʼe tonu ke tou faiga pea mo fai he ʼu fakatuʼutuʼu. Neʼe mole ina tuku feiaʼi tatou kaʼe neʼe ina fakapapauʼi mai ʼe nofo anai mo tatou. (Mat. 28:19, 20) Pea tahi, neʼe foaki mai e Sehova tona laumalie maʼoniʼoni ʼo toe feia mo he ʼu meʼa gaue pea mo he ako ʼe ʼaoga kia tatou moʼo akoʼi ki te hahaʼi te moʼoni. (Sakl. 4:6; 2 Ko. 4:7) ʼE feala ke tou faikole ke ‘fakatupu ia tatou te fia fai mo te faʼafai’ moʼo fakahoko ia te gaue maʼuhiga ʼaia.—Filp. 2:13.
4. He koʼe ʼe tonu ke tou haga fai ni tisipulo?
4 ʼE lahi tatatou fiafia ʼi te fakamafola ʼo te logo lelei. Kaʼe, ʼe lahi age anai tatatou fiafia mo kapau ʼe tou akoʼi ki he tahi te moʼoni pea mo tokoni kia ia ke tou haʼele fakatahi ʼi “te ala ae e na taki ki te mauli.” (Mat. 7:14; 1 Tes. 2:19, 20) Pea ko te faʼahi ʼae ʼe maʼuhiga age, ko tatatou fakafiafiaʼi ia Sehova ʼi tatatou haga fai ni tisipulo koteʼuhi ʼe mole ina loto “ke mate he tahi, kae ke kaku fuli ki te fakahemala.”—2 Pet. 3:9.