Tou Foaki Ia Tatou ʼAki He Lotolelei
1 Neʼe fakakikite e te tagata fai pesalemo ko Tavite ko te hahaʼi ʼa Sehova “ ʼe nātou foaki anai ia nātou totonu ʼaki he lotolelei”; ko tona faka ʼuhiga ko he “ ʼu hahaʼi ʼe nātou foaki ia nātou totonu ʼaki tonatou loto faʼitaliha.” (Pes. 110:3, kiʼi nota ʼi te lalo pasina) ʼE mahino papau ia, ko te faʼahi ʼaia ʼe hoko ʼi te kautahi ʼo te ʼu tēhina ʼi te malamanei katoa. Lolotoga te ʼu taʼu gāue e fā ʼaē kua hili, neʼe gāueʼi e te hahaʼi ʼa Sehova te ʼu hola ʼe lauʼi miliale tupu ʼo faka mafola ia te logo lelei ʼo te Puleʼaga. Pea ʼe mole gata pe ʼi te fai faka mafola pea mo te fai ʼo ni ʼu tisipulo, ʼaē ʼe feala ai ke tou foaki fakamalotoloto ia tatou moʼo tokoni ki te hahaʼi.
2 Te ʼu Faʼahi ʼAē ʼe Feala Ke Tou Fakahā Ai Tatatou Lotolelei: Ko ʼihi ʼi te kokelekasio ʼe lagi ʼaoga kia nātou he tokoni ke feala hanatou ʼolo ki te ʼu fono. He koʼe ʼe mole koutou ʼave ia nātou? Ko ʼihi ʼe lagi ʼe mahahaki, peʼe vaivavai, peʼe tuku ʼi lopitali. ʼE feala koa ke koutou fai he ʼu fakatuʼutuʼu ke koutou ʼaʼahi ia nātou, peʼe koutou tokoni kia nātou ʼi he faʼahiga ʼaluʼaga? ʼE lagi ʼi ai he tahi peʼe ko he famili ʼe ʼaoga ke fakaloto mālohiʼi. Neʼe koutou manatuʼi koa ia nātou ʼaia ʼo koutou fakaafe ke nātou ʼōmai ʼo kau ki takotou ako faka famili? Ko he pionie peʼe ko he kaugā fai faka mafola ʼe lagi ʼaoga anai ke ʼi ai hona kaugā fagona ʼi te minisitelio. He koʼe ʼe mole koutou ʼui age ke koutou gāue fakatahi mo ia? ʼE ʼi ai te ʼu ʼaluʼaga ʼe feala ai ke tou foaki ia tatou ʼaki he lotolelei moʼo fai te meʼa ʼaē ʼe lelei kia nātou ʼaē ʼe kāiga mo tatou ʼi te tui.—Kal. 6:10.
3 ʼE feala ke fakahā e te ʼu tēhina tanatou lotolelei ke fakaʼaogaʼi nātou ʼi te kautahi ʼa Sehova, ʼo nātou faiga ke nātou mulimuli ki te ʼu meʼa ʼaē ʼe fakamaʼua ki te ʼu tēhina, mo kapau ʼe nātou fia liliu ko he ʼu tagata ʼāfea pea mo he ʼu tagata faifekau faka minisitelio. (1 Tim. 3:2-10, 12, 13; Tito 1:5-9) ʼI tatatou fakahaʼuhaʼu ʼo kaugamālie, ʼe ʼaoga ke ʼi ai he ʼu tēhina faiva, ʼe nātou lotolelei ke nātou takitaki te fai faka mafola pea mo te faiakonaki, pea mo nātou tauhi ki te ʼu kokelekasio.—1 Tim. 3:1.
4 Lagi ko ʼihi ia tatou ʼe feala ke lahi tanatou fakaʼaogaʼi tonatou temi ki te gāue ʼa Sehova, ʼo nātou toʼo te selevisi pionie vaeluaʼi temi ʼi ʼihi temi. Tahi ʼaē meʼa, ʼaki he ʼu fetogi fakapotopoto ʼi tatatou polokalama, ʼe feala ke hoholo atu tatatou pionie vaeluaʼi temi, peʼe tou pionie katoa. Ko totatou ʼu ʼaluʼaga takitokotahi, ʼe nātou faka fealagia koa ke tou ʼolo ki he telituale ʼe lahi ai te gāue ʼaē ʼe tonu ke fai? ʼE feala koa ke tou fakaʼaogaʼi totatou temi ki te gāue ʼo te Petele, pea ke tou kau ai ki te fakatuputupu ʼo te gāue ʼi te malamanei katoa? ʼE toe lahi foki mo te gāue ʼaē ʼe fai ʼo ʼuhiga mo te laga ʼo te ʼu Fale ʼo te Puleʼaga, te ʼu fale Fakatahi, pea mo te ʼu Filiale ʼi te malamanei, ʼaē ʼe ʼaoga kiai he kau gāue ʼe nātou lotolelei ʼo foaki ia nātou ki te faʼahi ʼaia. ʼE fai he fakamālo lahi kia nātou ʼaē ʼe nātou fakaʼaogaʼi tonatou temi ki te ʼu gāue lelei ʼaia, pea ʼe lahi te ʼu tapuakina ʼaē ʼe nātou maʼu!—Luka 6:38.
5 ʼE ko te ʼu temi fakafiafia ʼaenī. ʼAki tona laumālie, ʼe fakahoko e Sehova te gāue taulekaleka ʼi te kele ʼaki tana hahaʼi ʼaē ʼe nātou lotolelei ke nātou fai te gāue ʼaia! ʼI te temi ʼaē ʼe fakaafe ai e Sehova ʼaki tana kautahi, he tahi ʼu hahaʼi ke nātou ʼōmai ʼo kau ki te fakatuputupu ʼo te ʼu gāue ʼo te Puleʼaga, ʼe lagi lelei ke tou fai te fehuʼi ʼaenī kia tatou totonu, ‘ ʼE kei ʼau foaki koa ia ʼau ʼaki he lotolelei?’ Pea ʼe tonu ke tou vakaʼi fakalelei totatou loto pea mo totatou ʼu ʼaluʼaga takitokotahi. Ko tatatou pipiki ki te ʼAtua, ʼe ina uga fakavilivili anai tatou ke tou fai te ʼu meʼa fuli ʼaē ʼe feala ke tou fai ʼi te gāue taputapu, ʼo tou fakafiafia ʼaupito ai te loto ʼo Sehova!—Sof. 3:17.