Te Tali Ki ʼAkotou ʼu Fehuʼi

◼ Ka tou fai fagonogono ʼi te telefoni, ʼe tonu koa ke tou fakamahino te fakatuʼutuʼu ʼo te ʼu meʼa ʼofa?

Ka tou fai fagonogono ki he tahi, ʼe feala ke tou fakamahino age, ko te gāue faiako Tohi-Tapu ʼaē ʼe fai e te kau Fakamoʼoni ʼa Sehova ʼi te malamanei katoa, ʼe lagolago katoa ʼaki he ʼu meʼa ʼofa ʼe foaki ʼaki he lotolelei, pea ʼe tou tali lelei te ʼu meʼa ʼofa ʼaia. Kae ʼaua naʼa tou talanoa ki he meʼa ʼofa, peʼe ki te fakatuʼutuʼu ʼo ʼuhiga mo te ʼu meʼa ʼofa mokā tou fai fagonogono ʼi te telefoni, heʼe feala ke faka ʼuhiga hala, ʼo nātou manatu ʼe tou fakaʼaogaʼi te telefoni moʼo kole meʼa ʼofa. Kae ko te minisitelio ʼa te kau Fakamoʼoni ʼa Sehova ʼe mole fai ke maʼu ai he falā.—2 Ko. 2:17.

◼ Ka tou fai fagonogono ʼi te telefoni, koteā ʼaē ʼe tonu ke tou fai mo kapau ʼe kole mai e he tahi ke mole toe ʼolo age te kau Fakamoʼoni ʼa Sehova ki tona ʼapi?

ʼE tonu ke tou fakaʼapaʼapa ki tona loto. Tou tohi ʼi he pepa tona higoa, mo te ʼaho ʼaē neʼe ina kole mai ai te faʼahi ʼaia, ʼo tou fafaʼo te nota ʼaia ki te pepa ʼo te telituale ʼaē ʼe tuʼu ai tona ʼapi, ke ʼaua naʼa toe ʼolo te kau fai faka mafola ki tona ʼapi. Tuʼa tahi ʼi te taʼu, ʼe tonu ke toe vakaʼi te lisi ʼa te hahaʼi ʼaē neʼe nātou kole mai ke mole tou ʼolo age kiō nātou. ʼAki te takitaki ʼa te tagata taupau gāue, ʼe feala anai ke hinoʼi he ʼu kaugā fai faka mafola māhani, pea mo fakaʼeteʼete, ke nātou ʼolo ki te ʼu hahaʼi ʼaia moʼo ʼiloʼi peʼe kei nātou tapuʼi te ʼolo age ki tonatou ʼapi, peʼe kailoa.—Vakaʼi ʼi te alatike Te Tali Ki ʼAkotou ʼu Fehuʼi ʼi Te Minisitelio ʼo Te Puleʼaga Fakafalani ʼo Sanualio 1994.