Te ʼu Tonu
◼ Tufa ʼo Tesepeli: Te tagata ʼaē ʼe lahi tokotahi ʼo te ʼu temi fuli. Peʼe feala ke koutou tufa Te Tohi ʼo Te ʼu Hisitolia Faka Tohi-Tapu. Sanualio: Kapau ʼe kei maʼu ʼi te kokelekasio, pea koutou tufa he tohi e pasina 192 neʼe tā ʼi muʼa ʼo te taʼu 1988. Peʼe koutou tufa Te Tohi ʼo Te ʼu Hisitolia Faka Tohi-Tapu. Fepualio Pea Mo Malesio: Te ʼAtamai Mālama ʼAē ʼe Ina Taki Ki Te Maʼuli Heʼegata. ʼE faiga tāfito anai ke kamata he ʼu ako Tohi-Tapu.
◼ Ko te ʼu pepa fakaafe ki te ʼAho Fakamanatu ʼo te taʼu 2003 ʼi te lea tāfito ʼo te ʼu kokelekasio, kua vave momoli atu ki tokotou kokelekasio. Kapau ʼe ʼi ai he ʼu hahaʼi ʼo te tahi ʼu lea ʼi tokotou telituale, pea mo koutou fia fai ki he tahi ʼu pepa fakaafe ʼi te ʼu lea ʼaia, ʼe tonu ke koutou foimo fakaʼui ʼi te temi nei ʼi te Pepa Fakaʼui Tohi (S-14). Ko te ʼu pepa fakaafe ki te ʼAho Fakamanatu ʼe maʼu ʼi te Fakafalani, mo te Fakapilitānia, mo te Faka Pisilama pea mo te Fakaʼuvea. Koutou fakaʼui pe te ʼu pepa ʼaē ʼe ʼaoga ki tokotou telituale.
◼ Koutou tokagaʼi ko te ʼAho Fakamanatu ʼo te taʼu 2004 ʼe tō anai ʼi te ʼAhotapu, ʼaho 4 ʼo ʼApelili, ʼi te ʼosi tō ʼo te laʼā. ʼE fakahā fakatomuʼa atu ke feala ai ki te ʼu tēhina ke nātou tāʼofi peʼe vakaʼi he tahi atu ʼu Fale ʼo Te Puleʼaga mokā ʼe tokolahi te ʼu kokelekasio ʼe nātou fakaʼaogaʼi te Fale ʼo Te Puleʼaga pea ke maʼu ai he tahi ʼu fale. ʼE tonu ke ʼiloʼi papau e te kau tagata ʼāfea ʼe mole hoko anai he ʼu meʼa ʼi te fale ʼaia ʼe fakaleluʼi anai ki te fono, ke feala ke fai te ʼAho Fakamanatu ʼi te tokalelei pea mo fakaʼaluʼalu lelei tona fai. ʼUhi ko te maʼuhiga ʼo te ʼaho ʼaia, mokā filifili te tēhina ke ina fai te akonaki ʼo te ʼAho Fakamanatu, ʼe tonu anai ki te kolesi ʼo te kau tagata ʼāfea ke nātou filifili he tahi ʼi te ʼu tagata ʼāfea ʼe poto lelei, kae mole mulimuli ki he polokalama peʼe hinoʼi tuʼumaʼu te tēhina e tahi moʼo fai te akonaki ʼi te taʼu fuli. Kapau ko he tēhina ʼāfea poto ʼe kau ʼi te kau fakanofo ʼe feala ke ina fai te akonaki, pea ʼe tonu ke filifili te tēhina ʼaia.
◼ ʼE fai te fetogi ʼo ʼuhiga mo te Ako ʼo Te Minisitelio Faka Teokalatike ʼaē ka fakahoko anai ʼi te ʼaʼahi ʼo te tēhina taupau faka silikosikilipisio. ʼO kamata ʼi Sanualio 2003, hili te katiko pea mo te faikole, ʼe fai anai te ako lolotoga teitei minuta e 25. ʼE fai anai ia minuta e nima he akonaki ʼo ʼuhiga mo he kalitate ki te faiakonaki, pea ʼe minuta hogofulu anai ki te akonaki ʼaoga, pea minuta hogofulu anai ki te ʼu puani maʼuhiga ʼo te Tohi-Tapu. ʼE mole fai anai te akonaki 2, mo te akonaki 3, pea mo te akonaki 4. ʼE hoa anai ki te ako ia te Fono Gāue lolotoga te vaeluaʼi hola. Hili te katiko, pea ʼe tuku anai ki te tēhina taupau faka silikosikilipisio he vaeluaʼi hola ki tana akonaki, pea hoa kiai te katiko fakaʼosi pea mo te faikole.
◼ ʼI te Fono Gāue ʼo te vāhaʼa ʼo te ʼaho 6 ʼo Sanualio, ʼe tufa anai kia nātou fuli ʼaē kua papitema te kiʼi kate Instructions médicales prévisionnelles/Décharge pea mo te Document dʼidentité médical maʼa nātou liliki.