ʼE Faka ʼĀteainaʼi Tatou e Te Moʼoni
1 ʼI te tahi lakaga, neʼe ʼui fēnei e Sesu ki te kau Sutea ʼaē neʼe tui kia te ia: “E koutou iloi anai te mooni, pea e fakaateaina anai koutou e te mooni.” (Soa. 8:32) Neʼe palalau ʼo ʼuhiga mo he ʼāteaina ʼe lahi age ʼi te ʼāteaina ʼaē ʼe tou maʼu ʼi te mālama, ko he ʼāteaina ʼe feala ke tou maʼu e tatou fuli—peʼe tou koloaʼia peʼe tou māsisiva, peʼe tou popoto peʼe kailoa. Neʼe akoʼi e Sesu te moʼoni ʼaē ʼe ina foaki anai te ʼāteaina mai te maʼuli popūla ki te agahala pea mo te mate. Ohage ko tana fakamahino e Sesu, “ko ae e ina fai te agahala, e popula ia ki te agahala.” (Soa. 8:34) E mahino ia ʼe tou fakaʼamu ki te temi ʼaē ka maʼu anai e te hahaʼi fakalogo fuli ia te “ ʼāteaina . . . mai te popūla ki te maumau pea [mo] . . . te ʼāteaina faka kolōlia ʼo te fānau ʼa te ʼAtua.”—Loma 8:21, MN.
2 Ko te moʼoni ʼo ʼuhiga mo Sesu pea mo tona tuʼulaga ʼi te fakahoko ʼo te fakatuʼutuʼu ʼa te ʼAtua ʼe ina foaki te ʼāteaina ʼaia. ʼE kau kiai te ʼatamai mālama ʼo ʼuhiga mo te sakilifisio faitotogi ʼaē neʼe ina foaki maʼa tatou. (Loma 3:24) ʼI te temi nei, ko te tali pea mo te fakalogo lelei ki te moʼoni ʼa te Tohi-Tapu, ʼe feala ai ke tou maʼu he faʼahiga ʼāteaina mai te mataku, te heʼe ʼamanaki, pea mo te tahi atu ʼu aga ʼe kovi.
3 Te ʼĀteaina Mai Te Mataku Pea Mo Te Heʼe ʼAmanaki: ʼE mole tonu ke tou lotomamahi ʼo ʼuhiga mo te ʼu ʼaluʼaga ʼo te mālama, heʼe tou mahino pe koʼe ʼe hoko te agakovi pea ʼe tou ʼiloʼi ka vave pulihi anai ʼi te kele. (Pes. 37:10, 11; 2 Tim. 3:1; Apk. 12:12) Pea tahi ʼaē meʼa, ko te moʼoni ʼe ina faka ʼāteaina tatou mai te ʼu akonaki hala ʼo ʼuhiga mo te ʼaluʼaga ʼo te kau mate. ʼE tou ʼiloʼi ʼe mole feala ki te kau mate ke nātou fai mai he meʼa ʼe kovi, ʼe mole nātou mamahi ʼo heʼegata ʼi te afi, pea ʼe mole toʼo e te ʼAtua te hahaʼi ke nātou nonofo mo ia ʼi selo.—Tnk. 9:5; Gaue 24:15.
4 Neʼe tokoni e te ʼu moʼoni ʼaia ki te taumatuʼa neʼe mate tanā toe ʼi te fakaʼī. Neʼe ʼui fēnei e te faʼe: “ ʼE mole ʼi ai he tahi ʼe feala ke ina fetogi tamā tama, ʼo aʼu ki tamā toe sisio kia ia ʼi te fakatuʼuake. Kae ʼe ma ʼiloʼi ko te lotomamahi ʼaē ʼe tau mo māua, ʼe faka temi pe ia.”
5 Te ʼĀteaina Mai Te ʼu Aga Kovi ʼe Fakatupu Tuʼutāmaki: Ko te moʼoni ʼa te Tohi-Tapu ʼe feala ke ina fetogi te fakakaukau pea mo te agaaga ʼa he tahi, ʼo feala ai ke hāo mai te ʼu fihifihia. (Ef. 4:20-24) Ko te agatonu pea mo te faʼa gāue ʼe feala ke tokoni ke fakamaʼamaʼa te masiva. (Taag. 13:4) Ko te fakahā ʼo te ʼofa faka sakilifisio ʼe hikihiki ai tatatou ʼu felogoi mo te hahaʼi. (Kol. 3:13, 14) Ko te fakaʼapaʼapa ki te pule ʼe ina fakasiʼisiʼi te ʼu fihifihia faka famili. (Ef. 5:33–6:1) Ko tatatou tekeʼi te ʼinu fakavalevale, mo te ʼu felāveʼi fakasino heʼeʼaoga, mo te suluka, pea mo te toloke ʼe tou hāo ai mai te ʼu mahaki.—Taag. 7:21-23; 23:29, 30; 2 Ko. 7:1.
6 Ko te tūpulaga neʼe mole feala ke ina fakagata tana palu ki te toloke talu mai taʼu e hiva. ʼI te tahi ʼaho, neʼe felāveʼi mo te tuagaʼane neʼe lolotoga fai faka mafola ʼi te ala. Neʼe ina tali te tohi, pea neʼe fai he ʼu fakatuʼutuʼu ke ʼaʼahi ia ia ki tona ʼapi. Neʼe kamata tana ako Tohi-Tapu. Hili māhina e lua neʼe mole kei palu e te tūpulaga ki te toloke, pea hili māhina e valu ʼo tana ako, neʼe papitema. ʼI tanā sisio ʼaē ki tana līaki tana toloke, neʼe uga ai tona tēhina mo tona holotuʼa ke nā ako te Tohi-Tapu.
7 Tou Tokoni Ki Te Hahaʼi Ke Nātou Maʼu Te ʼĀteaina: Ko nātou ʼaē neʼe maʼuli popūla fualoa ʼi te ʼu akonaki hala ʼe lagi faigataʼa kia nātou hanatou mahino ki te ʼāteaina ʼaē ʼe foaki e te Folafola ʼa te ʼAtua. Ke malave ki tonatou loto ʼe lagi tonu kia ia ʼaē ʼe ina fai te ako ke faiga lahi pea mo teuteu lelei. (2 Tim. 4:2, 5) ʼE mole ko te temi ʼaenī ke vaivai tatatou gāue ʼaē ko te ‘faka mafola te ʼāteaina kia nātou ʼe pilisoni.’ (Isa. 61:1) ʼE maʼuhiga ʼaupito te ʼāteaina faka Kilisitiano. Kapau ʼe tou maʼu te ʼāteaina pea ʼe tou toe maʼu mo te maʼuli heʼegata.—1 Tim. 4:16.