Fakamanatu ʼo Te Ako ʼo Te Minisitelio Faka Teokalatike
Ko te ʼu fehuʼi ʼaenī, ʼe vakaʼi anai ʼi te fai palalau ʼo te fakamanatu ʼo te Ako ʼo Te Minisitelio Faka Teokalatike lolotoga te vāhaʼa ʼaē ʼe kamata ʼi te ʼaho 27 ʼo ʼOketopeli 2003. Ko te tagata taupau ʼo te ako ʼe ina fai anai te fakamanatu ia minuta e 30, ʼo fakatafito ki te ʼu akonaki ʼaē neʼe vakaʼi ʼi te ʼu vāhaʼa ʼo te ʼaho 1 ʼo Sepetepeli ʼo aʼu ki te ʼaho 27 ʼo ʼOketopeli 2003. [Nota: Ko te ʼu fehuʼi ʼaē ʼe mole tuʼu ai he tohi ke vakaʼi, ʼe koutou fai anai e koutou totonu hakotou ʼu kumi moʼo maʼu te ʼu tali.—Vakaʼi te tohi École du Ministère pp. 36-7.]
HE KALITATE KI TE FAIAKONAKI
1. Koteā te faka ʼuhiga ʼo te tokoni ʼaē ʼe ʼui ia 1 Timoteo 2:9 ke tou ‘teuteu lelei,’ pea koteā tona ʼaoga kia tatou mokā tou fai hatatou akonaki mai muʼa, peʼe ka tou fai faka mafola? [be p. 132 pal. 4-5]
2. Ko te ʼu pelesepeto faka Tohi-Tapu ʼaē ʼe tou maʼu ia 1 Soane 2:15-17, mo Efeso 2:2, pea mo Loma 15:3 ʼe tokoni feafeaʼi mai ki tatatou faʼahiga teuteu? [be p. 133 pal. 2-4]
3. He koʼe ʼe maʼuhiga ke tou lolomi tatatou mataku, pea ʼe tou lava fakahoko feafeaʼi te faʼahi ʼaia mokā tou fai akonaki peʼe mokā tou kau ki te fai faka mafola? [be p. 135 kiʼi talanoa; p. 136 pal. 5, kiʼi talanoa]
4. ʼUhi ko Sesu neʼe ko “te Fakamooni Agatonu mo Mooni,” neʼe koteā te faʼifaʼitaki ʼaē neʼe ina tuku mai kia tatou ʼi te fakaʼaogaʼi ʼo te Tohi-Tapu ʼi te minisitelio? (Apokalipesi 3:14) [be p. 143 pal. 2-3]
5. Koteā ʼaē ʼe tonu ke tou fai ke toe lahi age tatatou popoto ʼi te fakaʼaogaʼi ʼo te Tohi-Tapu? (Tito 1:9) [be p. 144 pal. 1, kiʼi talanoa]
AKONAKI N° 1
6. Koteā te faka ʼuhiga ʼo te ako, pea koteā ni ʼu fua lelei ʼe tou maʼu mo kapau ʼe tou ako tuʼumaʼu te Folafola ʼa te ʼAtua? [be p. 27 pal. 3; p. 32 pal. 3]
7. ʼO mulimuli kia Sakopo 1:5, 6, koteā ʼaē ʼe maʼuhiga mokā tonu ke tou fai he tonu ʼe maʼuhiga? [w01 1/9 p. 28 pal. 4]
8. Koteā te faka ʼuhiga ʼo te ʼu taʼu maʼuhiga ʼaupito pea he koʼe ʼe nātou maʼuhiga ʼaupito? [si p. 282 pal. 27]
9. He koʼe ʼe ʼui “ko ʼaē ʼe ina fai he ʼu palalau kovi ʼe vale ia”? (Taag. 10:18) [w01 15/9 p. 25 pal. 3]
10. ʼI te mālama foʼou, ʼe lava mahino feafeaʼi anai te hahaʼi ʼi hona ʼaluʼaga ʼe lahi age, ki te sio ʼa Sehova ʼo ʼuhiga mo te temi? [si p. 283 pal. 32]
LAU ʼO TE TOHI-TAPU
11. Moʼoni Peʼe Hala: Ia 1 Kolonito 2:9, ʼe talanoa te ʼapositolo ko Paulo ki te ʼu meʼa ʼaē neʼe teuteuʼi e Sehova ohage ko he tōfiga maʼa te hahaʼi agatonu. Koutou fakamahino. [ip-2 p. 366 kiʼi talanoa]
12. Koteā te ʼu fakahala ʼaē ʼe faka ʼuhiga kiai ia 1 Kolonito 10:13, pea e feafeaʼi te foaki mai e Sehova “he puleʼaki”? [w91 1/10 pp. 10-11 pal. 11-14]
13. ʼE malave feafeaʼi ki te kau Kilisitiano te loto fia foaki ʼa Sesu? (2 Ko. 8:9) [w92 15/1 p. 16 pal. 10]
14. Neʼe liliu feafeaʼi te Lao ko he “tagata faiako ʼe ina taki tatou kia Kilisito”? (Kal. 3:24, MN ) [w02 1/6 p. 15 pal. 11]
15. Koteā “te ʼu meʼa tāfito ʼo te malamanei” ʼaē ʼe tonu ke tou tokakaga kiai ke mole tou hēʼia? (Kol. 2:8, MN )