ʼE Tou Lava Tokoni Feafeaʼi Ki Te ʼu ʼOhoana ʼAē ʼe Mole ʼi Te Moʼoni?
1 ʼE lahi te ʼu kaugana ʼa Sehova, ko tonatou ʼu ʼohoana ʼe ko he ʼu hahaʼi ʼe nātou agalelei ki te ʼu tēhina mo tuagaʼane, pea mo nātou tali lelei te kokelekasio, kae ʼe mole nātou fia liliu ko he ʼu kaugana ʼa te ʼAtua. Neʼe ʼui fēnei e te tagata ʼohoana neʼe mole ʼi te moʼoni: “Neʼe mole ʼau fia ʼalu ʼo fai faka mafola ʼi te ʼu ʼapi.” Ko ʼihi, e lagi tonu ke nātou lītuʼa ki he ʼu aga ʼe mole ʼalutahi mo te Tohi-Tapu, peʼe lagi nātou manatu ʼe mole feala anai ke nātou mulimuli ki te polokalama faka teokalatike ʼo tonatou ʼohoana. ʼE tou lava tokoni feafeaʼi kia nātou?
2 Tou ʼOfa Kia Nātou: E lagi feala ke nātou tali te moʼoni ʼa te Tohi-Tapu, mokā tou ʼoʼofa kia nātou pea mo tou fia ʼiloʼi te ʼu meʼa ʼaē ʼe nātou tuʼania kiai. (Filp. 2:4) Ko nātou ʼaē ʼi te temi nei kua nātou tauhi fakatahi mo tonatou ʼohoana, ʼe nātou tau ʼui neʼe tupu ko te agalelei ʼaē neʼe fai age kia nātou e te ʼu tēhina mo tuagaʼane. Neʼe ʼui fēnei e te tagata ʼohoana ʼaē neʼe tou talanoa ki ai ʼi te kamata: “Ko José, te tagata ʼāfea ʼo te kokelekasio, neʼe haʼu ʼo mā fai palalau. ʼE ʼau mahalo neʼe ko tana fakaloto mālohi ʼaē neʼe tupu ai taku fia ako fakamalotoloto.” Ko te tahi tagata ʼohoana ʼe ina manatuʼi, ko te ʼu tēhina ʼaē neʼe nātou ʼaʼahi ia ia, neʼe nātou faigaʼi ke nātou palalau ki te ʼu meʼa ʼaē ʼe ina leleiʼia. Neʼe ina ʼui fēnei: “Neʼe kamata fetogi ʼosi ai taku manatu ʼo ʼuhiga mo te lotu ʼo [taku ʼohoana]. Ko tona ʼu kaumeʼa neʼe ko he ʼu hahaʼi popoto, neʼe feala hamatou palalau ki he ʼu faʼahi kehekehe.”—1 Ko. 9:20-23.
3 He ʼu Gāue Moʼo Tokoni Kia Nātou: Ko te ʼu ʼohoana ʼaē ʼe mole ʼi te moʼoni, ʼe lava malave kia nātou te tokoni ʼofa ʼaē ʼe fai age kia nātou. (Taag. 3:27; Kal. 6:10) ʼI te tahi ʼaho, neʼe mole kei haʼele te motokā ʼa te tagata ʼe mole ʼi te moʼoni, pea neʼe ʼalu te tūpulaga Fakamoʼoni ʼo tokoni ki ai ki tona toe gaohi. ʼE ina ʼui fēnei: “Neʼe malave ʼaupito kia ʼau.” Ko te tahi tēhina, neʼe tokoni ʼi te ʼaho katoa ki te ʼohoana ʼa te tuagaʼane ʼe mole ʼi te moʼoni, moʼo fakatuʼu te ʼā ʼi tona malaʼe. Neʼe tupu ai hanā ʼu felogoi lelei, ʼi tanā gāue pea mo tanā fai palalau. Hili kiai vāhaʼa e lua, pea haʼu te tagata ki te tēhina ʼo ʼui fēnei: “Kua tonu ke ʼau fetogi toku maʼuli. ʼE ke fia fai haku ako Tohi-Tapu?” Neʼe tuputupu vave ʼi te moʼoni pea ʼi te temi nei kua papitema.
4 ʼI tatatou kumi te hahaʼi ʼaē ʼe tau mo feʼauga ʼi totatou telituale, tou haga faiga ke tou tokoni ki te ʼu ʼohoana ʼaē ʼe mole ʼi te moʼoni, ʼo totatou ʼu tēhina mo tuagaʼane.—1 Tim. 2:1-4.