Polokalama ʼo Te ʼu Fono Gāue

Vāhaʼa ʼo te ʼaho 12 ʼo Sanualio

Katiko 224

10 min: Te ʼu Logo. Te ʼu Tonu. ʼAki te ʼu manatu ʼo te pasina 4, fai he ʼu faʼifaʼitaki ki te tufa ʼo Te Tule Leʼo ʼo te ʼaho 15 ʼo Sanualio pea mo te Réveillez-vous ! ʼo te ʼaho 22 ʼo Sanualio. ʼI te ʼu faʼifaʼitaki ʼaia, ʼe tonu ke tufa lualua te ʼu nusipepa, tatau aipe peʼe ko he nusipepa pe e tahi ʼaē ʼe koutou fakahā. ʼOsi ʼaia, pea koutou fakahā lelei te ʼu puani ʼaoga ʼo te ʼu faʼifaʼitaki ʼaia.

15 min: “Te Lelei ʼAupito ʼo Te Poto Fakaʼatua.”a Kapau ʼe maʼu he temi, koutou fakaafe te nofoʼaki ke nātou fakamatala te ʼu vaega.

20 min: Neʼe Tou Fiafia ʼi Te ʼu Tohi Foʼou. Ko te fai palalau mo te nofoʼaki. Neʼe tou fiafia ʼi te ʼu tohi foʼou e lua ʼaē neʼe tufa mai ʼi te Fakatahi Faka Tisitilike “Koutou Faka Kolōlia Ki Te ʼAtua.” ʼI te ʼu tohi faka Tohi-Tapu fuli ʼaē kua tou maʼu, ʼe mole he fakatatau mo te tohi “ Voyez le bon pays ”. Ka koutou fuli te ʼu pasina, ʼe koutou sio anai ki te ʼu paki kehekehe ʼo te Kele ʼo Te Fakapapau. Koutou talanoa ki he ʼu agaaga ʼo te ʼu mape. Koutou fakahā he ʼu faʼahi ʼe tou lava fakaʼaogaʼi lelei ai te tohi ʼaia. Ko te tohi Écoute le Grand Enseignant ʼe tokoni ki tatatou ʼu fānau ke lelei tonatou maʼuli fakalaumālie. Koutou talanoa ki he ʼu puani ʼe tuʼu ai pea mo ʼaoga ki totatou temi, ʼo koutou fakahā tona ʼaoga ki te ʼu mātuʼa pea mo tanatou ʼu tamaliki. Koutou kole age ki te nofoʼaki ke nātou fakamatala atu tanatou fakaʼaogaʼi lelei te ʼu tohi foʼou ʼaia.

Katiko 19 pea mo te faikole fakaʼosi.

Vāhaʼa ʼo te ʼaho 19 ʼo Sanualio

Katiko 66

5 min: Te ʼu logo.

10 min: Te Tali Ki ʼAkotou ʼu Fehuʼi. Ko he akonaki ʼe fai e he tagata ʼāfea.

15 min: Ko he akonaki ʼe ʼaoga ki te kokelekasio.

15 min: “ ʼE Tou Lava Tokoni Feafeaʼi Ki Te ʼu ʼOhoana ʼAē ʼe Mole ʼi Te Moʼoni?”b Koutou vakaʼi fakatomuʼa mo he tokotahi peʼe ko he toko lua kua nā liliu ko he ʼu kaugana ʼa Sehova, ʼuhi ko te faʼifaʼitaki lelei ʼo tonā ʼu ʼohoana ʼaē neʼe nā ʼuluaki tali te moʼoni.

Katiko 138 pea mo te faikole fakaʼosi.

Vāhaʼa ʼo te ʼaho 26 ʼo Sanualio

Katiko 158

12 min: Te ʼu logo. Lau ʼo te falā. Fakamanatuʼi ki te kau fai faka mafola ke nātou ʼaumai tanatou ʼu kiʼi pepa tānaki gāue ʼo Sanualio. ʼAki te ʼu manatu ʼo te pasina 4, fai he ʼu faʼifaʼitaki moʼo fakahā Te Tule Leʼo ʼo te ʼaho 1 ʼo Fepualio, pea mo te Réveillez-vous ! ʼo te ʼaho 8 ʼo Fepualio. ʼI te ʼu faʼifaʼitaki ʼaia, ʼe tonu ke tufa lualua te ʼu nusipepa, tatau aipe peʼe ko he nusipepa pe e tahi ʼaē ʼe koutou fakahā. ʼI he faʼifaʼitaki e tahi, koutou fakahā peʼe feafeaʼi hakotou tufa te ʼu nusipepa ki he vāhaʼa fale.

15 min: Koutou Maʼuliʼi Te Folafola ʼa Te ʼAtua ʼi Te ʼAho Fuli. Ko he akonaki pea mo he fai palalau mo te nofoʼaki. Koutou fakaloto mālohiʼi te kokelekasio ke nātou fakaʼaogaʼi lelei te kiʼi kaupepa Tou Vakaʼi Te Tohi-Tapu ʼi Te ʼAho Fuli​—2004. Koutou fai palalau ki te ʼu ʼuluaki palalau, ʼi te pasina 3 mo te 4. Koutou fakafehuʼi ki te nofoʼaki, peʼe ko te temi fea ʼaē ʼe nātou leleiʼia ai te vakaʼi ʼo te koga tohi ʼo te ʼaho. Koutou fai palalau mo te kokelekasio ki te koga tohi ʼo te ʼaho pea mo tona fakamatala. Koutou kole age kia nātou ke nātou fakahā te ʼu manatu ʼo te koga tohi ʼaē ʼe feala ke nātou maʼuliʼi. Koutou fakaloto mālohiʼi te nofoʼaki katoa, ke nātou vakaʼi fakanounou ʼi te ʼaho fuli peʼe feafeaʼi hanatou maʼuliʼi te koga tohi ʼo te ʼaho.

18 min: Koutou Fakakaumeʼa Mo Takotou ʼu Tēhina Mo Tuagaʼane. (Taag. 18:24; 27:9) Ko he akonaki pea mo he fai palalau ʼe fakatafito ki Te Tule Leʼo ʼo te ʼaho 1 ʼo Tesepeli 2000, ʼi te pasina 22 ki te 23. ʼI te ʼu tapuakina ʼo te tauhi moʼoni, ʼe ʼi ai te fealagia ʼaē ke tou maʼu hatatou ʼu kaumeʼa moʼoni. ʼE tou maʼu he ʼu fakaloto mālohi, mokā tou fakakaugā mo totatou ʼu tēhina mo tuagaʼane ʼi te ʼu fono, ʼi te fai faka mafola, pea mo te tahi ʼu lakaga. Koteā ʼaē ʼe tonu ke tou fai ke feala hatatou maʼu he ʼu kaumeʼa ʼi te kokelekasio? Vakaʼi te talanoa “Ko Faʼahi e Ono Ke Tologa Ai Takotou Fakakaumeʼa,” ʼo fakaafe te nofoʼaki ke nātou fakamatala peʼe feafeaʼi hatatou maʼuliʼi te ʼu puani ʼaia ʼi tatatou ʼu felogoi fakatautehina.

Katiko 106 pea mo te faikole fakaʼosi.

Vāhaʼa ʼo te ʼaho 2 ʼo Fepualio

Katiko 204

10 min: Te ʼu logo. Koutou talanoa ki te tufa ʼo Fepualio. Moʼo tufa te tohi Te ʼAtamai Mālama, vakaʼi he faʼifaʼitaki e tahi ʼi te ʼu faʼifaʼitaki ʼaē ʼe tuʼu ʼi te pepa ʼaē ʼe ʼalutahi mo Te Minisitelio ʼo Te Puleʼaga ʼo Sanualio 2002, ʼi te pasina 5.

20 min: “Koutou Tokaga ʼo Fakaʼaogaʼi Lelei Tokotou Temi.”c Koutou fakaafe te nofoʼaki ke nātou fakahā te ʼu meʼa ʼaē ʼe nātou fai ke mole fakatupu kovi te ʼu meʼa ʼaē mole maʼuhiga ki tonatou ʼu maʼua fakalaumālie.

15 min: Koutou Faʼifaʼitaki Ia Paulo ʼAē Neʼe Faʼifaʼitaki Kia Kilisito. (1 Ko. 11:1) Ko he fai palalau mo te nofoʼaki. Ohage ko Sesu, neʼe fakaʼaogaʼi e Paulo te ʼu faigamālie fuli moʼo fagonogono ki ‘te hahaʼi ʼi te potu fuape.’ (Gaue 17:17) Koteā te ʼu faigamālie ʼaē ʼe koutou maʼu ʼi tokotou telituale? Ko ai ʼaē ʼe tou felāveʼi mo nātou mokā tou ʼolo ki he fale koloā, mokā tou ʼi te gāue peʼe ko te faleako, peʼe ʼi te ʼu kā? Ko ai ʼaē ʼe tou lava fagonogono ki ai mokā tou nonofo ʼi totatou ʼapi? Koutou fakaafe te nofoʼaki ke nātou fakamatala he ʼu faʼifaʼitaki ʼi tanatou fagonogono ki te hahaʼi ʼaē neʼe nātou felāveʼi mo nātou ʼi te ʼu gāue ʼo te ʼaho fuli.

Katiko 151 pea mo te faikole fakaʼosi.

[Kiʼi nota]