Tou Faʼa Kātaki ʼi Te Fai Faka Mafola
1 ʼE tou māʼuʼuli nei ʼi te ʼu temi faigataʼa. ʼI te ʼaho fuli ʼe ʼi ai te fenua ʼe tau, mo te fetauʼaki ʼa te ʼu hahaʼi ʼuhi heʼe nātou lanu kehekehe, mo te ʼu tuʼutāmaki ʼaē ʼe feala ke hoko mai ki te kele, ohage ko te hake ʼo te tai, pea mo te tahi ʼu meʼa fakamataku. ʼE ʼaoga ʼaupito he logo lelei ki te malamanei. Kae tokolahi ʼe mole nātou leleiʼia te ʼu meʼa fakalaumālie. ʼI ʼihi koga meʼa, ʼe lagi maʼu gataʼa te hahaʼi ʼi tonatou ʼu ʼapi pea mo toe faigataʼa tāfito te maʼu ʼo he tahi ʼe fia logo peʼe ina fia ako te Tohi-Tapu. Logola te ʼu faʼahi ʼaia, kae ʼe maʼuhiga ke tou faʼa kātaki ʼi te faka mafola ʼo te logo lelei ʼo te Puleʼaga ʼa te ʼAtua, ʼaē kua fakatuʼu.—Mat. 24:14.
2 Tou ʼOʼofa Ki Te Hahaʼi: Ko tatatou fai faka mafola, ʼe ko he fakahā ʼaia ʼo te ʼofa ʼo Sehova ki te hahaʼi. “E mole loto ia ke mate niʼihi, kae ke tafoki te tagata fuape o fakahemala.” (2 Pet. 3:9; Esk. 33:11) Koia neʼe ina fakatotonu ai, ohage ko tona ʼui e Sesu, “e maua muà ke fagonogono te evaselio ki te atu puleaga.” (Mko. 13:10) ʼE kole e te ʼAtua ki te hahaʼi ke nātou maliu kiā te ia ke feala hanatou hāo ʼi te fakamāu ʼaē ka hoko ki te malamanei ʼa Satana. (Soe. 2: 28, 29, 32; Sofo. 2:2, 3) ʼE mole tou loto fakafetaʼi koa kiā Sehova, ʼi tana foaki mai te fealagia ʼaia kiā tatou?—1 Tim. 1:12, 13.
3 ʼE hā ʼi te tānaki gāue ʼaē neʼe fai ʼi te malamanei lolotoga te taʼu 2004, ko teitei ako Tohi-Tapu e 6 085 387 neʼe fai ʼi te māhina fuli, pea ko te ʼu tisipulo foʼou e teitei toko 5 000 neʼe papitema ʼi te vāhaʼa fuli! Ko ʼihi ʼi te ʼu tisipulo foʼou ʼaia neʼe maʼu koteʼuhi neʼe tapuakina e Sehova te faʼa kātaki ʼa te kau fai faka mafola, ʼaē neʼe nātou faiga ke nātou palalau mo te hahaʼi fuli ʼi tonatou telituale. ʼE ko he toe fiafia lahi neʼe maʼu ʼi te ʼu kokelekasio, pea ʼe ko he pilivilesio lahi hatatou kaugā gāue mo te ʼAtua ʼi te gāue ʼaia ʼaē ʼe ina hāofaki te maʼuli ʼo te hahaʼi!—1 Ko. 3:5, 6, 9.
4 Tou Faka Kolōliaʼi Te Huafa ʼo Te ʼAtua: ʼE tou faʼa kātaki ʼo fai faka mafola ke feala hatatou faka kolōliaʼi ia Sehova iā muʼa ʼo te hahaʼi, pea mo tāpuhā tona huafa ʼi te malamanei kātoa. (Hep. 13:15) Ko Satana ʼe ina fakahēʼi “te malama-nei katoa” ke ʼaua naʼa nātou tui ko te ʼAtua ʼe feala hana fakatokatoka te ʼu fihifihia ʼo te malamanei, peʼe ke ʼaua naʼa nātou tui ʼe tokaga ia ki te ʼu mamahi ʼo te hahaʼi, peʼe ke ʼaua naʼa nātou tui ʼe maʼuli moʼoni. (Apk. 12:9) ʼAki tatatou fai faka mafola, ʼe tou fakahā ai te moʼoni ʼo ʼuhiga mo tatatou Tāmai fakatalakitupua ʼaē ʼi selo. ʼOfa pe ke tou haga faka kolōliaʼi tona huafa, ʼi te temi nei pea ʼo talu ai.—Pes. 145:1, 2.