Tou Haga Fai Faka Mafola!
1 ʼE ko te finegalo ʼo te ʼAtua “ke fakamauli te tagata fuape, pea ke natou kaku ki te iloi o te mooni.” (1 Tim. 2:4) Ko te tupuʼaga la ʼaia ʼo tana tuku mai te gāue ʼaē ko te faka mafola ʼo te logo lelei. (Mat. 24:14) Kapau ʼe tou mahino ki te tupuʼaga ʼo tatatou haga fai faka mafola, pea ʼe mole tou līaki anai te gāue ʼaia tatau aipe pe tou lotovaivai peʼe lagi fakaleluʼi tatou.
2 He Koʼe ʼe Tonu Ke Tou Haga Fai? ʼI te mālama ʼe lahi te ʼu meʼa ʼe nātou fakaleluʼi te hahaʼi, ʼo nātou galoʼi peʼe mole nātou tokagaʼi te ʼu meʼa ʼaē ʼe tou tala age. Koia ʼe tonu ke tou haga fakahā kia nātou te logo ʼaē neʼe tuku mai e te ʼAtua ʼo ʼuhiga mo te hāofaki. (Mat. 24:38, 39) Tahi ʼaē meʼa, ʼe fetogi tuʼumaʼu te maʼuli ʼo te hahaʼi. Pea ʼe feala ke fetogi fakapunamaʼuli mo te ʼu ʼaluʼaga ʼo te mālama. (1 Ko. 7:31) ʼE feala pe, ʼi te ʼapogipogi, ʼi te vāhaʼa ka haʼu, peʼe ʼi te māhina ka haʼu, ke hoko he ʼu fihifihia peʼe ko he ʼu tuʼania foʼou ki te hahaʼi ʼaē ʼe tou faka mafola ki ai, ʼo tupu ai hanatou fia fakalogo ki te logo lelei. ʼE mole koutou loto fakafetaʼi koa ki te faʼa kātaki ʼo te Fakamoʼoni ʼaē neʼe ina fakahā atu te moʼoni?
3 Tou Faʼifaʼitakiʼi Te Manavaʼofa ʼo Te ʼAtua: ʼAki he loto faʼa kātaki, neʼe tuku e Sehova he temi ia muʼa ʼo tana fakamāu te hahaʼi agakovi. ʼE ina fakaʼaogaʼi tatou moʼo fakahoko tana pāui te hahaʼi loto faitotonu, ke nātou tauhi kia te ia pea ke hāofaki nātou. (2 Pet. 3:9) ʼE mamate anai ni hahaʼi ʼuhi ko tatou, mo kapau ʼe mole tou haga tala te logo ʼo te manavaʼofa ʼo te ʼAtua, pea mo fakatokagaʼi kia nātou te kua vave hoko mai ʼo te fakamāu ʼa te ʼAtua ki te hahaʼi fuli ʼaē ʼe mole nātou līaki tanatou agakovi. (Esk. 33:1-11) Tatau aipe peʼe mole tali lelei tuʼumaʼu tatatou fai faka mafola, kae ʼe mole tonu ke tou fiu ʼi tatatou faiga katoa moʼo tokoni ki te hahaʼi fakamalotoloto ke nātou tali te manavaʼofa lahi ʼo te ʼAtua.—Gaue 20:26, 27; Loma 12:11.
4 Tou Fakahā Totatou ʼOfa: Neʼe fai e Sehova ʼAtua, ʼaki ia Sesu Kilisito, te fakatotonu ʼaē ke faka mafola te logo lelei ki te kele katoa. (Mat. 28:19, 20) Tatau aipe peʼe mole fia fakalogo te hahaʼi, kae tou maʼu te fealagia ʼaē ke tou fakahā totatou ʼofa pea mo tatatou tauhi katoa ki te ʼAtua, ʼo tou haga fai te meʼa ʼaē ʼe totonu.—1 Soane 5:3.
5 Tou fakatotonu ke tou haga fai faka mafola! Tou faiva ʼi te gāue ʼaia, heʼe kei faka ʼuhiga te temi ki te “aho o te fakamauli” ʼa Sehova.—2 Ko. 6:2.