He Koʼe Koa ʼe Tonu Ke Hoko Atu Tatatou Toe Liliu Ki Te Hahaʼi?
1 Neʼe mole heʼeki koutou fai koa la te fehuʼi ʼaia, ʼi he ʼaho neʼe lagi koutou teuteu ai ki te fai faka mafola? ʼE ʼi ai ʼihi ʼu koga meʼa ʼo totatou telituale ʼe gāueʼi tuʼumaʼu, ʼe feala ke ʼiloʼi aipe tatou e te hahaʼi pea mo fakaliliu atu aipe ia tatou. Ko te tokosiʼi pe ʼe feala ke nātou tali leleiʼi tatou. Kae ʼe lahi te ʼu tupuʼaga tāfito ʼaē e tou hoko atu tatatou toe liliu ai kia nātou.
2 Ia meʼa fuli, neʼe fakatotonu mai ke tou haga faka mafola te logo lelei ʼo te Puleʼaga ʼo aʼu ki te hoko mai ʼo te fakaʼosi. (Mat. 24:14; 28:19, 20) Neʼe feʼekeʼaki e te polofeta ko Isaia peʼe ko temi ʼe fia ʼe haga fai ai anai tana gāue fai faka mafola. Neʼe ina maʼu te tali ki te faʼahi ʼaia ia Isaia 6:11. ʼE mahino papau ia, neʼe ʼui age ke toe liliu ki te hahaʼi mo te logo ʼa te ʼAtua. ʼO toe feiā pe ia ʼaho nei, tatau aipe pe feala ke fakaliliu tatou e te hahaʼi, kae ʼe fakaʼamu e Sehova ke tou haga ʼolo ʼo vakaʼi te hahaʼi ʼaē ʼe nonofo ʼi totatou telituale. (Esk. 3:10, 11) ʼE ko he maʼua taputapu ʼaia neʼe foaki mai kia tatou.—1 Ko. 9:17.
3 Ko te tahi tupuʼaga ʼo te hoko atu ʼo tatatou toe liliu ki te hahaʼi, ʼe ko te fealagia ke tou fakahā te loloto ʼo tatatou tauhi kia Sehova. (1 So. 5:3) Tahi ʼaē, ka tou sio ki te meʼa ʼaē ka ʼamanaki hoko ki te malamanei ʼi te temi ka haʼu, ʼe mole feala ke tou tātāʼofi tatou ke tou faiga ʼaki te ʼofa ke tou fakatokagaʼi totatou ʼu kāiga. (2 Tim. 4:2; Sake 2:8) ʼI tatatou agatonu ʼaē ʼi te fakahoko ʼo tatatou gāue, ʼe tou foaki fakaliuliuga ai te ʼu faigamālie kia nātou ʼaē ʼe nātou tali te logo ʼa te ʼAtua ʼaē ʼe ina hāofaki, ʼo mole feala anai ke nātou ʼui neʼe mole fakatokagaʼi nātou.—Esk. 5:13.
4 Pea tahi ʼaē, ʼe mole tou ʼiloʼi te temi ʼaē ʼe fetogi ai anai te loto ʼo te hahaʼi. ʼE lagi feala ke hoko ʼuhi ko he fetogi ʼo tonatou ʼu ʼaluʼaga takitokotahi, pe ko he tuʼutāmaki ʼi tonatou famili, peʼe ko te ʼu ʼaluʼaga ʼo te malamanei ʼaē ʼe ina uga ai ia nātou ke nātou fakakaukauʼi lelei tonatou ka haʼu. Peʼe ko he meʼa ʼe tou ʼui ki te hahaʼi ʼi te matapā ʼe ina fakatupu ai hanatou tali lelei te logo. (Tnk. 9:11; 1 Ko. 7:31) Pea tahi ʼaē, ʼe fetogi te nofoʼaga ʼa te hahaʼi. ʼE feala ke tou maʼu he ʼu hahaʼi foʼou ʼi totatou telituale, ʼe nātou tali anai te logo lelei, lagi ko he kau tūpulaga kua nātou nonofo tokotahi ʼi te temi ʼaenī pea ʼe nātou fakakaukau lelei ki te ʼaluʼaga ʼo tonatou maʼuli.
5 ʼE hoko atu koa tatatou toe liliu ki te hahaʼi? Ei! ʼE foaki mai kia tatou e te Tohi-Tapu he ʼu tupuʼaga lahi ke tou liliu tuʼumaʼu ai ki te hahaʼi. ʼI te fakaʼosi, mokā kua fakagata te gāue fai faka mafola, ʼe tapuakina anai tatou e Sehova ʼi tatatou haga faiga tuʼumaʼu ʼi te fai faka mafola, pea ʼe ina tapuakinaʼi anai ia nātou ʼaē neʼe nātou tali ʼaki he loto fakafetaʼi te logo lelei ʼo te Puleʼaga.—1 Tim. 4:16.