“Kua Tou Gāueʼi Tuʼa Lahi Totatou Telituale!”
1 ʼE koutou manatu koa kua tuʼa lahi takotou gāueʼi ʼo tokotou telituale, pea ʼe mole kei maʼu ai he ʼu hahaʼi ʼe hage ko he ʼu ōvi? Lagi neʼe koutou manatu: ‘ ʼE ʼau ʼiloʼi peʼe tali feafeaʼi anai e te hahaʼi. Koteā te ʼaoga ke tou toe liliu kia nātou ʼaē ʼe mole fia logo?’ ʼE moʼoni ʼe lahi te ʼu telituale ʼe tau fai. Kae ʼe tonu ke tou mahino ʼe lelei ke fai te faʼahi ʼaia. Koteā tona tupuʼaga? Koʼeni te ʼu tupuʼaga e fā.
2 Neʼe Tali Tatatou ʼu Faikole: Neʼe ʼui fēnei e Sesu: “Io, e lahi te taukai kae toko sii te kau gaue, koia koutou kole ki te Aliki o te taukai ke ina fekaui mai he kau gaue ki tana taukai.” (Lu. 10:2) Talu mai fualoa, ʼe tou kole mamahi kia Sehova ke tokoni lahi mai. ʼE lahi te ʼu koga meʼa, kua maʼu ai te tahi kau gāue, pea kua toe ʼāsili age tatatou fai ʼo te telituale. ʼE mole tonu koa la ke tou fiafia heʼe kua tali mai e Sehova ki tatatou ʼu faikole?
3 ʼE Maʼu Te ʼu Fua Lelei Mo Kapau ʼe Haga Fai: Māʼia mo te ʼu telituale ʼaē ʼe tou fai tuʼumaʼu, ʼe tali e te hahaʼi te logo ʼo te Puleʼaga, pea ʼe nātou ʼiloʼi ai te moʼoni. Koia ʼe tonu ai ke tou haga fai faka mafola, ke feala hatatou maʼu he tahi ʼu hahaʼi agatonu. (Isa. 6:8-11) Ohage ko te meʼa ʼaē neʼe fai e te ʼu ʼuluaki tisipulo ʼa Sesu, “koutou ʼolo tuʼumaʼu” ki te hahaʼi ʼo tokotou telituale, ʼo koutou faiga mālohi ke nātou fia ʼiloʼi te Puleʼaga ʼo te ʼAtua.—Mat. 10:6, 7, MN.
4 ʼI Potukalia ʼe lahi te ʼu kokelekasio ʼe nātou gāueʼi tonatou telituale ʼi te vāhaʼa fuli, kae ʼe kei nātou maʼu te ʼu hahaʼi ʼe nātou hage ko ni ʼu ōvi. ʼE ʼi ai te tuagaʼane ʼe loto falala. ʼE ina ʼui fēnei: “ ʼI te uhu fuli, ʼi muʼa ʼo taku ʼalu ki te faka mafola, ʼe ʼau faikole kia Sehova ke tokoni mai kia ʼau ke ʼau maʼu he tahi ʼe ina fia ako te Tohi-Tapu.” ʼI te tahi ʼaho neʼe ina fakatuʼutuʼu ke ina fai he ako mo te kau gāue ʼi te fale kosi ulu. Kae neʼe ko te tokotahi pe ʼaē neʼe haʼu ki te ako. Neʼe ʼui e te fafine ʼaia: “Ko nātou ia ʼaē, ʼe mole fia fai nātou ki te ako, kae ʼe ʼau loto ʼau kiai.” Hili kiai te māhina, pea neʼe fai e te fafine ʼaia, tana ʼu ako Tohi-Tapu e lua. Mole tuai pea neʼe papitema, pea neʼe kau ki te selevisi pionie!
5 ʼE Lolotoga Fai Nei Te Gāue: Kua faka mafola te logo lelei ohage ko tona fakakikite e Sesu. (Mat. 24:14) Māʼia mo te ʼu koga meʼa ʼaē ‘ ʼe mole fia fakalogo ai te hahaʼi kia tatou,’ ʼe tou fai ai te ʼu fakatokaga kia nātou ʼaki te gāue fai faka mafola. ʼE tou ʼiloʼi ko ʼihi ʼe mole nātou tali, peʼe nātou fakafeagai ki te moʼoni. Kae ʼe tonu ke tou tala age kia nātou te fakamāu ʼaē kua vave fakahoko e Sehova.—Esk. 2:4, 5; 3:7, 8, 19.
6 ʼE Mole Heʼeki ʼOsi Te Gāue: ʼE mole ʼa tatou te vakaʼi pe ko te temi fea ʼaē ʼe tonu ai ke fakagata te gāue fai faka mafola. ʼE ʼiloʼi tonu e Sehova pe ko te temi fea ʼaē ʼe tonu ke fakagata ai. ʼE ina ʼiloʼi peʼe kei ʼi ai he ʼu hahaʼi ʼi totatou telituale ʼe nātou tali anai te logo lelei. Ia ʼaho nei, ko ʼihi hahaʼi ʼe nātou fakafisi ki te logo ʼaia, kae ʼe lagi nātou tali anai ʼi he tahi temi, heʼe feala ke hoko he ʼu meʼa fakapunamaʼuli kia nātou, ohage la: ʼe mole kei ʼi ai hanatou gāue, honatou mahaki kovi, pea mo te mate ʼo he tahi neʼe nātou ʼofa ai. ʼUhi ko te ʼu meʼa ʼaē ʼe lau ʼo ʼuhiga mo tatou, peʼe ko tanatou maʼumaʼua, ko te tokolahi ʼo te hahaʼi ʼe mole heʼeki nātou logo tonu ki te ʼu meʼa ʼaē ʼe tou faka mafola. Kapau ʼe koutou faka mafola tuʼumaʼu kia nātou, pea ʼe nātou tokagaʼi anai pea mo fakalogo.
7 ʼI te ʼu taʼu ʼaenī, ko nātou ʼaē kua lalahi, pea kua ʼi ai honatou ʼu famili, kua maʼuhiga ʼaupito kia nātou te maʼuli, pea ʼe nātou fai te ʼu fehuʼi ʼe gata pe ki te Folafola ʼa te ʼAtua ʼe lava tali kiai. Ko te kiʼi fafine kei finemui neʼe ina fakaafe te ʼu fakamoʼoni e lua ke nā ʼolo age ki tona ʼapi pea neʼe ina ʼui fēnei age: “ ʼI taku kei veliveli, neʼe mole ʼau mahino pe koʼe neʼe kapu te kau Fakamoʼoni e taku faʼe, pea mo tana ʼui age ʼaē ʼe mole fia fai ki te faʼahi ʼaia, logola neʼe nātou fia palalau pe ʼo ʼuhiga mo te Tohi-Tapu. Pea neʼe ʼau fakakaukauʼi, kapau ʼe ʼau lahi ake, mo ʼau ʼohoana, pea mo maʼu hoku ʼapi, ʼe ʼau kole anai ki te kau Fakamoʼoni ʼa Sehova ke nātou ʼōmai, ʼo fakamahino mai te Tohi-Tapu.” Pea neʼe ina fai te faʼahi ʼaia, pea neʼe fiafia ai te ʼu Fakamoʼoni ʼaē neʼe nā ʼaʼahi ia ia.
8 ʼE Koutou Lava Hikihiki Koa Takotou Gāue? ʼE mole faigataʼa tuʼumaʼu tatatou telituale ʼuhi ko te hahaʼi. ʼI ʼihi temi ʼe ko tatou totonu. ʼE tou kamata koa te gāue ʼaia ʼaki he ʼu manatu kovi? ʼE hā anai ʼi tatatou aga, mo totatou leʼo pea mo totatou fofoga. Koutou loto falala pea mo koutou mata malimali. Koutou fetogi takotou ʼu faʼahiga tala ʼo te logo lelei, pea mo koutou gāueʼi ke lelei. ʼE lagi feala ke koutou fetogi te fehuʼi ʼaē ʼe kamata ʼaki te fai palalau, peʼe koutou fakaʼaogaʼi he tahi vaega ʼi te fai palalau. Koutou fehuʼi ki te ʼu tēhina mo tuagaʼane te faʼahiga fai ʼaē ʼe lelei moʼo gāueʼi te telituale. Koutou ʼolo ʼo faka mafola mo he ʼu tēhina mo tuagaʼane kehekehe pea mo he kau pionie, pea koutou sio koteā ʼaē ʼe lelei ai tanatou minisitelio.
9 ʼE tali e Sehova te gāue fai faka mafola pea ʼe ina tapuakina, pea ko tatatou kau ki te gāue ʼaia, ʼe ina fakamoʼoni totatou ʼofa kia te ia pea mo totatou kāiga. (Mat. 22:37-39) Koia tou fai te gāue ʼo aʼu ki tona gataʼaga, ʼo mole tou fiu ʼi te gāueʼi tuʼumaʼu ʼo totatou telituale.