Kua Hihina Te ʼu Gāueʼaga Ki Te Tānaki ʼo Te Taʼukai
1. Koteā te gāue maʼuhiga ʼaē ʼe lolotoga fakahoko nei?
1 ʼI te ʼosi fagonogono ʼa Sesu ki te fafine Samalitana, neʼe ina ʼui fēnei ki tana ʼu tisipulo: “Hiki ake ʼokotou mata pea ke koutou sisio ki te ʼu gāueʼaga, kua hihina ia ki te tānaki ʼo te taʼukai.” (Soa. 4:35, 36) Neʼe kua lolotoga te taʼukai fakalaumālie, pea neʼe feala ke sio fakatomuʼa ia Sesu ki te fakahoko ʼo te gāue ʼaia ʼi te mālamanei kātoa. Mai tona nofoʼaga ʼi selō, ʼe haga pipiki aipē ia Sesu ki te tānaki ʼo te taʼukai. (Mat. 28:19, 20) Koteā te ʼu fakaʼiloga ʼe hā mai ai ʼe haga tuputupu aipē te gāue ʼaia ʼo aʼu ki tona gataʼaga?
2. Koteā ʼaē ʼe hā mai ʼi te ʼu tuputupu ʼe hoko ʼo ʼuhiga mo te tānaki ʼo te taʼukai ʼi te mālamanei kātoa?
2 Ko He Taʼukai ʼi Te Mālamanei Kātoa: Lolotoga te taʼu gāue 2009, neʼe ʼi ai te laka ki muʼa ʼo te kau fai fakamafola ʼi te mālamanei kātoa ʼi te 3,2 ʼi te teau. ʼI te ʼu fenua ʼaē ʼe tapuʼi ai te gāue fai fakamafola, neʼe hoko ai te laka ki muʼa ʼo te kau fai fakamafola, ko te 14 ʼi te teau. Ko te lahi ʼo te ʼu ako Tohi-Tapu ʼe fai ʼi te māhina fuli, kua fakalaka ʼi te toko 7 619 000—ʼe laka age tonatou kaugamālie ʼi te kau fai fakamafola, pea ʼe teitei pē ko te vaelua ʼo te toko miliona ʼaē neʼe hilifaki ki te lahi ʼo te kau ako Tohi-Tapu ʼaē neʼe lau ʼi te taʼu kua hili. ʼI te kua mafola vave ʼo te gāue ʼi te ʼu potu kehekehe ʼo te kele, koia kua lahi ai mo te ʼu kole neʼe fai ki te Sōsiete ʼo ʼuhiga mo te akoako ʼaē ʼe fai ki te kau misionea ʼo Kileate. Kua lahi ʼi te ʼu telituale ia te ʼu lea kehekehe ʼi he lotoʼi fenua pē. ʼE hā lelei mai ai, ko Sehova ʼe ina fai ke vave te gāue lolotoga te temi fakaʼosi ʼo te taʼukai. (Isa. 60:22) ʼE kotou maʼu koa he manatu ʼe lelei ʼo ʼuhiga mo tokotou telituale?
3. Koteā ʼaē ʼe feala ke ʼui e ʼihi ʼo ʼuhiga mo te tānaki ʼo te taʼukai ʼi tonatou telituale?
3 Te Tānaki ʼo Te Taʼukai ʼi Tokotou Telituale: ʼE feala pē ke ʼui e ʼihi: “ ʼE mole loko fia logo te hahaʼi ʼo tomatou telituale ki te logo lelei.” ʼE moʼoni ʼi ʼihi telituale ʼe hagē ia ʼe mole faʼa tali lelei e te hahaʼi te logo ohagē ko ʼihi telituale, peʼe mole kaugamālie te hahaʼi ʼaē ʼe fia logo ohagē ko te temi muʼa. Koia, ʼe feala ai ke ʼui e ʼihi Fakamoʼoni ʼe mole kei lahi te hahaʼi ʼaē ʼi tonatou telituale ʼe kei natou fia logo ki te moʼoni, pea ʼi te temi nei ʼe natou kumikumi pē nātou te tokosiʼi ʼaē ʼe lagi kei fia logo ki te moʼoni. ʼE moʼoni koa te manatu ʼaia?
4. Koteā te aga ʼaē ʼe tonu ke tou maʼu ʼo ʼuhiga mo totatou minisitelio, pea koteā tona tupuʼaga?
4 Talu mai te kamata ʼo te taʼukai ʼo aʼu pē ki tona fakaʼosi, ʼe ko he temi ia ʼe tonu ke gāue lahi ai. Kotou tokagaʼi te maʼuhiga ʼaē ʼo te temi ʼi te ʼu palalau ʼaenī ʼa Sesu: “Ko te taʼukai ʼe lahi, kae ʼe tokosiʼi te kau gāue. Koia, kotou faikole ki te ʼAliki ʼo te taʼukai ke ina fekauʼi mai he kau gāue ki tana taʼukai.” (Mat. 9:37, 38) ʼE fakalogo kiā Sehova, te ʼAliki ʼo te taʼukai, peʼe ko te temi fea ʼaē ʼe tonu ai ke hoko te taʼukai pea ʼe ko te telituale fea ʼaē kā fai ai. (Soa. 6:44; 1 Ko. 3:6-8) Koteā te gāue ʼaē neʼe fakanofo tātou kiai? ʼE tali fēnei mai te Tohi-Tapu: “ ʼI te uhu tūtū tau pulapula pea ʼo aʼu ki te afiafi ʼaua naʼa ke fakamālōlō tou nima.” (Tnk. 11:4-6) ʼE mahino ia, ʼi te temi ʼaē ʼe lolotoga fakakaku ai te taʼukai ki tona gataʼaga ʼe mole ko he temi ia ke tou mālōlō ai!
5. He koʼē ʼe tonu ke tou haga gāue mālohi ʼi te fakamafola ʼo te logo lelei ʼi te ʼu telituale ʼaē ʼe hagē mai ʼe mole fia logo te hahaʼi ki te moʼoni?
5 Tou Haga Tānaki Te Taʼukai: Tatau aipē peʼe kua fai liuliuga totatou telituale pea ʼe hagē kiā tātou ʼe mole fia logo te hahaʼi ki te moʼoni, kae ʼe ʼi ai te tupuʼaga tāfito ʼo tatatou gāue mālohi pea mo te maʼuhiga ʼaē ʼo te temi kiā tātou. (2 Tim. 4:2) Ko te ʼu fetogi fakamataku ʼaē ʼe hoko ʼi te mālamanei ʼe feala ai ki te hahaʼi ke natou fetogi tanatou aga ʼo ʼuhiga mo te logo pea ke natou fakakaukau fakalelei ia tonatou kā haʼu. ʼI te lalahi ake ʼa te kau tūpulaga, ʼe lagi natou fia maʼu he maʼuli fīmālie pea mo he tokalelei ʼo tonatou fakakaukau. Ko tatatou faʼa kātaki ʼaē ʼo fai tuʼumaʼu te gāue, ʼe feala ai pē anai ki ʼihi ke malave kiā nātou te logo. Pea ko te hahaʼi ʼaē neʼe mole natou tali ia tātou ki muʼa atu kua lagi ʼi te temi leva ʼaia kua natou fia logo ki te moʼoni. Māʼia mo nātou ʼaē ʼe natou fakafisi mo tonatou loto kātoa ki te logo ʼaē ʼe tou tala, kae ʼe ʼaoga mo nātou ʼaia ke tou fai age kiā nātou he fakatokaga.—Esk. 2:4, 5; 3:19.
6. Kapau ʼe mole loko fia logo te hahaʼi ʼo totatou telituale, koteā ʼaē kā tokoni mai anai ke tou haga taupau maʼu tatatou faʼafai?
6 Kapau ʼe faigataʼa totatou telituale, koteā anai kā tokoni mai ke tou haga taupau maʼu tatatou faʼafai? ʼO mole gata ʼaki pē ʼi tatatou fai fakamafola ʼaē ʼi te ʼu ʼapi, ʼe ʼi ai te tahi age ʼu faʼahiga fakahoko ʼo te minisitelio, ohagē lā ko te fagonogono ʼi te ʼu fale gāue peʼe ko te fagonogono ʼaki te telefoni. Peʼe lagi lelei ke tou fetofetogi tatatou ʼu faʼahiga ʼuluaki palalau ʼaē ʼi te fai fakamafola ke mole tou fiu ʼi te fai tuʼumaʼu pē ʼo te ʼu palalau māhani. ʼE lagi feala ke tou fetogi tatatou polokalama, ke tou fai fakamafola ʼi te afiafi peʼe ʼi he tahi age temi ʼe tou ʼiloʼi papau ai ʼe tou maʼu atu anai te hahaʼi kiō nātou. Peʼe feala ke tou akoako he tahi age lea ke feala ai hatatou fakamafola te logo lelei ki ʼihi atu hahaʼi. ʼE lagi feala ke tou hikihiki age tatatou minisitelio, ʼo tou liliu ʼo pioniē kātoa. Peʼe lagi feala ke tou ʼolo ki he tahi koga meʼa ʼe mole lahi ai he kau fai fakamafola ki te tānaki ʼo te taʼukai. Kapau ʼe tou maʼu te manatu ʼaē ʼe lelei ʼo ʼuhiga mo te taʼukai, ʼe tou faʼa kātaki anai ʼo lagolago mālohi ki te gāue maʼuhiga ʼaia.
7. ʼO aʼu ki ʼāfea ʼe tonu ai ke tou hoko atu te tānaki ʼo te taʼukai?
7 ʼE nounou te temi ʼaē ʼe tonu ai ki te hahaʼi gāue kele ke natou tānaki te fulumeto, koia ʼo aʼu ki te fakaʼosi ʼo te gāue ʼe tonu ai ke mole natou fakatuatuai peʼe ke natou gāue māmālie. ʼE toe fakamaʼua te taʼi manatu ʼaia ke maʼu ʼo ʼuhiga mo te taʼukai fakalaumālie. ʼO aʼu ki ʼāfea ʼe tonu ai ke tou hoko atu te tānaki ʼo te taʼukai? Lolotoga “te fakaʼosi ʼo te tuʼu ʼo te ʼu faʼahiga meʼa ʼaenī” pea ʼo aʼu ki “te fakaʼosi.” (Mat. 24:14; 28:20) Ohagē pe ko te Minisi lahi ʼaē ʼa Sehova, ʼe tou fia fakaʼosi te gāue ʼaē neʼe fakatotonu mai ke tou fai. (Soa. 4:34; 17:4) Koia ʼo aʼu ki te fakaʼosi, tou kātaki ʼo fakahoko fakalelei ia tatatou minisitelio, ʼaki te fiafia pea mo te aga ʼaē ʼe lelei. (Mat. 24:13) ʼE mole heʼeki ʼosi te tānaki ʼo te taʼukai!
[Fakamatala ʼo te pasina 2]
Talu mai te kamata ʼo te taʼukai ʼo aʼu pē ki tona fakaʼosi, ʼe ko he temi ia ʼe tonu ke gāue lahi ai