ʼE Fiafia Te Kau Gāue ʼo Te Taʼukai!

“E lahi te taukai, kae e lavaki te kau gaue. Koia, koutou faikole ki te Aliki o te taukai, ke ina fekaui mai he kau gaue ki tana taukai.”—Mateo 9:37, 38.

1. Koteā ʼaē ka tokoni mai anai ke tou haga fai te finegalo ʼo te ʼAtua?

MOKĀ tou manatuʼi te ʼaho ʼaē neʼe tou papitema ai ʼo tou liliu ko he kaugana ʼa Sehova, ʼe hage pe kia tatou kei foʼou tatau aipe mokā ʼe mole heʼeki fualoa peʼe kua fualoa. Ko te fakavikiviki kia Sehova kua liliu ko te meʼa maʼuhiga tāfito ʼaia ʼi totatou maʼuli ʼaē kua tou foaki kia te ia. ʼE maʼuhiga ʼaupito kia tatou tatatou tauhi fakafiafia ʼaē kia Sehova, heʼe tou fakaʼaogaʼi te temi faigamālie moʼo tokoni ki te hahaʼi ke nātou logo pea ke feala hanatou tali te logo ʼo te Puleʼaga. (Efeso 5:15, 16) Mo te temi pe la ʼaenī, ʼe hage kia tatou ʼe fakalaka vave te temi heʼe “lahi . . . [tatatou] ʼu gāue ʼi te ʼAliki.” (1 Kolonito 15:58, MN ) Ko tatatou fiafia ʼi te fai ʼo te finegalo ʼo Sehova ʼe ina uga anai tatou ke tou haga fai, logola tatatou tau ʼaē mo ni ʼu fihifihia.—Nehemia 8:10.

2. Koteā ʼaē ʼe lagolago ki tatatou fiafia ʼi te taʼukai fakatātā?

² ʼI totatou ʼuhiga Kilisitiano, ʼe tou kau ki te taʼukai fakatātā. Neʼe fakatatau e Sesu Kilisito ki he taʼukai ia te tānaki ʼo te hahaʼi ki te maʼuli heʼegata. (Soane 4:35-38) ʼE fakaloto mālohiʼi anai tatou mokā tou vakaʼi te fiafia ʼo te kau ʼuluaki kau gāue Kilisitiano ʼo te taʼukai, heʼe tou kau ki te gāue ʼo te taʼukai ʼaia. ʼE tou vakaʼi anai te ʼu puani e tolu ʼe lagolago ki tatatou fiafia ʼi te taʼukai ia ʼaho nei. ʼE ʼi ai (1) tatatou logo ʼo ʼuhiga mo te ʼamanaki, (2) te fua lelei ʼo tatatou kumi te hahaʼi, pea mo (3) te tokalelei ʼo totatou ʼatamai ʼi totatou ʼuhiga kau gāue ki te taʼukai.

ʼE Fekauʼi Ko Te Kau Gāue ʼo Te Taʼukai

3. Neʼe koteā ʼaē neʼe fakafiafia ai te kau ʼuluaki tisipulo ʼa Sesu?

³ Neʼe fetogi te maʼuli ʼo te kau ʼuluaki kau gāue ʼo te taʼukai—tāfito te kau ʼapositolo agatonu e toko 11 ʼa Sesu—ʼi te 33 ʼo totatou temi ʼi tanatou ʼolo ki te moʼuga ʼo Kalilea ʼo faka felāveʼi kia Kilisito ʼaē kua fakatuʼuake! (Mateo 28:16) ʼI te temi ʼaia neʼe lagi hā “kia tehina e nima geau i he temi e tahi.” (1 Kolonito 15:6) Neʼe nātou manatuʼi tuʼumaʼu pe te gāue ʼaē neʼe tuku age e Sesu. Neʼe ina ʼui fēnei age: “Koutou olo o fakahoko he u tisipulo i te atu puleaga, papitema natou i te Huafa o te Tamai, mo te Alo, mo te Laumalie-Maonioni. Koutou fakaʼako natou ki te taupau o meafuape nee au fakatotonu kia koutou.” (Mateo 28:19, 20) Logola tonatou fakatagaʼi mālohi kae neʼe nātou fiafia ʼaupito ʼi te taʼukai he neʼe nātou sisio ki te fakatuʼu ʼaē ʼo te ʼu kokelekasio ʼi te ʼatu ʼu koga meʼa. ʼI te temi ʼaia, ‘neʼe kua fakahā te logo lelei ki te meʼa maʼuli fuli pe ʼi te lalo lagi.’—Kolose 1:23; Gaue 1:8; 16:5.

4. Neʼe feafeaʼi te ʼaluʼaga ʼi te temi ʼaē neʼe fekauʼi ai te kau tisipulo ʼa Kilisito?

⁴ ʼI te kamata ʼo te minisitelio ʼo Sesu neʼe ina pāuiʼi tana kau ʼapositolo e toko 12 pea neʼe ina fekauʼi nātou ke nātou tala tāfito te logo ʼaenī: “Kua fakaovi mai te Puleaga o Selo.” (Mateo 10:1-7) Mo Sesu totonu “nee feʼaluʼaki . . . i te u kolo lalahi mo te u kolo liliki fuape [ʼo Kalilea], nee fai akonaki i onatou sinakoka, pea nee ina fagonogono te [“logo lelei,” MN ] o te Puleaga, pea nee ina fakamauli te mahaki fuli mo te vaivai fuape.” Neʼe manavaʼofa Sesu ki te hahaʼi “koteuhi kua natou fakaofaofa pea mo ogosia o hage he u ovi e mole honatou tauhiovi.” (Mateo 9:35, 36) ʼI te lahi fau ʼo tona ʼofa, neʼe ina toe ʼui fēnei ki tana kau tisipulo: “Io, e lahi te taukai, kae e lavaki te kau gaue. Koia, koutou faikole ki te Aliki o te taukai [ia Sehova ʼAtua], ke ina fekaui mai he kau gaue ki tana taukai.” (Mateo 9:37, 38) ʼI tana ʼi Sutea, neʼe toe mahino pe kia Sesu ʼe tokosiʼi te kau gāue ki te taʼukai pea neʼe kei toe pe māhina e ono ʼo tona minisitelio ʼi te kele. (Luka 10:2) ʼI te ʼu ʼaluʼaga ʼaia e lua, neʼe ina fekauʼi tana kau tisipulo ko he kau gāue ʼo te taʼukai.—Mateo 10:5; Luka 10:3.

Ko Tatatou Logo ʼo Te ʼAmanaki

5. Koteā te logo ʼaē ʼe tou tala?

⁵ ʼE tou tali fakafiafia ʼi totatou ʼuhiga kaugana ʼa Sehova ia ʼaho nei ki te pāui ki he kau gāue ʼo te taʼukai. Ko te meʼa ʼaē ʼe tou fiafia lahi ai heʼe tou fakahā te logo ʼo te ʼamanaki kia nātou ʼaē ʼe lotomamahi pea mo lotovaivai. Ohage ko te kau tisipulo ʼa Sesu ʼi te ʼuluaki sēkulō, ʼe ko he pilivilesio ia tatatou tala te logo lelei—ia te logo moʼoni ʼo ʼuhiga mo te ʼamanaki—kia nātou ʼaē ʼe “fakaofaofa pea mo ogosia o hage he u ovi e mole honatou tauhiovi”!

6. Koteā te gāue ʼaē neʼe kau kiai te kau ʼapositolo ʼi te ʼuluaki sēkulō?

⁶ ʼI te vaelua ʼo te ʼuluaki sēkulō, neʼe maʼumaʼua te ʼapositolo ko Paulo ʼi te faka mafola ʼo te logo lelei. Pea ʼe mahino ia neʼe fua lelei tana gāue ʼo te taʼukai, heʼe ʼi tana tohi ʼaē ki te kau Kilisitiano ʼo Kolonito ʼi te 55 ʼo totatou temi neʼe ina ʼui fēnei: “E au fakamanatu atu kia koutou, u tehina, te [“logo lelei,” MN ] nee au fagonogono kia koutou aia nee koutou tali pea e koutou pukepuke.” (1 Kolonito 15:1) Ko te kau ʼapositolo pea mo ʼihi kau ʼuluaki Kilisitiano neʼe nātou faʼa gāue ʼi te taʼukai. Tatau aipe peʼe mole fakahā mai e te Tohi-Tapu pe ko ʼapositolo ʼe fia neʼe hāo ʼi te ʼu tautea ʼaē neʼe hoko ʼi te fakaʼauha ʼo Selusalemi ʼi te 70 ʼo totatou temi, kae ʼe tou ʼiloʼi ko te ʼapositolo ko Soane neʼe kei fai faka mafola ia taʼu e 25 ki muli age.—Apokalipesi 1:9.

7, 8. Koteā te logo ʼo te ʼamanaki ʼaē ʼe mālohi age tona tala ʼi te temi nei e te kau kaugana ʼa Sehova?

⁷ Pea neʼe hoko mai leva te ʼu sēkulō ʼaē neʼe pule ai te kau takitaki lotu ʼo te Keletiate, “te tagata ʼaē ʼe manuki ki te lao,” pea mo ʼaposita. (2 Tesalonika 2:3, MN ) Kae ʼi te fakaʼosi ʼo te 19 sēkulō, ko nātou ʼaē neʼe kei nātou maʼuliʼi te ʼu akonaki ʼa Kilisito, neʼe nātou tala te logo ʼo te ʼamanaki, ʼo nātou fakahā te Puleʼaga. Ei, talu mai te ʼuluaki tā ʼo te nusipepa ʼaenī (ʼi Sūlio 1879), neʼe ko tona ʼu kupu tāfito kehekehe ʼaenī: “Messager de la Présence de Christ,” “Messager du Royaume de Christ” peʼe “Annonce le Royaume de Jéhovah.”

⁸ Neʼe fakatuʼu te Puleʼaga ʼo te ʼAtua ʼi selo ʼaki ia Sesu Kilisito ʼi te 1914, pea ʼe mālohi age ʼi te temi nei tatatou faka mafola te logo ʼo te ʼamanaki. Koteā tona tupuʼaga? Koteʼuhi ʼi te ʼu meʼa lelei ʼaē ka hoko ʼi te pule ʼo te Puleʼaga, ʼe kau ai te fakaʼauha ʼo te tuʼu ʼo te ʼu faʼahiga meʼa agakovi ʼaenī. (Taniela 2:44) ʼE ʼi ai koa he tahi age logo lelei ʼi te logo ʼaia? Pea koteā he tahi age fiafia lahi ʼe tou lava maʼu gata pe mokā kita kau ki te tala ʼo te Puleʼaga ia muʼa ʼo te “mamahi lahi”?—Mateo 24:21; Maleko 13:10.

Te Kumi ʼAē ʼe Fua Lelei

9. Koteā te fakatotonu ʼaē neʼe foaki e Sesu ki tana kau tisipulo, pea neʼe tali feafeaʼi e te hahaʼi te logo ʼo te Puleʼaga?

⁹ Ko te tahi meʼa ʼe tou fiafia ai ʼi totatou ʼuhiga kau gāue ʼo te taʼukai, ʼe ko te fua lelei ʼaē ʼo te kumi ʼo te hahaʼi ʼaē ke nātou liliu ko ni ʼu tisipulo pea mo nātou kau ki te gāue ʼo te taʼukai. ʼI te 31-32 ʼo totatou temi, neʼe fakatotonu fēnei e Sesu ki tana kau tisipulo: “I he kolo’pe, pe ko he kolo lahi, pe ko he kolo veliveli e koutou hu ai, koutou kumikumi iaʼia ae e mauli ai pea e tuha mo koutou.” (Mateo 10:11) Neʼe mole ko te hahaʼi fuli ʼaē neʼe tāu mo nātou te logo, heʼe neʼe ʼasi ʼi tanatou faʼahiga tali ʼaē ʼo te logo ʼo te Puleʼaga. Kae neʼe faka mafola mālohi te logo lelei e te kau tisipulo ʼa Sesu ʼi te ʼu potu fuli pe ʼaē neʼe nātou maʼu atu kiai te hahaʼi.

10. Neʼe feafeaʼi te hoko atu e Paulo tana kumi te hahaʼi ʼaē neʼe tāu mo nātou ia te logo?

¹⁰ ʼI te ʼosi mate pea mo te fakatuʼuake ʼo Sesu, neʼe hoko atu pe te kumi lahi ʼo te hahaʼi ʼaē neʼe tāu mo nātou te logo. Neʼe fai palalau Paulo mo te kau Sutea ʼi tonatou sinakoka pea mo te hahaʼi ʼaē neʼe ʼi te fakatauʼaga meʼa ʼi Ateni. ʼI tana faka mafola ʼi te Aleopasi ʼo te kolo Keleka ʼaia, “neʼe ʼōmai he ʼu tagata ʼo fakatahi mo ia pea neʼe nātou tui, neʼe kau ai foki ia Tenisio ko he tuʼi fakamāu ʼo te telepinale ʼo te Aleopasi, pea mo te fafine ʼe higoa ko Tamalisi, pea mo ʼihi neʼe ʼi ai.” ʼI te ʼu potu fuli ʼaē neʼe ʼalu kiai Paulo, neʼe ina toe tuku te faʼifaʼitaki lelei ʼo ʼuhiga mo tana faka mafola “ ʼi muʼa ʼo te hahaʼi peʼe ʼi te ʼu ʼapi.”—Gaue 17:17, 34; 20:20, MN.

11. Koteā te ʼu faʼahiga fai ʼo te minisitelio neʼe fakaʼaogaʼi ʼi te ʼu taʼu ʼaenī kua ʼosi?

¹¹ ʼI te ʼu taʼu e hogofulu ʼaenī kua ʼosi ʼo te 19 sēkulō, neʼe kumi mālohi e te kau Kilisitiano fakanofo ia te hahaʼi ʼaē ʼe tāu mo nātou te logo. Ko Te Tule Leʼo ʼo Sione ʼo te māhina ʼo Sūlio pea mo ʼAukusito 1881, neʼe ʼui fēnei ʼi te alatike “Oints pour prêcher”: “Ko te faka mafola ʼo te logo lelei . . . ʼe fai ‘ki te hahaʼi agavaivai’—ia nātou ʼaē ʼe nātou tali pea mo lava fagono, ke feala hanatou fakatuputupu ia nātou te sino ʼo Kilisito, ke nātou kaugā hau mo ia.” Ko te kau gāue ʼa te ʼAtua ʼe nātou tautau felāveʼi mo te hahaʼi ʼi te hili ʼo tanatou misa pea nātou foaki age te ʼu kiʼi pepa lotu ʼe fakahā ai te ʼu logo faka Tohi-Tapu ke faka fealagia ai he tali leleiʼi e te hahaʼi ʼaē ʼe tāu mo nātou te logo. ʼI te fakatokagaʼi ʼaē ʼo te fua lelei ʼo te fai faka mafola ʼaia, ko Te Tule Leʼo ʼo te ʼaho 15 ʼo Maio 1903, neʼe ina fakaloto mālohiʼi te kau gāue ʼo te taʼukai ke nātou tufa te kiʼi pepa lotu “ ʼi te ʼu ʼapi ʼi te ʼu ʼAhotapu uhu.”

12. Neʼe tou fakatuputupu feafeaʼi te fua lelei ʼo tatatou gāue fai faka mafola? Koutou tuku mai he faʼifaʼitaki.

¹² ʼI te ʼu taʼu ʼaenī, neʼe tou fakalahi totatou minisitelio, ʼo mole gata pe tatatou kumi te hahaʼi kiō nātou kae ʼi ʼihi atu ʼu faʼahi. Neʼe fua lelei te taʼi fai ʼaia ʼi te ʼu fenua ʼaē ʼe mole tou maʼu atu te hahaʼi kiō nātou ʼi te ʼu hola māhani ʼaē ʼe tou fai faka mafola ai, ʼuhi ko te ʼu ʼaluʼaga faka ekonomika pea mo te kumi ʼo te ʼu fakafiafia. ʼI Pilitania ʼi te sio ʼa te Fakamoʼoni mo tona kaugā fagona ki te toʼo kā tuʼumaʼu ʼa te hahaʼi mokā nātou mavae ʼi te matatai, neʼe nā lototoʼa ʼo ʼolo ki te ʼu kā ʼaia ʼo fakahā Te Tule Leʼo pea mo te ʼu Réveillez-vous ! ki te hahaʼi ʼaē ʼe heheka ʼi loto. ʼI te māhina katoa neʼe nā tufa ia nusipepa e 229. ʼE nā ʼui fēnei: “Neʼe mole ma mataku ʼi tamā faka mafola ʼi te matatai, ʼi te ʼu fale koloā peʼe ko he tahi ʼu faigataʼaʼia neʼe feala ke tau mo māua, koteʼuhi neʼe ma ʼiloʼi ko Sehova ʼe nofo tuʼumaʼu mo māua.” Neʼe ʼi ai te tahi neʼe nā ʼave tuʼumaʼu ki ai tana ʼu nusipepa, pea neʼe kamata tanā ako Tohi-Tapu, pea neʼe nā kau tokolua ki te gāue pionie vaeluaʼi temi.

13. ʼI ʼihi koga meʼa, koteā te ʼu fetogi ʼi totatou minisitelio ʼe tonu ke tou fai?

¹³ ʼI te hoko atu ʼo te kumi ʼo te hahaʼi ʼaē ʼe tāu mo nātou ia te logo, ʼe lagi ʼaoga ke tou toe vakavakaʼi totatou minisitelio ʼi ʼona tahi age ʼu koga. Logola te kua māhani ʼa te kau Fakamoʼoni ʼi te faka mafola ʼi te ʼu ʼapi ʼi te ʼu ʼAhotapu uhu, kae ʼe nātou tokagaʼi ʼi ʼihi koga meʼa ko te ʼaʼahi tautonu ʼo te hahaʼi kiō nātou ʼe mole fua lelei heʼe kei nātou momoe. Tokolahi te kau Fakamoʼoni neʼe nātou fetogi tanatou polokalama fai faka mafola, ʼo nātou fai ʼi te ʼu afiafi ʼi te lagi hili ʼo te ʼu fono faka Kilisitiano. Pea neʼe fua lelei te kumi ʼaia. ʼI te taʼu ʼaenī kua ʼosi neʼe tuputupu te kau faka mafola ʼo te Puleʼaga ʼi te malamanei katoa ʼi te 2,3 ki te teau. Ko he faʼahi ʼe ina vikiʼi te Pule ʼo te taʼukai pea mo fakatupu fiafia ki ʼotatou loto.

Tou Taupau Te Tokalelei ʼi Te Taʼukai

14. Koteā te manatu ʼaē ʼe tonu ke tou maʼu mokā tou fakahā tatatou logo, pea koteā tona tupuʼaga?

¹⁴ Ko te tahi meʼa ʼaē ʼe tou fiafia ai ʼe ko te tokalelei ʼo te ʼatamai ʼaē ʼe tou fakahā ʼi te gāue ʼo te taʼukai. Neʼe ʼui fēnei e Sesu: “ ʼI takotou hū ki te loto fale, koutou fakaʼalofa ki ʼona hahaʼi; pea kapau ʼe tāu mo te ʼapi, pea ke haʼu kia te ia te tokalelei ʼaē ʼe koutou fakaʼamu ke ina maʼu.” (Mateo 10:12, 13, MN ) Ko te kupu faka Hepeleo fakaʼalofa pea mo tona kupu faka Keleka ʼi te Tohi-Tapu ʼe nā fakaliliu te manatu ʼaenī ‘Ke fua lelei ia meʼa fuli kia koe.’ Ko te manatu ʼaia ʼe ina takitaki tatou mokā tou fakaōvi ki te hahaʼi ʼi tatatou faka mafola ia te logo lelei. ʼE tou fakaʼamu ke nātou tali leleiʼi te logo ʼo te Puleʼaga. Kia nātou ʼaē ʼe nātou tali leleiʼi, ʼe nātou maʼu te ʼamanaki ʼaē ke nātou fakatokatoka mo te ʼAtua mokā nātou fakahemala ʼi tanatou ʼu agahala, pea mo nātou tafoki mai, pea mo nātou fai tona finegalo. Pea ko te tokalelei ʼo te ʼAtua ʼe ina taki nātou ki te maʼuli heʼegata.—Soane 17:3; Gaue 3:19; 13:38, 48; 2 Kolonito 5:18-20.

15. ʼE tou lava taupau feafeaʼi he manatu tokalelei mokā mole tali leleiʼi tatatou fai faka mafola?

¹⁵ ʼE tou lava taupau feafeaʼi tatatou tokalelei mokā ʼe mole tali leleiʼi tatou? Neʼe fakatotonu fēnei e Sesu: “Kapau leva ʼe mole tāu [mo te ʼapi ʼaia] pea ke toe liliu mai takotou tokalelei kia koutou!” (Mateo 10:13, MN ) ʼI te fakamatala ʼa Luka ʼo ʼuhiga mo te fekauʼi ʼaē ʼo te toko 70 tisipulo, ʼe tou maʼu ai te ʼu palalau ʼaenī ʼa Sesu: “Kapau ʼe ʼi ai he kaumeʼa ʼo te tokalelei, ko takotou tokalelei ʼe hili anai kia te ia. Kaʼe kapau ʼe mole ʼi ai, pea ʼe toe liliu atu anai kia koutou.” (Luka 10:6, MN ) ʼI te temi ʼaē ʼe tou fakahā ai te logo lelei ki te hahaʼi, ʼe tou fai anai te faʼahi ʼaia ʼaki he aga fakaʼapaʼapa pea mo tokalelei. Kapau ʼe mole tali leleiʼi te logo, peʼe fatufatuʼi, peʼe palalau koviʼi, ʼe faka fealagia ai ke ‘toe liliu mai kia kita’ tatatou logo ʼo te tokalelei. Kae ʼe mole pulihi e te ʼu meʼa ʼaia tatatou tokalelei, ʼaē ko he fua ʼo te laumālie maʼoniʼoni ʼo Sehova.—Kalate 5:22, 23.

Ko Te Fakatuʼutuʼu Lelei Maʼa Te Kau Gāue ʼo Te Taʼukai

16, 17. (a) Koteā ʼaē ʼe tou fakatuʼutuʼu kiai mokā tou fai he ʼu ʼaʼahi? (b) ʼE tou lava tokoni feafeaʼi ki te hahaʼi ʼaē ʼe nātou fai mai tanatou ʼu fehuʼi faka Tohi-Tapu?

¹⁶ ʼI totatou ʼuhiga kau gāue ʼo te taʼukai, ʼe tou fiafia ʼaupito ʼi tatatou kau ki te tānaki ʼo te hahaʼi ki te maʼuli heʼegata. Pea ʼe ko he meʼa fakafiafia mokā tali lelei ʼe ia ʼaē ʼe tou faka mafola ki ai, pea mo lahi he ʼu meʼa ʼe ina fia ako, pea mo ina fakahā ʼe ko ia ko “he kaumeʼa ʼo te tokalelei”! Lagi ʼe lahi tana ʼu fehuʼi faka Tohi-Tapu, pea ʼe mole tou lava tali fuli anai kiai ʼaki pe he ʼaʼahi ʼe tahi. Mai tona ʼaluʼaga ʼaē ʼe mole lelei anai ke tou nofo fualoa ʼi takita ʼuluaki ʼaʼahi, koteā te meʼa ʼe tou lava fai? ʼE tou lava muliʼi te fakatuʼutuʼu neʼe fakahā kua hili nei kiai taʼu e 60.

¹⁷ “ ʼE tonu ki te kau Fakamoʼoni fuli ʼa Sehova ke nātou teuteu ki te fai ʼo he ʼu ako Tohi-Tapu.” ʼE tou maʼu te fakatotonu ʼaia ʼi te tolu kaupepa ʼo te ʼu kaupepa lahi Étude modèle ʼaē neʼe tā ʼi te 1937 ki te 1941. Neʼe ina toe ʼui fēnei: “Ko te kau faka mafola fuli [ʼo te Puleʼaga] ʼe tonu ke nātou tokaga ʼo tokoni ʼi te ʼu faʼahi fuli pe ki te hahaʼi ʼaē ʼe loto lelei pea mo fia fagono ki te logo ʼo te Puleʼaga. ʼE tonu ke ʼaʼahi te ʼu hahaʼi ʼaia, pea mo tali ki tanatou ʼu fehuʼi kehekehe . . , pea mo kamata he ako Tohi-Tapu . . . ʼi te temi pe ʼaē ʼe koutou feala ai.” Ei, ʼe tou fakatuʼutuʼu ke tou ʼaʼahi te hahaʼi pea mo kamata he ako Tohi-Tapu pea mo fai tuʼumaʼu.a Ko he aga faka kaumeʼa pea mo he tokaga ʼofa kia ia ʼaē ʼe fia logo, ʼe ina uga tatou ke tou teuteuʼi lelei pea mo fai fakalelei te ako.

18. ʼE tou lava tokoni feafeaʼi ki te hahaʼi foʼou ke nātou liliu ko ni ʼu tisipulo ʼa Sesu Kilisito?

¹⁸ ʼAki te tohi Te ʼAtamai Mālama ʼAē ʼe Ina Taki Ki Te Maʼuli Heʼegata pea mo te ʼu kaupepa lalahi ohage la ko te kaupepa Koteā ʼAē ʼe Fakamaʼua Mai e Te ʼAtua Kia Tatou?, ʼe tou lava fai ai he ʼu ako Tohi-Tapu pea mo feala ai ke tou kau ki te tokoni ki te hahaʼi foʼou ke nātou liliu ko ni ʼu tisipulo. ʼI tatatou faiga ʼaē ke tou faʼifaʼitakiʼi te Faiako Lahi ko Sesu Kilisito, ʼe lagi toe faʼifaʼitakiʼi anai e te ʼu ako ʼaia tatatou aga tokalelei pea mo fiafia, tatatou aga fakamalotoloto, pea mo tatatou fakaʼapaʼapa ki te ʼu lekula. Ka tou tokoni ki te hahaʼi foʼou ʼo tou tali ki ʼanatou ʼu fehuʼi, tou faiga ke tou akoʼi nātou peʼe feafeaʼi hanatou lava tali ki te hahaʼi ʼaē ʼe nātou faifehuʼi age kia nātou. (2 Timoteo 2:1, 2; 1 Petelo 2:21) ʼI totatou ʼuhiga kau gāue fakatātā ʼo te taʼukai, ʼe tou fiafia moʼoni heʼe fakafuafua ko ako Tohi-Tapu e 4 766 631 neʼe fai ʼi te malamanei ʼi te taʼu ʼaenī kua ʼosi. ʼE tou fiafia tāfito la mo kapau ʼe tou kau ki te kau gāue ʼaē ʼe nātou fai te ʼu ako Tohi-Tapu.

Tou Fakafiafia ʼi Te Taʼukai

19. He koʼe neʼe feala ke maʼu he fiafia ʼi te taʼukai ʼi te temi ʼo te minisitelio ʼo Sesu pea ki muli age?

¹⁹ Neʼe ʼi ai te ʼu tupuʼaga tāfito ki te fiafia ʼi te taʼukai ʼi te temi ʼo te minisitelio ʼo Sesu pea ki muli age. Koia neʼe hahaʼi ia nātou ʼaē neʼe nātou tali te logo lelei. Neʼe lahi tāfito te fiafia ʼi te Penikosite 33 ʼo totatou temi, he neʼe ko te toko 3 000 neʼe nātou tali te takitaki ʼa Petelo, pea mo nātou maʼu te laumālie maʼoniʼoni ʼo Sehova, pea neʼe nātou kau ki te puleʼaga ʼo te ʼAtua ia te Iselaele fakalaumālie. ʼIo neʼe haga tuputupu tonatou hahaʼi pea neʼe lahi te fiafia he “neʼe hoko atu pe te hilifaki e Sehova kia nātou ʼi te ʼaho fuli te hahaʼi ʼaē kua hāofaki.”—Gaue 2:37-41, 46, 47, MN; Kalate 6:16; 1 Petelo 2:9.

20. Koteā te fiafia lahi ʼaē ʼe tou maʼu ʼi tatatou taʼukai?

²⁰ ʼI te temi ʼaia, neʼe hoko moʼoni te fakakikite ʼaenī ʼa Isaia: “[Ko koe Sehova] neʼe ke fakahahaʼi te puleʼaga; maʼa ia neʼe ke fakatupu te fiafia lahi. Neʼe nātou fiafia ʼi ʼou muʼa ohage ko te fiafia ʼi te temi ʼo te taʼukai, ohage ko nātou ʼaē ʼe fakafiafia mokā nātou vahevahe te koloā.” (Isaia 9:3) Tatau aipe peʼe tou sio nei ki te ‘puleʼaga hahaʼi’ kua teitei katoa ai te kau fakanofo, kae ko tatatou fiafia ʼe lahi mokā tou sio ki te kau gāue ʼo te taʼukai ʼe nātou tuputupu ʼi te taʼu fuli.—Pesalemo 4:7; Sakalia 8:23; Soane 10:16.

21. Koteā ʼaē ka tou talanoa anai kiai ʼi te alatike ka hoa mai?

²¹ ʼE mahino papau ia ʼe ʼi ai te tupuʼaga tāfito ʼo tatatou fiafia ʼi te taʼukai. ʼE tou fiafia ʼi totatou ʼuhiga kau gāue ki te taʼukai, ʼuhi ko tatatou logo ʼo ʼuhiga mo te ʼamanaki, ko tatatou kumi te hahaʼi ʼaē ʼe tāu mo nātou te logo, pea mo te tokalelei ʼo totatou ʼatamai. Kae ʼe nātou felāveʼi mo te fakafeagai ʼa te tokolahi. Neʼe hoko te faʼahi ʼaia ki te ʼapositolo ko Soane. Neʼe nofo pilisoni ʼi te motu ko Patemosi “uhi ko te folafola a te Atua mo te fakamooni a Sesu.” (Apokalipesi 1:9) ʼE feafeaʼi hatatou lava taupau ʼo tatatou fiafia mokā ʼe tou felāveʼi mo he fakataga pea mo he fakafeagai? Koteā anai ka tokoni kia tatou ke tou kātakiʼi ia te agamālohi ʼa te tokolahi ʼaē ʼe tou faka mafola ki ai ʼi te temi nei? ʼE tou maʼu anai te tali faka Tohi-Tapu ki te ʼu fehuʼi ʼaia ʼi te alatike ʼaē ka hoa mai.

[Kiʼi nota]

ʼE Koutou Tali Feafeaʼi Anai?

• Koteā te taʼukai fakatātā?

• Koteā te logo ʼaē ʼe tou tala?

• He koʼe ʼe fua lelei tatatou kumi ia te kau tisipulo?

• ʼE lava feafeaʼi hatatou taupau ia te tokalelei ʼi te taʼukai?

• He koʼe ʼe tonu ke tou fiafia ʼi te taʼukai?

[Paki ʼo te pasina 12]

Ko te faka mafola ʼi te ʼuluaki pea mo te 20 sēkulō

[Paki ʼo te pasina 13]

Ohage ko Paulo, ʼe faiga e te kau gāue ʼo te taʼukai ʼo te temi nei ke nātou aʼu ki te hahaʼi ʼi te ʼu potu fuli pe

[Paki ʼo te pasina 13]

Tou faka mafola te logo lelei ʼaki he aga fakaʼapaʼapa