Kotou Lagolago Mālohi Ki Te Tānaki Lahi ʼo Te Taʼukai Fakalaumālie

“Ke lahi . . . takotou ʼu gāue ʼi te ʼAliki.”—1 KO. 15:58.

1. Koteā te fakaafe ʼaē neʼe fai e Sesu ki tana ʼu tisipulo?

ʼI TANA fakalaka ʼi te fenua ʼo Samalia ʼi te fakaʼosi ʼo te taʼu 30 ʼo totatou temi, ko Sesu neʼe mālōlō ʼi te vai keli neʼe tuʼu ovi ki te kolo ʼo Sisale. Neʼe ina ʼui fēnei ai ki tana ʼu tisipulo: “Hiki ake ʼokotou mata pea ke kotou sisio ki te ʼu gāueʼaga, kua hihina ia ki te tānaki ʼo te taʼukai.” (Soa. 4:35) Neʼe mole talanoa ia Sesu ki he taʼukai moʼoni, kae neʼe talanoa ki te tānaki fakalaumālie ʼo te hahaʼi fakamālotoloto ʼaē kā liliu ko hana ʼu tisipulo. ʼI tona fakahagatonu, neʼe ko hana pāui ʼo ʼuhiga mo te gāue. Neʼe lahi te gāue ʼaē neʼe tonu ke fai ʼi he kiʼi temi nounou!

2, 3. (a) Koteā ʼaē ʼe ʼiloga mai ai ʼe tou māʼuʼuli ʼi te temi ʼo te tānaki ʼo te taʼukai? (b) Koteā ʼaē kā tou vakaʼi anai ʼi te ʼalatike ʼaenī?

² Ko te talanoa ʼa Sesu ʼo ʼuhiga mo he taʼukai, ʼe ʼi ai tona fakaʼuhiga makehe kiā tātou iā ʼaho nei. ʼE tou māʼuʼuli ʼi te temi ʼaē ʼe tou sio ai ko te gāueʼaga ʼo te mālamanei ʼe kua “hihina ia ki te tānaki ʼo te taʼukai.” ʼI te taʼu fuli, ʼe fai ki te ʼu lauʼi miliona hahaʼi ia te fakaafe ʼaē ke natou ako ia te ʼu moʼoni ʼaē ʼe natou maʼu ai ia te maʼuli, pea ʼe papitema ai te ʼu lauʼi afe tisipulo foʼou. ʼE ko tatatou pilivilēsio ke tou lagolago ki te toe tānaki ʼaia ʼo te taʼukai ʼaē ʼe mole hona fakatatau, ʼo fakalogo ki te takitaki ʼo te Pule ʼo te taʼukai, ia Sehova ʼAtua. ʼE kotou gāue “lahi” koa ʼi te tānaki ʼo te taʼukai?—1 Ko. 15:58.

³ Lolotoga tana ʼu taʼu e tolu vaelua ʼi tana minisitelio ʼi te kele, neʼe teuteuʼi e Sesu tana ʼu tisipulo ki tanatou gāue ʼi te tānaki ʼo te taʼukai. ʼE tou vakaʼi anai ʼi te ʼalatike ʼaenī te ʼu ako ʼe tolu ʼi te ʼu ako maʼuhiga ʼaē neʼe akoʼi e Sesu ki tana ʼu tisipulo. ʼI te ʼu ako takitahi ʼaia e tolu ʼe fakahā lelei ai he kalitātē ʼe maʼuhiga ʼaupitō kiā tātou, tāfito lā heʼe tou fai te meʼa ʼaē ʼe tou lavaʼi ʼi te tānaki ʼo te ʼu tisipulo ʼi totatou temi. Tou vakaʼi ia te ʼu kalitātē takitahi ʼaia.

ʼE Maʼuhiga Ia Te Agavaivai

4. Koteā ia te faʼifaʼitaki ʼaē neʼe fakaʼaogaʼi e Sesu moʼo fakahā ia te maʼuhiga ʼo te agavaivai?

⁴ Kotou fakakaukauʼi ia te ʼaluʼaga ʼaenī: Neʼe hoki ʼosi age pē te fihi ʼa te ʼu tisipulo moʼo ʼiloʼi peʼe ko ai ʼaē ʼe lahi age. ʼE ʼiloga ʼi tonatou ʼu fofoga tanatou femahalohaloʼaki pea mo tanatou felotokoviʼaki. Pea neʼe pāui e Sesu ia te kiʼi tamasiʼi ke tuʼu ʼi te lotolotoiga ʼo tana ʼu tisipulo. ʼI tana fakatokagaʼi age ia te kiʼi tamasiʼi, neʼe ʼui fēnei e Sesu: “Ko ʼaē ʼe ina fakamālalo anai ia ia ohagē ko te kiʼi tamasiʼi ʼaenī, ko ia ia ʼaē ʼe lahi tokotahi ʼi te puleʼaga ʼo selō.” (Lau ia Mateo 18:1-4.) Neʼe mole tonu ke maʼu e te ʼu tisipulo te manatu ʼa te mālama, ʼaē ʼe ina fakamaʼuhigaʼi he tahi mokā ʼe mālohi, mo maʼu koloa, pea mo maʼu tuʼulaga. Kae neʼe tonu ke mahino kiā nātou ʼe natou lalahi anai mo kapau ʼe natou ‘fakamālalo ifo ia nātou’ kiā mata ʼo te hahaʼi. Neʼe hoki tapuakina pē nātou e Sehova pea mo fakaʼaogaʼi nātou, mo kapau neʼe natou fakahā ia te agavaivai moʼoni.

5, 6. He koʼē ʼe tonu ke kotou agavaivai moʼo lagolago mālohi ki te tānaki ʼo te taʼukai? Kotou tuku mai he faʼifaʼitaki.

⁵ ʼI te temi nei, tokolahi ʼi te mālamanei ʼe natou faiga tāfito ke natou maʼu ia te mālohi, mo te ʼu koloa, pea mo he tuʼulaga. Koia, ʼe mole kei lahi tonatou temi peʼe mole kei ʼi ai pē lā honatou temi ki te ʼu gāue fakalaumālie. (Mat. 13:22) Kae ko te hahaʼi ʼa Sehova ʼe natou fiafia ʼi tanatou ‘fakamālalo ifo ia nātou’ kiā mata ʼo te hahaʼi, ke feala hanatou maʼu ia te tapuakina pea mo te ʼofa ʼo te Pule ʼo te taʼukai.—Mat. 6:24; 2 Ko. 11:7; Filp. 3:8.

⁶ Tou vakaʼi age muʼa ia te faʼifaʼitaki ʼo Francisco, ʼaē ʼe tagata ʼāfea ʼi Amelika Sautē. ʼI tana kei tūpulaga, neʼe mavae ʼi te univelesitē ke feala hana pioniē. ʼE ina ʼui fēnei: “ ʼI taku teuteu ʼohoana, neʼe feala pē ke au maʼu he gāue neʼe feala ai ke mā māʼuʼuli fīmālie ʼaupitō ʼi te faʼahi fakapaʼaga. Kae neʼe mā filifili ia he maʼuli faigafua pea ke mā hoko atu toko lua ia te selevisi temi kātoa. Ki muli age, neʼe maʼu tamā fānau, pea neʼe lahi ai mo tona ʼu faigataʼaʼia. Kae neʼe tokoni mai Sehova ke mā pipiki maʼu ki te tonu ʼaē neʼe mā fai.” ʼE fakaʼosi fēnei e Francisco: “Kua taʼu 30 tupu taku maʼu ia te pilivilēsio ʼaē ke au tagata ʼāfea, pea mo te tahi ʼu gāue makehe. Neʼe mole he temi neʼe au fakahemala ai ʼi taku fakafaigafua ʼo toku maʼuli.”

7. Neʼe kotou faigaʼi koa ke kotou maʼuliʼi ia te tokoni iā Loma 12:16? Pea neʼe koteā tona fua?

⁷ Kapau ʼe kotou fakafisi ki “te ʼu meʼa ʼaē ʼe māʼoluga” ʼo te mālama ʼaenī pea mo kotou tuku ke “taki koutou e te ʼu meʼa ʼaē ʼe agavaivai,” pea ʼe feala ke kotou ʼamanaki mo koutou ke kotou maʼu he tahi ʼu tapuakina pea mo he ʼu pilivilēsio ʼi te tānaki ʼo te taʼukai.—Loma 12:16; Mat. 4:19, 20; Luka 18:28-30.

Ko Te Faʼa Gāue ʼe Maʼu Ai He ʼu Tapuakina

8, 9. (a) Kotou fakamatala fakanounou ia te lea fakatātā ʼa Sesu ʼo te ʼu taleta. (b) Ko ai tāfito ʼaē ʼe feala ke fakalotomālohi ʼaki te lea fakatātā ʼaia?

⁸ Ko te tahi kalitātē ʼe tonu ke tou maʼu ke feala hatatou lagolago mālohi ki te tānaki ʼo te taʼukai ʼe ko te faʼa gāue. Neʼe fakamahino e Sesu ia te faʼahi ʼaia ʼaki ia te lea fakatātā ʼo ʼuhiga mo te ʼu taleta.a ʼE talanoa ia te lea fakatātā ʼaia ki he tagata, ʼi muʼa ʼo tana folau ki he tahi fenua, neʼe ina tuku tana ʼu koloa ki te ʼu tagata kaugana e toko tolu. Ki te ʼuluaki tagata kaugana neʼe ina foaki age taleta e nima pea ki te lua tagata kaugana ko taleta e lua; neʼe ina foaki age ki te tolu te taleta e tahi. ʼI te ʼosi mavae ʼo tanatou pule, ko te ʼuluaki pea mo te lua tagata kaugana neʼe nā faʼa gāue atu aipē pea neʼe nā ‘fakatuputupu te lahi’ ʼo te ʼu taleta ʼo tanā pule. Kae ko te tolu tagata kaugana neʼe “piko.” Neʼe ina tanu tana taleta ʼi te kele. ʼI te toe liliu mai ʼo tanatou pule, neʼe ina fakapale te ʼuluaki pea mo te lua tagata kaugana ke nā pule “ki he ʼu meʼa ʼe lahi.” Neʼe ina toʼo ia te taleta ʼaē neʼe ina foaki ki te tolu kaugana pea ina kapu ia ia mai tona loto fale.—Mat. 25:14-30.

⁹ ʼE mahino ia ʼe kotou loto moʼoni anai ke kotou faʼifaʼitakiʼi te ʼu tagata kaugana faʼa gāue ʼi te lea fakatātā ʼo Sesu pea mo kotou lagolago mālohi ki te gāue ʼaē ko te fai ʼo ni ʼu tisipulo, ʼo mulimuli ki takotou ʼu fealagia. Kae ʼe feafeaʼi mo kapau ko takotou ʼu ʼaluʼaga ʼe natou fakatuʼakoi ʼaupitō takotou ʼu gāue? Lagi ʼuhi ko te ʼu faigataʼaʼia fakaekonomika, ʼe tonu ai ke kotou gāue lolotoga ni ʼu hola moʼo taupau tokotou fāmili. Peʼe lagi ʼe mole kei kotou maʼu te mālohi ʼo te temi tūpulaga pea ʼe kotou mahamahaki. Kapau koia ʼaia, pea ʼe kotou maʼu anai ʼi te lea fakatātā ʼo te ʼu taleta ia he logo fakalotomālohi kiā koutou.

10. Neʼe fakahā feafeaʼi e te pule ʼi te lea fakatātā ʼo te ʼu taleta tana lotomahino, pea he koʼē ʼe ko he fakalotomālohi ʼaia kiā koutou?

¹⁰ Kotou tokagaʼi, ko te pule ʼo te lea fakatātā neʼe mahino ki te ʼu fealagia kehekehe ʼo tana ʼu tagata kaugana. Neʼe ina fakahā ia te faʼahi ʼaia ʼi tana foaki ia te ʼu taleta “ ʼo mulimuli pē ki te meʼa ʼe lavaʼi e te tagata takitokotahi.” (Mat. 25:15) Ohagē ko tana fakaʼamu kiai, neʼe lahi age te falā ʼaē neʼe fakatuputupu e te ʼuluaki tagata kaugana ʼi te lua tagata kaugana. Kae neʼe mahino ki te pule tanā faʼa gāue toko lua, he neʼe ina ʼui fēnei age kiā nāua ʼe nā “agalelei pea mo agatonu,” pea mo ina foaki age hanā fakapale tatau. (Mat. 25:21, 23) ʼO toe fēia pē, ko te Pule ʼo te taʼukai, ia Sehova ʼAtua, ʼe mahino kiā ia, ko te ʼu meʼa ʼaē ʼe kotou lava fai moʼo tauhi kiā te ia ʼe fakalogo ki tokotou ʼu ʼaluʼaga. ʼE mahino papau ia, ʼe loto fakafetaʼi anai pea mo ina fakapale anai takotou ʼu faiga ʼaē ʼe kotou fai ʼaki tokotou nefesi kātoa moʼo tauhi kiā te ia.—Mko. 14:3-9; lau ia Luka 21:1-4.

11. Kotou tuku mai he faʼifaʼitaki ʼe fakahā ai peʼe tou lava maʼu feafeaʼi he ʼu tapuakina lahi mokā tou faʼa gāue logolā ia te ʼu ʼaluʼaga faigataʼa.

¹¹ Ko te faʼifaʼitaki ʼo Selmira, ko te tuagaʼane ʼe maʼuli ʼi Pelesile, ʼe ina fakahā mai ʼe mole tonu pē ke tou fakatalitali ke tokalelei totatou ʼaluʼaga ke feala ai hatatou faʼa gāue ʼi te selevisi ʼa te ʼAtua. Iā taʼu e ʼuafulu ki muʼa atu, ko te ʼohoana ʼo Selmira neʼe matehi ʼi te hoko ʼo te kaihaʼa, pea neʼe ina taupau tokotahi tanā ʼu tamaliki e toko tolu. Neʼe fai menasi lolotoga ni ʼu hola pea neʼe gaʼegaʼe ʼi tana feʼaluʼaki ʼi te ʼu kā neʼe fonu ʼaupitō. Logolā ia te ʼu faigataʼaʼia ʼaia, kae neʼe ina fakatuʼutuʼu tana gāue ke feala ai hana toʼo ia te selevisi pioniē kātoa. Ko te toko lua ʼo tana ʼu tamaliki neʼe nā kau fakatahi mo ia ki ʼamuli ʼi te selevisi pioniē. ʼE ina ʼui fēnei: “ ʼAki te temi, ko hahaʼi ʼe ʼuafulu tupu neʼe natou ako ia te Tohi-Tapu mo au, pea kua natou liliu ko toku ‘fāmili.’ ʼO aʼu mai ki te temi nei, ʼe natou ʼoʼofa mai pea mo matou kaumeʼa. ʼE ko he koloa ʼe mole feala ke totogi ʼaki te paʼaga.” ʼE mahino mai, ko te Pule ʼo te taʼukai neʼe ina fakapale ia te faʼa gāue ʼo Selmira!

12. ʼE tou lava fakahā feafeaʼi tatatou faʼa gāue ʼi te gāue fai fakamafola?

¹² Kapau ko tokotou ʼu ʼaluʼaga ʼo te temi nei ʼe natou fakatuʼakoi tokotou temi ʼi te minisitelio, ʼe kei feala pē ke kotou fakatuputupu takotou lagolago ki te tānaki ʼo te taʼukai, ʼo kotou gāue ke toe lahi age te ʼu fua ʼo takotou minisitelio. Kā kotou mulimuli lelei ki te ʼu tokoni ʼaoga ʼo te Fono Gāue ʼaē ʼe fai ʼi te vāhaʼa fuli, ʼe kotou hikihiki anai takotou poto ʼi te fai fakamafola pea mo kotou maʼu anai he ʼu faʼahiga fai fakamafola foʼou. (2 Tim. 2:15) Pea kapau ʼe feala, kotou fetogi peʼe kotou tuku he ʼu gāue ʼe mole faʼa maʼuhiga, ke feala ai hakotou lagolago tuʼumaʼu ki te ʼu fakatuʼutuʼu ʼo te ʼu fono fai fakamafola ʼo te kōkelekāsio.—Kol. 4:5.

13. Koteā ia te faʼahi ʼaē ʼe maʼuhiga ʼaupitō moʼo gāueʼi pea mo taupau takotou faʼa gāue?

¹³ Kotou manatuʼi ko te faʼa gāue ʼe tupu mai he loto ʼe fonu ʼi te loto fakafetaʼi. (Pes. 40:8) Ko te tolu tagata kaugana ʼaē ʼe talanoa ki ai ʼi te lea fakatātā ʼa Sesu neʼe mataku ʼi tona pule, heʼe ʼi tana manatu ʼe ko he tagata ʼe ina fakamaʼua age he ʼu tuʼuga meʼa pea ʼe mole lotomahino. Koia lā ʼaē neʼe ina tanu ai ia tana taleta, kae mole ina fakaʼaogaʼi moʼo fakatuputupu ia te ʼu koloa ʼo tona pule. Ke ʼaua naʼa tou fakaʼaoʼaoganoa ohagē ko te tagata kaugana ʼaia, ʼe tonu ke tou maʼu pea mo taupau ia he ʼu felōgoi ʼofa mo Sehova, te Pule ʼo te taʼukai. Kotou fakaʼaogaʼi hokotou temi ki te ako pea mo kotou metitāsio ki tona ʼu kalitātē taulekaleka, ohagē ko tona ʼofa, mo tona faʼa kātaki, pea mo tona manavaʼofa. Kapau ʼe kotou fai ia te faʼahi ʼaia, ʼe uga anai koutou e tokotou loto ke kotou fai te meʼa ʼaē ʼe kotou lavaʼi ʼi te tauhi kiā Sehova.—Luka 6:45; Filp. 1:9-11.

“ ʼE Tonu Ke Kotou Māʼoniʼoni”

14. Koteā te fakamaʼua maʼuhiga ʼe tonu ke mulimuli kiai nātou ʼaē ʼe fia gāue ʼi te tānaki ʼo te taʼukai?

¹⁴ ʼI tana fakaʼaogaʼi ia te ʼu palalau ʼaē ʼe tuʼu ʼi te ʼu Koga Tohi Fakahepeleo, ʼe fakahā e te ʼapositolo ko Petelo ia te finegalo ʼo te ʼAtua ʼo ʼuhiga mo tana ʼu kaugana ʼi te kele, ʼo ina ʼui fēnei: “ ʼO ʼalutahi mo te Māʼoniʼoni ʼaē neʼe ina pāuiʼi koutou, mo koutou foki ke kotou liliu ʼo māʼoniʼoni ʼi takotou aga kātoa, he neʼe tohi fēnei: ‘ ʼE tonu ke kotou māʼoniʼoni, heʼe au māʼoniʼoni.’ ” (1 Pet. 1:15, 16; Lev. 19:2; Teu. 18:13) ʼE fakahā lelei ʼi te ʼu palalau ʼaia, ko te kau gāue ʼo te tānaki taʼukai ʼe tonu ke natou maʼa ʼi te aga ʼaē ʼe tonu ke fai pea mo te faʼahi fakalaumālie. ʼE feala ke tou mulimuli ki te fakamaʼua maʼuhiga ʼaia ʼaki tatatou fai, ʼi hona ʼaluʼaga fakatā, he ʼu fakatuʼutuʼu ke fakamaʼa tātou. ʼE lava fakahoko feafeaʼi ia te faʼahi ʼaia? ʼAki ia te tokoni ʼa te folafola ʼo te moʼoni ʼaē ʼe haʼu mai te ʼAtua.

15. Koteā ʼaē ʼe lava fakahoko maʼa tātou e te moʼoni ʼo te folafola ʼa te ʼAtua?

¹⁵ Ko te folafola ʼo te moʼoni ʼaē ʼe haʼu mai te ʼAtua ʼe fakatatau ki te vai ʼaē ʼe ina fakamaʼa. Ohagē lā, neʼe tohi e te ʼapositolo ko Paulo ko te kōkelekāsio ʼa te kau Kilisitiano fakanofo ʼe maʼa kiā mata ʼo te ʼAtua, ʼe hagē ko he fafine ʼohoana maʼa ʼo Kilisito, ʼaē neʼe fakamaʼa “ ʼi te vai ʼaki te folafola . . . ke māʼoniʼoni pea mole heʼe mele.” (Efe. 5:25-27) ʼI muʼa atu, neʼe toe talanoa mo Sesu ki te lava fakamaʼa ʼa he tahi ʼaki te folafola ʼa te ʼAtua, pea ʼe ko te folafola ʼaia ʼaē neʼe ina tala. ʼI tana palalau ki tana ʼu tisipulo, neʼe ʼui fēnei e Sesu: “ ʼE kua kotou ʼosi maʼa ʼuhi ko te folafola ʼaē neʼe au tala atu kiā koutou.” (Soa. 15:3) Koia, ko te moʼoni ʼo te folafola ʼaē ʼe haʼu mai te ʼAtua ʼe ina lava fakamaʼa ʼi te faʼahi fakalaumālie pea mo te aga ʼaē ʼe tonu ke fai. ʼE hoki tali anai tatatou tauhi ki te ʼAtua mo kapau ʼe tou tuku ke fakamaʼa fēia tātou e te moʼoni ʼo te ʼAtua.

16. ʼE tou lava nonofo maʼa feafeaʼi ʼi te faʼahi fakalaumālie pea mo te aga ʼaē ʼe tonu ke fai?

¹⁶ Koia, ke tou liliu ko he kau gāue ʼi te tānaki ʼo te taʼukai ʼa te ʼAtua, ʼe tonu muʼa ke tou pulihi ʼi totatou maʼuli ia te ʼu aga fuli ʼaē ʼe ʼuli ʼi te faʼahi fakalaumālie pea mo fakafeagai ki te ʼu lao ʼa te ʼAtua. ʼEī, ke feala hatatou haga maʼu ia te pilivilēsio ke tou gāue ʼi te tānaki ʼo te taʼukai, ʼe tonu ke tou tuku he faʼifaʼitaki lelei ʼi te fakamaʼuhigaʼi ʼo te ʼu lēkula māʼoluga ʼa Sehova ʼo ʼuhiga mo te aga ʼaē ʼe maʼa pea mo te ʼu kalitātē fakalaumālie. (Lau ia 1 Petelo 1:14-16.) Ohagē pē ko tatatou tōkakaga tuʼumaʼu ʼaē ke tou maʼa ʼi te faʼahi fakasino, ʼe tonu ke fakamaʼa tuʼumaʼu tātou e te folafola ʼo te moʼoni ʼa te ʼAtua. Koia ʼaē ʼe tonu ai ke tou lau ia te Tohi-Tapu pea mo kau ki te ʼu fono Fakakilisitiano. ʼE toe maʼua foki ke tou faiga fakamālotoloto ke tou maʼuliʼi ia te ʼu fakamanatu ʼa te ʼAtua. Kapau ʼe tou fai ia te ʼu faʼahi ʼaia, pea ʼe feala anai ke tou tauʼi ia tatatou ʼu vaivaiʼaga pea mo te mālohi heʼe maʼa ʼo te mālamanei. (Pes. 119:9; Sake 1:21-25) ʼEī, ʼi meʼa fakalotofīmālie tatatou ʼiloʼi, ʼaki ia te tokoni ʼa te folafola ʼo te moʼoni ʼa te ʼAtua, ʼe feala ke “fakamaʼa” tātou, māʼia mai he agahala mamafa neʼe tou fai!—1 Ko. 6:9-11.

17. Ke feala hatatou nonofo maʼa, ko te ʼu tokoni Fakatohi-tapu fea ʼaē ʼe tonu ke tou tokagaʼi?

¹⁷ ʼE kotou tali koa ke fakamaʼa tokotou maʼuli ʼaki te folafola ʼo te moʼoni ʼa te ʼAtua? Ohagē lā, ʼe kotou tali feafeaʼi mokā fakatokagaʼi atu ia te ʼu tuʼutāmaki ʼo ʼuhiga mo te ʼu fakafiafia heʼe maʼa ʼo te mālamanei? (Pes. 101:3) Kapau ʼe kotou sio ʼe mole hona ʼaoga, pea ʼe kotou tekeʼi koa takotou fakatahi mo tokotou ʼu kaugā ako pea mo tokotou ʼu kaugā gāue ʼaē ʼe mole kotou tauhi fakatahi kiā Sehova? (1 Ko. 15:33) ʼE kotou faiga moʼoni koa ke kotou tauʼi tokotou ʼu vaivaiʼaga ʼaē ʼe feala ke natou fakaliliu koutou ke kotou heʼe maʼa kiā mata ʼo Sehova? (Kol. 3:5) ʼE kotou fakamamaʼo koa mai te ʼu fihi fakapolitike ʼo te mālamanei pea mo te tauhi fakavale ki te fenua ʼaē ʼe maʼu ʼi te ʼu tuʼuga faigaoʼi fakataupiepie?—Sake 4:4.

18. Kapau ʼe tou maʼa ʼi te aga ʼaē ʼe tonu ke fai pea mo maʼa ʼi te faʼahi fakalaumālie, ʼe tokoni feafeaʼi mai anai ke tou maʼu he ʼu fua lelei ʼi tatatou tānaki ia te taʼukai?

¹⁸ Kapau ʼe kotou fakalogo agatonu ʼi te ʼu faʼahi ʼaia, ʼe kotou maʼu anai ia he ʼu fua lelei. ʼI tana fakatatau tana ʼu tisipulo fakanofo ki he ʼu vaʼa ʼo he fuʼu vite, neʼe ʼui fēnei e Sesu: “Ko te ʼu vaʼa fuli pē iā te au ʼe mole hona fua, [ko taku Tamai] ʼe ina toʼo ia, pea ko te ʼu vaʼa fuli pē ʼaē ʼe fua, ʼe ina fakamaʼa ia, ke toe lahi ake hona fua.” (Soa. 15:2) Kapau ʼe kotou tuku ke fakamaʼa koutou e te vai fakamaʼa ʼo te moʼoni ʼo te Tohi-Tapu, ʼe kotou fua anai ʼo lahi ake.

Ko Te ʼu Tapuakina ʼi Te Temi Nei Pea ʼi Te Kā Haʼu

19. Neʼe tapuakina feafeaʼi ia te ʼu tisipulo ʼa Sesu ʼi tanatou ʼu faiga ʼaē moʼo tānaki ʼo te taʼukai?

¹⁹ Ko te ʼu tisipulo agatonu ʼaē neʼe natou tali ke akoʼi nātou e Sesu, neʼe natou maʼu ki muli age ia te mālohi ʼaki ia te laumālie māʼoniʼoni ʼi te Penikositē ʼo te taʼu 33 ʼo totatou temi, ke natou liliu ko he ʼu fakamoʼoni “ ʼo kaku ki te potu taupotu ʼo te kele.” (Gāue 1:8) Neʼe natou liliu ko he ʼu tehina ʼe gāue ʼi te kolesi pule, mo misionea, pea mo tagata feʼoloʼaki, pea neʼe maʼuhiga tanatou gāue moʼo fakamafola ia te logo lelei “ki te ʼu fakatupu fuapē ʼi te lalo lagi.” (Kol. 1:23) ʼI tapuakina lahi neʼe natou maʼu, pea ʼi toe fiafia lahi neʼe natou foaki ki ʼihi atu!

20. (a) Koteā ia te ʼu tapuakina ʼaē kua kotou maʼu ʼi takotou lagolago mālohi ʼaē ki te tānaki ʼo te taʼukai fakalaumālie? (b) Koteā te tonu ʼaē kua kotou loto papau kiai?

²⁰ ʼEī, kapau ʼe tou fakahā ia te agavaivai, mo tou faʼa gāue, pea mo fakamaʼuhigaʼi ia te ʼu lēkula māʼoluga ʼo te Folafola ʼa te ʼAtua, ʼe tou haga hoko atu anai tatatou lagolago mālohi ki te tānaki lahi ʼo te taʼukai fakalaumālie ʼaē ʼe lolotoga fai nei. Ko te hahaʼi tokolahi ʼe natou māʼuʼuli mamahi pea ʼe mole natou fiafia ʼi te faʼahiga maʼuli koloaʼia pea mo fakafiafia ʼo te mālamanei, kae ʼe tou maʼu tātou ia te fiafia moʼoni pea mo te maʼuli fakafeʼauga. (Pes. 126:6) Ko te meʼa ʼaē ʼe maʼuhiga tāfito, heʼe ko tatatou “gāue ʼe mole vaʼiganoa ʼo ʼuhiga mo te ʼAliki.” (1 Ko. 15:58) Ko te Pule ʼo te taʼukai, ia Sehova ʼAtua, ʼe ina tapuakina anai tātou ʼo talu ai ʼuhi ko ‘tatatou gāue pea mo te ʼofa ʼaē neʼe tou fakahā ʼo ʼuhiga mo tona huafa.’—Hep. 6:10-12.

[Nota]

ʼE Kei Kotou Manatuʼi Koa?

ʼI takotou faiga ke kotou lagolago mālohi ki te tānaki ʼo te taʼukai . . .

• he koʼē ʼe maʼuhiga ke kotou agavaivai?

• ʼe lava feafeaʼi hakotou gāueʼi pea mo taupau takotou faʼa gāue?

• he koʼē ʼe maʼuhiga ke kotou taupau te ʼu aga ʼe maʼa pea mo kotou maʼa ʼi te faʼahi fakalaumālie?

[Paki ʼo te pasina 25]

Ko te agavaivai ʼe tokoni mai ke tou fakafaigafua totatou maʼuli ke feala hatatou tōkakaga tāfito ki te ʼu gāue ʼo te Puleʼaga