Te ʼu Tupuʼaga ʼo Tatatou Tatuʼu Tuʼumaʼu Ki Te Hahaʼi
1. Koteā te fehuʼi ʼe lagaʼi ʼo ʼuhiga mo tatatou gāue fai faka mafola?
1 ʼE lahi te ʼu kolo, ʼe tou fai tuʼumaʼu ai tatatou gāue fai faka mafola. ʼE tou tatuʼu tuʼumaʼu ki te hahaʼi, logolā neʼe lagi fakahā mai e te tagata peʼe ko te fafine tana mole loto ʼaē ki te logo. He koʼē ʼe tou tatuʼu ʼo ʼaʼahi te hahaʼi ʼaē neʼe mole natou tali leleiʼi tātou ʼi tatatou ʼaʼahi fakamuli ia nātou?
2. Koteā te tupuʼaga tāfito ʼo tatatou faʼa kātaki ʼi te minisitelio?
2 Totatou ʼOfa Kiā Sehova Pea Mo Te Hahaʼi: Ko te tupuʼaga tāfito ʼo tatatou faʼa kātaki ʼi te minisitelio ʼe ko totatou ʼofa ʼaē kiā Sehova. ʼE uga tātou e totatou loto ke tou haga palalau ki te hahaʼi ʼo ʼuhiga mo totatou ʼAtua lahi. (Luka 6:45) Ko totatou ʼofa kiā Sehova ʼe ina uga tātou ke tou fakalogo ki tana ʼu fakatotonu pea mo tokoni ki te hahaʼi ke natou fai fēia mo nātou. (Taag. 27:11; 1 Soa. 5:3) Tatau aipē peʼe mole tali leleiʼi tātou e te hahaʼi, kae ʼe tou agatonu aipē ʼo faʼa kātaki ʼi te gāue ʼaia. Logopē lā te fakatagaʼi ʼo te ʼu Kilisitiano ʼo te ʼuluaki sēkulō, kae neʼe natou haga faka mafola “tuʼumaʼu pē.” (Gāue 5:42) Kā mole fia fakalogo te hahaʼi ki te logo ʼaē ʼe tou faka mafola, ʼe mole tou lotovaivai ai anai, kae ʼe tou nonofo mālolohi, ʼo tou fakahā te loloto ʼo totatou ʼofa pea mo tatatou tauhi ʼaē kiā Sehova.
3. ʼE tokoni feafeaʼi mai anai ia te ʼofa ʼaē ki te hahaʼi ke tou haga fai faka mafola?
3 ʼE tou toe faʼa kātaki heʼe tou ʼoʼofa ki totatou kāiga. (Luka 10:27) ʼE mole loto e Sehova ke fakaʼauha hina tahi. (2 Pet. 3:9) Māʼiapē lā ʼi he telituale ʼe fai tuʼumaʼu, ʼe kei tou maʼu aipē ni ʼu hahaʼi ʼe natou fia tauhi kiā Sehova. Ohagē lā ʼi Kuatelupe, ʼaē ko te Fakamoʼoni ʼa Sehova e 1 ʼi te toko 56 hahaʼi ʼo te motu, neʼe ko toko 214 hahaʼi neʼe papitema ʼi te taʼu ʼaenī kua hili. Ko te teitei toko 20 000 tupu hahaʼi neʼe kau ki te ʼAho Fakamanatu, ʼo fakafuafua ai ko te toko 1 ʼi te toko 22 hahaʼi ʼo te motu ʼaia neʼe kau kiai!
4. Ko te ʼu fetogi fea ʼe feala ke hoko ʼi he telituale?
4 Te ʼu Fetogi ʼi Te Telituale: ʼE tou felāveʼi tuʼumaʼu pē mo te ʼu hahaʼi foʼou ʼi totatou telituale. Ko te ʼapi ʼaenī ʼe tou fai neʼe mole natou tali leleiʼi tātou ʼi tatatou ʼaʼahi fakamuli, kae ʼi te temi leva ʼaenī lagi ko he tahi age ʼo te fāmili ʼaē ʼe ina ʼavahi mai te matapā, pea neʼe mole heʼeki logo ia ki tatatou fai faka mafola. Peʼe lagi feala ke tou maʼu he ʼu hahaʼi foʼou ʼo te ʼapi ʼe natou fia logo anai ki tatatou fai faka mafola. Ko he fānau ʼa he ʼu mātuʼa ʼe mole natou tali te logo, ʼe natou lahilahi ake anai pea mo mavae ʼi te loto fale. ʼE lagi natou tali anai te logo ʼo te Puleʼaga.
5. Ko te ʼu tupuʼaga fea ʼaē ʼe feala ai ki te hahaʼi ke natou fia logo ki te moʼoni?
5 ʼE toe fetogi mo te hahaʼi. ʼI te temi muʼa, ko te ʼapositolo ko Paulo “nee ko he tagata laukovi, nee ko he fai fakataga, mo pauʼu.” (1 Tim. 1:13, Tauhi Foou) ʼO toe fēia mo te tokolahi ʼaē ʼe natou tauhi kiā Sehova ʼi te temi nei, neʼe mole natou fia logo ki te moʼoni ʼi te temi muʼa. Ko ʼihi lagi neʼe natou fakafeagai ki te logo lelei, kae ʼaki te fetogi ʼo te ʼu ʼaluʼaga ʼo te mālamanei, kua natou fia logo ki tatatou fai faka mafola. Ko ʼihi kua natou fia logo leva ki tatatou fai faka mafola, heʼe lagi neʼe hoko kiā nātou he tuʼutāmaki: ko he tahi neʼe mate ʼi te fāmili, ko te mole kei ʼi ai ʼo he gāue, ko he fihifihia faka paʼaga, peʼe ko he mahaki.
6. He koʼē ʼe tonu ke tou haga fai faka mafola ʼaki he loto fiafia?
6 Ko te tuʼu ʼo te ʼu faʼahiga meʼa ʼaenī kua vave pē tona pulihi, kae ko tatatou ia gāue fai faka mafola pea mo tatatou ia faiako ʼe vave pē tona tuputupu. (Isa. 60:22) Koia, ʼe tou haga fai faka mafola ai ʼaki he loto fiafia pea mo tou faiga ai ke tou taupau he manatu ʼe lelei. Heʼe lagi ko ia ʼaē kā tou felāveʼi anai mo ia, ʼe fia logo anai ki tatatou fai faka mafola. Tou haga palalau ki te hahaʼi! ‘ ʼI tatatou fai fēia, ʼe tou haofaki ai anai ia tātou pea mo nātou ʼaē ʼe fakalogo mai.’—1 Tim. 4:16.