He Koʼe ʼe Tonu Ke Tou Haga Fai Faka Mafola?
1 Kua fualoa koa te fakahoko ʼo te gāue fai faka mafola ʼo te Puleʼaga ʼi tokotou kolo? (Mat. 24:14) Kapau koia, pea ʼe lagi koutou manatu kua gāueʼi lelei te telituale ʼo takotou kokelekasio. Ka koutou fai faka mafola ʼi te temi nei, ʼe lagi koutou felāveʼi mo he ʼu hahaʼi tokolahi ʼe hage ʼe mole kei nātou fia logo ki te logo ʼo te Puleʼaga. Kapau koia, koutou tokagaʼi te ʼu palalau ʼaenī ʼo ʼuhiga mo te ʼu tisipulo moʼoni ʼa Sesu, ʼi te tohi La prophétie dʼIsaïe, lumière pour tous les humains II, ʼi te pasina 141: “ ʼI ʼihi koga meʼa, ʼe hage ʼe veliveli te fua ʼo tanatou minisitelio mokā fakatatau ki tanatou gāue kinakina pea mo tanatou ʼu faiga. Kae ʼe nātou kātakiʼi.” Kae he koʼe koa ʼe tonu ke tou haga fai faka mafola?
2 Tou Manatuʼi Ia Selemia: Ko tatatou kātaki ʼi te gāue fai faka mafola, ʼe mole fakalogo ia ki te tali peʼe ki te mole tali ʼa te hahaʼi. Neʼe fai faka mafola ia Selemia ia taʼu e 40 ʼi tana telituale, logola neʼe ko te tokosiʼi neʼe nātou fakalogo kia ia, pea tokolahi neʼe nātou fakafeagai ki tana logo. He koʼe neʼe faʼa kātaki ia Selemia? He neʼe ina fai te gāue ʼaē neʼe fakatotonu age e te ʼAtua ke ina fai, pea ʼi tana ʼiloʼi ʼaē te meʼa ʼaē ka ʼamanaki hoko ʼi te ka haʼu, neʼe uga ia ia ke haga palalau ʼaki he lototoʼa.—Sel. 1:17; 20:9.
3 ʼE toe feiā mo tatou ia ʼaho nei. Ko Sesu neʼe ina “fakatotonu mai kia [tatou] ke [tou] fakaha ki te hahai pea mo fakamooni, e ko ia ae kua hinoi e te Atua ko te Tuʼi fakamau o te hahai mauli mo te hahai mate.” (Gaue 10:42) Ko te logo ʼaē ʼe tou tala ʼe fakalogo kiai te maʼuli peʼe ko te mate ʼo nātou ʼaē ʼe fagono kiai. ʼE fakamāuʼi anai te hahaʼi ʼo mulimuli ki tanatou faʼahiga tali te logo lelei. Koia, ʼe ko totatou maʼua ke tou mulimuli ki te meʼa ʼaē neʼe fakatotonu mai ke tou fai. Tatau aipe peʼe mole fia fakalogo te hahaʼi, kae ʼe ko te fealagia ʼaia ke tou fakahā tatatou ʼofa lahi kia nātou pea mo tatatou tauhi katoa kia Sehova, ʼo tou haga fai te meʼa ʼaē ʼe tonu ke tou fai. Kae ʼe mole gata ai.
4 ʼE Fua Lelei Kia Tatou: Ko te fai ʼo te finegalo ʼa te ʼAtua, tatau aipe peʼe feafeaʼi tona tali ʼi te telituale, ʼe tou maʼu ai te tokalelei ʼo te loto pea mo te fiafia, ʼaē ʼe mole tou lava maʼu ʼi he tahi age faʼahi. (Pes. 40:8) ʼE tou maʼu he ʼuhiga moʼoni ki totatou maʼuli. Kapau ʼe lahi tatatou kau ki te minisitelio, pea ʼe toe tokaga lahi anai totatou loto pea mo totatou ʼatamai ki te ʼamanaki pea mo te fiafia ʼi te maʼuli ʼi te mālama foʼou ʼa te ʼAtua. Kapau ʼe tou taupau te ʼu fakapapau ʼaia ʼo te Tohi-Tapu, pea ʼe tou mālohi ai ʼi te faʼahi fakalaumālie pea mo fakaloto mālohi ai tatatou ʼu felogoi mo Sehova.
5 Tatau aipe mo kapau ʼe mole tou sio neinei ki te ʼu fua ʼo tatatou gāue fai faka mafola, kae neʼe kua lagi to te moʼoni ʼi te loto ʼo he tahi, pea ʼe tuputupu ake anai ʼi te temi ʼaē neʼe fakatotonu kiai e Sehova. (Soa. 6:44; 1 Ko. 3:6) ʼE mole he tahi ia tatou ʼe ina ʼiloʼi pe ko te tokofia anai kei toe ke fakahā kia nātou te Puleʼaga ʼaki te ʼu faiga ʼa te hahaʼi ʼa Sehova, ʼi tatatou telituale peʼe ʼi te malamanei.
6 Tāfito ʼi te temi nei, ʼe maʼuhiga ke tou tokaga ki te fakatotonu ʼaenī ʼa Sesu: “Koutou tokaga, koutou alaʼala, koteuhi e mole koutou iloi, pe ko te temi fea. Ko te mea e au tala atu kia koutou, e au tala ki te hahai fuape : koutou alaʼala.” (Mko. 13:33, 37) Koia ʼofa pe ke tou haga tala te logo lelei ʼo te Puleʼaga, ʼo tou fakafiafia te loto ʼo Sehova ʼi tatatou kau ki te tāpuhā ʼo tona huafa lahi pea mo maʼoniʼoni.