Fakamanatu ʼo Te Ako Faka Teokalatike

Ko te ʼu fehuʼi ʼaenī, ʼe vakaʼi anai ʼi te fai palalau ʼo te fakamanatu ʼo te Ako Faka Teokalatike lolotoga te vāhaʼa ʼaē ʼe kamata ʼi te ʼaho 27 ʼo Fepualio 2006. Ko te taupau ʼo te ako ʼe ina fai anai te fakamanatu ia minuta e 30, ʼo fakatafito ki te ʼu akonaki ʼaē neʼe vakaʼi ʼi te ʼu vāhaʼa ʼo te ʼaho 2 ʼo Sānualio ʼo aʼu ki te ʼaho 27 ʼo Fepualio 2006. [Nota: Ko te ʼu fehuʼi ʼaē ʼe mole tuʼu ai he tohi ke vakaʼi, ʼe koutou fai anai e koutou totonu hakotou ʼu kumi moʼo maʼu te ʼu tali.​—Vakaʼi te tohi École du ministère pp. 36-37.]

HE KALITĀTĒ KI TE FAIAKONAKI

1. ʼE tokoni feafeaʼi mai ia te Ako Faka Teokalatike ke tou ‘momoli ki te ʼAtua he sākilifisio fakavikiviki pea mo fai he palalau ʼo ʼuhiga mo tona huafa iā muʼa ʼo te kaugamālie’? (Hep. 13:15) [be p. 5 pal. 3–p. 6 pal. 1]

2. He koʼe ʼe tonu ke tou faigaʼi ke totonu tatatou lautohi? [be p. 83 pal.1-5]

3. He koʼe ʼe maʼuhiga ke mahino lelei tatatou ʼu palalau mokā tou fai palalau pea mo faiakonaki? [be p. 86 pal. 1-6]

4. He koʼe ʼe maʼuhiga ke tou puʼaki fakalelei te ʼu kupuʼi palalau, pea koteā ʼaē ʼe tonu ke tou fakatokagaʼi? [be p. 89 pal. 1-p. 90 pal. 3, te fakamatala ʼaē ʼe ʼātakai]

5. Koteā te ʼu tokoni ʼaē ʼe feala ai ke tou mulimuli kiai ke mole tuta tatatou ʼu palalau? [be p. 94 pal. 4-5, te fakamatala ʼaē ʼe ʼātakai]

AKONAKI NO. 1

6. ʼE fakamoʼoni feafeaʼi ia 2 Fakamatala 36:​17-23 ʼe feala hatatou falala ki te ʼu lea faka polofeta ʼo te Tohi-Tapu? [si p. 85 pal. 35]

7. Koteā te ʼu meʼa ʼaē neʼe hoko, ʼo feala ki te kau Sutea ke nātou toe liliu ki tonatou fenua ʼi te taʼu 537 ʼi muʼa ʼo totatou temi, moʼo toe laga ia te ʼapi ʼo Sehova? [si p. 85 pal. 1-p. 86 pal. 3]

8. ʼE fakahā feafeaʼi ʼi te tohi ʼo Esitalasi ʼe ko Sehova ia te ʼAtua moʼoni, pea mo ina uga feafeaʼi tatou ke tou falala kiā te ia? [si p. 87 pal. 14; p. 88 pal. 18]

9. He koʼe ʼe maʼuhiga “te ʼuafulu taʼu ʼo te nofo hau ʼo Atasease” ʼi te hōloga ʼo te temi ʼo te Tohi-Tapu? (Neh. 2:​1, 5, 6, 11, 17, 18) [si p. 88 pal. 2, p. 89 pal. 5]

10. Koteā te faʼifaʼitaki lelei ʼaē neʼe tuku mai e Nehemia ki te ʼu kaugana ʼo te ʼAtua ʼo te temi nei? [si p. 91 pal. 16-17]

LAU ʼO TE TOHI-TAPU

11. Ko te kau Iselaele ʼaē neʼe mavae mai Papiloni, neʼe nātou nonofo koa mo te Ulime pea mo te Tumime ʼaē neʼe fakaʼaogaʼi moʼo ʼiloʼi te tali ʼa Sehova? (Esita. 2:​61-63)

12. He koʼe neʼe tokolahi ia te kau Sutea ʼaē neʼe lotolotolua ki te toe liliu ki Selusalemi mo Esitalasi? (Esita. 7:​28–8:⁠20)

13. Neʼe lava feafeaʼi ki te kau gāue hanatou toe laga ia te ʼu kaupā ʼaki he nima pe e tahi? (Neh. 4:​17, 18)

14. ʼI te agamāhani ko te ʼu tohi maʼuhiga neʼe fakamaʼu ʼi he sila, kae he koʼe koa neʼe momoli e Sanapalate kiā Nehemia “he tohi neʼe mole pupunu”? (Neh. 6:⁠5)

15. ʼO hilifaki ki ‘te ʼu valoki’ ʼaē neʼe ina fai ki te kau Sutea, ohage ko tana valokiʼi ia te ʼu tama ʼaliki pea mo te kau ʼaliki, koteā te tahi meʼa ʼaē neʼe fai e Nehemia? (Neh. 13:​25, 28)