Te ʼu Tonu

◼ Te tufa ʼo te māhina ʼo Malesio: Te tohi foʼou Koteā ʼAē ʼe Akoʼi Moʼoni Mai ʼi Te Tohi-Tapu? Koutou faiga ke koutou kamata ʼaki he ʼu ako Tohi-Tapu. ʼApelili Mo Maio: Te Tule Leʼo pea mo te Réveillez-vous ! Ka koutou ʼaʼahi te ʼu hahaʼi ʼaē neʼe fia logo, ʼo feiā mo nātou ʼaē neʼe kau ki te ʼAho Fakamanatu peʼe ki he tahi age fakatahi, kae mole nātou kau ki te kokelekasio, koutou faiga tāfito ke koutou tufa te tohi foʼou Koteā ʼAē ʼe Akoʼi Moʼoni Mai ʼi Te Tohi-Tapu? ʼE tonu ke tou fakatuʼutuʼu ke tou kamata he ako Tohi-Tapu ʼaki te tohi ʼaia. Sūnio: Te tohi Te Manuʼia Faka Famili peʼe ko te tohi Te ʼAtamai Mālama.

◼ Mai tona ʼaluʼaga ʼaē ko fakaʼosi vāhaʼa e nima ʼi ʼApelili, ʼe ko he māhina lelei ʼaia ke kita pionie vaeluaʼi temi.

◼ ʼE fai anai te ʼAho Fakamanatu ʼi te Feliafā ʼaho 12 ʼo ʼApelili 2006. Kapau ʼi te agamāhani, ʼe fono takotou kokelekasio ʼi te ʼaho ʼaia, pea ʼe tonu anai ke fai takotou fono ʼaia ʼi he tahi ʼaho ʼo te vāhaʼa, mo kapau ʼe ava te Fale ʼo Te Puleʼaga. Kapau ʼe mole feala pea kapau ʼe mole fai anai takotou Fono Gāue, pea ko te ʼu koga ʼaē ʼe ʼaoga tāfito ki takotou kokelekasio ʼe fai anai ʼi he tahi Fono Gāue.

◼ ʼE tonu ke foimo tufa e te ʼu kokelekasio te ʼu Tule Leʼo pea mo te ʼu Réveillez-vous ! foʼou ʼi te temi pe ʼaē ʼe tau mai ai. Heʼe feala ai anai ki te kau fai faka mafola ke nātou ʼiloʼi lelei te ʼu nusipepa ʼi muʼa ʼo tanatou tufa ʼi te telituale. ʼO feiā mo Te Minisitelio ʼo Te Puleʼaga, ke foimo tufa mokā tau mai. Pea ʼe feala ke tufa ʼi te ʼu Ako Tohi.

◼ ʼI he Fono Gāue ʼo Maio, ʼe fai anai he faifai palalau ki te foʼi ʼata viteo Noé : il marchait avec Dieu. Kapau ʼe ʼaoga, koutou foimo fakaʼui ʼi tokotou kokelekasio ia te foʼi fime ʼaia.

◼ ʼE mole tali anai e te filiale ia te ʼu kole takitokotahi ʼa te kau fai faka mafola ʼo ʼuhiga mo ni ʼu tohi faka Tohi-Tapu. ʼI te māhina fuli, ʼe tala anai te faʼahi ʼaia e te taupau pelesita ʼi muʼa ʼo te momoli ki te filiale ia te ʼu fakaʼui tohi ʼa te kokelekasio. ʼE feala ai anai ki te nofoʼaki ke nātou fakaʼui tanatou ʼu tohi ki te tēhina ʼaē ʼe tokaga ki te ʼu tohi. Koutou manatuʼi peʼe ko te ʼu tohi fea ʼaē ʼe fakaʼui ʼaki he kole makehe.