ʼAua Naʼa Puli Te ʼOfa ʼAē Neʼe Kotou Maʼu ʼi Te Kamata
1 Ko Sesu, ʼi tona kolōlia, neʼe ina fai te tokoni ʼaenī ki te kōkelekāsio ʼo te ʼuluaki sēkulō ko Efeso: “Koʼenī te meʼa ʼaē ʼe au koviʼia ai ia koe, heʼe kua ke liʼaki te ʼofa ʼaē neʼe ke maʼu ʼi te kamata.” (Apk. 2:4, MN ) ʼE hā mai ai, ʼe tokolahi neʼe mole kei natou maʼu tonatou ʼofa ʼaē kiā Sehova ʼi te kamata. ʼI te temi ʼaē neʼe tou ʼiloʼi ai te moʼoni, neʼe tou ʼoʼofa mālohi ai ki te ʼAtua pea mo totatou tatau, pea neʼe uga ai tātou e totatou loto ke tou tala ʼaki he faʼafai ia te ʼamanaki foʼou ʼaia. Koteā ʼaē kā tokoni mai anai ke mole puli ia totatou ʼofa ʼaē neʼe tou maʼu ʼi te kamata pea ke mole siʼisiʼi ai tatatou minisitelio?
2 Te Ako Takitokotahi Pea Mo Tatatou ʼOlo Ki Te ʼu Fono: ʼI tatatou kamata ʼiloʼi ia te moʼoni, koteā ʼaē neʼe tupu ai totatou ʼofa ki te ʼAtua pea mo te hahaʼi? Neʼe mole tupu koa lā ko te ʼu meʼa fuli ʼaē neʼe tou ako ʼo ʼuhiga mo Sehova ʼi te Tohi-Tapu? (1 Soa. 4:16, 19) Koia, “ke lesili lahiʼage” totatou ʼofa, ʼe tonu ke tou haga ako ke tou maʼu ia te ʼatamai mālama totonu, ʼo tou vakavakaʼi ia te ʼu “mea loloto o te Atua.”—Filp. 1:9-11; 1 Ko. 2:10.
3 Ko te taupau ʼo he polokalama ako ʼe lelei, ʼe feala ke faigataʼa moʼoni ʼi te ʼu ʼaho fakamuli ʼaenī, heʼe lahi ai te ʼu tuʼania pea mo te ʼu faʼahi ʼe natou fakaleluʼi ai tātou. (2 Tim. 3:1) ʼE tonu ke tou fakatuʼutuʼu he temi ke tou kai ki te meʼa kai fakalaumālie. Ko te ʼolo tuʼumaʼu ki te ʼu fono ʼe toe maʼuhiga foki, tāfito lā ʼi tatatou “mamata ki te fakaovi mai o te Aho.”—Hep. 10:24, 25.
4 Te Minisitelio: Ko te faʼafai ʼi te minisitelio ʼe tokoni mai ke tou taupau totatou ʼofa ʼaē neʼe tou maʼu ʼi te kamata ʼo ʼuhiga mo te ʼAtua. ʼI tatatou faka mafola ia te logo lelei, ʼe tou fakamanatuʼi ai kiā tātou te ʼu fakapapau ʼofa ʼa Sehova, pea ʼe tokoni mai ai ke mālohi tatatou ʼamanaki pea mo totatou ʼofa. Kā tou akoʼi ki te hahaʼi ia te ʼu moʼoni ʼo te Tohi-Tapu, ʼe tonu ke tou fai he ʼu kumi ke tou mahino lelei ia tātou totonu kiai, pea ʼe fakamālohiʼi ai tatatou tui.—1 Tim. 4:15, 16.
5 ʼE tāu mo Sehova ke tou foaki kiā te ia ia meʼa fuli pē, ʼo kau kiai mo totatou ʼofa. (Apk. 4:11) ʼAua naʼa kotou tuku ke siʼisiʼi tokotou ʼofa. Kotou taupau ke mālohi te ʼofa ʼaē neʼe kotou maʼu ʼi te kamata, ʼo kotou ako fakamālotoloto ia te Tohi-Tapu, mo ʼolo tuʼumaʼu ki te ʼu fono, pea mo faʼafai moʼo tala ki te hahaʼi ia te faʼahi ʼaē ʼe maʼuhiga tāfito kiā koutou.—Loma 10:10.