Kua Nātou Fakatuʼutuʼu Moʼo Fai ʼo Te Finegalo ʼo Sehova
Kāpite 9
Te ʼu Faʼahiga Fai Moʼo Faka Mafola ʼo Te Logo Lelei
TE ʼU TELITUALE
ʼE ko te fakatuʼutuʼu ʼa Sehova ke faka mafola ia te logo ʼo te Puleʼaga ʼi te mālamanei kātoa, ʼi te ʼu kolo lalahi pea mo te ʼu tuʼa kolo, ʼo fai ʼi he ʼu ʼaluʼaga ʼe lelei. ʼO ʼuhiga mo te fakatuʼutuʼu ʼaia, ʼe foaki anai e te filiale ʼaē ʼe taupau ki te ʼu kōkelekāsio pea mo ʼihi atu kau fai faka mafola ʼe nonofo mamaʼo mai te ʼu kōkelekāsio ia he telituale ke natou gāueʼi. (1 Ko. 14:40) Ko te faʼahiga fai ʼaia ʼe ʼalutahi mo te ʼu fakatuʼutuʼu ʼaē neʼe fai e te ʼAtua ʼi te ʼuluaki sēkulō. (2 Ko. 10:13; Kal. 2:9) ʼUhi ko te vave ʼo te tuputupu ʼo te gāue ʼo te logo lelei ʼo te Puleʼaga ʼi te ʼu ʼaho fakamuli ʼaenī, kua fai ia he fakatuʼutuʼu ke lelei ia te vaevae ʼo te ʼu telituale ke ʼaua naʼa ʼalunoa tatatou ʼu faiga. Kae ʼe ko he faigamālie ʼaia ki he toe kaugamālie ke natou fagono ki te logo lelei.
ʼE tokaga anai te taupau ki te gāue ke gāueʼi kātoa ia te telituale ʼo te kōkelekāsio. ʼE hinoʼi anai he tagata faifekau faka minisitelio ke tokaga ki te tufa pea mo te fakafoʼou ʼo te ʼu telituale. ʼI te kōkelekāsio ʼaē ʼe fakatuʼakoi ai he ʼu telituale, ʼi te agamāhani ʼe nofo ia te taupau ʼo te Ako Tohi mo te ʼu telituale ʼo tana ako tohi.
Kapau ʼe ke kau ʼi he kōkelekāsio ʼe lahi tona telituale, ʼe lagi ke fia maʼu anai hau telituale ʼe oviovi atu ki te faʼahi ʼaē ʼe ke nofo ai. Kapau ko te telituale ʼaē neʼe hinoʼi atu ʼe ovi ki tou ʼapi, ʼe feala anai ke ke fakaʼaogaʼi lelei tou temi ki te gāue fai faka mafola. ʼE toe feala pē foki ke ke fakaafe niʼihi ke natou kaugā fai faka mafola mo koe ʼi te telituale ʼaia.
Kapau ʼe feala ke ʼavatu he telituale ke ʼāteaina pē kiā koe tokotahi, ʼe tonu anai ke ke kole age ki te tehina ʼaē ʼe tokaga ki te ʼu telituale ʼo te kōkelekāsio ke ina foaki atu he telituale neʼe heʼeki foaki ki he tahi. ʼE maʼua anai ke ke fakahāhā age ki te tehina ʼaē ʼe tokaga ki te telituale ia te ʼu faʼahi ʼo te telituale ʼaē neʼe ke gāueʼi. ʼI tau fai faka mafola ʼaia ʼi te telituale, ʼe ke feʼiloʼiʼaki anai mo he toe hahaʼi, pea kapau ʼe ke faʼa kātaki, ʼe ke maʼu anai he fiafia ʼi tau tokoni ki ʼihi ke natou leleiʼia te ʼu fakatuʼutuʼu ʼa Sehova ʼo ʼuhiga mo te haofaki.
ʼE mahino ia, kapau ʼe ʼi ai hau telituale ʼe ʼāteaina pē kiā koe tokotahi, ʼe toe fakamaʼua atu foki ke ke faka mafola ki he toe hahaʼi tokolahi ʼi te telituale ʼaia. Ko tona faka ʼuhiga, ʼe tonu anai ke ke toe liliu ʼo ʼaʼahi te ʼu ʼapi ʼaē neʼe mole ke maʼu ai he tahi, pea mo foaki he tokoni fakalaumālie kiā nātou ʼaē neʼe fia fagono ki te logo lelei ʼo te Puleʼaga. ʼI ʼihi temi, ʼe tou maʼu ʼi Te Minisitelio ʼo Te Puleʼaga ia te ʼu tokoni ʼe ʼaoga tāfito ʼo ʼuhiga mo te gāueʼi kātoa ʼo te telituale, ʼo tou fakaʼaogaʼi te Tohi-Tapu, te ʼu tohi, te ʼu nusipepa, te ʼu kaupepa lalahi, te ʼu kiʼi pepa lotu, te ʼu pepa fakaafe pea mo ʼihi atu ʼu tokoni mai “te tagata kaugana agatonu mo poto.” Ke feala hau felāveʼi mo nātou ʼaē ʼe nonofo ʼi tou telituale, ʼi te ʼu nofoʼaga ʼaē ʼe faigataʼa hakita hū kiai peʼe ko he ʼu nofoʼaga ʼe puipui lelei, ʼe lagi tonu anai ke ke faitohi, ke ke telefoni kiā nātou peʼe ke fakaʼaogaʼi ia he tahi age ʼu puleʼaki ohagē ko te fai faka mafola ʼi te ala. ʼE foaki atu anai e te taupau ki te gāue pea mo te taupau ʼo te Ako-Tohi, he ʼu tokoni lelei ʼe ʼalutahi mo te ʼu ʼaluʼaga ʼaē ʼe hoko ʼi te kolo pea mo ʼaē ʼe hoko kiā koe totonu.
Kapau ʼe gāue fakatahi ia nātou fuli ʼaē ʼe kau ki te kōkelekāsio, pea ʼe fai kātoa pea mo lelei anai ia te telituale. ʼE tou toe tōkakaga anai ke ʼaua naʼa hahaʼi fau he kau Fakamoʼoni ʼe gāue ʼi he koga meʼa pē e tahi, ʼo tupu ai he maveuveu peʼe ʼiʼita ai te hahaʼi ʼo te nofoʼaga ʼaia. ʼE tou fakahā ai ʼe tou tokagaʼi totatou ʼu tehina mo te hahaʼi ʼo te telituale.
KO TE FAKA MAFOLA KI HE HAHAʼI ʼE LEA KEHEKEHE
ʼE ʼaoga ki te hahaʼi fuli ke natou akoʼi ia te ʼu meʼa ʼo ʼuhiga mo Sehova ʼAtua, mo tona ʼAlo pea mo tona Puleʼaga. (Apk. 14:6, 7) ʼE tou fiafia ʼaupitō ʼi te tokoni kiā nātou ʼo totatou telituale ʼaē ʼe palalau ki he tahi age lea ke natou fetapa ki te huafa ʼo Sehova, ke haofaki nātou pea mo natou maʼu ia te ʼulugaaga faka Kilisitiano. (Loma 10:12, 13; Kol. 3:10, 11) Kae, ʼe feafeaʼi he fakaʼaluʼalu lelei pea ʼaki te ʼofa ia te ʼu ʼaluʼaga kehekehe pea mo te ʼu fihifihia ʼaē ʼe feala ke tou felāveʼi mo ia mokā tou faka mafola ia te logo lelei ki te hahaʼi ʼaia?
ʼE tonu ki te kau Kilisitiano ke natou gaohi fakalelei tonatou ʼu tatau ohagē pē ko nātou totonu. (Mat. 7:12) ʼE tou fakahā anai tatatou tōkakaga fakamālotoloto ki te hahaʼi ʼaē ʼe ʼomai mai he tahi age fenua peʼe palalau ki he tahi age lea, ʼo tou fakaʼapaʼapa kiā nātou. (Loma 15:7) Ko he faʼahiga fai ʼaia ʼe maʼuhiga mokā tou faka mafola te logo lelei ki ni hahaʼi matāpule, koteʼuhi ʼe tokoni mai anai ke tou maʼu ia te manatu ʼa te ʼAtua ʼo ʼuhiga mo nātou ʼaia.—Gaue 10:34, 35; 17:26.
Kā ke felāveʼi mo he tahi ʼi te telituale ʼe palalau ki he lea ʼe mole ke mahino kiai, faigaʼi ke ke ʼiloʼi pe ko te lea fea ʼaē ʼe ina palalauʼi. Fakahā age ia te logo ʼaē ʼe tuʼu ʼi te kiʼi kaupepa Une bonne nouvelle pour des gens de toutes nations. Kapau ʼe nofo ovi ki he kōkelekāsio peʼe ki he kiʼi kūtuga ʼi tana lea, ʼe lagi feala anai ke ke faigaʼi ke felōgoi mo he tahi ʼi te ʼu tehina. Peʼe lagi ʼe i ai he kaugā fai faka mafola ʼi tau kōkelekāsio ʼe mahino ki te lea ʼaia, ʼo feala hana tokoni kiā ia ʼaē ʼe fia mahino. Peʼe ke ʼui age ki ai ʼe ke faigaʼi anai ke ke maʼu hana tohi ʼi tana lea. Vakaʼi pea mo te tehina ʼaē ʼe tokaga ki te ʼu tohi, pe ko te ʼu tohi faka Tohi-Tapu fea ʼaē ʼe feala ke maʼu ʼi te lea ʼaia.
Ko ʼihi kau fai faka mafola ʼaki pē te ʼu kupu ʼaē kua natou mahino kiai, kua feala pē hanatou kamata he ʼu ʼuluaki palalau. Ko ʼihi logolā tona faigataʼa kae neʼe natou fakatuʼutuʼu ke natou ako te Tohi-Tapu mo he tahi, ʼo natou fakaʼaogaʼi he tohi ʼi tatatou ʼu tohi ʼaē neʼe tā ʼi tana lea. Kapau ʼe tou fakaʼaogaʼi te ʼu pāki pea mo tou faka lau age ki ai te ʼu vaega, ʼe mahino anai ki te ʼu akonaki tāfito ʼo te Tohi-Tapu. ʼE lagi ʼe i ai he tahi ʼi tona fāmili ʼe mahino ki tana lea pea mo ʼa tātou moʼo fakahoko lea.
Tou manatuʼi, ko tatatou fakatuʼutuʼu ke tou fai he ʼu tisipulo, pea mo tou fakaloto mālohiʼi ia ia ʼaē ʼe fia mahino ke kau ki te ʼu fono ʼo te kōkelekāsio mo kapau ʼe mole ʼi ai he kōkelekāsio ʼi tana lea. ʼE feala ke mālohi tana tui ʼi tana fakakaugā ʼaē mo te ʼu tehina pea mo tokoni anai ki ai ke tuputupu ʼi te faʼahi fakalaumālie.
Kapau ʼe maʼu ʼi te telituale ʼo te kōkelekāsio ia he ʼu matāpule neʼe ʼomai mai he tahi age fenua, ʼe tonu anai ki te kau tagata ʼāfea ke natou takitaki te gāue fai faka mafola moʼo faka fealagia ke foaki kiā nātou he tokoni fakalaumālie. ʼE lagi ko te hahaʼi matāpule ʼaia ʼe natou nonofo ʼi he ʼu telituale ʼe lahi ai ni ʼu kōkelekāsio. Ki te faʼahi ʼaia, ʼe tokoni anai te ʼu taupau ʼo te silikō ki te kau tagata ʼāfea ke natou mulimuli ki te takitaki ʼo te filiale, ʼo feala ki te ʼu kōkelekāsio ʼaē ʼe pipiki ki te telituale ʼaia ke natou gāue fakatahi ʼi te fai faka mafola. ʼE feala anai ke fakatuʼutuʼu ke fai ʼi ʼihi temi he akonaki ki te kaugamālie peʼe ko he ako ʼo Te Tule Leʼo ʼi he lea matāpule ke ʼiloʼi te kaugamālie ʼo hahaʼi ʼe ʼomai anai ki te ʼu fono ʼaia.
ʼE feala ke fakatuʼu he kiʼi kūtuga matāpule mo kapau ʼe kātoa te ʼu faʼahi ʼaenī: (1) ʼE maʼu he ʼu kaugā fai faka mafola peʼe ko he ʼu hahaʼi ʼe fia logo pea mo mahino feʼauga ki te logo lelei ʼi he tahi age lea, (2) ʼe maʼu he tagata ʼāfea peʼe ko he tagata faifekau faka minisitelio kua fotufotuʼa moʼo tokaga ki te kiʼi kūtuga ʼaia pea mo fai he fono ʼi te vāhaʼa, pea (3) ʼe maʼu he kau tagata ʼāfea ʼe natou faʼufaʼu he kolesi ʼe natou lotolelei ke natou tokoni ki te kiʼi kūtuga ʼaia. Kā kua kātoa te ʼu faʼahi ʼaia, pea ʼe fakahā anai e te kau tagata ʼāfea ki te filiale ke ʼiloʼi te kiʼi kūtuga ʼaia pea mo foaki kiā nātou he ʼu fakatuʼutuʼu.
ʼI te agamāhani, ko te ʼuluaki fono ʼaē ʼe fai ʼi te vāhaʼa fuli ki he kiʼi kūtuga, ʼe ko te Ako Tohi. Ki muli age, ʼe feala anai ki te ʼu tagata ʼāfea ke natou fakafuafua ʼe lelei ke fai mo he tahi age ʼu fono, ohagē ko te Akonaki Ki Te Kaugamālie pea mo te Ako ʼo Te Tule Leʼo. ʼE feala anai ke fai te ʼu kiʼi faifai palalau ʼo te Ako Faka Teokalatike ʼi he lua koga fale mo kapau ʼe maʼu ai ia he tagata ʼāfea peʼe ko he tagata faifekau faka minisitelio ʼe palalau lelei ʼi te lea moʼo fai tokoni. ʼE feala ki te kiʼi kūtuga ʼaia ke fai mo hanatou ʼu fono ki te fai faka mafola. Ko te ʼu fakatuʼutuʼu faka teokalatike ʼaia ʼe ʼaoga tatau ki te ʼu lea kehekehe.
ʼE gāue fakatahi anai te kiʼi kūtuga ʼaia, ʼo mulimuli ki te takitaki ʼa te kolesi ʼo te kau tagata ʼāfea ʼaē ʼe tokaga kiā nātou. ʼE foaki anai e te ʼu tagata ʼāfea ia he takitaki ʼe fakapotopoto pea mo tōkakaga ʼo foaki ia te ʼu meʼa ʼaē ʼe ʼaoga ki te kiʼi kūtuga ʼaia. ʼI te temi leva ʼaē kā ʼaʼahi ai e te taupau ʼo te silikō ia te kōkelekāsio ʼaē ʼe tokoni ki te kiʼi kūtuga ʼaia lolotoga te vāhaʼa kātoa, ʼe fai faka mafola anai mo te kiʼi kūtuga ʼaia, pea ʼe ina fai anai he kiʼi tohi fakanounou ki te filiale, ʼo fakahā kiai te ʼu gāue lelei ʼaē neʼe fai pea mo te ʼu meʼa ʼaē ʼe ʼaoga ki te kōkelekāsio. Kapau ko nātou fuli ʼaē ʼe kau ki te gāueʼi ʼo te ʼu telituale matāpule, ʼe natou mulimuli fakalelei ki te ʼu tokoni faka Tohi-Tapu pea mo te takitaki faka teokalatike, ʼe faka tapuhā anai te huafa ʼo Sehova.—1 Ko. 1:10; 3:5, 6.
TE GĀUE ʼI HE ʼU TELITUALE ʼE LEA KEHEKEHE
ʼI ʼihi kolo lalahi, ʼe tonu anai ki te kau fai faka mafola ʼo te ʼu kōkelekāsio takitahi ke natou fai faka mafola pē ki te hahaʼi ʼaē ʼe palalau ʼi tanatou lea koteʼuhi ʼi te ʼu telituale ʼaē ʼe lea kehekehe ai te hahaʼi, ʼe tahi foaki pē ʼo mulimuli ki tana lea. ʼE feala anai ki te ʼu taupau gāue ʼo te ʼu kōkelekāsio ʼo te ʼu telituale ʼaia, ke natou fakatuʼutuʼu ia he faʼahiga fai ʼo te telituale pea mo ʼaumai nātou ki te kōkelekāsio ʼaē ʼe fai ai te ʼu fono ʼi tanatou lea, ia nātou ʼaē ʼe fia mahino. ʼE maʼuhiga ia te faʼahi ʼaia, koteʼuhi ʼe feala ki ʼihi kau fai faka mafola ʼo he tahi age ʼu kōkelekāsio ʼe mole natou lea tahi, ke natou gāueʼi fakatahi mo tātou ia te telituale, kae ʼe mole tou loto ke “mau he tutaʼaga o [te] ave [ʼo] te Evaselio o Kilisito.”—1 Ko. 9:12.
ʼE feala ki te kau fai faka mafola mokā natou fai faka mafola ʼi te ala peʼe ʼi he fagonogono faigamālie ke natou ʼave he ʼu tohi ʼi te ʼu lea kehekehe. Kae kā natou fai faka mafola ʼi te ʼu ʼapi, ʼe natou tufa pē anai ia te ʼu tohi ʼi te lea ʼo tanatou kōkelekāsio. Tou manatuʼi, ʼe foaki pē te ʼu telituale ʼo te ʼu koga meʼa ʼaia ʼo mulimuli ki tana lea, ke feala ki te kau fai faka mafola ʼaē ʼe natou tuku age te ʼu tohi ke natou taki mai ki te kōkelekāsio ia te hahaʼi ʼaē ʼe fia mahino, ke natou ʼomai ʼo logo ki te ʼu fono ʼaē ʼe fai ʼi te lea ʼaē ʼe natou mahino lelei kiai peʼe mo leleiʼia. (1 Ko. 14:9) Kapau ʼe tou tōkakaga tāfito ʼi tatatou minisitelio ki te hahaʼi ʼaē ʼe natou mahino ki te ʼu fono ʼo te lea ʼo te kōkelekāsio ʼaē ʼe tou kau ai peʼe mo natou leleiʼia, pea ʼe kaugamālie age anai te hahaʼi ʼaē kā natou maʼu te maʼuli.
KO HE FAI FAKA MAFOLA FAKA KŪTUGA
ʼE ko te maʼua ʼo te kau Kilisitiano ʼaē kua foaki tonatou maʼuli ki te ʼAtua ke natou fakahā ia te logo lelei ki te hahaʼi. ʼE lahi ʼaupitō te ʼu faʼahiga fakahoko ʼo te faʼahi ʼaia, kae tokolahi iā tātou ʼe tou fiafia ʼi te gāue fakatahi mo ʼihi kau fai faka mafola. (Luka 10:1) Pea ki te faʼahi ʼaia, ʼe fakatuʼutuʼu e te ʼu kōkelekāsio he ʼu fono ki te fai faka mafola ʼi te fakaʼosi vāhaʼa, ʼo toe fēia aipē ki te lolotoga ʼo te vāhaʼa. Ko te ʼu ʼaho mālōlō ʼe ko he tahi age faigamālie ke tou fai faka mafola faka kūtuga, koteʼuhi tokolahi te ʼu tehina ʼe mole natou gāue ʼi te ʼu ʼaho ʼaia. ʼE fakatuʼutuʼu anai ke tō lelei ia te fono ʼo te vahe gāue ki te kau fai faka mafola. ʼE feala ki te ʼu fono ʼaia ke fai ʼi te Fale ʼo Te Puleʼaga, ʼi te ʼu ʼapi ʼaē ʼe fai ai te Ako Tohi, peʼe ʼi he tahi atu ʼu koga meʼa ʼe lelei pea mo ʼaoga ke fai ai.
ʼI te ʼu fono ki te fai faka mafola ʼaia, ʼe foaki ai he ʼu tokoni kiā nātou ʼaē kei foʼofoʼou peʼe ko nātou ʼaē ʼe mole heʼeki māhani lelei ʼi te fai faka mafola. Tahi ʼaē meʼa, ʼe lagi lelei age ke ʼolo ki ʼihi koga meʼa he ʼu kaugā fagona e toko lua peʼe laka atu, ʼo fai faka mafola fakatahi ai. ʼE feala leva ʼi tanatou gāue fakatahi ʼaia ke natou fetokoniʼaki pea mo fefakaloto mālohiʼaki tuʼumaʼu iā nātou. Tatau aipē pe neʼe ke fakatuʼutuʼu ke ke gāue tokotahi ʼi te telituale, kae ko tau lagolago ki te fono ki te fai faka mafola fakatahi ʼe ko he fakaloto mālohi ʼaia kiā nātou ʼaē ʼe kau ai. ʼE feala ai ke ke lototoʼa ʼi tau ʼiloʼi ʼaē ʼe ʼi ai ʼihi ʼe natou fai faka mafola ʼi te telituale ʼaē ʼe fai ai te gāue.
ʼOfa pē, ke tou mulimuli fuli ki te faʼifaʼitaki ʼaē neʼe tuku mai e Sesu pea mo te kau ʼapositolo! ʼE feala ke tou tui papau, ʼe tapuakinaʼi anai e Sehova ia tatatou ʼu faiga ʼaē ke tou lagolago kātoa ki te gāue maʼuhiga ʼaē ko te faka mafola ʼo te logo lelei ʼo te Puleʼaga.—Luka 9:57-62.