ʼE Ko He Fakamoʼoni ʼAia ʼo Te Tui!
1. Koteā te ʼu ʼaluʼaga fakamataku ʼaē neʼe fakakikite e Sesu?
1 Neʼe fakalogo lelei ia te kau ʼapositolo ki te palalau age ʼaē ʼa Sesu ʼo ʼuhiga mo tana ʼi henī pea mo te fakaʼosi ʼo te tuʼu ʼo te ʼu faʼahiga meʼa ʼaenī. Neʼe tonu ke hoko ʼi te mālamanei he ʼu ʼaluʼaga fakamataku: te ʼu tau, te ʼu hoge, te ʼu mafuike, te ʼu mahaki. Pea neʼe ʼui e Sesu, ʼe fehiʼaʼinaʼi anai tana kau tisipulo, ʼe gaohi koviʼi anai nātou, pea mo matehi anai nātou. ʼE tutuʼu ake anai ni kau polofetā loi pea mo natou fakahēhē ia te tokolahi. Ko te ʼofa ʼo te tokolahi ʼe puli anai ia.
2. He koʼē ʼe fakaofoofo ia te fakamafola ʼo te logo lelei ʼi te mālamanei kātoa?
2 Kae logolā ia te ʼu ʼaluʼaga fakamataku ʼaia, neʼe punamaʼuli te kau ʼapositolo ʼi te ʼui age leva ʼaē e Sesu, ko te logo lelei ʼo te Puleʼaga ʼo te ʼAtua ʼe fakamafola anai ʼi te kele kātoa. (Mat. 24:3-14) Iā ʼaho nei, ʼe tou sio ki te hoko fakaofoofo ʼo te lea fakapolofetā fakafiafia ʼaia. Logolā tatatou māʼuʼuli ʼi he ʼu temi faigataʼa, kae ko te kau Fakamoʼoni ʼa Sehova ʼe natou faʼafai ʼo tala ia te logo lelei. ʼE puli te ʼofa ʼi te mālamanei, kae ʼe ʼāʼāsili age te tuputupu ʼo totatou ʼofa. Logolā totatou fehiʼaʼinaʼi e “te ʼu puleʼaga kātoa,” kae ʼe tou fai fakamafola ʼi te teitei fenua fuli pē.
3. ʼI te tānaki gāue ʼo te mālamanei kātoa, koteā ʼaē ʼe ina fakalotomālohiʼi koutou?
3 ʼE fakalotomālohi ia te vakaʼi ʼo te gāue ʼa te kau Fakamoʼoni ʼa Sehova lolotoga te taʼu gāue ʼaenī kua hili, ohagē ko tona fakahā ʼi te ʼu pāsina 3 ki te 6! ʼE ko te 16 taʼu ʼaenī ʼaē neʼe fai ai hola e tahi miliale tupu ʼi te gāue fai fakamafola pea mo te fai ʼo ni ʼu tisipulo. ʼE ko he fakamoʼoni ʼaia ʼo te tui! Neʼe tuputupu te lahi ʼo te kau pioniē ko te toko 5,8 ʼi te teau, mo te lahi ʼo te kau fai fakamafola ko te toko 3,1 ʼi te teau, pea mo te lahi ʼo te ʼu ako Tohi-Tapu ko te toko 4,4 ʼi te teau. Kapau ʼe fakatatau ia te kaugamālie ʼo te kau papitema pea mo ʼaē ʼo te taʼu gāue kua hili, pea neʼe tuputupu te kau papitema ʼe ko te toko 20,1 ʼi te teau. ʼE fakafiafia tata sio ki te teitei toko fitu miliona hahaʼi ʼe natou tauhi agatonu kiā Sehova, pea kua natou laka age ʼi te temi ʼaenī! Kā kotou sio te tānaki ʼaē ʼe tuʼu ʼi te ʼu pāsina 3 ki te 6, koteā ʼaē ʼe ina fakalotomālohiʼi tāfito koutou?
4. Koteā te ʼu vaivaiʼaga neʼe lava tauʼi e te tagata ʼi tana faiga ʼaē ki te papitema?
4 Logolā te fakaofoofo ʼo te tānaki gāue ʼaia, kae ʼaua naʼa galo kiā tātou ʼe fakatātā e te tānaki ʼaia ia te ʼu hahaʼi neʼe natou fakahā ia tanatou tui. Tou vakaʼi age muʼa ia te faʼifaʼitaki. Ko Guillermo neʼe lahilahi ake ʼi Bolivie. Neʼe tupu ʼi te taʼu 1935, pea talu mai tona taʼu hiva neʼe gāue ʼi te gāueʼaga ʼe tō ai te fuʼu ʼakau ko te coca. Talu mai tana kei veliveli, neʼe ina mama ia te ʼu lau coca, ke tupu ai hana maʼu ia hona kiʼi fīmālie mai te fakaʼofaʼofa ʼo te toe gāue kinakina ʼaia. Ki muli age, neʼe ʼinu fakavalevale te kava pea mo suluka. ʼI tana kamata ʼiloʼi ia te ʼu faʼahi ʼaē ʼe fakamaʼua age e Sehova kiā ia, neʼe tuku e Guillermo tana suluka pea mo tana ʼinu kava. Ko te meʼa ʼaē neʼe faigataʼa ʼaupitō kiā ia, neʼe ko tana tuku ʼaē ʼo tana agamāhani talu mai fualoa, ko te mama ʼo te ʼu lau coca. Neʼe faikole ʼi te temi fuli pē pea neʼe ina lava liʼaki ia te faʼahi ʼaia. ʼI tana kua liʼaki ia tana ʼu aga ʼaia ʼe kovi, neʼe papitema leva. ʼE ina ʼui fēnei: “ʼI te temi nei kua au maʼa pea mo fiafia ʼaupitō.”
5. Koteā ʼaē ʼe kotou fakaʼamu kiai?
5 ʼE tokaga moʼoni ia Sehova ki te hahaʼi. ʼE ina loto ke fakahemala te hahaʼi fuli pē. (2 Pet. 3:9) ʼE tou fakaʼamu mo tātou ki te faʼahi ʼaia. ʼOfa pē ke uga tātou e totatou loto ke tou fai ia meʼa fuli moʼo hoko atu tatatou tokoni ki te hahaʼi ʼaē ʼe fakamālotoloto ke natou ʼiloʼi ia Sehova pea mo ʼoʼofa kiā te ia, ohagē pē ko tātou.