Te ʼu Tonu

◼ Te tufa ʼo te māhina ʼo Maio: Ko Te Tule Leʼo pea mo te Réveillez-vous ! ʼE kotou faiga anai ke kotou ʼolo ʼo ʼaʼahi ia te hahaʼi ʼaē kei foʼofoʼou ʼaē ʼe fia logo pea mo nātou ʼaē neʼe ʼomai ʼo kau ki te ʼaho Fakamanatu pea mo te akonaki makehe kae ʼe mole ʼomai putuputu ki te kōkelekāsio. ʼE tonu ke kotou kamata he Ako Tohi-Tapu mo nātou ʼaē ʼe kotou ʼaʼahi mo kapau ʼe natou loto kiai. Sūnio: Te Tohi ʼo Te ʼu Hisitolia Faka Tohi-Tapu peʼe ko Te Tagata ʼAē ʼe Lahi Tokotahi ʼo Te ʼu Temi Fuli. Sūlio Mo ʼAukusitō: Te kaupepa Kotou Nonofo ʼAlaʼala! Peʼe ko te kaupepa ʼE Koutou Lava Kaumeʼa Mo Te ʼAtua!

◼ ʼE tonu ki te ʼu kolesi ʼa te kau tagata ʼāfea ke natou toe vakaʼi ia te tohi ʼo te ʼaho 6 ʼo Sūlio 2006, ʼaē ʼe talanoa ai ʼo ʼuhiga mo te ʼu teuteu fakatomuʼa mokā hoko mai he tuʼutāmaki ʼi te kele pea ke natou nonofo mo he lisi ʼo te ʼu fakaʼiloʼilo ʼo ʼuhiga mo te kau fai fakamafola fuli. ʼI te ʼu koga meʼa fakatuʼutāmakiʼia, ʼe tonu ke toe ʼi ai he tahi age lisi ʼo nātou ʼaē ke felōgoi fakavilivili mo te kau tagata ʼāfea mokā hoko he tuʼutāmaki. ʼO mole gata ʼaki pē ʼi te ʼu ʼaluʼaga ʼaia mokā hoko he tuʼutāmaki, kae ʼe tonu ki te kau fai fakamafola ke natou felōgoi mo tanatou ʼu taupau ʼo te Ako Tohi peʼe ko he tahi age tagata ʼāfea mo kapau ʼe natou ʼolo ki he faʼahi ʼi he temi loaloaga, ohagē lā ʼe natou folau mālōlō peʼe natou ʼolo ʼo gāue, peʼe natou takoto mahaki ʼi te lōpitali.

◼ Kotou tokagaʼi ʼe mole ʼi ai anai he pepa fai fakaafe ki te fakatahi fakatisitilike 2008. Kae ʼe lolotoga fai nei ia te fakatuʼutuʼu ʼo ʼuhiga mo te tufa ʼo te ʼu pepa fēia kā fakahoko anai ki muli age ʼi te mālamanei kātoa. ʼE hoki fakahā anai he tahi ʼu logo ʼo ʼuhiga mo te fakatuʼutuʼu ʼaia ʼi he tahi lākaga.