Te Tali Ki ʼAkotou ʼu Fehuʼi
◼ ʼE ʼaoga koa ki te nofoʼaki ke natou pasipasi ʼi te ʼu akonaki fuli pē ʼi te Ako Fakateokalatike pea mo te Fono Gāue?
ʼI te temi ʼaē neʼe fakatupu ai e te Tupuʼaga, ko Sehova ia te kele, “neʼe kalaga fakafiafia fakatahi ai te ʼu fetuʼu ʼo te uhu pea ko te ʼu foha fuli ʼo te ʼAtua neʼe natou fakavikiviki.” (Sopo 38:7) Ko te ʼu foha ʼaia ʼo te ʼAtua neʼe natou fia vikiʼi ia Sehova ʼo ʼuhiga mo tana ʼu meʼa fakatalakitupua ʼaē neʼe ina fakatupu, ʼaē ko he faʼahi neʼe ina fakahā ai ia tona poto, tana agalelei, pea mo tona mālohi.
ʼE ko he meʼa lelei kiā tātou ke tou fakahā ia he loto fakafetaʼi lahi ki te ʼu faiga ʼo totatou ʼu tehina pea mo tanatou ʼu akonaki ʼaē neʼe natou fai. Ohagē lā, ʼe ko he agamāhani hatatou pasipasi ki te ʼu akonaki pea mo te ʼu faʼifaʼitaki ʼaē ʼe fai ʼi tatatou ʼu fakatahitahi makehe, ohagē lā ko te ʼu fakatahi lalahi. Ko te ʼu akonaki ʼaē ʼe fai ʼi te ʼu fakatahi lalahi ʼaia, neʼe fakaʼaogaʼi kiai ia he temi pea mo he teuteu lahi. ʼAki tatatou pasipasi ʼe tou fakahā ai ia tatatou loto fakafetaʼi ʼaē ki te gāue kinakina ʼa te tehina faiakonaki kae ʼe toe fēia foki ki te ako ʼaē ʼe foaki mai e Sehova ʼaki tana Folafola pea mo tana kautahi.—Isa. 48:17; Mat. 24:45-47.
ʼE feafeaʼi ʼo ʼuhiga mo te pasipasi ki te ʼu akonaki ʼaē ʼe fai ʼi te Ako Fakateokalatike pea mo te Fono Gāue? ʼE mole ʼi ai he lēkula ʼe ina tapuʼi mai te faʼahi ʼaia mo kapau ʼe tou pasipasi heʼe tou loto fakafetaʼi ki he kiʼi akonaki neʼe hoki fai. Kae ko tata pasipasi ʼaia, ʼe feala pē ke liliu ko hata agamāhani, ʼo kita fai te faʼahi ʼaia kae mole kei tou fai fakamālotoloto. Koia lā ʼaē, ʼi te agamāhani ʼe mole tou pasipasi ai ʼi te akonaki fuli pē.
Logolā ʼe lagi mole tou pasipasi anai ʼi te ʼu akonaki fuli ʼaē ʼe fai ʼi te Ako Fakateokalatike pea mo te Fono Gāue, kae ʼe ʼi ai te ʼu ʼaluʼaga ʼe feala ke tou fakahā fuli ai ia tatatou loto fakafetaʼi ki te akonaki pea mo te ʼu faiga ʼa nātou fuli ʼaē ʼe natou kau kiai. ʼE tou lava fai ia te faʼahi ʼaia ʼaki hatatou fakalogo lelei ki te ʼu tehina faiakonaki. Pea ʼi te hili ʼo te fono, ʼi te agamāhani ʼe feala ke tou ʼolo kiā nātou ʼaia, ʼo fakahā kiā nātou ia tatatou loto fakafetaʼi ʼo ʼuhiga mo te ʼu faiga ʼaē neʼe natou fai moʼo teuteuʼi tanatou ʼu kiʼi akonaki.—Efe. 1:15, 16.