Te Tali Ki ʼAkotou ʼu Fehuʼi

◼ ʼO ʼuhiga mo te fakaʼaogaʼi ʼo te telefoni moʼo mulimuli ki te ʼu fono ʼo te kōkelekāsio, he koʼē ʼe fakamaʼua kiai ia he fakasiosio poto?

ʼE lahi te ʼu kōkelekāsio kua natou fakafealagia ia te faʼahi ʼaia maʼa nātou ʼaē mole kei lava ʼomai ki te ʼu fono ʼaē ʼe fai ʼi te Fale ʼo Te Puleʼaga, ʼuhi ko te mahaki peʼe ko he tahi atu ʼu ʼaluʼaga, ke feala ai mai ʼonatou ʼapi ke natou fakalogo ki te ʼu fono. ʼE tonu ke maʼu he fakasiosio poto pea mo he fakatuʼutuʼu lelei, ke ʼiloʼi papau ko te fakatuʼutuʼu ʼofa ʼaia ʼe fakaʼaogaʼi e nātou ʼaē ʼe ʼaoga moʼoni kiai. Koia, ko te ʼu tagata ʼāfea ʼaē ʼe natou tōkakaga ki te taʼi fakatuʼutuʼu ʼaia, ʼe natou fia fakaʼaluʼalu lelei anai pea mo leʼoleʼo lelei ia te fakaʼaogaʼi ʼo te fakatuʼutuʼu ʼaia, ke fai “ia meʼa fuli ʼi te fakapotopoto pea mo te fakatokatoka.”—1 Ko. 14:40.

ʼE vakaʼi anai e te ʼu tagata ʼāfea ke fakamuʼamuʼa ia te ʼu tehina mo tuagaʼane ʼo tonatou kōkelekāsio ʼaē ʼe māhahaki kovi peʼe māʼimoa peʼe natou nonofo ʼi ʼonatou ʼapi ʼuhi ko he tahi age tupuʼaga. Ko he kaugā fakamafola ʼe mahaki fakatemi peʼe palalisia, peʼe ko he tahi ʼe tuputupu ʼi tana ako Tohi-Tapu kae ʼe tonu ke nofo ʼi tona ʼapi, ʼe feala ke ʼaoga kiā nātou ia te fakatuʼutuʼu ʼaia pea ʼe feala ke fakakau nātou ki te lau ʼaē ʼo te nofoʼaki ʼo te kōkelekāsio. ʼI te ʼu potu ʼaē ʼe mole feala ai ke fai te fakatuʼutuʼu mo te telefoni kiā nātou ʼaē ʼaoga moʼoni ki ai, ʼe lagi feala ke fai he tahi age ʼu fakatuʼutuʼu, ohagē lā ke puke maʼa nātou ia te ʼu fono.

ʼE mahino ia, ʼe mole he meʼa ʼe feala ke fakatatau mo te ʼu lelei ʼaē ʼe tou maʼu ʼi tatatou kau fakahagatonu ʼaē ki tatatou ʼu fono. Ko tatatou fakatahi ʼaē mo totatou ʼu tehina ʼe maʼu ai ia “he fefakalotomālohiʼaki” pea ʼe tokoni ki te hahaʼi foʼofoʼou ke lahi tanatou leleiʼia ia tanatou ʼomai ʼaē kiai. Kā tou ʼomai ki tatatou ʼu fono, ʼe lahi age te ʼu meʼa ʼe tou ako mai te ʼu kiʼi faʼifaʼitaki ʼaē ʼe fai ai, pea ʼe feala ki te ʼu tagata ʼāfea ke natou foaki mai he tokoni, pea ʼe tou sio mata ai ki te ʼofa fakatautehina. Koia ʼe moʼoni ai ia te ʼu meʼa ʼaē neʼe logoʼi e te tuagaʼane finematuʼa ʼi tona loto, ʼaē neʼe fāʼufua ki ai te kaugā fai fakamafola, ʼi tana hū ki tuʼa ʼi te Fale ʼo te Puleʼaga, ʼo ina ʼui fēnei: “ ʼE mole feala ke fai he meʼa fēia kiā koutou mokā kotou nonofo ʼio koutou, ʼo mulimuli ai ki te ʼu fono ʼi te telefoni!”—Loma 1:11, 12.

Ohagē ko Ana ʼaē “neʼe mole puli ia ʼi he ʼaho ʼi te fale lotu,” iā ʼaho nei, tokolahi ʼi tatatou hahaʼi mātutuʼa ʼe natou kau tuʼumaʼu ki te ʼu fono Fakakilisitiano, ʼo fakalogo pē ki tonatou mālolohi pea mo tonatou ʼu ʼaluʼaga. (Luka 2:36, 37) ʼE natou fakalogo ki te ʼu fono ʼaki te telefoni mokā ʼe ʼaoga ki ai, kae ʼe natou ʼiloʼi lelei pē ʼe mole feala ki te fakatuʼutuʼu ʼaia ke natou maʼu ai ia te ʼu lelei fuli ʼaē ʼe maʼu mokā kita kau fakahagatonu ki te ʼu fono ʼaē ʼe fai ʼi te Fale ʼo Te Puleʼaga. ʼI tatatou mulimuli ki tanatou faʼifaʼitaki lelei ʼaia, ʼofa pē ke tou haga fiafia ʼi tatatou faiga lahi ʼaē ke tou kau ki tatatou ʼu fono, ʼi tatatou tauhi ki totatou ʼAtua lahi ko Sehova.—Pes. 95:1-3, 6; 122:1.