He Faʼifaʼitaki ʼo He ʼu ʼUluaki Palalau

Ko Te Tule Leʼo Apelili–Sunio

“ʼE matou tufa ia te kiʼi pepa lotu ʼaeni ki te hahaʼi fuli ʼi te ʼaho nei. ʼE fakahaha ai pe koʼe ʼe ʼaoga ia te Tohi-Tapu. Koʼeni tau kiʼi pepa. [Foaki age te pepa lotu Kotea Takotou Manatu ʼo ʼUhiga Mo Te Tohi-Tapu?] Ko ʼihi ʼe natou feʼekeʼaki pe ʼe ko te ʼu tokoni ʼae ʼe maʼu ʼi te Tohi-Tapu ʼe ʼaoga ʼi tanatou gaue. Kotou fakatokagaʼi ia te vaega ʼaeni ʼe palalau ʼo ʼuhiga mo te gaue. [Lau ia Ekelesiasi 3:13.] ʼE ke maʼu ʼi te nusipepa ʼaeni ia te ʼu pelesepeto Fakatohi-tapu ʼe feala ke tokoni mai ke tou maʼu ia te fiafia ʼi tatatou gaue. ʼE ke loto lelei la ke au tuku atu?”

Réveillez-vous! Apelili

“ʼE matou fia faipalalau mo kotou heʼe tokolahi te hahaʼi ʼe natou tuʼania ʼo ʼuhiga mo te ʼu fetogi ʼi ʼonatou maʼuli fakafamili. ʼI te ʼu taʼu ʼaeni kua ʼosi, neʼe tokakaga fakalelei te ʼu matuʼā ki ʼanatou fanau, kaʼe ʼi te temi nei kua fetogi. ʼI takotou manatu la, ʼe akoʼi fakalelei koa te ʼu matuʼā ʼanatou fanau? [Tuku ke fai mai hana tali.] ʼE ui ʼi te Tohi-Tapu ko te fakatonutonuʼi ʼe ʼaoga. [Lau ia Taaga Lea 29:17.] ʼE foaki mai ʼi te nusipepa ʼaeni ia te ʼu tokoni lelei ʼo ʼuhiga mo te fakatonutonuʼi ʼo te ʼu fanau.”