Ke Lelei Age Tatatou Minisitelio: Tokoni Ke Fai Tuʼumaʼu e Tau Ako Tana Agamahani Lelei ʼAe Ko Te Ako

He Koʼe ʼe Maʼuhiga? ʼE tonu ki te kau ako Tohi-Tapu ke lahi age tanatou fafaga ʼonatou ʼatamai mo ʼonatou loto ʼaki te ʼu akonaki ʼo te Folafola ʼa Te ʼAtua. ʼI tanatou fai te faʼahi ʼaia, ʼe natou malolohi anai ʼi te faʼahi fakalaumalie. (Hep. 5:12–6:1) Ko te ako ʼe fakamaʼua ki ai he ʼu faiga. Pea ʼe tonu ke hilifaki te ʼu faʼahi ʼae neʼe hoki natou ako ki te ʼu faʼahi ʼae kua natou iloʼi. ʼE tonu ke natou toe mahino pe ʼe feafeaʼi hanatou maʼuliʼi te ʼu faʼahi ʼaia. (Taag. 2:1-6) Ko te fai ʼo he ʼu fekumi ʼe tokoni anai ki te kau ako ke natou tali ki he ʼu fehuʼi Fakatohi-tapu, ʼaki tanatou fakaʼaogaʼi ʼatatou tohi. Kapau ʼe natou faiga ke natou maʼuliʼi te ʼu faʼahi ʼae ʼe natou ako, ʼe natou lotomalohi anai moka natou felaveʼi mo he ʼu ʼahiʼahi ʼi tonatou ʼuhiga Kilisitiano.—Luka 6:47, 48.