Tafitoʼaga ʼo Te Kaupepa Ako Te Maʼuli Fakakilisitiano Mo Te Faifakamafola
VAHAʼA ʼO TE ʼAHO 7-13 ʼO SANUALIO
TE ʼU KOLOA ʼO TE TOHI-TAPU | GAUE 21-22
“Ke Hoko Te Finegalo ʼo Sehova”
(Gaue 21:8-12) ʼI te ʼaho ake, neʼe matou mavae ʼo olo ki Sesalea. Neʼe matou hu ki te ʼapi ʼo Filipo, te Tagata Faifakamafola. Pea neʼe kau ʼi te ʼu tagata ʼe toko fitu neʼe fakaʼapaʼapaʼi, ʼo matou nonofo mo ia. 9 Neʼe maʼu e te tagata ʼaia ʼona ʼofafine ʼe toko fa neʼe mole ʼohoana pea neʼe natou faifakakikite. 10 Kaʼe hili ni ʼaho ʼi tamatou kua nonofo ai, neʼe haʼu mai Sutea te polofeta neʼe higoa ko Akapusi. 11 Neʼe haʼu kia matou pea neʼe ina toʼo te kiliʼi pipi ʼo Paulo ʼo ina haʼi ʼaki ʼona vaʼe mo ʼona nima pea ina ui fenei: “ ʼE ui fenei e te laumalie maʼoniʼoni: ‘Ko te tagata ʼae ʼoʼona te kiliʼi pipi ʼaeni, ʼe haʼi fenei anai ia ia e te kau Sutea ʼi Selusalemi, pea ʼe natou tuku anai ia ia ki te ʼu nima ʼo te hahaʼi ʼae ʼe mole Sutea.’ ” 12 ʼI tamatou logo ki ai, ʼo feia mo natou ʼae neʼe ʼi ai, neʼe matou kole mamahi age ke ʼaua naʼa hake ki Selusalemi.
bt-F 177-178 15-16
“Ke Hoko Te Finegalo ʼo Sehova”
15 ʼI te nofo ʼa Paulo ʼi te ʼapi ʼo Filipe, neʼe haʼu ki ai te tagata neʼe fakaʼapaʼapaʼi ko Akapusi. Neʼe iloʼi e natou ʼae neʼe ʼi ʼo Filipe ko Akapusi neʼe ko he polofeta; pea neʼe ina fakakikite ʼe hoko anai he toe hoge lahi ʼi te temi pule ʼo te hau ko Kolote. (Gaue 11:27, 28) Neʼe lagi natou feʼekeʼaki fenei: ‘Kotea te tupuʼaga ʼo te haʼu ʼa Akapusi? Pea kotea te logo ʼae ʼe ina fia fakaha?’ ʼI tanatou fagono fakamalotoloto, neʼe toʼo leva e Akapusi te kiliʼi pipi ʼo Paulo ʼo haʼi ʼaki ʼona vaʼe mo ʼona nima. Neʼe ko he koga kie loa neʼe takai ʼi te koga loto pea neʼe feala ke ʼai ki ai he foʼi fala peʼe ko ni ʼihi atu kiʼi meʼa. Pea neʼe ina fai he ʼu palalau fakatupu fakakaukau. “ ʼE ui fenei e te laumalie maʼoniʼoni: ‘Ko te tagata ʼae ʼoʼona te kiliʼi pipi ʼaeni, ʼe haʼi fenei anai ia ia e te kau Sutea ʼi Selusalemi, pea ʼe natou tuku anai ia ia ki te ʼu nima ʼo te hahaʼi ʼae ʼe mole Sutea.’ ”—Gaue 21:11.
16 Neʼe fakamoʼoni te lea fakapolofeta ʼa Akapusi ʼi te alu ʼa Paulo ki Selusalemi. ʼE toe ha ai te fehiʼa ʼa te kau Sutea, ʼo natou tuku ia ia “ki te ʼu nima ʼo te hahaʼi ʼae ʼe mole Sutea.” Neʼe malave ʼaupito te lea fakapolofeta ʼaia kia natou ʼae neʼe maʼunofo ʼi ʼo Filipe. ʼE tohi fenei e Luka: “ ʼI tamatou logo ki ai, ʼo feia mo natou ʼae neʼe ʼi ai, neʼe matou kole mamahi age ke ʼaua naʼa hake ki Selusalemi. Kaʼe neʼe ui fenei e Paulo: ‘He koʼe ʼe kotou fetagihi pea mo faigaʼi ke kotou fakalotovaivaiʼi au? Ke kotou iloʼi, kua au teuteu ke pilisoniʼi au pea ke au mate foki ʼi Selusalemi ʼuhi ko te huafa ʼo te ʼAliki ko Sesu.’ ”—Gaue 21:12, 13.
(Gaue 21:13) Kaʼe neʼe ui fenei e Paulo: “He koʼe ʼe kotou fetagihi pea mo faigaʼi ke kotou fakalotovaivaiʼi au? Ke kotou iloʼi, kua au teuteu ke pilisoniʼi au pea ke au mate foki ʼi Selusalemi ʼuhi ko te huafa ʼo te ʼAliki ko Sesu.”
bt-F 178 17
“Ke Hoko Te Finegalo ʼo Sehova”
17 Tou fakakaukauʼi age muʼa te aluʼaga ʼaeni. ʼE kole fakamalotoloto e te ʼu tehina ʼo kau ai mo Luka, kia Paulo ke ʼaua naʼa alu. Ko ʼihi ʼe faifetagihi. Neʼe malave ʼaupito kia Paulo tonatou ʼofa mamahi ʼaia, ʼo ina ui fakalelei age kia natou ʼe natou ‘fakalotovaivaiʼi ia ia’ peʼe, ohage ko tona ui ʼi ʼihi fakaliliu, ʼe natou “fakalotomamahiʼi ʼaupito [tona] loto.” Kae ʼe lototoʼa pe ia Paulo; ohage ko te aluʼaga neʼe hoko ki te ʼu tehina ʼo Tile. Koia, ʼe mole ko te ʼu fakakolekole, peʼe ko ni tagi ʼae ʼe feala ke lotovaivai ai. Kae, ʼe ina fakamahino age te tupuʼaga ʼo tana faiga ke alu. Neʼe lototoʼa moʼoni mo fakamalotoloto ʼaupito ia Paulo. Ohage pe ko Sesu ʼi muʼa atu, neʼe fakatotonu ke alu ki Selusalemi. (Hep. 12:2) Neʼe mole loto ia Paulo ke mate fakamaletile, kae kapau neʼe tonu ke mate feia, pea neʼe ko he pilivilesio ʼi tona ʼuhiga tisipulo ʼa Sesu Kilisito.
(Gaue 21:14) ʼI tamatou sisio ʼae ʼe mole fetogi anai tana manatu, neʼe matou haganoa ai leva pea mo ui fenei: “Ke hoko te finegalo ʼo Sehova.”
bt-F 178 18
“Ke Hoko Te Finegalo ʼo Sehova”
18 Kae neʼe feafeaʼi leva te ʼu tehina? Neʼe natou tali lelei ʼaki he aga fakaʼapaʼapa. ’E ui fenei ia Gaue 21:14: “ ʼI tamatou sisio ʼae ʼe mole fetogi anai tana manatu, neʼe matou haganoa ai leva pea mo ui fenei: ‘Ke hoko te finegalo ʼo Sehova.’ ” Ko natou ʼae neʼe faiga ke mole alu ia Paulo ki Selusalemi, neʼe mole natou toe fakakinauʼi. Neʼe natou fakalogo pe leva kia Paulo ʼo natou haganoa ki ai, mo mahino ʼe ko te finegalo ʼaia ʼo Sehova, logo la neʼe faigataʼa ʼaupito kia natou. Neʼe iloʼi e Paulo ko tana alu ʼaia ʼe feala ke mate ai. Neʼe faigafua noa pe kia Paulo mo ka na pau la neʼe mole taʼofi e natou ʼae ʼe ʼoʼofa mamahi kia ia.
Kumi Te ʼu Koloa ʼi Te Tohi-Tapu
(Gaue 21:23, 24) Koia ke ke fai te meʼa ʼaeni ʼe matou ui atu: ʼE ʼi ai ʼi heni he ʼu tagata ʼe toko fa neʼe natou fai he fakapapau. 24 Ke ke toʼo te ʼu tagata ʼaia pea mo kotou fakamaʼa ʼo mulimuli ki te Lao pea mo ke totogi te ʼu meʼa ʼae ʼe ʼaoga kia natou, ke feala ke tele ʼonatou ʼulu. Pea ʼe iloʼi anai e te hahaʼi fuli ʼe mole moʼoni te ʼu faʼahi ʼae neʼe natou logo ki ai ʼo ʼuhiga mo koe, kaʼe ʼe lelei tau aga pea ʼe ke taupau foki mo te Lao.
bt-F 184-185 10-12
“Kotou Fagono Mai Ki Taku Fakamahino Atu”
10 Kae neʼe lotomahino ia Paulo kia natou ʼae neʼe fia mulimuli ki ʼihi agaʼi fenua Fakasutea. Ohage ko te mole gaue ʼi te Sapato peʼe ko te tapuʼi ʼo te kai ʼo he faʼahiga meʼa kai. (Lom. 14:1-6) Pea neʼe mole ina fakatotonu he ʼu lekula ʼo ʼuhiga mo te silikosisio. Pea tahi, neʼe silikosisioʼi ia Timoteo e Paulo, ʼae neʼe tamai Keleka ke mole fakatupu tokakovi ki te kau Sutea. (Gaue 16:3) Neʼe fakalogo te silikosisio ki te loto ʼo te taki tokotahi. Neʼe ui fenei e Paulo ki te kau Kalate: “ ʼE mole he ʼuhiga ʼo te silikosisio peʼe ko te heʼe silikosisio. Kaʼe ʼe ko te tui ʼae ʼe maʼuhiga pea ko te ʼu gaue ʼo te tui ʼe tupu mai te ʼofa.” (Kal. 5:6) Ko he tahi ʼe silikosisio ʼuhi pe he ko te fakamaʼua ʼo te Lao peʼe ʼuhi pe ke ina maʼu te ʼofa ʼo te ʼAtua, ʼe ha ai ʼe ko he tahi ʼe mole tui.
11 Koia, logo la neʼe ko he ʼu logo neʼe mole moʼoni, kae neʼe fakatupu kovi ki te kau Sutea ʼae neʼe tui. Ko te tupuʼaga la ʼaia ʼo te foaki e te kau tagata ʼafeā te fakatotonu ʼaeni kia Paulo: “ ʼE ʼi ai ʼi heni he ʼu tagata ʼe toko fa neʼe natou fai he fakapapau. Ke ke toʼo te ʼu tagata ʼaia pea mo kotou fakamaʼa ʼo mulimuli ki te Lao pea mo ke totogi te ʼu meʼa ʼae ʼe ʼaoga kia natou, ke feala ke tele ʼonatou ʼulu. Pea ʼe iloʼi anai e te hahaʼi fuli ʼe mole moʼoni te ʼu faʼahi ʼae neʼe natou logo ki ai ʼo ʼuhiga mo koe, kaʼe ʼe lelei tau aga pea ʼe ke taupau foki mo te Lao.”—Gaue 21:23, 24.
12 Neʼe feala pe ke ui e Paulo ko te fihifihia tafito neʼe mole ko he ʼu palalau ʼo ʼuhiga mo ia, kae neʼe ʼuhi ko te fakamalotoloto ʼa te kau Sutea tui ʼae ki te Lao ʼa Moisese. Koia, neʼe aga malū pe ia Paulo, kae kehe pe ke ʼaua naʼa maumauʼi te ʼu pelesepeto fakaʼatua. Ki muʼa atu neʼe mole ina tohi koa la: “Kia natou ʼae ʼe fakalogo ki te lao, neʼe au hage ko he tahi ʼe fakalogo ki te lao, logo la ʼe mole au fakalogo ki te lao, ke feala ai haku maʼu ia natou ʼae ʼe fakalogo ki te lao.” (1 Ko. 9:20) Neʼe felogoi lelei ia Paulo mo te kau tagata ʼafea ʼo Selusalemi ʼo liliu ai ohage ko he tahi ʼe fakalogo ki te lao.’ ʼI tana fai feia, neʼe ina tuku mai he faʼifaʼitaki lelei kia tatou ia ʼaho nei, ke tou gaue fakatahi mo te kau tagata ʼafeā, ʼo mole tou fakakinauʼi ke fai te meʼa ʼae tou loto ki ai.—Hep. 13:17.
(Gaue 22:16) Pea ʼi te temi leva ʼaeni, kotea ʼae ʼe ke fakatuatuai ai? Ke ke tuʼu ake, ʼo papitema pea ke ke fetapa ki te huafa ʼo Sesu, pea ʼe fakamolemole anai e te ʼAtua ʼau agahala.’
nwtsty tokoni ki te ako ʼo Gau 22:16
ke ke fetapa ki te huafa ʼo Sesu, pea ʼe fakamolemole anai e te ʼAtua ʼau agahala: ʼE fakamolemole te ʼu agahala ʼa he tahi moka ʼe fetapa ki te huafa ʼo Sesu kae mole ʼaki te vai ʼae ʼe papitemaʼi ʼaki. Ko tona fakaʼuhiga ke tui kia Sesu pea mo fakamoʼoni ʼaki he ʼu gaue Fakakilisitiano.—Gau 10:43; Skp 2:14, 18.
VAHAʼA ʼO TE ʼAHO 14-20 ʼO SANUALIO
TE ʼU KOLOA ʼO TE TOHI-TAPU | GAUE 23-24
“Neʼe Tukugakoviʼi Ia Paulo Ko He Tagata ʼe Fakatupu Maveuveu, Mo Ina Lagaʼi He ʼu Agatuʼu”
(Gaue 23:12) ʼI te uhu ake, neʼe fonofono te kau Sutea pea mo natou fakapapau ke mole natou kakai mo iinu mo kapau heʼeki natou matehi ia Paulo.
(Gaue 23:16) Kaʼe neʼe logo ia te tama ʼa te tokolua ʼo Paulo ki tanatou fakatuʼutuʼu, pea neʼe hu ki te fale solia ʼo ina fakamatala age kia Paulo.
bt-F 191 5-6
“Ke Ke Lotomalohi!”
5 Neʼe to tonu te fakalotomalohiʼi ʼo Paulo. Koteʼuhi ʼi te uhu ake, neʼe ‘fonofono te toko 40 tupu kau tagata Sutea pea mo fakapapau ʼe mole natou kakai anai mo iinu mo kapau ʼe heʼeki natou matehi ia Paulo.’ Neʼe ha ’i tanatou “fakapapau” ʼaia tanatou fia matehi ia te apositolo. Pea tahi, neʼe natou manatu ʼe feala ke hoko he malaʼia mo kapau ʼe mole natou fakahoko ia te fakapapau ʼaia.’ (Gaue 23:12-15). Neʼe lagolago te kau pelepitelo pule mo te kau takitaki Sutea ki tanatou fakatuʼutuʼu ʼae ke toe fakaliliu mai ia Paulo ki te Sanetualio, takua he neʼe natou fia fakafehufehuʼi ia ia. Kae ʼi tona fakahagatonu, neʼe ko he kaka ke matehi ia Paulo.
6 Kae neʼe maʼu logo te ʼilamutu ʼa Paulo ki te fakatuʼutuʼu ʼaia pea neʼe alu ai ʼo tala kia Paulo. Neʼe kole atu aipe e Paulo ke foimo alu ʼo fakaha ki te kamutoa Loma ko Kolote Lisiasi. (Gaue 23:16-22) ʼE ʼofa moʼoni ia Sehova ki te kau tupulaga, ʼae ʼe natou fakamuʼamuʼa ʼaki he lototoʼa te maʼuli fiafia ʼo te hahaʼi ʼa te ʼAtua ia natou totonu, ohage ko te ʼilamutu ʼa Paulo ʼae ʼe mole tou iloʼi tona higoa ʼo natou gaue agatonu mo kinakina ʼo lagolago ki te Puleʼaga.
(Gaue 24:2) Pea neʼe pauʼi leva ia Teletulio, ʼo ina kamata tukugakoviʼi ia ia, ʼo ina ui fenei ki te kovana: “ ʼE matou tokagaʼi te tokalelei lahi ʼae ʼe matou maʼu ʼuhi ko koe pea mo te ʼu fetogi ʼae ʼe ke fakahoko ʼi te puleʼaga ʼaeni, ʼuhi ko tau fakakaukau poto.
(Gaue 24:5, 6) Koteʼuhi neʼe matou maʼu atu te tagata ʼaeni ʼe fakatupu maveuveu, mo ina lagaʼi he ʼu agatuʼu ʼi te lotolotoiga ʼo te kau Sutea fuli, ʼi te ʼu potu fuli ʼo te kele, pea ʼe ko he takitaki ʼo te magaʼi lotu ʼa te kau Nasaleti. 6 Neʼe ina toe faigaʼi foki ke ina moamoagaʼi ia te fale lotu, koia neʼe matou puke ai ia ia.
bt-F 192 ¶10
“Ke Ke Lotomalohi!”
10 ʼI te fale hau ʼo Helote ʼi Sesalea, neʼe leʼohi ai ia Paulo ʼo fakaatalitali ki te kaku mai ʼa te hahaʼi ʼae ʼe natou tukugakoviʼi ia Paulo mai Selusalemi. (Gaue 23:35) Pea neʼe natou tau mai kua hili ki ai ʼaho ʼe nima: Neʼe ko te pelepitelo lahi ko Ananiasi mo te tagata poto palalau ko Teletulio pea mo ʼihi kau takitaki Sutea. Neʼe kamata laupisiʼi muʼa e Teletulio ia Felise ʼi te ʼu meʼa ʼae neʼe ina fai maʼa te kau Sutea moʼo ʼona fakaoloolo ke kau mo natou. Pea neʼe aʼu mai leva ki te koga maʼuhiga ʼae ko te tukugakoviʼi ʼo Paulo ʼo ina ui “ ʼe fakatupu maveuveu, mo ina lagaʼi he ʼu agatuʼu ʼi te lotolotoiga ʼo te kau Sutea fuli, ʼi te ʼu potu fuli ʼo te kele, pea ʼe ko he takitaki ʼo te magaʼi lotu ʼa te kau Nasaleti, neʼe ina toe faigaʼi foki ke ina moamoagaʼi ia te fale lotu, koia neʼe matou puke ai ia ia.” Neʼe toe tekeni foki ʼe ʼihi kau Sutea te ʼu tukugakovi ʼaia, ʼo natou fakamoʼoni ki ai. (Gaue 24:5, 6, 9) Ko te lagaʼi ʼo he agatuʼu mo te takitaki ʼo he magaʼi lotu pea mo te moamoagaʼi ʼo te fale lotu neʼe ko he ʼu tukugakovi mamafa neʼe feala ke iku ki he fakatuʼā mate.
(Gaue 24:10-21) Neʼe fakagafua age e te kovana ke palalau ia Paulo pea neʼe palalau fenei leva: “ ʼE au iloʼi lelei, ʼe ko koe ko te tuʼi fakamau ʼo te puleʼaga ʼaeni talu mai ni taʼu. Koia ʼe au fiafia ʼi te fakamahino ʼi ʼou muʼa toku aluʼaga. 11 ʼE heʼeki fakalaka ʼaho ʼe 12 talu mai te temi ʼae neʼe au hake ai ʼo tauhi ki te ʼAtua ʼi Selusalemi. ʼE feala ke ke vakaʼi pe ʼe moʼoni te faʼahi ʼaia. 12 Neʼe mole natou maʼu au ʼe au lolotoga fihi mo he tahi ʼi te fale lotu peʼe au fakamaveuveuʼi te hahaʼi, ʼi te ʼu sinakoka peʼe ʼi te kolo. 13 Pea ʼe mole feala ke natou fakamoʼoni atu te ʼu tukugakovi ʼae ʼe natou fai ʼo ʼuhiga mo au. 14 Kaʼe ʼe au tala atu kia koe te faʼahi ʼaeni, ʼe au foaki he tauhi taputapu ki te ʼAtua ʼo ʼaku kui ʼo mulimuli ki te tauhi ʼae ʼe natou fakahigoaʼi ko he magaʼi lotu, pea mo au tui ki te ʼu meʼa fuli ʼae ʼe tuʼu ʼi te Lao pea mo te ʼu tohi ʼa te kau Polofeta. 15 Pea ʼe au falala ki te ʼAtua, ohage pe ko te ʼu tagata ʼaeni, pea ʼe matou ʼamanaki ʼe ʼi ai anai he fakatuʼuake ʼo te kau faitotonu pea mo te kau heʼe faitotonu. 16 ʼUhi ko te faʼahi ʼaia, ʼe au faigaʼi tuʼumaʼu ke au taupau he leʼo ʼo loto ʼe maʼa ia muʼa ʼo te ʼAtua pea mo te tagata. 17 Hili ni taʼu, neʼe au haʼu ʼo ʼaumai he ʼu meʼa ʼofa maʼa taku hahaʼi pea mo fai ni molaga. 18 ʼI taku lolotoga fakahoko te ʼu faʼahi ʼaia, neʼe natou maʼu au ʼi te fale lotu, kua au maʼa ʼo mulimuli ki te Lao, kaʼe neʼe mole ʼi ai he hahaʼi kaugā malie peʼe ko he maveuveu. Kaʼe neʼe ʼi ai ʼihi Sutea mai te potu fenua ʼo Asia 19 neʼe natou tukugakoviʼi au, pea ʼe tonu ke natou ʼi heni ʼo palalau atu, mo kapau neʼe natou maʼu he hala ia au. 20 Peʼe ke fakaha atu e te ʼu tagata ʼaeni te kovi ʼae neʼe natou maʼu ʼi tanatou fakamauʼi au ia muʼa ʼo te Sanetualio, 21 naʼa meʼa age pe ko taku kalagaʼi fenei ʼi te lotolotoiga ʼo natou: ‘ ʼI te ʼaho nei ʼe fakamauʼi au ʼi ʼokotou muʼa, ʼuhi ko taku tui ki te fakatuʼuake ʼo te kau mate!’ ”
bt-F 193-194 13-14
“Ke Ke Lotomalohi!”
13 Neʼe tuku mai e Paulo he faʼifaʼitaki lelei moka ʼe fakamauʼi tatou e te ʼu pule maʼoluga ʼuhi ko tatatou lotu, mo tukugakoviʼi tatou ʼe ko he hahaʼi ʼe fakatupu maveuveu, pea ʼe ko he ʼu hahaʼi agatuʼu peʼe ʼe ko tatou ʼe ko he “magaʼi lotu ʼe kovi.” Neʼe mole kakaʼi e Paulo ia te kovana ʼaki he ʼu palalau fakalaupisi ohage ko tona fai e Teletulio. Neʼe aga fakaʼapaʼapa pe ʼo nofo fakalogologo pea neʼe fai e Paulo he fakamoʼoni ʼaki he ʼu palalau ʼe tasilo mo fakaʼeteʼete. Neʼe ina fakaha ai neʼe mole ʼomai te ʼu “Sutea mai te potu fenua ʼo Asia” ia natou ʼae neʼe natou tukugakoviʼi ia ia, ʼo ui neʼe ina moamoagaʼi te fale lotu. He ʼe ʼo mulimuli ki te lao, neʼe tonu ke natou fepalalauʼaki ke logo ia Paulo ki ʼanatou tukugakovi.—Gaue 24:18, 19.
14 Ko te meʼa ʼae neʼe fakaofoofo, neʼe ko te mole fakagata e Paulo tana fia foaki he ʼu fakamoʼoni ʼo ʼuhiga mo tana tui. ʼAki he lototoʼa, neʼe ina toe talanoaʼi tana tui ʼae ki te fakatuʼuake, ʼae neʼe tupu ai la te maveuveu ʼi tona fakamauʼi e te Sanetualio. (Gaue 23:6-10) Moʼo haofaki ʼo ia, neʼe ina fakamaʼuhigaʼi te ʼamanaki ki te fakatuʼuake. Kotea tona tupuʼaga? Koteʼuhi neʼe ina fakamoʼoni ʼo ʼuhiga mo Sesu pea mo tona fakatuʼuake, ʼae neʼe mole tui ki ai ia natou ʼae ʼe fakafeagai. (Gaue 26:6-8, 22, 23) Koia, ko te fihifihia neʼe ko te fakatuʼuake kae tafito neʼe ko te tui ʼae kia Sesu pea mo tona fakatuʼuake.
Kumi Te ʼu Koloa ʼi Te Tohi-Tapu
(Gaue 23:6) Neʼe iloʼi e Paulo, ʼi te Sanetualio, neʼe ʼi ai te kau Satuseo pea mo te kau Faliseo. Koia, neʼe kalaga fenei ai: “ ʼU tagata, ʼu tehina, ko au ko he Faliseo, foha ʼo te kau Faliseo. ʼE fakamauʼi au ʼuhi ko taku tui ki te fakatuʼuake ʼo te kau mate.”
nwtsty tokoni ki te ako ʼo Gau ʼo 23:6
ko au ko he Faliseo: Ko ʼihi ʼo te nofoʼaki neʼe natou iloʼi ia Paulo. (Gau 22:5) ʼI te ui ʼae e Paulo ʼe ko ia ʼe ko he foha ʼo te kau Faliseo, neʼe mahino te kau Faliseo ʼo te Sanetualio, neʼe ina fakamoʼoni tona ʼuhiga Faliseo ohage pe ko natou, logo la tana kua liliu ʼae ko he Kilisitiano faʼa fai. Neʼe mole malualoi ia Paulo. Kae ʼi te aluʼaga ʼaeni, neʼe ina ui ʼe ko ia ko he Faliseo kae mole ko he Satuseo koteʼuhi, ohage pe ko te kau Faliseo neʼe tui mo ia ki te fakatuʼuake. ʼI tana ui age feia, neʼe ina maʼu ai he faigamalie ke felogoi lelei mo te kau Faliseo ʼae neʼe ʼi ai. ʼI tana talanoa ʼae ki te fakatuʼuake, neʼe fakaʼamu ia Paulo ʼe fia lagolago age anai kia ia ni ʼihi ʼo te Sanetualio. Koia, neʼe lagolago ʼihi kau Faliseo kia ia. (Gau 23:7-9) Ko te ʼu palalau ʼaeni ʼa Paulo ia Gau 23:6 ’e alu tahi mo tana talanoa ʼae ʼo ʼuhiga mo ia totonu, ki muli age ʼi muʼa ʼo te Hau ko Akilipa. (Gau 26:5) ʼI tana faitohi mai Loma ki te ʼu tehina mo tuagaʼane ʼo Filipe, neʼe toe talanoa ai ia Paulo ki tona ʼuhiga tagata Faliseo. (Flp 3:5) Pea ʼe tou toe fakatokagaʼi ʼi te fakamatala ʼae ʼe tuʼu ia Gau 15:5 ʼo ʼuhiga mo ʼihi kau Faliseo neʼe liliu ko he kau Kilisitiano.—Vakaʼi te tokoni ki te ako ʼo Gau 15:5.
(Gaue 24:24) Hili he ʼu ʼaho, neʼe haʼu ia Felise mo tona ʼohoana ko Tulusila, te fafine Sutea pea neʼe ina fekauʼi ke ʼaumai ia Paulo. Neʼe fagono leva ki tana palalau age ʼo ʼuhiga mo te tui kia Kilisito Sesu.
(Gaue 24:27) Kaʼe hili taʼu ʼe lua, neʼe fetogi leva e Polokio Feseto ia Felise. Pea neʼe loto e Felise ke ʼofainaʼi ia ia e te kau Sutea, koia neʼe ina tuku ai ia Paulo ke pilisoniʼi.
nwtsty tokoni ki te ako ʼo Gau ʼo Gau 24:24
Tulusila: Ko te muli ʼaia ʼo te ʼu ʼofafine ʼe tolu ʼo Helote, te Helote ʼae ʼe tuʼu ia Gau 12:1, ʼae ko Helote Akilipa I. Neʼe tupu ia Tulusila ʼi te teitei taʼu 38 H.T.S. pea neʼe tau tuagaʼane mo Akilipa II pea tautehina mo Pelenise. (Vakaʼi te tokoni ki te ako ʼo Gau 25:13 mo Te ʼu Kupu Mo ʼOna Fakaʼuhiga, “Helote.”) Neʼe ʼuluaki ʼohoana ia Tulusila mo te Hau Silia ko Azizus d’Émèse pea nā mavete ʼo toe ʼohoana leva mo te kovana ko Felise, ʼi te teitei taʼu 54 H.T.S. ʼi tona lagi taʼu 16. ʼI te temi ʼae neʼe palalau ai ia Paulo kia Felise “ ʼo ʼuhiga mo te faitotonu, mo te lotololomi pea mo te fakamau ʼae ka hoko,” neʼe lagi neʼe ʼi ai ia Tulusila. (Gau 24:25) Neʼe fetogi leva e Feseto ia Felise ʼi tona ʼuhiga kovana kae neʼe tuku pe ia Paulo e Felise ʼi te pilisoni, he neʼe loto “ke ʼofainaʼi ia ia e te kau Sutea.” ʼE ui ʼe ʼihi neʼe ina fia fakafiafiaʼi tona ʼohoana ʼae neʼe ko he Sutea pea neʼe kei finemui.—Gau 24:27.
VAHAʼA ʼO TE ʼAHO 21-27 ʼO SANUALIO
TE ʼU KOLOA ʼO TE TOHI-TAPU | GAUE 25-26
“ ʼE Tagi Ia Paulo Kia Sesale Pea ʼe Ina Fakamoʼoni Ki Te Hau Ko Helote Akilipa”
(Gaue 25:11) Kapau ko au ko he tagata agakovi pea neʼe au fai he meʼa ʼe tuha ai ke matehi au, ʼe mole au fakafisi ki te mate. Kaʼe kapau ʼe mole he fakamoʼoni ki te ʼu tukugakovi ʼae ʼe fai e te ʼu tagata ʼaeni ʼo ʼuhiga mo au, pea ʼe mole feala ke tuku au e he tahi kia natou, ʼuhi pe ko hana agaʼofa kia natou. ʼE au tagi kia Sesale!”
bt-F 198 6
“ ʼE Au Tagi Kia Sesale!”
6 Neʼe kumi kau ia Feseto ki te kau Sutea pea neʼe feala ke tuʼutamakiʼia ai te maʼuli ʼo Paulo. Kae neʼe fakaʼaogaʼi e Paulo ʼona faigamalie ʼi tona ʼuhiga tagata Loma. Neʼe ina ui fenei kia Feseto: “ ʼE au tuʼu nei ia muʼa ʼo te fakamauʼaga ʼo Sesale. ʼE tonu ke fakamauʼi au ʼi heni. Neʼe mole au fai he meʼa ʼe kovi ki te kau Sutea, pea ʼe ke iloʼi lelei pe. . . . ʼE au tagi kia Sesale!” Neʼe mole kei feala he holomuli ʼa Paulo, kae neʼe tonu pe ke ina fakahoko tana tagi. Neʼe tali fenei age e Feseto: “Neʼe ke tagi kia Sesale, pea ʼe ke alu anai kia Sesale.” (Gaue 25:10-12) ʼI te tagi ʼa Paulo ki he tui fakamau ʼe maʼoluga age, neʼe ina tuku mai ai he faʼifaʼitaki ki te kau Kilisitiano moʼoni ʼo te temi nei. Ka fakafeagai ni hahaʼi ki te kau Fakamoʼoni ʼa Sehova ʼo natou “fai ni fakakaukau kovi ki te lao,” ʼe feala pe ke tauʼi e te kau Fakamoʼoni ʼaki te ʼu fakafealagia ʼo te lao, ke lagolago te logo lelei.—Pes. 94:20.
(Gaue 26:1-3) Neʼe ui fenei age e Akilipa kia Paulo: “Kua gafua tau tali ki te ʼu tukugakovi ʼae ʼe fai kia koe.” Neʼe faoʼi e Paulo tona nima pea neʼe ina ui fenei: 2 Hau ko Akilipa, ʼe au fiafia ʼi te ʼaho nei ʼi taku lava tali ʼi ʼou muʼa ʼo ʼuhiga mo te ʼu meʼa fuli ʼae neʼe tukugakoviʼi ai au e te kau Sutea, 3 tafito la he ʼe ke iloʼi lelei te ʼu agaʼi fenua fuli ʼo feia mo te ʼu fihi ʼa te kau Sutea. Koia, ʼe au kole atu ke ke kataki ʼo fagono mai.
bt-F 198-201 10-16
“ ʼE Au Tagi Kia Sesale!”
10 Neʼe fakamalo ia Paulo ki te Hau ko Akilipa ʼi tana fakafealagia age ke palalau ʼi tona fakamauʼi. Pea neʼe toe fakamanatuʼi age ʼe Paulo te mahino katoa ʼa te hau ki te ʼu agaʼi fenua mo fihi fuli ʼa te kau Sutea. Neʼe talanoa leva ia Paulo ki tona maʼuli ʼafeā: “Neʼe au maʼuli ohage ko he Faliseo, ʼo mulimuli ki te magaʼi lotu ʼae ʼe faigataʼa ʼona lekula.” (Gaue 26:5) ʼI tana kei Faliseo, neʼe ʼamanaki ki te haʼu ʼa te Mesia. Pea ʼi tana kua Kilisitiano leva, neʼe tui malohi ʼe ko Sesu Kilisito te Mesia. Pea ʼe lolotoga fakamauʼi nei ʼuhi ko te ʼamanaki, ʼae ʼe toe maʼu pe e natou ʼae neʼe natou ʼave ia ia ki te fakamauʼaga. Ko te ʼamanaki ʼae ʼe hoko anai te fakapapau ʼae neʼe fai e te ʼAtua ki ʼanatou kui. Ko te tupuʼaga la ʼaia ʼo te fia logo ʼa Akilipa ki te ʼu fakamahino ʼa Paulo.
11 Neʼe talanoa ia Paulo ki tana gaohi koviʼi te kau Kilisitiano ʼi muʼa atu: “Kia au, neʼe au tui papau neʼe tonu ke au fakahoko he ʼu tuʼuga gaue moʼo fakafeagai ki te huafa ʼo Sesu te tagata Nasaleti . . . ʼI te kovi ʼo toku ita kia natou [te ʼu tisipulo ʼa Kilisito], neʼe au fakatagaʼi natou ʼo kaku ki te tahi ʼu kolo.” (Gaue 26:9-11) Neʼe moʼoni te ʼu palalau ʼaia ʼa Paulo. Pea neʼe iloʼi lelei pe e te hahaʼi te ʼu agakovi fuli neʼe ina fakahoko ki te kau Kilisitiano. (Kal. 1:13, 23) Neʼe lagi feʼekeʼaki ai e Akilipa pe kotea ʼae neʼe tupu ai te fetogi ʼa Paulo.
12 Neʼe feala pe ke maʼu e Akilipa he tali ʼi te ʼu palalau ʼaeni ʼa Paulo: Neʼe “au fagona ai ki Tamaso ʼaki te fakagafua pea mo te ʼu fakatotonu mai te kau pelepitelo pule. Pea ʼi te ala, ʼi te fetapa, Hau ko Akilipa, neʼe ha mai he malama mai te lagi kia au mo natou ʼae neʼe kaugā fagona mo au, pea neʼe malohi age ʼi te gigila ʼo te laʼa. Neʼe matou fetokaʼi fuli. Pea neʼe au logo ki he leʼo neʼe ina ui fenei mai ʼi te Fakahepeleo: ‘Saulo, Saulo, he koʼe ʼe ke fakatagaʼi au? ʼE ke fakamamahiʼi ia koe totonu ʼi tau fakatutuʼu, ohage ko he manu ʼe fakatutuʼu ki te tagata tauhi manu ʼae ʼe ina taki ia ia ʼaki te ʼakau masila.’ Kaʼe neʼe au ui fenei: ‘Ko ai ia koe?’ Pea neʼe tali fenei mai e te ʼAliki: ‘Ko au ia Sesu, ʼae ʼe ke fakatagaʼi.’ ”—Gaue 26:12-15.
13 Neʼe ‘fakafeagai ia Paulo ʼi muʼa atu ʼo te hoko ʼo te aluʼaga ʼaia. Ohage pe ko he manu ʼe tauʼoho age ki te tagata tauhi manu ʼae ʼe ina taki ʼaki he ʼakau masila,’ neʼe lavea ʼi tana tautau ī ki te muamuaʼi ʼakau masila. ʼO toe feia pe mo Paulo, neʼe lavea ʼi te faʼahi fakalaumalie ʼi tana fakafeagai ki te finegalo ʼo te ʼAtua. Neʼe ko he tagata fakamalotoloto kae neʼe kei nofo ʼi te fakapoʼuli. ʼI te ha ʼa Sesu ki ai ʼi te ʼala ʼae ki Tamaso neʼe fetogi katoa ai tana fakakaukau.—Soane 16:1, 2.
14 Koia, neʼe fai e Paulo he ʼu toe fetogi lahi ʼi tona maʼuli. Neʼe ina ui fenei leva kia Akilipa: “Neʼe mole au talagataʼa ki te meʼa ʼaia neʼe ha mai mai te lagi, kaʼe neʼe au ʼave te logo, ʼuluaki kia natou ʼae ʼi Tamaso pea kia natou leva ʼae ʼi Selusalemi, pea ki te ʼu kolo fuli ʼo Sutea, ʼo feia mo te ʼu fenua matapule. Neʼe au fakaha age ʼe tonu ke natou fakahemala pea mo tafoki ki te ʼAtua, ʼo natou fai he ʼu gaue ʼe tuha mo te fakahemala.” (Gaue 26:19, 20) Neʼe kua lauʼi taʼu leva te faigaʼi e Paulo te gaue ʼae neʼe fakatotonu age e Sesu, ʼi tana ha kia ia ʼi te temi ʼo te fetapa. Neʼe kotea leva te ʼu fua ʼo tana gaue ʼaia? ʼI te tali e te hahaʼi te logo lelei ʼae neʼe ina fakamafola, neʼe natou fakahemala ai ki ʼanatou aga fakalialia mo kaka pea ke natou fakaovi ki te ʼAtua. Neʼe natou fakalogo leva mo fakaʼapaʼapa ki te ʼu lao mo te ʼu pule taki.
15 Kae ko te ʼu fua lelei fuli ʼaia ʼo te gaue ʼa Paulo neʼe ko he meʼa noa ia ki te kau Sutea fakafeagai. Neʼe tala fenei ai e Paulo: “Ko te tupuʼaga la ʼaia ʼo toku puke e te kau Sutea ʼi te fale lotu pea mo natou faigaʼi ke natou matehi au. Kaʼe ʼaki te tokoni ʼa te ʼAtua, ʼe kei hoko atu pe ia ʼaho nei taku fai he fakamoʼoni ki te hahaʼi malalo pea mo natou maʼoluga.”—Gaue 26:21, 22.
16 ʼE tonu kia tatou kau Kilisitiano moʼoni ke tou “nonofo teuteu tuʼumaʼu” ke tou fakamahino tatatou tui. (1 Pe 3:15) Ka tou palalau ki tatatou tui ki te ʼu tui fakamau mo te ʼu pule taki, ʼe tou faʼifaʼitakiʼi anai te faʼahiga palalau ʼa Paulo kia Akilipa mo Feseto. ʼE lagi lave loto anai moka ʼe tou fakamahino age te fetogi e te Tohi-Tapu totatou maʼuli mo te maʼuli ʼo te hahaʼi ʼae ʼe natou tali te logo lelei.
(Gaue 26:28) Kaʼe neʼe ui fenei e Akilipa kia Paulo: “Kei toe siʼi pe pea ke fakatafoki au ke au Kilisitiano.”
bt-F 202 18
“ ʼE Au Tagi Kia Sesale!”
18 Koʼeni te tali ʼa Paulo kia Feseto: “ ʼE mole au ʼulu vale, Kovana Lahi ko Feseto, kaʼe ʼe au fai he ʼu palalau ʼe moʼoni mo fakapotopoto. Pea ko te hau, ʼae ʼe au palalau fakahagatonu ki ai, ʼe ina iloʼi lelei te ʼu meʼa ʼaeni . . . Hau ko Akilipa, ʼe ke tui koa ki te kau Polofeta? ʼE au iloʼi ʼe ke tui ki ai.” Neʼe ui leva e Akilipa ki ai: “Kei toe siʼi pe pea ke fakatafoki au ke au Kilisitiano.” (Gaue 26:25-28) ʼE mole iloʼi pe neʼe ko he palalau fakamalotoloto ʼa te hau , kae ʼe ha mai ai neʼe malave ʼaupito ki tona loto te tali ʼa Paulo.
Kumi Te ʼu Koloa ʼi Te Tohi-Tapu
(Gaue 26:14) Neʼe matou fetokaʼi fuli. Pea neʼe au logo ki he leʼo neʼe ina ui fenei mai ʼi te Fakahepeleo: ‘Saulo, Saulo, he koʼe ʼe ke fakatagaʼi au? ʼE ke fakamamahiʼi ia koe totonu ʼi tau fakatutuʼu, ohage ko he manu ʼe fakatutuʼu ki te tagata tauhi manu ʼae ʼe ina taki ia ia ʼaki te ʼakau masila.’
nwtsty tokoni ki te ako ʼo Gau 26:14
he manu ʼe fakatutuʼu ki te tagata tauhi manu ʼae ʼe ina taki ia ia ʼaki te ʼakau masila: Neʼe fakaʼaogaʼi te muʼamuʼaʼi ʼakau masila moʼo taki ʼaki te ʼu manu. (Tfm 3:31) ʼE tatau te faʼifaʼitaki ʼaeni mo te faʼifaʼitaki ʼae ʼe maʼu ʼi te ʼu tohi ʼafeā Fakakeleka. Ko he vitulo ʼe uigataʼa neʼe mole fia alu ki muʼa logo la tona hukihuki atu e te tagata tauhi manu, ʼe faifai pe pea lavea ʼi te tautau lave ʼo tona kili ki te muʼaʼi ʼakau masila. Neʼe agatuʼu feia ia Saulo ʼi muʼa atu ʼo tana liliu ko he Kilisitiano. Neʼe fakafeagai tuʼumaʼu ki te ʼu tisipulo ʼofaina ʼa Sehova ʼAtua. Pea neʼe feala ke tuʼutamakiʼia ai tona maʼuli. (Gau 5:38, 39; 1 Ti 1:13, 14) ʼI te vaega ʼo Ekelesiasi 12:13, ʼe fakata te ʼu “mea masila” ki te ʼu palalau fakapotopoto ʼae ʼe fai e he tahi, ʼe fakatupu fia logo.
nwt te ʼu kupu mo ʼona fakaʼuhiga
ʼAkau masila: Ko he koga ʼakau loa neʼe fakapipiki ki ai he moʼi ukamea neʼe fakaʼaogaʼi e te hahaʼi gaue kele moʼo hukiʼi pea mo taki he manu. ʼE fakata e te ʼakau masila te ʼu palalau ʼe fai e he tahi ʼe poto moʼo uga ia ia ʼae ʼe fagono ke ina tokagaʼi te tokoni poto ʼae ʼe fai age. Ko te ui ʼae ‘fakatutuʼu ki te ʼakau masila’ ʼe fakaʼuhiga ki te vitulo uigataʼa ʼae ʼe fakatutuʼu ki tona taki ʼaki te ʼakau masila, ʼo tupu ai tona lavea.—Gau 26:14; Tfm 3:31.
(Gaue 26:27) Hau ko Akilipa, ʼe ke tui koa ki te kau Polofeta? ʼE au iloʼi ʼe ke tui ki ai.”
Tou Tokoni Ki Te Hahaʼi Ke Nātou Tali Te Logo ʼo Te Puleʼaga
14 Neʼe ʼiloʼi e Paulo neʼe ʼui ko Akilipa ʼe ko ia ko te Sutea. Neʼe fakamanatuʼi age e Paulo te meʼa ʼaē neʼe ʼiloʼi e Akilipa ʼo ʼuhiga mo te Lotu Sutea, ʼo ina ʼui, ʼi tona ʼuhiga moʼoni, neʼe ina faka mafola te ʼu “mea nee tala e te kau polofeta mo Moisese o uhiga mo mea e amanaki hokosia mai” ʼo ʼuhiga mo te mate pea mo te fakatuʼuake ʼo te Mesia. (Gaue 26:22, 23) ʼI tana palalau fakahagatonu kia Akilipa, neʼe fehuʼi fēnei e Paulo: “E tui tau afio, Akilipa, ki te kau polofeta?” Neʼe faigataʼa kia Akilipa tana tali kiai. Kapau neʼe ina ʼui neʼe fakafisi ki te kau polofeta, pea ʼe fakatupu kovi anai ki tona ʼuhiga tagata tui Sutea. Kae kapau ʼe ʼalutahi mo te fakakaukau ʼa Paulo, pea ʼe ina fakahā anai ia muʼa ʼo te hahaʼi ʼe manatu tahi mo te ʼapositolo pea neʼe feala ke ʼui ko ia ko he Kilisitiano. ʼAki he aga fakapotopoto, neʼe tali e Paulo totonu ki tana fehuʼi, ʼo ina ʼui fēnei: “E au iloi e ke tui.” ʼI te malave ʼaia ki te loto ʼo Akilipa, neʼe feafeaʼi tana tali? Neʼe ina tali fēnei: “Kei toe siʼi pe pea ke fakatafoki au, ke au kilisitiano.” (Gaue 26:27, 28) Logola neʼe mole liliu ia Akilipa ko he Kilisitiano, kae ʼe mahino ia neʼe malave ki tona loto te logo ʼaē neʼe fakahā age e Paulo.—Hepeleo 4:12.
VAHAʼA ʼO TE ʼAHO 28 ʼO SANUALIO -3 ʼO FEPUALIO
TE ʼU KOLOA ʼO TE TOHI-TAPU | GAUE 27-28
“ ʼE Folau Vaka Ia Paulo Ki Loma”
(Gaue 27:23, 24) ʼAnapo, ko te ʼAtua ʼae ʼe au atolasio pea mo foaki ki ai he tauhi taputapu, neʼe ina fekauʼi mai he ʼaselo 24 pea neʼe ina ui fenei mai: ‘Paulo, ʼaua naʼa ke mataku. ʼE tonu ke ke tuʼu ia muʼa ʼo Sesale, pea ʼe haofaki anai e te ʼAtua ia natou fuli ʼae ʼe folau fakatahi mo koe.’
bt-F 208 15
“ ʼE Mole He Tahi Ia Koutou ʼe Mate Anai”
15 Neʼe lagi fakamafola e Paulo te “ ʼamanaki ki te fakahoko ʼo te fakapapau ʼae neʼe fai e te ʼAtua” ki ʼona kaugā faifolau. (Gaue 26:6; Kol 1:5) Pea ʼi te ʼamanaki mou ʼo te vaka neʼe ina toe foaki age kia natou he tahi ʼamanaki ʼe feala ke hoko ʼi te moʼi temi pe ʼaia. Neʼe ina ui fenei: ‘ ʼAnapo, neʼe fekauʼi mai he ʼaselo pea neʼe ina ui fenei mai: ‘Paulo, ʼaua naʼa ke mataku. ʼE tonu ke ke tuʼu ia muʼa ʼo Sesale, pea ʼe haofaki anai e te ʼAtua ia natou fuli ʼae ʼe folau fakatahi mo koe.’ Koia ʼu tagata, kotou lotomalohi, he ʼe au tui ki te ʼAtua, pea ʼe hoko anai ohage pe ko tona fakaha mai. Kaʼe ʼe tonu ke mahaʼia te vaka ʼi he motu.’—Gaue 27:23-26.
(Gaue 28:1, 2) ʼI tamatou kua hao ʼi te tuʼutamaki, neʼe matou iloʼi leva neʼe higoa te motu ko Malete. 2 Pea neʼe agalelei ʼaupito te hahaʼi ʼo te motu kia matou. Neʼe natou tafu he afi ʼo fakatalitali leleiʼi ia matou fuli, he neʼe ʼua pea mo momoko.
bt-F 209 18
“ ʼE Mole He Tahi Ia Koutou ʼe Mate Anai”
18 Neʼe kakau te kau folau ʼo te vaka ki te kiʼi motu ko Malete, ʼe tuʼu ʼi te potu saute ʼo Sisile. (Vakaʼi te ʼa takai “ ʼE tuʼu Malete ʼifea?”) Pea ko te hahaʼi ʼo te motu neʼe “agalelei ʼaupito” kia natou. (Gaue 28:2) Neʼe natou tafu te afi he neʼe palapala mo mokosisia ia Paulo mo ʼona kaugā faifolau. Neʼe fakamafana ai te kau folau he neʼe momoko mo ʼua. Pea neʼe hoko ai leva te milakulo.
bt-F 210 ¶21
“ ʼE Mole He Tahi Ia Koutou ʼe Mate Anai”
21 Neʼe maʼuli ia te tagata maʼu kele ko Popilio ʼi te koga meʼa ʼaia. Neʼe ko te ofisie Loma ʼo Malete. Neʼe fakahigoaʼi ia ia e Luka ko te “pule ʼo te motu,” te tuʼulaga totonu ʼae neʼe tohi ʼi te ʼu foʼi monimo ʼe lua ʼi te lea ʼo Malete. Neʼe ina fakaʼapi ia Paulo mo ʼona kaugā faifolau lolotoga ʼaho ʼe tolu. Kae neʼe mahaki te tamai ʼo Popilio. Neʼe fakamatala lelei fenei e Luka tona mahaki: “Neʼe takoto te tamai ʼa Popilio he neʼe fiva pea mo mahaki fatu.” Koia, neʼe faikole ia Paulo pea ina hili ʼona nima ki ai. Neʼe ina fakamalolo ai te tagata. Pea neʼe punamaʼuli te hahaʼi ʼo te motu, ʼo natou toe ʼaumai ai mo te tahi ʼu hahaʼi mahaki ke fakamalolo e Paulo. Pea neʼe natou foaki leva kia Paulo mo ʼona kaugā folau he ʼu meʼa ʼofa mo te ʼu meʼa ʼae ʼe ʼaoga anai ki tanatou faifolau.—Gaue 28:7-10.
(Gaue 28:16, 17) ʼI tamatou hu leva ki Loma, neʼe fakagafua age kia Paulo ke nofo ʼi he ʼapi mo te tagata solia ʼae neʼe leʼo kia ia. 17 Kaʼe hili ʼaho ʼe tolu, neʼe ina pauʼi te ʼu tagata Sutea maʼuhiga. ʼI tanatou kua fakatahitahi, neʼe ina ui fenei kia natou: “ ʼU tagata, ʼu tehina, logo la neʼe mole au fai he meʼa ʼe fakafeagai ki te hahaʼi pea mo te ʼu agaʼi fenua ʼo ʼatatou kui, kaʼe neʼe puke au ʼi Selusalemi pea mo ʼave pilisoni au ki te kau Loma.
bt-F 213 10
“Foaki He Fakamoʼoni Katoa”
10 ʼI te tau atu ʼa te kau faifolau ki Loma, “neʼe fakagafua age kia Paulo ke nofo ʼi he ʼapi mo te tagata solia ʼae neʼe leʼo kia ia.” (Gaue 28:16) Neʼe seiniʼi mahani he tagata pilisoni ki te tagata solia leʼo, ke ʼaua naʼa hola. Kae neʼe mole fakagata ai e Paulo tana fakamafola te logo lelei ʼo te Puleʼaga. Neʼe malolo muʼa ia ʼaho ʼe tolu pea ina toe pauʼi leva te ʼu tagata Sutea maʼuhiga ʼo Loma ke felaveʼi mo natou pea ke faifakamafola kia natou.
Kumi Te ʼu Koloa ʼi Te Tohi-Tapu
(Gaue 27:9) Neʼe fualoa tamatou nonofo ʼi ai pea ʼi te temi ʼaia neʼe faigataʼa te faifolau ʼi te tai, koteʼuhi neʼe kua fakalaka te temi sesunio ʼo te ʼAho ʼo Te ʼu Faifakalelei. Koia neʼe fai ai e Paulo te fakatokaga ʼaeni
nwtsty tokoni ki te ako Gau 27:9
te temi sesunio ʼo te ʼAho ʼo Te ʼu Faifakalelei: ʼE fakaʼuhiga te kupu Fakakeleka ʼo te sesunio ki te ʼaho sesunio ʼae neʼe fakamaʼua ʼi te Lao ʼa Moisese, neʼe fakahigoaʼi ko te Yom Kippour (ʼe haʼu mai te Fakahepeleo yôm hakkippourim, “ ʼaho ʼe ʼaofi ai” te ʼu agahala). (Le 16:29-31; 23:26-32; Nu 29:7; vakaʼi ʼi Te ʼu Kupu Mo ʼOna Fakaʼuhiga ʼi Te Tohi-Tapu, te kupusiga palalau “ ʼAho ʼo Te ʼu Faifakalelei.”) Ko he tahi ʼe sesunio, ʼe fakafisi ia ki te ʼu meʼa fuli ʼae ʼe holi ki ai. (Le 16:29, nota) Ko te sesunio ʼae ʼe tuʼu ia Gau 27:9, neʼe fai ʼi te ʼAho ʼo Te ʼu Faifakalelei, ʼi te fakaʼosi ʼo te mahina ʼo Sepetepeli peʼe ko te kamata ʼo te mahina ʼo Oketopeli.
(Gaue 28:11) Hili mahina ʼe tolu, neʼe matou heheka leva ki te vaka neʼe tuʼu ʼi tona taumuʼa te fakailoga ʼo “Te ʼu Foha ʼo Seusi.” Neʼe haʼu te vaka ʼaia mai Alesatelia pea neʼe tau ʼi te motu ʼi te temi momoko.
nwtsty tokoni ki te ako Gau 28:11
Te ʼu Foha ʼo Seusi: ʼI te ʼu fagana Fakakeleka mo Loma, ʼe fakahigoaʼi te ʼu “Foha ʼo Seusi” ko Kasito mo Poli. Ko te ʼu mahagā ʼa te ʼatua ko Seusi (Jupiter) mo te Fineʼaliki ko Léda. Neʼe tui te hahaʼi ʼe puipui te kau tautai e te tau tehina mahagā ʼaia mai te ʼu tuʼutamaki ʼo te tai. Pea ʼi te ui ʼae ʼi te vaega, ko te taumuʼa ʼo te vaka ʼe fakailoga ai “Te ʼu Foha ʼo Seusi,” ʼe ha ai neʼe sio tonu te tagata faitohi ʼo te fakamatala ʼaeni ki ai.