Tafitoʼaga ʼo Te Kaupepa Ako Te Maʼuli Fakakilisitiano Mo Te Faifakamafola
VAHAʼA ʼO TE ʼAHO 4-10 ʼO MALESIO
TE ʼU KOLOA ʼO TE TOHI-TAPU | LOMA 12-14
“Te ʼUhiga Moʼoni ʼo Te ʼOfa Fakakilisitiano”
(Loma 12:10) Kotou feʼofaʼaki moʼoni ohage ko he fale tau tehina. Kotou lotolelei ʼo fakamaʼuhigaʼi ʼihi.
it-1-F 53
ʼOfa
ʼE tonu ke maʼuliʼi e te fale tau tehina mo tuagaʼane ʼo te kokelekasio te ʼofa fakatautehina, ko te kupu Fakakeleka philadélphia, ʼe fakaʼuhiga: “ ʼofa ki he tehina.” (Lom 12:10; Hep 13:1; pea mo vakaʼi ia 1Pe 3:8) Koia ʼae ʼe tonu ai ke malohi te ʼu felogoi ʼo te kokelekasio mo fai ʼaki he loto mafana, ohage ko te ʼu felogoi ʼa he famili. Tatau aipe pe ʼe kua feʼofaʼofani te kokelekasio kae ʼe fakalotomalohiʼi natou ke natou feʼofaʼaki ʼo laka age.—1Te 4:9, 10.
Ko te kupu Fakakeleka philostorgos, ʼe fakaʼuhiga “ ʼofa mamahi”, ʼe fakaʼaogaʼi ki he ʼu kilisitiano ʼe lua ʼe nā feiloiʼaki lelei. ʼI te kupu Fakakeleka ʼaia, ʼe ʼi ai te kupu stérgô, ʼe tau fakaʼuhiga ki te ʼofa fakakaiga. Neʼe fakalotomalohiʼi e te apositolo ko Paulo ia te kau Kilisitiano ke natou maʼuliʼi te kalitate ʼaia. (Lom 12:10) Pea neʼe ina toe fakamahino lelei ʼi te ʼu ʼaho fakamuli, ʼe ʼi ai anai he ʼu hahaʼi ʼe “heʼe ʼofa” (Fakakeleka: astorgoï) pea ʼe tuha ia mo natou ia te mate.—2Ti 3:3; Lom 1:31, 32.
(Loma 12:17-19) ʼAua naʼa kotou liufaki ki he tahi te kovi ʼaki te kovi. Kotou faigaʼi ke kotou fai te meʼa ʼae ʼe lelei ʼo mulimuli ki te manatu ʼa te hahaʼi fuli pe. 18 Kapau ʼe feala, pea mo fakalogo kia koutou, kotou maʼuʼuli ʼi te tokalelei mo te hahaʼi fuli pe. 19 Kau ʼofaina, ʼaua naʼa kotou lagavaka kaʼe kotou tuku ke fakaha e te ʼAtua ia tona hauhau, he neʼe tohi fenei: “ ‘ ʼAʼaku te lagavaka, ʼe au liufaki anai,’ ko te ui ʼaia ʼa Sehova.”
“Kotou Māʼuʼuli ʼi Te Tokalelei Mo Te Tagata Fuapē”
3 Lau ia Loma 12:17. Neʼe fakamahino e Paulo kā fakatagaʼi tātou, ʼe mole tonu ke tou tali fakaʼita age. Ko te mulimuli ki te tokoni ʼaenī, ʼe ʼaoga tāfito ʼi te ʼu loto fale ʼaē ʼe mole natou lotu tahi fuli. ʼI te taumātuʼa, ko ia ʼaē ʼe Kilisitiano ʼe mole faiga anai ke ina liufaki ki tona ʼohoana ia he palalau kovi peʼe ina tali ʼaki he tahi age aga ʼe kovi. ʼE mole maʼu he fua lelei mo kapau ʼe ‘liufaki te kovi ʼaki te kovi.’ ʼE ina fakaʼāsili age ia te fihifihia.
w07 1/7 24-25 12-13
“ ʼAua Naʼa Kotou Liufaki Ki He Tahi Te Kovi ʼUhi Ko Te Kovi”
12 ʼE toe tokoni mai Paulo ki tatatou felōgoi ʼaē mo totatou ʼu tehina mo tuagaʼane pea mo te hahaʼi ʼo te mālama: “ ʼAua naʼa kotou liufaki ki he tahi te kovi ʼuhi ko te kovi.” Ko te palalau ʼaia ʼe ko te ikuʼaga ʼo te meʼa ʼaē neʼe ina ʼui ki muʼa atu, tāfito lā te manatu ʼaenī: “Kotou fehiʼa ki te meʼa ʼaē ʼe kovi.” Heʼe feafeaʼi anai he ʼui ʼa he tahi ʼe fehiʼa moʼoni ki te meʼa ʼaē ʼe kovi mo kapau ʼe ina fakaʼaogaʼi te kovi moʼo liufaki te kovi ki ʼihi? Ko te aga ʼaia ʼe fakafeagai anai ki te ʼofa ʼaē ʼe ‘mole mālualoi.’ Pea toe ʼui e Paulo: “Kotou foaki he ʼu meʼa lelei iā muʼa ʼo te hahaʼi fuli.” (Loma 12:9, 17) ʼE feafeaʼi hatatou maʼuliʼi te ʼu palalau ʼaia?
13 Ki muʼa atu, ʼi tana tohi ki te kau Kolonito, neʼe faitohi ia Paulo ʼo ʼuhiga mo te ʼu fakataga ʼaē kā tau anai mo te kau ʼapositolo. Neʼe ina ʼui fēnei: “Kua matou liliu ko he mataga ki te kau aselo mo te malama-nei pea mo te hahai. . . . E matou foaki te tapuaki kae lea koviʼi matou; ka fakatagai matou, e matou kataki; ka fasituu mai kia matou, e matou fakavaivai.” (1 Kolonito 4:9-13, Tauhi Foou) ʼO toe fēia iā ʼaho nei, ʼe sioʼi te kau Kilisitiano moʼoni e te hahaʼi ʼo te mālamanei. Kā sio te hahaʼi ʼi ʼotatou tafaʼaki logolā totatou gaohi koviʼi kae ʼe tou agalelei aipē, ʼe feala hanatou tali ia te logo ʼo te Puleʼaga.—1 Petelo 2:12.
(Loma 12:20, 21) Kaʼe “kapau ʼe fia kai tou fili, foaki age hana meʼa kai. Kapau ʼe fia inu, foaki age hana meʼa inu. Koteʼuhi ʼi tau fai feia, ʼe ke tanaki anai ki tona fuga ʼulu he ʼu mamala kakaha.” 21 ʼAua naʼa ke tuku ke malo te kovi ia koe, kaʼe ke ke haga malo ʼi te kovi ʼaki te lelei.
w12 1/11 31 13
Kotou Fefakamolemoleʼaki ʼAki Te Lotolelei
13 ʼE lagi feala pē ʼi ʼihi temi ke kotou fia ʼiʼita he neʼe aga kovi kiā koutou he tahi ʼe mole tauhi kiā Sehova. Kae ʼe feala ke kotou tokoni kiā ia ke fia logo ki te ʼu akonaki ʼa te Tohi-Tapu. Neʼe tohi fēnei e te ʼapositolo ko Paulo: “Kapau e fia kai tou fili, foaki kia ia he meakai; kapau e fia inu ia, foaki kia ia he meainu; koteuhi i tau fai te mea aia, e ke tanaki anai ni mamala kakaha ki tona fuga ulu. Ke aua naa ke tuku ke malo te kovi ia koe, kae ke ke malo i te kovi aki te lelei.” (Loma 12:20, 21) Kā kotou aga fakaʼapaʼapa ki he tahi māʼia mo ʼaē ʼe ʼita kiā koutou, ʼe feala ke kotou fetogi tana aga ʼo liliu ʼo agalelei. Kapau ʼe kotou lotomahino pea mo manavaʼofa ki he tahi neʼe aga kovi atu kiā koutou, ʼe feala ke fakatupu ʼi tona loto te fia ʼiloʼi ʼo te Tohi-Tapu. Tatau aipē pe koteā tana faʼahiga tali, kae ko takotou agamalū mo takotou agalelei ʼe ina uga anai ia ia ke ina fia ʼiloʼi pe koʼē ʼe kehe takotou aga.—1 Pet. 2:12; 3:16.
Kumi Te ʼu Koloa ʼi Te Tohi-Tapu
(Loma 12:1) Koia, ʼe au kole mamahi atu, ʼu tehina, ʼaki te manavaʼofa ʼo te ʼAtua, ke kotou momoli ʼokotou sino ohage ko he sakilifisio maʼuli, mo maʼoniʼoni pea mo lelei ki te ʼAtua. ʼE kotou foaki ai anai he tauhi taputapu ʼaki ʼokotou fealagia fakakaukau.
lv 63-64 5-6
ʼE Feafeaʼi Hatatou Filifili He ʼu Fakafiafia ʼe Lelei?
5 Ko meʼa fuli pē ʼe kotou fai ʼi tokotou maʼuli ʼe ʼi ai tona pikipikiga mo takotou tauhi ʼaē kiā Sehova. ʼI tana tohi ki te kau Loma, neʼe fakaʼaogaʼi e Paulo ia te palalau ʼe mālohi ke manatuʼi e tona ʼu tehina ia te moʼoni ʼaē neʼe ina tohi. Neʼe ina fai te tokoni ʼaenī kiā nātou: “Kotou momoli ʼokotou sino ko he sākilifisio maʼuli, mo māʼoniʼoni, pea mo lelei ki te ʼAtua, ko he tauhi taputapu ʼaki tokotou ʼatamai.” (Loma 12:1) Ko tokotou sino ʼe fakaʼuhiga ki tokotou ʼatamai, tokotou loto, pea mo tokotou mālohi fakasino. ʼE kotou fakaʼaogaʼi te ʼu faʼahi fuli ʼaia moʼo tauhi ki te ʼAtua. (Maleko 12:30) ʼE ʼui e Paulo ko te taʼi tauhi ʼaia ʼaē ʼe fai ʼaki totatou nefesi kātoa, ʼe ko he sākilifisio ia. ʼAki te kupu “sākilifisio” ʼe tou maʼu ai he fakatokaga ʼe fai mai kiā tātou. ʼI te Lao ʼa Moisese, neʼe mole tali e te ʼAtua ke fai age he sākilifisio neʼe ʼi ai hona mele. (Levitike 22:18-20) ʼO toe fēia pē, kapau ʼi te tauhi ʼa he Kilisitiano ʼe ʼi ai he faʼahi ʼe heʼemaʼa, pea ʼe mole tali anai e te ʼAtua. Kae ʼe lava hoko feafeaʼi ia te faʼahi ʼaia?
6 Neʼe fakatotonu fēnei e Paulo ki te kau Kilisitiano ʼo Loma: “ ʼAua naʼa kotou tuku te ʼu koga ʼo tokotou sino ki te agahala.” Neʼe toe ʼui age e Paulo ke natou “tāmateʼi te ʼu gāue ʼo te sino.” (Loma 6:12-14; 8:13) ʼI te kamata ʼo tana tohi, neʼe ina fai he ʼu faʼifaʼitaki ʼo ʼuhiga mo “te ʼu gāue ʼo te sino.” ʼO ʼuhiga mo te mālama agahala ʼaenī, ʼe tou lau fēnei: “ ʼE fonu tonatou gutu ʼi te faitutuku.” “ ʼE fakavilivili pē tonatou ʼu vaʼe ki te ligitoto.” “ ʼE mole he manavasiʼi ki te ʼAtua iā muʼa ʼo ʼonatou mata.” (Loma 3:13-18) ʼE ʼulihi anai e he Kilisitiano tona sino mo kapau ʼe ina fakaʼaogaʼi “te ʼu koga” ʼo tona sino moʼo fai ia te ʼu agahala ʼaia. Kapau lā iā ʼaho nei, ʼe sioʼi e he Kilisitiano he ʼu meʼa heʼeʼaoga ohagē ko te ʼu pāki ʼaē ʼe hā ai te ʼu felāveʼi fakasino fakalialia peʼe ko he ʼu ʼata ʼe ʼasi ai te toe agamālohi fakalialia heʼe ʼaoga, pea ʼe ina lolotoga “tuku [tona ʼu mata] ki te agahala,” ʼo ina ʼulihi ai tona sino kātoa. Ko tana tauhi ʼe liliu anai ko he sākilifisio ʼe mole kei māʼoniʼoni pea ʼe mole tali e te ʼAtua. (Teutalonome 15:21; 1 Petelo 1:14-16; 2 Petelo 3:11) ʼI toe meʼa fakaʼofaʼofa leva ʼo tupu pē ko tatatou filifili ia he ʼu fakafiafia ʼe kovi!
(Loma 13:1) Ke fakalogo te hahaʼi fuli pe ki te ʼu pule maʼoluga, koteʼuhi ʼe mole he pule mo ka na pau la neʼe mole fakagafua e te ʼAtua. Neʼe fakatuʼu e te ʼAtua ia te ʼu pule maʼoluga ki ʼonatou tuʼulaga kehekehe.
Ko He ʼu Puani ʼAoga ʼo Te Tohi Ki Te Kau Loma
13:1—ʼE fakaʼuhiga feafeaʼi te ʼui ʼaē ko te ʼu pule māʼoluga “ ʼe . . . tahi tuʼu ʼi tona tuʼulaga ʼuhi pē ko te ʼAtua”? Ko te ʼu puleʼaga fakatagata “ ʼe natou tahi tuʼu ʼi tona tuʼulaga ʼuhi pē ko te ʼAtua” ʼo natou pule ʼuhi heʼe fakafealagia e te ʼAtua, pea ʼi ʼihi lakaga ko ʼihi pule neʼe fakakikite e te ʼAtua. ʼE ʼiloga lelei te faʼahi ʼaia ʼaki te kau takitaki kaugamālie neʼe fakakikite ʼi te Tohi-Tapu.
VAHAʼA ʼO TE ʼAHO 11-17 ʼO MALESIO
TE ʼU KOLOA ʼO TE TOHI-TAPU | LOMA 15-16
“Kumi Kia Sehova Te Faʼa Kataki Mo Te Fimalie”
(Loma 15:4) Koteʼuhi ko te ʼu meʼa fuli ʼae neʼe tohi ʼi te temi muʼa neʼe tohi ia moʼo akoʼi ʼo tatou. ʼE tou maʼu ai he ʼamanaki koteʼuhi ʼe tokoni mai te ʼu Tohi Taputapu ke tou faʼa kataki pea mo foaki mai he fakafimalie.
w17.07 11 11
“Kotou Fetagihi Mo Natou ʼAe ʼe Fetagihi”
11 ʼE lahi te ʼu fakamatala fakalotofimalie ʼe tou maʼu ʼi te Folafola ʼa te ʼAtua ohage ko te fakamatala ʼo ʼuhiga mo te lotomamahi ʼa Sesu ʼi te mate ʼo Lasalo. Pea ʼe mole tou punamaʼuli ai tatou, koteʼuhi “ko te ʼu meʼa fuli ʼae neʼe tohi ʼi te temi muʼa neʼe tohi ia moʼo akoʼi ʼo tatou. ʼE tou maʼu ai he ʼamanaki koteʼuhi ʼe tokoni mai te ʼu Tohi Taputapu ke tou faʼa kataki pea mo foaki mai he fakafimalie.” (Loma 15:4) Kapau ʼe kotou lotomamahi, ʼe toe feala pe foki mo koutou ke kotou maʼu he fakalotofimalie ʼi te ʼu vaega ʼaeni:
▪ “E ovi [ia Sehova] kia natou ae e loto fasifasi, pea e ina fakamauli natou ae e loto mamahi.”—Pes. 34:19, 20.
▪ “Kapau e lahi te u tuania ia au o hage e hahai kaugamalie, ko au fakapelepele e natou fakafiafiai . . . [“ia au,” MN].”—Pes. 94:19.
▪ “Ko te ʼAtua tatatou Tamai ʼe ʼofa ia tatou, pea ʼuhi ko tona ʼofa makehe ʼe ina foaki mai kia tatou he fakafimalie heʼe gata pea mo he ʼamanaki. ʼE matou faikole kia Ia pea mo totatou ʼAliki ko Sesu Kilisito ke nā fakafimalieʼi ʼokotou loto pea ke nā fakamalohiʼi koutou.”—2 Tes. 2:16, 17.
(Loma 15:5) ʼOfa pe ke fakagafua atu e te ʼAtua, ʼae ʼe ina foaki te faʼa kataki mo te fimalie, ke kotou maʼu he manatu ʼe tatau mo te manatu ʼa Kilisito Sesu,
“Ke Fakahoko e Te Kataki Fualoa Tana Gaue”
5 Kole kia Sehova te malohi. Ko Sehova ʼAtua ʼe ina “foaki atu kia koutou . . . te kataki fualoa mo te fakapelepele.” (Loma 15:5) ʼE ko ia tokotahi pe ʼae ʼe mahino lelei age ki totatou aluʼaga, mo te ʼu meʼa ʼae ʼe tou logoʼi pea mo totatou maʼuli. Koia ʼae ʼe ina iloʼi lelei te meʼa ʼae ʼe ʼaoga ke tou kataki fualoa ai. ʼE ui fenei ʼi te Tohi-Tapu: “E ina fakahoko te u holi o natou ae e [“manavasiʼi,” MN] kia ia; e logo ia ia ki anatou tagi, pea e ina fakamauli natou.” (Pesalemo 145:19) Kaʼe, ʼe tali feafeaʼi mai anai te ʼAtua ki ʼatatou kole ʼae ke tou maʼu te kataki fualoa?
(Loma 15:13) ʼOfa pe ki te ʼAtua ʼae ʼe ina foaki te ʼamanaki, ke ina foaki atu te fiafia mo te tokalelei katoa ʼuhi ko takotou tui kia te ia, ke malohi age ai takotou ʼamanaki ʼaki te malohi ʼo te laumalie maʼoniʼoni.
w14 15/6 14 11
“ ʼE Tonu Ke Ke ʼOfa Kia Sehova, Tou ʼAtua”
11 ʼE foaki mai e Sehova te ʼamanaki ʼo te maʼuli heʼe gata. (Loma 15:13) ʼE tokoni mai te ʼamanaki ʼaia ke tou ʼutakiʼi te ʼahiʼahiʼi ʼo tatatou tui. Ko te kau fakanofo agatonu ʼe natou ʼamanaki maʼuʼuli anai ʼo talu ai ʼi selo. (Apk. 2:10) Pea ko ʼihi atu kau agatonu ʼe natou ʼamanaki maʼuʼuli anai ʼo talu ai ʼi te Palatiso ʼi te kele. (Luka 23:43) Kotea ʼae ʼe tou logoʼi ʼo ʼuhiga mo tatatou ʼamanaki? ʼE tou fiafia lahi ai mo tou maʼu te tokalelei pea mo tou ʼofa ki te ʼAtua ʼae ʼe ina foaki mai “te u kalasia lelei fuli pea mo te u meaofa lelei tukupau fuli.”—Sakp. 1:17.
Kumi Te ʼu Koloa ʼi Te Tohi-Tapu
(Loma 15:27) ʼE moʼoni, neʼe natou fiafia ʼi te fai ʼo te faʼahi ʼaia, pea neʼe ko honatou maʼua. Koteʼuhi kapau neʼe maʼu e te ʼu puleʼaga te ʼu lelei fakalaumalie mai te kau maʼoniʼoni, pea ʼe ko tonatou maʼua ke natou tokoni kia natou ʼaki ʼonatou koloa fakamalama.
w89-F 1/12 24 3
“ ʼAhiʼahiʼi Pe ʼe Moʼoni Tokotou ʼOfa”
Neʼe ʼekenaki ia te Kau Senitile ʼae neʼe liliu ko ʼonatou tehina, ke natou tokoni ki ʼonatou tehina Sutea ʼi ʼonatou ʼahiʼahi. Neʼe mole ko he “maʼua” koa la ʼo natou ke tokoni ki te kau Kilisitiano ʼo Selusalemi? Neʼe mole ko Selusalemi koa la ʼae neʼe kamata mafola ai te logo lelei ʼo aʼu ki te kau Senitile? Neʼe fakalotoʼi fenei natou e Paulo: “Koteʼuhi kapau neʼe maʼu e te ʼu puleʼaga te ʼu lelei fakalaumalie mai te kau maʼoniʼoni, pea ʼe ko tonatou maʼua ke natou tokoni kia natou ʼaki ʼonatou koloa fakamalama.”—Loma 15:27.
(Loma 16:25) ʼE feala ki te ʼAtua ke ina fakamalohiʼi koutou. ʼE alu tahi te faʼahi ʼaia mo te logo lelei ʼae ʼe au tala pea mo te faifakamafola ʼo ʼuhiga mo Sesu Kilisito. ʼE mulimuli te logo lelei ʼaia ki te fakaha ʼo te meʼa fakalilo tapu ʼae neʼe fufu talu mai fualoa.
it-2-F 647 2
Te Fakatuʼutuʼu Fakatomuʼa ʼo Meʼa Fuli ʼAe Ka Hoko
ʼE tapuakinaʼi anai te ʼu puleʼaga fuli ʼo te kele ʼaki te Mesia peʼe Kilisito, te Hakoga ’o te fakapapau. (Kal 3:8, 14) Neʼe ʼuluaki talanoa ki te “hakoga” ʼaia kae neʼe kua hoko te agatuʼu ʼae ʼi Eteni pea neʼe mole heʼeki tupu la ia Apele. (Sen 3:15) Neʼe hoko teitei taʼu ʼe 4000 ʼi muʼa ʼo te fakaha ʼo te “meʼa fakalilo tapu” ʼaki te iloʼi lelei ʼo te “hakoga” Fakamesia. Koia, ko te meʼa fakalilo ʼaia “neʼe fufu talu mai fualoa.”—Lom 16:25-27; Efe 1:8-10; 3:4-11.
VAHAʼA ʼO TE ʼAHO 18-24 ʼO MALESIO
TE ʼU KOLOA ʼO TE TOHI-TAPU | 1 KOLONITO 1-3
“ ʼE Kotou Fakalogo Koa Ki ʼOkotou Holi Peʼe Ki Te Laumalie ʼo Te ʼAtua?”
(1 Kolonito 2:14) Kaʼe ko te tagata ʼae ʼe takitaki e ʼona holi ʼe mole ina tali ia te ʼu meʼa ʼae ʼe haʼu mai te laumalie ʼo te ʼAtua, koteʼuhi ʼe ko he ʼu meʼa vale ia kia ia. Pea ʼe mole feala ia ke ina iloʼi te ʼu meʼa ʼaia, he ʼe tonu ke vakavakaʼi ʼaki te laumalie maʼoniʼoni.
w18.02 17 4-5
Kotea Te Fakaʼuhiga ʼo He Tahi ʼe Ina Maʼu He ʼu Manatu Fakalaumalie?
4 ʼE feafeaʼi te faʼahiga manatu ʼa te tagata ʼae ʼe takitaki e ʼona holi? ʼE ina maʼu te faʼahiga manatu ʼa te hahaʼi ʼo te malama, ʼae ko te fai ʼo te ʼu meʼa ʼae ʼe holi ki ai tona loto. ʼE ui e te apositolo ko Paulo ʼo ʼuhiga mo te faʼahiga manatu ʼaia, ʼe ko “te ʼaele . . . peʼe ko te faʼahiga manatu ʼaia ʼe gaue ʼi te temi nei ʼi te ʼu foha ʼo te talagataʼa.” (Efeso 2:2) Ko te faʼahiga manatu ʼaia, ʼe ina ʼekenaki ia he tokolahi ke natou mulimuli ki te meʼa ʼae ʼe fai te hahaʼi. ʼE natou fai pe te meʼa ʼae ʼe natou loto ki ai, kae ʼe natou meʼa noaʼi te ʼu lekula ʼa te ʼAtua. Ko he tagata ʼe takitaki e ʼona holi, ʼe fia maʼu tuʼulaga, ʼe manatu tafito ia ki te falā pea ʼi tana manatu ʼe maʼuhiga pe ʼana tonu.
5 Ko te tagata ʼae ʼe takitaki e ʼona holi, ʼe ina fai tuʼumaʼu te ʼu meʼa ʼae ʼe fakahigoaʼi ʼi te Tohi-Tapu ko “te ʼu gaue ʼo te kakano.” (Kalate 5:19-21) ʼI te ʼuluaki tohi ʼa Paulo ʼae neʼe ina fai ki te kau Kilisitiano ʼo Kolonito, neʼe talanoa ai ki te tahi ʼu aga ʼa te hahaʼi ʼae ʼe natou maʼu te ʼu manatu fakatagata. ʼE natou fefakapalatahiʼaki moka hoko he fihi, ʼe natou fakatupu maveuveu, ʼe natou uga te hahaʼi ke natou agatuʼu, ʼe natou ʼave ʼihi ki te fakamauʼaga, ʼe mole natou fakaʼapaʼapa ki te kau takitaki pea ʼe natou kakai mo iinu fakavale. Ko he tahi ʼe takitaki e ʼona holi ʼe mole ina tekeʼi te ʼu fakahala. (Taaga Lea 7:21, 22) Pea neʼe ui e Suta, ko natou ʼae ʼe manatu ki te kakano ʼe feala pe ke puli ia natou te laumalie ʼo Sehova.—Suta 18, 19.
(1 Kolonito 2:15, 16) Kaʼe ko te tagata ʼae ʼe takitaki e te laumalie ʼo te ʼAtua, ʼe ina vakavakaʼi ia meʼa fuli, pea ʼe mole he tahi ʼe ina fakamauʼi ia ia. 16 Koteʼuhi “ko ai ʼae ʼe ina lava iloʼi te manatu ʼa Sehova ke ina akoʼi ia ia?” Kaʼe ʼe tou maʼu tatou te manatu ʼa Kilisito.
Kotea Te Fakaʼuhiga ʼo He Tahi ʼe Ina Maʼu He ʼu Manatu Fakalaumalie?
6 Kae ko te tagata ʼae ʼe ina maʼu he ʼu manatu fakalaumalie ʼe tokaga fakamalotoloto ia ki ʼana felogoi mo te ʼAtua. ʼE ina tuku ke takitaki ia ia e te laumalie maʼoniʼoni ʼo te ʼAtua pea ʼe ina faigaʼi ke ina faʼifaʼitakiʼi ia Sehova. (Efeso 5:1) ʼE faiga ke mahino ki te faʼahiga manatu mo te faʼahiga sio ʼae ʼa Sehova ʼo ʼuhiga mo he aluʼaga. Pea kia ia, ʼe maʼuli moʼoni ia te ʼAtua. ʼE mole hage ia ko te tagata ʼae ʼe takitaki e ʼona holi, koteʼuhi ko te tagata ʼae ʼe ina maʼu he ʼu manatu fakalaumalie ʼe fakaʼapaʼapa ki te ʼu pelesepeto ʼa Sehova ʼi te ʼu faʼahi fuli ʼo tona maʼuli. (Pesalemo 119:33; 143:10) ʼE mole ina fai “te ʼu gaue ʼo te kakano,” kae ʼe ina faigaʼi ke ina maʼu “te fua ʼo te laumalie.”—Kalate 5:22, 23.
w18.02 20-21 15
Kotea Te Fakaʼuhiga ʼo He Tahi ʼe Ina Maʼu He ʼu Manatu Fakalaumalie?
15 ʼE feafeaʼi hatatou faʼifaʼitakiʼi ia Kilisito? ʼE fakamahino ia 1 Kolonito 2:16 ʼe tonu ke tou maʼu “te manatu ʼa Kilisito.” Ia Loma 15:5 ʼe fakalotomalohiʼi ai tatou ke tou maʼu “he manatu ʼe tatau mo te manatu ʼa Kilisito Sesu.” Ke tou hage ko Kilisito, ʼe tonu ke tou ako ia tana faʼahiga manatu, te ʼu meʼa ʼae ʼe ina logoʼi pea mo ʼana gaue. Neʼe fakamuʼamuʼa e Sesu ʼi tona maʼuli ʼana felogoi ʼae mo te ʼAtua. Koia ka tou faʼifaʼitaki ia Sesu ʼe tou fakaovi ai kia Sehova. Ko te tupuʼaga tafito la ʼaia ʼo te maʼuhiga ʼae ke tou ako ke tou maʼu ia te manatu ʼa Sesu.
Kumi Te ʼu Koloa ʼi Te Tohi-Tapu
(1 Kolonito 1:20) ʼI te tuʼu ʼo te ʼu faʼahiga meʼa ʼaeni, ʼe ʼifea koa te tagata poto? ʼE ʼifea koa te sekelipa? ʼE ʼifea koa te tagata faifilosofia? Neʼe mole koa la fakaliliu e te ʼAtua ʼo vale ia te poto ʼo te malamanei?
it-2-F 854 5
Poto
Koia, ko te malama ʼi tona poto neʼe fakafisi ki te meʼa ʼofa ʼo te ʼAtua, te sakilifisio ʼa Kilisito; logo la te faiva mo te poto ʼo ʼona takitaki, kae neʼe natou “matehi ia te ʼAliki ʼo te kololia.” (1Ko 1:18; 2:7, 8.) Neʼe fakamoʼoni ai e te ʼAtua te vale ʼo te kau popoto ʼo te malama. ʼI tana fakaʼaogaʼi “te meʼa ʼa te ʼAtua ʼae ʼe hage ʼe vale” ki ʼonatou mata mo tana filifili ia natou ʼae ‘ ʼe vavale, vaivai mo malalo,’ moʼo fakahoko tana fakatuʼutuʼu heʼe gata, neʼe natou ufiufi ai. (1Ko 1:19-28) Neʼe toe fakamanatuʼi age e Paulo ki te kau Kilisitiano ʼo Kolonito ʼe puli anai ‘te poto mo te kau pule ʼo te tuʼu ʼo te ʼu faʼahiga meʼa ʼaeni.’ Ko te taʼi poto ʼaia neʼe mole ʼaoga ke tuʼu ʼi te logo fakalaumalie ʼa te apositolo. (1Ko 2:6, 13) Neʼe fakatokaga e Paulo te kau Kilisitiano ʼo Kolose ki ‘te filosofia [philosophias, ko tona fakaʼuhiga “manako ki te poto”] pea mo te ʼu manatu kaka mo vaʼiganoa, ʼae ʼe fakatafito ki te talatisio fakatagata.’—Kol 2:8; vakaʼi mo te 2:20-23.
(1 Kolonito 2:3-5) Pea ʼi taku alu atu, neʼe au vaivai, mo mataku pea mo tete. 4 Pea neʼe mole au fakatafito ʼaku palalau pea mo te meʼa ʼae neʼe au fakamafola ki te ʼu palalau fakaoloolo ʼo te poto fakatagata, kaʼe neʼe ha ʼi ʼaku palalau te malohi ʼo te laumalie ʼo te ʼAtua, 5 ke mole fakatafito takotou tui ki te poto fakatagata kaʼe ki te malohi ʼo te ʼAtua.
Ko He ʼu Puani ʼAoga ʼo Te ʼu Tohi Ki Te Kau Kolonito
2:3-5. ʼI te temi ʼaē neʼe fai fakamafola ai ʼi Kolonito, ʼi te lotolotoiga ʼo te kau fai filosofia pea mo te kau faiako Keleka, neʼe lagi feʼekeʼaki e Paulo peʼe ina lavaʼi ʼapē hana fakalotoʼi ia nātou ʼaē neʼe fakalogo age. Kae, neʼe mole ina tuku hona vaivaiʼaga peʼe ko tana manavasiʼi ke ina tāʼofi ia tana fakahoko leleiʼi ia tana minisitelio ʼaē neʼe foaki age e te ʼAtua. ʼO toe fēia aipē, ʼe mole tonu ke tou tuku ia he ʼu ʼaluʼaga ʼe mole hoko ʼi te aga māhani ke natou tāʼofi ia tatatou tala ia te logo lelei ʼo te Puleʼaga ʼo te ʼAtua. ʼAki he loto falala, ʼe feala ke tou sisio ki te tokoni ʼa Sehova ohagē ko tona fai e Paulo.
VAHAʼA ʼO TE ʼAHO 25-31 ʼO MALESIO
“ ʼE Fakatupu e He Kiʼi Meʼa Fakatupu Ia Te Falena Katoa”
(1 Kolonito 5:1, 2) Neʼe au logo ʼe ʼi ai he tagata ia koutou ʼe maʼuli mo te ʼohoana ʼo tana tamai. Pea ko te ʼu faʼahiga felaveʼi fakasino heʼe ʼaoga ʼaia ʼe kovi age ia ʼi te ʼu meʼa ʼae ʼe fai e te hahaʼi ʼae ʼe mole tui. 2 Pea ʼe kotou fiameʼalahi ai koa koutou? Peʼe mole tonu koa la ke kotou lotomamahi ai? ʼE mole tonu koa la ke toʼo mai ia koutou te tagata ʼae ʼe ina fai te taʼi aga ʼaia?
(1 Kolonito 5:5-8) ʼe tonu ai ke kotou tuku te tagata ʼaia kia Satana ke pulihi te agahala ʼae neʼe ina fakahu ki te kokelekasio, pea ke feala ke taupau e te kokelekasio te aga ʼae ʼe lelei ʼi te ʼaho ʼo te ʼAliki. 6 ʼE mole lelei takotou fiameʼameʼa. ʼE mole kotou iloʼi koa la ʼe fakatupu e he kiʼi meʼa fakatupu ia te falena katoa ʼae neʼe natu ʼaki? 7 Kotou toʼo te meʼa fakatupu ʼafeā ke kotou liliu ai ko he falena foʼou neʼe natu, he ʼe kua kotou ʼateaina mai te meʼa fakatupu, koteʼuhi neʼe sakilifisioʼi ia Kilisito, tatatou akeno ʼo te Pasikate. 8 Koia, tou fai te ʼaho lahi, mole ʼaki te meʼa fakatupu ʼafeā, peʼe ko te meʼa fakatupu ʼo te agahala mo te agakovi, kaʼe ʼaki te pane hala fakatupu ʼo te meʼa ʼae ʼe lelei mo moʼoni.
(1 Kolonito 5:13) kaʼe fakamauʼi e te ʼAtua ia natou ʼae ʼo tuʼa? “Kotou toʼo mai ia koutou ia ia ʼae ʼe agakovi.”
it-2-F 130
Meʼa Fakatupu
Neʼe toe fakaʼaogaʼi e Paulo te fakata te meʼa fakatupu ʼi tana fakatotonu te kokelekasio ʼo Kolonito ke natou fakamavae te tagata ʼe aga heʼe ʼaoga. Neʼe ina ui fenei: “ ʼE mole kotou iloʼi koa la ʼe fakatupu e he kiʼi meʼa fakatupu ia te falena katoa ʼae neʼe natu ʼaki Kotou toʼo te meʼa fakatupu ʼafeā ke kotou liliu ai ko he falena foʼou neʼe natu, he ʼe kua kotou ʼateaina mai te meʼa fakatupu, koteʼuhi neʼe sakilifisioʼi ia Kilisito, tatatou akeno ʼo te Pasikate.” Pea neʼe ina fakamahino lelei pe kotea moʼoni te “meʼa fakatupu” ʼo ui fenei: “Koia, tou fai te ʼaho lahi, mole ʼaki te meʼa fakatupu ʼafeā, peʼe ko te meʼa fakatupu ʼo te agahala mo te agakovi, kaʼe ʼaki te pane hala fakatupu ʼo te meʼa ʼae ʼe lelei mo moʼoni.” (1Ko 5:6-8). ʼI heni, neʼe talanoa e Paulo ki te fakaʼuhiga ʼo te ʼu meʼa fakata ʼo te ʼaho lahi Fakasutea ʼo Te ʼu Pane Hala Fakatupu ʼae neʼe hoa atu aipe ki te Pasikate. ʼO toe feia ki he kiʼi meʼa fakatupu pe ʼe ina fakatupu vave te falena katoa, pea ʼe toe feia pe mo te kokelekasio katoa, ʼe liliu anai ʼo heʼe maʼa mo kapau ʼe mole ina toʼo mai ai, te tagata heʼe ʼaoga. Koia, neʼe tonu pe ke toʼo e te kokelekasio te “meʼa fakatupu” mai ai, ʼo toe feia pe mo te kau Iselaele neʼe mole tonu ke maʼu ʼi ʼonatou ʼapi he meʼa fakatupu lolotoga te ʼaho lahi.
it-2-F 903-904
Satana
Kotea te fakaʼuhiga ʼo te ‘tuku he tahi kia Satana ke pulihi te agahala’?
ʼI tana foaki ni fakatuʼutuʼu ki te kokelekasio ʼo Kolonito ʼo ʼuhiga mo te tagata neʼe maʼuli mo te ʼohoana ʼo tana tamai, neʼe tohi fenei e te apositolo ko Paulo: “Kotou tuku te tagata ʼaia kia Satana ke pulihi te agahala.” (1Ko 5:5) Neʼe ko te fakatotonu ʼaeni ke fakamavae mai te kokelekasio te tagata ʼaia pea ke mole toe felogoi mo ia. (1Ko 5:13) Ko te tuku ia ia kia Satana, ʼe fakaʼuhiga ke fakamavae ia ia mai te kokelekasio ki te malama ʼae ʼe puleʼi e te ʼatua ko Satana. Ohage pe ko he “kiʼi meʼa fakatupu” ʼi “te falena katoa ʼae neʼe natu ʼaki,” ko te tagata ʼaia neʼe ko te “agahala,” ko tona fakaʼuhiga ʼe ina fai he aga heʼe maʼa ʼi te kokelekasio. ʼI te fakamavae ʼo te tagata agahala ʼaia, ʼe tuputupu anai te kokelekasio ʼi te faʼahi fakalaumalie pea ʼe pulihi ai mo “te agahala.” (1Ko 5:6, 7) ʼO toe feia pe, neʼe tuku e Paulo ia Imeneo mo Alesatelo kia Satana he neʼe mole nā taupau te tui mo he leʼo ʼo loto ʼe lelei ʼo puli ai tanā tui.—1Ti 1:20.
(1 Kolonito 5:9-11) Neʼe au tohi atu ʼi taku tohi ke tuku takotou fakatahi mo te hahaʼi ʼae ʼe natou fai he ʼu felaveʼi fakasino heʼe ʼaoga. 10 Kaʼe neʼe mole au talanoa ʼo ʼuhiga mo te hahaʼi ʼo te malamanei ʼae ʼe natou fai he ʼu felaveʼi fakasino heʼe ʼaoga, peʼe ko te hahaʼi manumanū, peʼe kaihaʼa, peʼe tauhi taula ʼatua. Koteʼuhi, kapau koia, pea ʼe tonu ke kotou mavae mai te malamanei. 11 Kaʼe ʼe au faitohi atu ke tuku takotou fakatahi mo he tahi ʼe lau ʼe ko he tehina kaʼe ʼe ina fai he ʼu felaveʼi fakasino heʼe ʼaoga, peʼe ko he tagata manumanū, peʼe tauhi taula ʼatua, peʼe leakovi, peʼe inu kava fakavalevale, peʼe kaihaʼa, pea ke ʼaua naʼa kotou kakai mo te taʼi tagata ʼaia.
lv 34-35 19
Te Fakamavae ʼo He Tahi Mai Te Kokelekasio
19 ʼI ʼihi temi, ʼe tonu anai ke tou fakagata tatatou fakakaugā ʼaē mo he tahi neʼe kau ki te kōkelekāsio. ʼE hoko ia te ʼaluʼaga ʼaia ʼi te temi ʼaē kua fakamavae ai he tahi, he neʼe talagataʼa ia ki te lao ʼa te ʼAtua pea ʼe mole fia fakahemala ia, peʼe ko he tahi kua situʼa kiā Sehova, ʼo ina akoʼi he ʼu akonaki loi peʼe ko he tahi kua ina fakatotonu ke mavae pē ia ʼi te kōkelekāsio. ʼE ʼui fakalelei mai ʼi te Folafola ʼa te ʼAtua ke “ ʼaua naʼa [tou] fakatahi” mo nātou ʼaia. (1 Kolonito 5:11-13; 2 Soane 9-11) ʼE lagi faigataʼa hatatou fakamamaʼo mai he tahi neʼe tou kaumeʼa mo ia peʼe ko hotatou kāiga. ʼE tou tōkakaga anai koa ʼo fakamamaʼo mai iā nātou ʼaia, ʼo tou fakahā ai tatatou fia nofo agatonu ʼaē kiā Sehova pea mo tana ʼu lao faitotonu? Kotou manatuʼi ʼe maʼuhiga kiā Sehova tatatou agatonu pea mo tatatou fakalogo.
Kumi Te ʼu Koloa ʼi Te Tohi-Tapu
(1 Kolonito 4:9) Koteʼuhi ʼe hage kia au neʼe tuku e te ʼAtua ia matou, te kau apositolo, ke matou ha fakamuli ʼi he malaʼe faigaoʼi ohage ko he ʼu tagata neʼe fakatuʼā ki te mate, ke sioʼi matou e te malamanei, mo te kau ʼaselo pea mo te tagata.
w09 1/15 24 16
Ko Te Kau ʼĀselo ʼe “Ko He ʼu Laumālie Moʼo Tauhi Ki Te Hahaʼi”
16 Ko te kau Kilisitiano ʼaē ʼe ʼahiʼahiʼi ʼe natou liliu ko ‘he meʼa ʼe mamata kiai te ʼu ʼāselo.’ (1 Ko. 4:9) ʼAki he loto fiafia, ʼe mamata ia te ʼu ʼāselo ki tatatou ʼu gāue agatonu pea mo natou fakafiafia ʼi te fakahemala ʼa he tagata agahala. (Luka 15:10) Ko te aga fakalotu ʼa te ʼu fafine Kilisitiano ʼe tokagaʼi e te kau ʼāselo. ʼE fakahā ʼi te Tohi-Tapu “ ʼe tonu ki te fafine ʼohoana ke ina fai he fakaʼiloga ʼi tona ʼulu ʼo ʼuhiga mo te tuʼulaga pule, ʼuhi ko te kau ʼāselo.” (1 Ko. 11:3, 10) ʼEī, ʼe fakafiafia te ʼu ʼāselo ʼi tanatou mamata ki te ʼu fafine Kilisitiano pea mo te ʼu kaugana fuli ʼa te ʼAtua ʼi te kele ʼe natou fakalogo ki te ʼu fakatuʼutuʼu pea mo te takitaki fakateokalatike. Ko te taʼi fakalogo ʼaia ʼe ko he fakamanatu lelei ki te ʼu foha ʼaia ʼo te ʼAtua ʼi te lagi.
(1 Kolonito 6:3) ʼE mole kotou iloʼi koa la ʼe tou fakamauʼi anai he ʼu ʼaselo? Koia, ʼe mole feala koa ke tou fakamauʼi te ʼu fihifihia ʼo te maʼuli ʼaeni?
it-2-F 151
Lao
He lao ki te kau ʼaselo. Logo la ʼe natou maʼoluga age ʼi te tagata, kae ʼe natou toe fakalogo mo natou ki te lao mo te ʼu fakatotonu ʼa te ʼAtua. (Hep 1:7, 14; Pes 104:4) Maʼia mo Satana tona fili, neʼe fakatotonu e Sehova pea mo fakatuʼu he ʼu tuʼakoi ki ai. (Sopo 1:12; 2:6) Neʼe fakamoʼoni e te alekaselo ko Mikaele mo fakaʼapaʼapa ki te tuʼulaga ʼae ʼo Sehova ʼi tona ʼuhiga Tuʼi Fakamau Maʼoluga, lolotoga tana faipalalau mo te Tevolo ʼi tana ui ʼae: “Ke fakatonutonuʼi koe e Sehova.” (Suta 9; pea mo vakaʼi ia Skl 3:2, MN) Neʼe tuku e Sehova te kau ʼaselo fuli ke puleʼi natou e Sesu Kilisito ʼi tona kololia. (Hep 1:6; 1Pe 3:22; Mat 13:41; 25:31; Flp 2:9-11) Koia, ko Sesu ʼae neʼe ina fakatotonu ki te ʼaselo ʼave logo ke alu kia Soane. (Fkh 1:1) Ia 1 Kolonito 6:3, ʼe ui e te apositolo ko Paulo ʼo ʼuhiga mo te ʼu tehina fakanofo ʼo Kilisito, ʼe natou fakamauʼi anai he ʼu ʼaselo. Koteʼuhi ʼe natou kau anai ki te tautea ʼo te ʼu laumalie agakovi.