ʼE ʼi Ai Koa He ʼu Fafine Faifakamafola ʼi Te Kau Fakamoʼoni ʼa Sehova?

ʼEi. Ko te kau Fakamoʼoni ʼa Sehova fuli ʼe ko he kau faifakamafola, pe ʼe ko he kau minisi, pea ʼe kau ai te ʼu toko lauʼi miliona hahaʼi fafine. Ohage ko tona fakakikite ʼi te Tohi-Tapu, “ko natou fafine ʼae ʼe natou fagonogono te logo lelei ko he foʼi kautau lahi.”—Pesalemo 68:11.

Ko te ʼu fafine Fakamoʼoni ʼa Sehova ʼe natou muliʼi te faʼifaʼitaki ʼae neʼe tuku mai e te ʼu fafine ʼi te Tohi-Tapu. (Taaga Lea 31:10-31) Logo la ʼe mole natou takitaki ʼi te loto kokelekasio, kaʼe ʼe lahi tanatou kau ki te faifakamafola ki te hahaʼi. ʼE natou toe akoʼi te ʼu pelesepeto ʼo te Tohi-Tapu ki ʼonatou fanau. (Taaga Lea 1:8) ʼE faiga e te ʼu fafine Fakamoʼoni ke fua lelei ʼanatou palalau pea mo ʼanatou gaue ki te hahaʼi fuli.—Tito 2:3-5.