“E Lahi Anai Te Tokalelei” Moka Pule Te Puleʼaga ʼo Te ʼAtua

Kua ovi mai pe te temi ʼae ka fakatuʼu anai e te Puleʼaga ʼo te ʼAtua te tokalelei mo te logo tahi ʼi te kele katoa. Koʼeni te fakapapau ʼi te Pesalemo 72:7: “E lahi anai te tokalelei.” Kae ko ʼafeā koa ʼae ka pule ai te Puleʼaga ki te kele? ʼE hoko feafeaʼi anai? Pea kotea anai te ʼu lelei ʼe tou maʼu ai?

KO ʼAFEĀ KOA ʼAE KA PULE AI TE PULEʼAGA ʼO TE ʼATUA?

Neʼe fakakikite ʼi te Tohi-Tapu he ʼu aluʼaga fakamanavahe ʼe ha ai kua ovi mai pe te Puleʼaga ʼo te ʼAtua. Ko te ʼu aluʼaga ʼaia ʼe ko te “fakailoga,” pea ʼe kau ai te ʼu tau fakamalamanei, te hoge mo te ʼu mahaki, te ʼu mafuike pea mo te ʼaʼasili ʼo te agakovi.—Mateo 24:3, 7, 12; Luka 21:11; Fakaha 6:2-8.

ʼE ui fenei ʼi te tahi lea fakapolofeta: “ ʼI te ʼu ʼaho fakamuli, ʼe ʼi ai anai he ʼu temi makehe pea mo faigataʼa. Koteʼuhi ʼe ʼoʼofa pe anai te hahaʼi kia natou totonu, mo manako ki te paʼaga, . . . mo talagataʼa ki ʼanatou matuʼā, mo maʼuli galo, mo heʼe agatonu, mo heʼe ʼofa, mole natou maʼuli felogoi, mo faifasituʼu, mole natou lotololomi, mo fekai, mo fehihiʼa ki te lelei, . . . mo fiameʼalahi, mo natou ʼoʼofa ki te ʼu fakafiafia kaʼe mole ki te ʼAtua.” (2 Timoteo 3:1-4) ʼI te temi ʼaeni kua teitei maʼu fuli pe e te hahaʼi te ʼu aga ʼaia, kae neʼe mole feia ʼi muʼa atu.

Neʼe kamata hoko te ʼu lea fakapolofeta ʼaia ʼi te taʼu 1914. Neʼe tokagaʼi e te kau faihisitolia mo te kau faipolitike ia te fetogi ʼo te malamanei ʼi te ʼosi pe ʼo te taʼu ʼaia. Ohage ko te tagata faihisitolia ko Peter Munch: “Neʼe fetogi ʼaupito te hisitolia ʼo te tagata ʼuhi ko te tau ʼae neʼe hoko ʼi te 1914. ʼI muʼa ʼo te taʼu ʼaia, neʼe ui pe e te hahaʼi ʼe hikihiki anai ʼonatou faʼahiga maʼuli, . . . kae neʼe hoko mai leva he temi fakamataku mo fakalialia, fonu ʼi te fehiʼa mo te tuʼania.”

Kae ʼe mole tologa anai te ʼu aluʼaga fuli ʼaia. ʼE ko he ʼu fakamoʼoni kua ovi mai pe te pule ʼo te Puleʼaga ki te kele katoa. Koia, ʼi te palalau ʼa Sesu ki te fakailoga ʼo te fakaʼosi, neʼe ina toe ui fenei: “Ko te logo lelei ʼaeni ʼo te Puleʼaga ʼe fakamafola anai ʼi te kele katoa ko he fakamoʼoni ki te ʼatu puleʼaga, pea hoki hoko mai anai ia te fakaʼosi.”—Mateo 24:14.

ʼE fakamafola e te kau Fakamoʼoni ʼa Sehova ia te logo lelei ʼaia. ʼE higoa fenei ia tanatou nusipepa tafito: Ko Te Tule Leʼo ʼe Ina Kalagaʼi Te Puleʼaga ʼo Sehova. ʼE talanoa ki te ʼu fakatuʼutuʼu taulekaleka ʼae ka fakahoko anai e te Puleʼaga ʼo te ʼAtua maʼa te tagata mo te kele.

ʼE FEAFEAʼI ANAI TE TAKI ʼO TE PULEʼAGA ʼO TE ʼATUA?

Koʼeni ʼona tali maʼuhiga ʼe fa:

1. ʼE mole fakaʼaogaʼi anai e te Puleʼaga ʼo te ʼAtua te ʼu pule taki ʼo te malama ʼaeni.

2. ʼE fia pule pe anai te ʼu pule taki ʼo te malama ʼaeni pea ʼe natou fakafeagai anai ki te Puleʼaga ʼo te ʼAtua.—Pesalemo 2:2-9.

3. ʼE tonu anai ke maumauʼi e te Puleʼaga ʼo te ʼAtua te ʼu puleʼaga fakapolitike ʼae ʼe kei fia pule ki te tagata. (Taniela 2:44; Fakaha 19:17-21) Pea ʼe higoa te fihi fakaʼosi ʼaia ko Alamaketone.—Fakaha 16:14, 16.

4. ʼE hao anai ia natou fuli ʼae ʼe fakalogo ki te Puleʼaga ʼo te ʼAtua ʼi Alamaketone pea ʼe natou hu anai ki te malama foʼou tokalelei. ʼE natou faʼufaʼu anai te “toe hahaʼi tokolahi” ʼae ʼe lauʼi miliona.—Fakaha 7:9, 10, 13, 14.

KOTEA TE ʼU LELEI ʼE TOU MAʼU MAI TE PULE ʼA TE PULEʼAGA?

Ka fia liliu he tahi ko he kaugana ʼo te Puleʼaga ʼo te ʼAtua, ʼe tonu muʼa ke ako. Koia, neʼe faikole fenei ai ia Sesu ki te ʼAtua: “Koʼeni ia te fakaʼuhiga ʼo te maʼuli heʼe gata, ke natou ako ke natou iloʼi ia koe, te ʼAtua moʼoni pe ʼe tahi pea mo ia ʼae neʼe ke fekauʼi mai, ia Sesu Kilisito.”—Soane 17:3.

Ka kamata fakaovi he tahi kia Sehova ʼAtua pea ʼe lahi te ʼu lelei ʼe ina maʼu anai mai ai. Ohage ko te ʼu lelei ʼaeni ʼe lua: ʼUluaki, ʼe malohi ai tana tui he ʼe fakatafito ki he ʼu fakamoʼoni. ʼE tui pau ai ʼe moʼoni ia te Puleʼaga ʼo te ʼAtua pea ʼe kua ovi mai pe tana pule. (Hepeleo 11:1) Lua, ʼe tuputupu ai tona ʼofa ki te ʼAtua pea mo tona tatau. ʼE fakalogo ki te ʼAtua mo he loto ʼe lelei koteʼuhi ʼe ʼofa ia te ia. Pea ko te ʼofa ʼae ki tona tatau ʼae ʼe ina fia maʼuliʼi ai te Lekula Iloa ʼae neʼe talanoa ki ai ia Sesu: “Ko te meʼa ʼae ʼe kotou loto ke fai atu e te hahaʼi, kotou fai feia maʼa natou.”—Luka 6:31.

Ohage pe ko he tamai ʼofa, ʼe loto e totatou Tupuʼaga ke tou fiafia pea ke tou maʼu ia “te maʼuli moʼoni.” (1 Timoteo 6:19) Ko te maʼuli ʼae ʼe tou lolotoga ai ʼe mole ko “te maʼuli moʼoni” ʼaia. Ko te toko lauʼi miliona hahaʼi ʼe fetau mo te ʼu faigataʼaʼia ʼo te temi pea ʼe natou faigaʼi ke lelei age ʼonatou faʼahiga maʼuli. Kae ʼe ke iloʼi la pe ʼe feafeaʼi anai te “maʼuli moʼoni”? Tou vakaʼi he ʼu fakapapau taulekaleka ʼe fakahoko anai e te Puleʼaga ʼo te ʼAtua.