2 | Taupau Ia Meʼa ʼe ʼAoga Ki Te Maʼuli

HE KOʼE ʼE MAʼUHIGA

Kua faigataʼa ki te tokolahi te maʼu ʼo te meʼa maʼuli, pea ka hilifaki atu ki ai te ʼu fihifihia ʼo te malama, pea ʼe toe ʼasilisili age te mamahi. Kotea tona tupuʼaga?

• ʼI te ʼu fenua ʼae ʼe tokakovi ai, ʼe hake te totogi ʼo te meʼa kai pea mo te ʼu nofoʼaga.

• Ka hoko he faigataʼa fakaekonomika, pea ʼe lahi te mole maʼu ʼo he gaue, mo toe hifo mo te ʼu totogi.

• ʼE feala ki he tuʼutamaki fakanatula ke ina maumauʼi te ʼu fale koloa, te ʼu ʼapi mo ʼihi atu ʼu meʼa ʼe maʼu ʼo tupu ai te maʼuli fakaʼofaʼofa ʼo te tokolahi.

Ko Meʼa ʼe Tonu Ke Iloʼi

• Ka ke fakapotopoto mo tau foʼi falā, pea ʼe feala ke ke tauʼi he faigataʼa ʼe hoko.

• Ko te maʼuhiga ʼo te paʼaga ʼe mole heʼe gata. ʼE feala ke puli te maʼuhiga ʼo te ʼu totogi, ʼo te falā pea mo te ʼu koloa neʼe tanaki.

• ʼE ʼi ai ʼihi meʼa ʼe mole feala ke totogi e te falā, ohage la ko te fiafia mo te logo tahi fakafamili.

Ko Meʼa ʼe Tonu Ke Fai Nei

ʼE ui ʼi te Tohi-Tapu: “Kapau ʼe tou maʼu he meʼa kai pea mo ni mutuʼi meʼa, ʼe tou feʼauga anai ʼi te ʼu meʼa ʼaia.”—1 Timoteo 6:8.

Ko te maʼuli fakafeʼauga ʼe ko te fakaisiisi ʼo te ʼu meʼa ʼe kita loto ki ai, mo fakagata pe ki te meʼa ʼae ʼe ʼaoga ʼi te ʼaho takitahi, tafito la moka kua hifo tokita totogi.

Ke tou maʼuli fakafeʼauga ʼe tonu anai ke tou fakapotopoto ʼi te fakaʼaogaʼi o te falā. Kae kapau ʼe fakavalevale, ʼe lesili age anai ʼatatou ʼu fihifihia fakapaʼaga.