KA TOTOGI KOVI TE MAʼULI
Kotou Tali Te Aluʼaga ʼAia
Ka hake mamalie te totogi ʼo te ʼu koloa, ʼe feala pe ke mole tou tokagaʼi mo kapau ʼe lelei totatou totogi. Kae kapau ʼe hiki fakapunamaʼuli te totogi ʼo te ʼu koloa kae ʼe mole hiki totatou totogi, ʼe feala ke tupu ai te ʼu tuʼania mo te hoha tafito la mo kapau ʼe tou taupau hokita kiʼi famili.
ʼE mole feala ke tou taʼofi ia te totogi kovi ʼo te maʼuli. Kae kapau ʼe tou tali te aluʼaga ʼaia ʼe feala pe ke fua lelei kia tatou.
HE KOʼE ʼE MAʼUHIGA KE TOU TALI TE ALUʼAGA ʼAIA?
Kapau ʼe tou mahino ʼe mole hotatou malohi ki te totogi kovi ʼo te maʼuli, ʼe feala anai ke tou . . .
lolomi totatou lotohoha. Ko he tahi ʼe mole lotohoha ʼe lelei tana fakakaukau mo te ʼu tonu ʼae ʼe ina toʼo.
tekeʼi te ʼu aga ʼae ʼe mole fakapotopoto. Ohage la, moka ʼe mole tou totogi ʼotatou maʼua, peʼe tou maumau falā.
tekeʼi te ʼu kē fakafamili ʼo ʼuhiga mo te falā.
vakaʼi pe kotea te ʼu meʼa ʼae ʼe ʼaoga moʼoni kia tatou. Ohage la, tou fakaʼaogaʼi lelei tatatou foʼi falā pea mo totogi te ʼu meʼa ʼae ʼe ʼaoga tafito kia tatou.
KOTEA ʼE FEALA KE KOTOU FAI?
Kotou lotolelei ʼo tali te aluʼaga ʼaia. ʼI te ʼu temi ʼae ʼe hake ai te totogi ʼo te ʼu koloa, ʼe fakapotopoto anai hakotou fakasiʼisiʼi te ʼu meʼa ʼae ʼe kotou totogi. ʼE faigaʼi e ʼihi ke lahi te ʼu meʼa ʼae ʼe natou totogi kae ʼe mole feʼauga tanatou foʼi falā, ʼo ʼasili kovi ai tonatou aluʼaga. Pea ʼe natou toe gaʼegagaʼe ai. Kapau ʼe ʼi ai hokotou kiʼi famili, ʼe lagi kotou feʼekeʼaki pe feafeaʼi anai hona taupau, pea ʼe moʼoni ia. Kae kotou manatuʼi te faʼahi ʼaeni: Ko te meʼa ʼae ʼe ʼaoga tafito ki tokotou kiʼi famili ko tokotou ʼofa, mo tokotou temi pea mo takotou tokaga ki ai.
ʼE faigaʼi e ʼihi ke lahi te ʼu meʼa ʼae ʼe natou totogi kae ʼe mole feʼauga tanatou foʼi falā, ʼo ʼasili kovi ai tonatou aluʼaga