Kapite 7

Ko Te Fānau—ʼE Ko He Maʼua Pea Mo He Fakapale

1-4. (a) Koteā te ʼu faʼahiga meʼa fakaofoofo ʼo te tuputupu ʼo he kiʼi tamasiʼi ʼe hoko ʼi te fatu ʼo tana faʼe? (b) ʼI takotou ʼiloʼi te ʼu meʼa ʼaia, e feafeaʼi tanatou tokoni atu kia koutou ke koutou leleiʼia te ʼu palalau ʼaē ʼe tuʼu ia Pesalemo 127:3?

KO TE ʼamanaki ʼaē ke maʼu ʼo he fānau, ʼe ko he meʼa fakatupu fiafia pea ʼe ko he meʼa ʼe tonu ke fakakaukauʼi. Logope la ʼe ko he meʼa ʼe hoko māhani ʼi te malamanei, ko te fānauʼi ʼo he tamasiʼi, ʼe ko he ikuʼaga ia ʼo he meʼa fakaofoofo. Ka tou ʼiloʼi te fakaʼaluʼalu ʼo te meʼa ʼaia, ʼe tou mahino lelei ai leva ki te tupuʼaga ʼo te palalau ʼaē neʼe fai e te tagata fai pesalemo: “Koʼeni, ko te ʼu foha ʼe ko he tofiʼa ʼa Sehova; ko te fua ʼo te fatu ʼe ko he fakapale.” (Pesalemo 127:3) Tou vakaʼi age muʼa tana faʼahiga tuputupu.

² ʼE fakatahi te pulapula ʼaē ʼe haʼu mai te tagata ki te pulapula ʼa te fafine, ʼo liliu ai ko te eveeve e tahi. Ko te eveeve ʼaia ʼe liliu ko eveeve e lua, pea ko te ʼu eveeve ʼaia ʼe liliu leva ko eveeve e fā, pea liliu ko eveeve e valu, ʼo toe hoholo feiā aipe, ʼo liliu ai leva te eveeve ʼaia e tahi ko he tagata, ʼaē ʼe fakafuafua, ʼe faʼu tona sino ʼaki ia eveeve e 60 000 000 000 000. ʼI te kamata, ko te ʼu eveeve foʼou ʼaia, neʼe nātou tatau fuli, pea neʼe nātou kamata liliu ʼo kehekehe, ʼo liliu ʼihi ko te ʼu hui, ko ʼihi ko te ʼu ivi peʼe ko te ʼu ua, ko ʼihi ko te ʼate, mo ʼihi ko te mata, ko te kili, pea mo ʼihi ʼatu meʼa.

³ Kua tou mālama ki te tahi ʼu meʼa ʼi te ʼu meʼa ʼaē neʼe mole tou mahino kiai ʼo ʼuhiga mo te fakatupu ʼo he tamasiʼi pea mo te fetogi ʼo te ʼu eveeve, kae ʼe lahi te tahi ʼu meʼa ʼe mole heʼeki tou mahino kiai. Ohage la, koteā te meʼa ʼaē ʼe ina fakatupu te fakaʼaluʼalu ʼaē ʼo te eveeve e tahi ko te ʼu eveeve ʼe lahi ʼaupito? Ki muli age, ʼe fetogi te ʼu eveeve ʼaia. Koteā ʼaē ʼe tupu ʼaki ai te faʼahi ʼaia? Koteā ʼaē ʼe tupu ʼaki ai te faʼufaʼu ʼo te ʼu eveeve kehekehe, ʼe mole tatau tonatou ʼu agaaga, tonatou lahi, mo tanatou ʼu gāue makehe, ke nātou liliu ko te ʼu koga ʼo te sino, ohage ko te ʼate, te ihu peʼe ko te kauʼi tuhi matuʼa ʼo te vaʼe? Ko te ʼu fetogi ʼaia ʼe hoko ʼo mulimuli ki te kaletalio neʼe kua fai fakatomuʼa. Ka koteā te meʼa ʼaē ʼe ina fai te kaletalio ʼaia? Tahi ʼaē meʼa, ko te embryona ʼaē ʼe tuputupu ʼi te fatu ʼo tana faʼe, ʼe ko he sino ia ʼe kehekehe tona agaaga mo ʼaē ʼo tana faʼe. ʼI te agamāhani, ʼe līaki e te sino ʼo te tagata te ʼu meʼa fuli ʼaē ʼe mole ko he ʼu eveeve ʼo tona sino, ohage la ko te fakapipiki ʼo he lauʼi kili peʼe ko te foaki ʼo he koga ʼo he sino ki he tahi sino. He koʼe koa ʼe mole līaki e te sino ʼo te faʼe te embryon ʼaē ʼe kehe te agaaga ʼo tona sino, kae ʼe ina haga ia ʼo fafaga ia ʼaho e 280?

⁴ Ko te gāue fakaofoofo ʼaia ʼe hoko ʼi tona temi totonu, he neʼe fakatuʼutuʼu e Sehova ʼAtua ʼi te eveeve e tahi ʼaē neʼe tupu mai te pulapula ʼo te tagata pea mo te pulapula ʼo te fafine. ʼE hā te meʼa ʼaia ʼi te palalau ʼaē neʼe fai e te tagata fai pesalemo: “Ko tou ʼu mata neʼe sio ia ki toku sino ka heʼeki katoa, pea neʼe tohi ʼi tau tohi tona ʼu koga fuli.”—Pesalemo 139:16.

TE TUPUTUPU PEA MO TE FĀNAUʼI

5-8. Koteā te ʼu meʼa ʼaē ʼe hoko ʼi te fatu ʼo te faʼe, ʼi te lolotoga ʼo te fā vāhaʼa pea mo te temi ʼaē ʼe fānauʼi ai te kiʼi tamasiʼi?

⁵ Ko te embryon ʼe tuputupu vave. ʼI te hili ʼo vāhaʼa e fā, kua ʼi ai tona ʼuto, tona ʼu ivi, tona ʼu ua pea mo tona mafu ʼe ina pamu te toto pea mo ʼave ki te ʼu ua. Lolotoga ia vāhaʼa e ono, ʼe faʼu te toto ʼi te taga ʼaē ʼe ina kofukofu te kiʼi tamasiʼi, ʼo aʼu ki te lakaga ʼaē ʼe fai anai e te ʼate te gāue ʼaia pea ki muli age ko te uhoʼi hui ʼaē ka ina fai te gāue ʼaia. ʼI te lolotoga ʼo te nima vāhaʼa, ʼe kamata ʼasi te ʼu nima pea mo te ʼu vaʼe, pea hili kiai ia vāhaʼa e tolu, kua tupu te ʼu kauʼi tuhi pea mo te ʼu kauʼi vaʼe. ʼI te fakaʼosi ʼo te fitu vāhaʼa, kua tupu te ʼu koga tafito ʼo te sino, te ʼu mata, te ʼu taliga, te ihu pea mo te gutu.

⁶ E toe ʼui fēnei e te tagata fai pesalemo ʼaē neʼe tou talanoa ki ai: “Ko ʼoku hui neʼe molemo puli kia te koe, ʼi toku faʼu fakalilo.” (Pesalemo 139:15) ʼI te lolotoga ʼo te hiva vāhaʼa, ʼe liliu te ʼu cartilagesb ko te ʼu hui ʼi te tuputupu ʼo te ʼu hui fuli, pea ko te kiʼi tamasiʼi ʼaē ʼe tuputupu ʼe mole kei higoaʼi ko te embryon kae ko te fœtus.c “Heʼe ko koe, neʼe ke fakatupu toku ʼu ifiifi.” (Pesalemo 139:13) Ko te gāue ʼaē neʼe fakatuʼutuʼu e te ʼAtua ke faka fealagia te faʼahi ʼaia, ʼe hoko ʼi te māhina fā, pea ko te ʼu ifiifi ʼe nātou kamata fakamaʼa te toto.

⁷ ʼI te lakaga ʼaia, kua gaūgaūe te tamasiʼi, pea ʼe mafulifuli, mo ina peluki tona ʼu kauʼi tuhi pea mo te ʼu kauʼi vaʼe, mokā ʼe makaʼeneʼene tona ʼu ʼalofi nima peʼe ko tona ʼu ʼalofi vaʼe. ʼE feala hana kukumi he meʼa ʼi tona ʼu kauʼi tuhi, pea ʼe ina kamata mihi tona kauʼi tuhi matuʼa, ʼo fakamāmāhani ai tona ʼu ivi ʼaē ka ina fakaʼaogaʼi anai moʼo huhu ki tana faʼe. ʼE logoʼi e te faʼe te ʼoho ʼa te tamasiʼi mokā ʼe lonā. ʼI te fakaʼosi ʼo te māhina ono, kua lahi te ʼu koga ʼo tona sino kua katoa. Kua ava te ʼu kiʼi pu ʼo tona ihu, kua ʼiloga te ʼu tuʼamata, ʼe mole kei tuai pea ava te ʼu mata pea mo tona ʼu taliga, ʼo feala ai ki te kiʼi tamasiʼi ke ʼoho ʼi te fatu ʼo tana faʼe mokā ʼe lahi te logoaʼa.

⁸ ʼI te fakaʼosi ʼo vāhaʼa e fāgofulu, ʼe kamata te gāue. Ko te falega fānau kua ava pea ʼe teuteu te kiʼi tamasiʼi ke tō mai ki tuʼa. ʼI tona temi fānauʼi, ʼe feala ke mole takafuafua lelei te foʼi ʼulu ʼo te kiʼi tamasiʼi, kae ʼi te mole heʼeki hokohoko ʼo te ʼu hui ʼo te ʼulu, ʼe toe liliu ʼo takafuafua lelei ki muli age. ʼI muʼa ʼo tona fānauʼi, neʼe fai e te faʼe ia meʼa fuli ʼaē ʼe ʼaoga ki te tamasiʼi: neʼe ina foaki ki ai te oxygène,d te meʼa kai, neʼe ina puipui ia ia, mo ina foaki age ki ai te ʼofa ʼaē neʼe ʼaoga ki ai, pea neʼe ko ia ʼaē neʼe tokaga ki te fakaʼalu ki tuʼa ʼo te ʼu kovi. ʼI te temi nei, ko te sino ʼo te tamasiʼi kua tonu ke gāue ʼāteaina pe, naʼa fokifā kua mate.

9. Koteā te ʼu fetogi ʼaē ʼe tonu ke hoko fakavilivili, ke feala ki he kiʼi tamasiʼi ke maʼuli ʼi tona ʼosi fānauʼi?

⁹ ʼE tonu ke kamata mānava te kiʼi tamasiʼi, ke feala ki tona ʼu ʼatefēfē ke nā foaki te oxygène ki tona toto. Kae ke hoko te faʼahi ʼaia, ʼe tonu ke hoko te fetogi fakaofoofo ʼi te moʼi temi pe ʼaia: ʼe tonu ke hifo te toto ʼo te tamasiʼi ʼi te tahi faʼahi. Kapau ʼe kei maʼuli te fœtus ʼi te fatu ʼo tana faʼe, ʼe ʼi ai te kiʼi ava, ʼe ina vaheʼi te faʼahi mataʼu mai te faʼahi hema ʼo tona mafu, ʼe ina tāʼofi te toto lahi ke ʼaua naʼa ʼalu ki te ʼu ʼatefēfē. Kae ki te toto ʼaē ʼe hifo pe kiai, ʼe ina fai te toe takafoli ʼi te foʼi ua lahi, ʼo kaku pe ki te ʼu ʼatefēfē te 10 ki te teau ʼo te toto ʼo te fœtus. Kae ʼi te hili pe ʼo tona fānauʼi, ʼe tonu ke ʼalu fuli te toto ʼo te kiʼi tamasiʼi ki tona ʼu ʼatefēfē. Koia, ko te ʼu sekonita ʼaē ʼe hoa mai kiai, ko te foʼi ua ʼaē neʼe ina ōfeʼi kehe te toto ʼi te ʼu ʼatefēfē, ʼe māpunu leva ia ʼo feala ai ke ava te ala ʼaē ki te ʼu ʼatefēfē. ʼI te moʼi temi pe ʼaia, ʼe māpunu ai mo te ava ʼo te ʼu faʼahi ʼo te mafu, pea ko te toto fuli ʼaē ʼe pamu ʼi te faʼahi mataʼu ʼo te mafu kua hifo leva ia ki te ʼu ʼatefēfē ke feala he ʼai kiai ʼo te oxygène. Kua mānava te kiʼi tamasiʼi, pea kua ʼai te oxygène ki te toto. Kua hoko te ʼu fetogi fakaofoofo, pea kua maʼuli te tamasiʼi. Ko te gāue fuli ʼaia ʼe fakamatala leleiʼi e te tagata fai pesalemo ʼaki te ʼu palalau ʼaenī: “Neʼe ke puipui ʼau ʼi te fatu ʼo taku faʼe. ʼE ʼau vikiviki anai kia te koe, ʼi te agaaga fakamanavahe, he neʼe faʼu ʼau ki te faʼufaʼu fakatalakitupua.”—Pesalemo 139:13, 14.

10. ʼI te fakaofoofo ʼo te tuputupu ʼo te kiʼi tamasiʼi ʼi te fatu ʼo tana faʼe, koteā te ʼu manatu ʼe tonu ke maʼu e te ʼu mātuʼa ʼo ʼuhiga mo tanā fānau?

¹⁰ ʼE ko he fakafetaʼi feafeaʼi ʼe tonu ke maʼu e te tagata pea mo te fafine ʼo ʼuhiga mo te meʼa ʼofa ʼaia ʼo Sehova, te fealagia ʼaē ke nā fakatupu he tahi ohage ko nāua, ko he kiʼi tamasiʼi ʼe ko he koga totonu ʼo nāua, kae ʼe kehekehe! ʼIo, ʼe ko “he tofiʼa mai ia Sehova.”

KOUTOU TOKAGA KI TE “TOFIʼA” ʼAIA

11. Koteā te ʼu fehuʼi ʼe tonu ke fakakaukauʼi ʼe nātou ʼaē ʼe nātou fia maʼu fānau, pea koteā tona tupuʼaga?

¹¹ Neʼe mole faka tuʼakoi e Sehova te felāveʼi fakasino kia nātou ʼaē kua ʼohoana ʼuhi pe he ko he aga ʼe tonu ke fai. Neʼe ina manatuʼi foki mo te ʼu fānau ʼaē ka tutupu ai, koteʼuhi ʼe ʼaoga kia nātou he tāmai mo he faʼe ʼe nā feʼofani pea mo nā ʼofa ki tanā tamasiʼi. ʼE tonu ke ina maʼu te ʼofa pea mo te tokalelei ʼo te loto fale ʼaē ka tali fakafiafia ai e tana ʼu mātuʼa, pea mo nā foaki kia ia te maʼuli ʼaē ʼe ʼaoga ki tana tuputupu pea mo te tuputupu ʼo tona ʼuhiga ʼo ia. Ko te tagata pea mo te fafine ʼaē ʼe nā fakatuʼutuʼu ke nā maʼu hana tamasiʼi, ʼe tonu anai ke nā fai te ʼu fehuʼi ʼaenī kia nāua: ʼE tā loto moʼoni koa ki ai? ʼE feala koa ke tā foaki katoa age te ʼu meʼa ʼaē ʼe ʼaoga kia ia, ʼi te faʼahi fakasino, ʼo feiā mo te ʼu meʼa ʼaē ʼe ʼaoga ki tona loto pea mo te ʼu meʼa fakalaumālie? ʼE tā popoto anai koa ʼi tona akoʼi pea mo tuku kia ia he faʼifaʼitaki lelei? ʼE feala koa ke tā fai te ʼu maʼua ʼaē ʼe ʼalutahi mo te tupu ʼo te kiʼi tamasiʼi, pea mo tali te ʼu sakilifisio ʼaē ʼe kau ki te meʼa ʼaia? ʼI tatatou kei liliki, neʼe lagi hage kia tatou ʼe aga fefeka tatatou ʼu mātuʼa, kae ʼi te temi ʼaē ʼe tou maʼu fānau ai, ʼe tou mahino ai, ʼe ko he toe gāue te akoʼi ʼo te fānau. Koia, ʼe ko he toe maʼua lahi, kae ʼe toe maʼu ai foki te ʼu fiafia lahi.

12-14. He koʼe koa ko te fafine faitama ʼe kau ki te tuputupu lelei ʼo tana tamasiʼi (a) ʼi tana tokaga ki tana meʼa kai? (b) ʼi tana mole ʼinu te kava, ʼi tana mole suluka pea mo toloke? (c) ʼi tana lolomi te ʼu meʼa ʼaē ʼi tona loto?

¹² Koʼeni leva kua ke faitama, he neʼe koulua loto kiai, peʼe ko he meʼa neʼe hoko fakafokifā. ʼE tonu ke ke kamata tokaga ki te “tofiʼa ʼaē mai ia Sehova.” ʼE ke tokaga anai ki te ʼu meʼa ʼaē ʼe ke kai, pea mo ke fakafisi ki te tahi ʼu meʼa kai, peʼe ke kai fakaʼutaʼuta. Ko te ʼu meʼa kai ʼaē ʼe lahi ai te ukameae ʼe maʼuhiga, koteʼuhi ʼi tou fatu ʼe tānaki e te tamasiʼi te ukamea, ʼo ina teuteuʼi te ʼu ʼuluaki māhina e ono ka hoa mai ki tona fānauʼi. ʼE tonu ke lahi tau fakaʼaogaʼi te huʼa pipi (peʼe ko te folomasi) ke ke foaki ki tau tamasiʼi te calciumf ʼaē ʼe ʼaoga ki te faʼufaʼu ʼo tona ʼu hui. ʼE mole ke sino fau anai, mo kapau ʼe ke kai fakapotopoto ki te ʼu meʼa kai ʼaē ʼe lahi ai te hydrates de carbone.g ʼIo, ʼe ke kai anai maʼa te tokolua, kae ʼe ʼi ai te tahi ia koulua ʼe veliveli.

¹³ ʼE mahino ia, kapau neʼe ʼi ai he ʼu meʼa neʼe ke fai māhani, ʼe tonu anai ke ke tokaga kiai. Koia, ʼe tonu ki te faʼe ke ina ʼinu fakapotopoto te kava, heʼe ko te kava ʼaē ʼe ina ʼinu, ʼe ʼalu ki te fœtus, pea kapau ʼe lahi fau tana ʼinu te kava, ʼe feala ai ki tana kiʼi tamasiʼi ke māʼimoa peʼe kovi ki tona ʼatamai. Neʼe ʼi ai te ʼu kiʼi tamaliki neʼe fānauʼi age ʼe konahihia, koteʼuhi neʼe ʼinu kava tanatou faʼe. Kapau ʼe suluka te fafine, ʼe ina fakahū te meʼa kona ki te ʼu ua ʼo te fœtus, ʼo ina fetogi te oxygène ʼo tona toto ʼaki te gaz carbonique.h Koia ʼaē, ʼi muʼa ʼo he fānauʼi ʼo he tamasiʼi, kua lagi faigataʼa ki te tamasiʼi ʼaia hana maʼu ʼo hona maʼuli mālōlō. Ko te fakatō fatu pea mo te ʼu tamaliki ʼaē ʼe mamate ʼi te temi ʼaē ʼe fānauʼi ai, ʼe hoko tāfito ki te ʼu fafine ʼaē ʼe suluka. Ko te faʼe ʼaē ʼe ina fakaʼaoga te ʼu toloke ʼe feala ke ina fānauʼi he tamasiʼi ʼe toloke. Māʼiape la mo te ʼu faitoʼo ʼaē ʼe mole tou fakaʼaogaʼi tuʼumaʼu, ʼe feala ke kovi pea mo fakatupu ai he ʼu tamaliki māʼimoa. ʼE toe feala mo te kafe ke kovi ki te kiʼi tamasiʼi, mokā ʼe lahi fau tana fakaʼaogaʼi.

¹⁴ Tahi ʼaē meʼa, ko he tuʼania ʼe feala ke ina fakaviliviliʼi te fakatupu ʼo te ʼu hormones ʼi te sino ʼo te faʼe pea mo fakahoha te fœtus, ʼo liliu leva te kiʼi tamasiʼi ʼaia ʼo pago pea mo ʼitaʼita. ʼE moʼoni, ko te kiʼi tamasiʼi ʼe ina maʼu te puipui ʼi tana kei nofo ʼi te fatu ʼo tana faʼe, kae ʼaua leva naʼa tou ʼui ʼe hāo ia mo te ʼu meʼa ʼaē ʼe hoko ʼi tuʼa. ʼAki tana faʼe ʼe ʼi ai te mālohi ʼo te ʼu meʼa ʼaē ʼi tuʼa ki te kiʼi tamasiʼi ʼaia. ʼE ko tana faʼe ʼaē ka ina vakaʼi peʼe lelei peʼe kovi anai te ʼu meʼa ʼaia ʼo tuʼa, heʼe ko ia tokotahi pe ʼaē ʼe feala ai ki te kiʼi tamasiʼi ke ina ʼiloʼi te ʼu meʼa ʼo tuʼa. ʼE fakalogo te meʼa ʼaia ki te faʼahiga tokaga ʼa te fafine ki tona maʼuli, pea mo tana tali ia te ʼu meʼa ʼaē ʼe hoko ʼi te maʼuli. ʼE toe ʼaoga anai kia ia ke lagolago ki ai ia nātou ʼaē ʼe maʼuʼuli mo ia, kae tāfito he ʼofa lahi pea mo he lototokaga ʼo tona ʼohoana.—Fakatatau mo 1 Samuele 4:19.

TE ʼU TONU ʼE TONU KE FAI

15, 16. Koteā anai te ʼu tonu ʼe tonu ke fai ʼo ʼuhiga mo te koga meʼa ʼaē ka fai ai te faifānau, pea mo te faʼahiga fai ʼo te faifānau ʼaia?

¹⁵ ʼE ke fānauʼi anai tau tamasiʼi ʼi fale peʼe ʼi te kilinike? ʼE faigataʼa ke fai he tonu ki te faʼahi ʼaia, heʼe lahi te ʼu koga meʼa, ʼe mole nātou feōvi mo he kilinike. ʼI te tahi ʼu koga meʼa, ʼe tahitahiga te fānauʼi ʼo he tamasiʼi ʼi te loto fale, ʼuhi ko te ʼu tuʼutāmaki ʼaē ʼe feala ke hoko, mo kapau ʼe mole maʼu he tahi ʼe poto ʼi te faifānau, ohage la ko he fafine faifānau. Kae ʼi te ʼu fenua ʼaē ʼe faigamālie ai, ʼe lelei ke vakaʼi tuʼumaʼu e he tōketā te fafine faitama, ke feala hana ʼiloʼi peʼe ʼamanaki ke lelei tana faifānau peʼe ʼi ai anai he ʼu kiʼi fihifihia.

¹⁶ ʼE ke fānau anai koa ohage ko te agamāhani peʼe fai anai hou foʼi huki? ʼE fakalogo te faʼahi ʼaia kia koulua taumatuʼa mo kapau neʼe kua koulua felogoi fakatahi kiai. ʼI te faifānau māhani, ʼe feala ki te tagata ke kau ki te meʼa fakafiafia ʼaia pea ʼi te hili pe ʼo te faifānau, ʼe foaki te kiʼi tamasiʼi ki tana faʼe. Ko ʼihi ʼe nātou ʼui ʼe ʼaoga ʼaupito te faʼahi ʼaia, mo kapau ʼe fakahā e te ʼu sivi ʼa te tōketā, ko te faifānau ʼe mole ʼi ai anai hona ʼu fihifihia. ʼI te manatu ʼa te kau poto, ko te ʼu tamaliki ʼaē ʼe fānauʼi ʼi te ʼu ʼaluʼaga fīmālie ʼo te fānau māhani ʼe mole lahi tonatou ʼu fihifihia ʼi te ʼu meʼa ʼaē ʼi tonatou loto pea mo te ʼu koga ʼo ʼonatou sino.

17-19. ʼO mulimuli ki te ʼu sivi, he koʼe koa ʼe fua lelei te foaki fakavilivili ʼo te kiʼi tamasiʼi ki tana faʼe mokā ʼosi pe tona fānauʼi?

¹⁷ Neʼe ʼui fēnei e te nusipepa ʼo Tesepeli 1977 (Psychology Today):

“Talu mai ia taʼu e hogofulu tupu, kua ʼiloʼi e te kau tōketā ʼaē ʼe nātou sivi te ʼatamai, ko te ʼuluaki taʼu ʼo te kiʼi tamasiʼi ʼe feala ke ʼi ai hona ʼu fua loaloaga ki muli age, ki te tuputupu ʼa tana fakakaukau pea mo tona sino. ʼI te temi nei, ʼe ʼui ʼe toe maʼuhiga foki mo te ʼuluaki ʼaho ʼo te tamasiʼi (māʼia mo te ʼuluaki hola ʼo tona maʼuli). Ko te noʼo ʼofa ʼaē ʼe fai e te faʼe mo tana faʼahiga tokaga ʼaē ʼe ina kamata fai ki ai, ʼe maʼuhiga tāfito ʼi tana ʼosi fānauʼi. ʼE toe fakahā e te ʼu kumi foʼou, ʼe maʼuhiga te ʼu ʼuluaki hola ʼaia, ʼi te aga ʼaē ka fai e te faʼe ki tana kiʼi tamasiʼi pea mo te mālohi ʼo tana ʼofa ki ai ʼo toe feiā aipe mo tona ʼuhiga faʼe.”

¹⁸ Kapau neʼe mole fai he foʼi huki ki te fafine ʼi te temi ʼaē neʼe faifānau ai, ko te kiʼi tamasiʼi ʼe ʼalaʼala anai, ʼe ina avahi anai tona ʼu mata mo sio ki ʼona tafa, mo ina sioʼi te ʼu meʼa ʼaē ʼe hoko, pea ʼe ina sioʼi anai ia nātou ʼaē ʼe palalau, kae tāfito ʼe ina fakalogo anai te ʼu leʼo ʼa te hahaʼi fafine. ʼE feala ʼi te moʼi temi pe ʼaia, ke fesioʼaki te faʼe mo tana kiʼi tamasiʼi. ʼE ʼiloga ko te faʼahi ʼaia ʼe maʼuhiga, koteʼuhi ʼi te tahi ʼu sivi, neʼe ʼui e te ʼu faʼe, ko te temi ʼaē neʼe sioʼi ai nātou e tanatou kiʼi tamasiʼi, neʼe nātou logoʼi tanatou ōvi mālohi ʼaē ki ai. ʼO toe feiā aipe mo te lave ʼo te sino ʼo te faʼe ki te sino ʼo te kiʼi tamasiʼi ʼi tona ʼosi fānauʼi pe, ʼe maʼuhiga kia nāua toko lua.

¹⁹ ʼE tala e te kau poto, ko ʼihi mamahi ʼo te ʼu kiʼi tamaliki ʼaē ʼe ʼaoga ke faitoʼo, ʼe tupu mai te ʼu ʼuluaki hola ʼo tona maʼuli. Neʼe fakatatau te ʼu kiʼi tamaliki ʼaē neʼe fānauʼi ʼi te ʼu kilinike, ʼaē ʼe mole nātou momoe tahi mo tanatou ʼu faʼe, pea mo te ʼu kiʼi tamaliki ʼaē neʼe foaki ʼi tonatou ʼosi fānauʼi ki tanatou faʼe. ʼI te sivi ʼaia, neʼe ʼiloga ʼi te hili ʼo te māhina katoa, neʼe maʼuli lelei age te ʼu kiʼi tamaliki ʼaē neʼe foaki ki tanatou faʼe ʼi tonatou ʼosi fānauʼi. ʼE ʼui fēnei e te sulunale Psychology Today: “ ʼE ʼi ai te tahi meʼa fakaofoofo, heʼe ʼi tonatou taʼu nima, ko te ʼu kiʼi tamaliki ʼaē neʼe nātou maʼuli fualoa mo tanatou faʼe, ʼe lahi tanatou ʼatamai pea neʼe lelei tonatou ʼu nota ʼi te ʼu sivi ʼaē neʼe fai ʼo ʼuhiga mo tanatou palalau, ʼi te ʼu kiʼi tamaliki ʼaē ʼe sivi ohage ko te agamāhani ʼi te ʼu fale taupau tamaliki.”

20. Koteā te meʼa ʼaē ʼe tonu ke kita manatuʼi moʼo fai he tonu ʼe lelei?

²⁰ Kae ʼi muʼa ʼo hana fai he tonu, ʼe tonu ke ina fakakaukauʼi fakalelei te ʼu faʼahi fuli. ʼAua naʼa galo kia tatou, ʼe tou agahala fuli, ʼuhi ko tatatou ʼu ʼuluaki mātuʼa. Koia ʼaē ia ʼaho nei, ko te “faifānau māhani,” ʼe toe maʼu aipe foki mo tona ʼu ikuʼaga kovi. (Senesi 3:16; 35:16-19; 38:27-29) Koia, kapau ʼe ke fai hau tonu, manatuʼi te ʼu ʼaluʼaga ʼaē ʼe tau mo koe pea mo ke mulimuli ki te meʼa ʼaē ʼe ke manatu, ʼe lelei kia koe, tatau aipe peʼe mole ʼalutahi mo te faifānau ʼaē ʼe ʼui e ʼihi ʼe “lelei.”

21, 22. Koteā te ʼu fua lelei ʼo te fakahuhu ʼo te kiʼi tamasiʼi?

²¹ ʼE ke fakahuhu anai koa tau kiʼi tamasiʼi? ʼE lahi te ʼaoga ʼo te faʼahi ʼaia kia koulua toko lua. Ei, ko te huʼa huhu ʼo te faʼe, ʼe ko he meʼa lelei ia ki te kiʼi tamasiʼi. ʼE faigafua hana kai kiai, pea ʼe foaki age e te huʼa huhu ʼaia te ʼu meʼa ʼaē ʼe ʼaoga kia ia moʼo ʼona puipui ki te mahaki, pea mo te ʼu fihifihia ʼo te vavā pea mo te ʼu mahaki ʼo te ʼu meʼa ʼaē ʼe mānava ai. Ko te ʼu ʼuluaki ʼaho ʼo te ʼosi fānau, ʼe fakatupu e te ʼu huhu ʼo te faʼe, te huʼa vai ʼe higoa ko te colostrum, ʼe legalega pea ʼe ʼaoga tāfito ki te kiʼi tamasiʼi, koteʼuhi (1) ʼe mole lahi te ʼu meʼa ʼe gako pea mo te ʼu hydrates de carbone, ʼo faigafua ai tana ʼinu, (2) ʼe lahi age tana tekeʼi te ʼu meʼa ʼaē ʼe kovi ʼi te huʼa huhu ʼaē ka fakatupu e tana faʼe ʼi te ʼu ʼaho ki muli age, (3) ʼe ina fakamaʼa māmālie te ʼu ʼotaʼota fuli ʼi te sino ʼo te kiʼi tamasiʼi ʼaē neʼe tānaki ʼi tona ʼu vavā ʼi muʼa ʼo tona fānauʼi.

²² ʼE toe fua lelei ki te ʼu faʼe ʼaē ʼe nātou fakahuhu tanatou ʼu tamaliki. Ko te fakahuhu ʼo te kiʼi tamasiʼi, ʼe ina tāʼofi te maligi ʼo te toto, koteʼuhi ko te huhu ʼa te kiʼi tamasiʼi ki te huʼa huhu ʼo tana faʼe, ʼe ina fakagafua te māpunuʼi ʼo te falega fānau. Tahi ʼaē meʼa, ka huhu te kiʼi tamasiʼi, ʼe fakalahi ai te huʼa huhu ʼo tana faʼe, pea kua mahino ki te ʼu faʼe ʼaē neʼe nātou tuʼania naʼa mole feʼauga te huʼa huhu, kua feʼauga noa ia. Ko te fakahuhu ʼo te kiʼi tamasiʼi ʼe toe feala ʼi ʼihi temi ke ina fakatuai te toe hoko ʼo te “faka fealagia ʼaē ki te fānau” pea mo te mahaki fakafafine, ohage tana gāue ko te meʼa ʼaē ʼe fakaʼaogaʼi moʼo tāʼofi ʼo te maʼu fānau. Koia, ʼe ʼui e te Sosiete amelika ʼaē ʼe ina kumi he faitoʼo ki te kosea, “ ʼe tahitahiga te kosea ʼo te huhu ʼi te ʼu faʼe ʼaē ʼe nātou fakahuhu tanatou ʼu kiʼi tamaliki.” Pea tahi ʼaē, ko te fakahuhu ʼo te kiʼi tamasiʼi, ʼe mole puli ai he foʼi falā.

TE TUPUTUPU ʼO TE TAMASIʼI—ʼE FEAFEAʼI ANAI TAKOTOU FAKAHAGAHAGA TE KAUʼI NAHAU?

23. Koteā te ʼu fakatuʼutuʼu ʼe tou maʼu ki te akoʼi ʼo te fānau ia Pesalemo 127:4, 5?

²³ “Ohage ko he ʼu kauʼi nahau ʼi te nima ʼo he tagata tau, ʼe toe feiā mo te ʼu foha ʼo te temi tūpulaga. Manuʼia te tagata ʼaē neʼe ina fakafonu ʼaki tana ʼaiʼaga nahau!” (Pesalemo 127:4, 5, Segond) ʼE fakalogo te maʼuhiga ʼo te kauʼi nahau ki te totonu ʼo tona fakahagahaga e te tagata fai nahau. ʼE tonu kia ia ke tokaga lelei kiai pea mo faiva, ke ʼalu te kauʼi nahau ʼo tuʼu ki te meʼa ʼaē ʼe poloʼi. ʼO toe feiā aipe, ʼe maʼuhiga kia koutou ʼu mātuʼa, ʼaki te taki ʼa te ʼAtua, ke koutou fakakaukauʼi fakapotopoto te takitaki ʼaē ka koutou tuku anai ki takotou kiʼi tamasiʼi. Ki muli age, ʼe liliu anai koa ko he tagata poto, ʼe faiva pea mo fakaʼapaʼapaʼi, ʼe ina fakavikiviki anai ki tona ʼAtua?

24. (a) Koteā te ʼaluʼaga faka famili ʼaē ʼe tonu ke faigaʼi e te ʼu mātuʼa ke maʼu ʼi te loto fale maʼa tanā fānau? (b) He koʼe koa ʼe maʼuhiga te faʼahi ʼaia?

²⁴ ʼE tonu ke fai he ʼu tonu ʼo ʼuhiga mo te faʼahiga gaohi ʼo te kiʼi tamasiʼi pea mo te faʼahiga ako ʼaē ka fai ki ai, ʼi muʼa ʼo tana tupu. Ki te tamasiʼi ʼaē kua tupu, ʼe hage kia ia tana ʼu mātuʼa ko tona maʼuli katoa. Kae ʼe feafeaʼi anai te maʼuli katoa ʼaia? ʼE ina fakahā anai koa neʼe mulimuli lelei ia te ʼu mātuʼa ki te tokoni ʼaenī ʼa te Folafola ʼa te ʼAtua: “Ke toʼo ia koutou te lotokovi fuli pe, te ʼita fuli pe, te hāūhāū fuli pe, te kalaga fuli pe, te leakovi fuli pe, pea mo te agakovi. Kae ke koutou liliu ʼo feagaleleiʼaki ia koutou, fonu ʼi te manavaʼofa, ʼo koutou fefakamolemoleʼaki, ohage ko te fakamolemole ʼa te ʼAtua kia koutou ʼaki ia Kilisito.” (Efesi 4:31, 32) ʼIo, ko te maʼuli ʼi te loto fale ʼe ʼiloga anai ʼi te kiʼi tamasiʼi. Koia, koutou faiga ke tuputupu ʼi he ʼaluʼaga ʼe tokalelei pea ke ina maʼu ai te falala, ʼi he loto fale ʼe maʼu ai te ʼofa. ʼE lave anai ki te kiʼi tamasiʼi ʼaē ʼe ʼofainaʼi te ʼu ʼaluʼaga lelei ʼaia pea ʼe faʼufaʼu ʼaki anai tana aga. ʼE ina tokagaʼi anai te ʼu meʼa ʼi tokolua loto pea ʼe ina muliʼi anai takolua faʼifaʼitaki. Neʼe faka fealagia e te ʼu lao ʼo te agaaga ʼaē ʼe tuku e te ʼu mātuʼa ki ʼonatou hāko ʼaē neʼe fakatuʼutuʼu ʼe totatou Tupuʼaga, ke tuputupu te kiʼi tamasiʼi ʼi he ʼaluʼaga fakaofoofo ʼi te fatu ʼo tana faʼe. Kae ʼe feafeaʼi anai takotou takitaki te kiʼi tamasiʼi ʼaia ʼi tona ʼosi fānauʼi? ʼE fakalogo tāfito te faʼahi ʼaia, ki te maʼuli ʼaē ka hoko ʼi te loto fale, koteʼuhi ʼaki te meʼa ʼaia ohage pe ko te meʼa ʼaē neʼe ina faʼufaʼu te agaaga ʼa te tamasiʼi, ʼe ina fakahā anai te ʼaluʼaga ʼo te tamasiʼi ʼaia ki muli age. “Akoʼi te tama ki te ala ʼaē ʼe ʼaoga ki ai; koteʼuhi ka matuʼa anai, pea ʼe mole toe foki anai mai ai.”—Tāʼaga Lea 22:6.

25, 26. He koʼe koa ʼe maʼuhiga ke lahi te temi pea mo te tokaga ʼa te ʼu mātuʼa ki tanā fānau?

²⁵ ʼE mole feala ke fakatupu e te tagata mo te fafine he moʼi fisiʼi vao, kae ko nāua toko lua ʼe feala hanā fakatupu he kiʼi tamasiʼi, ko he koga ʼe faigataʼa ʼaupito tona faʼufaʼu pea ʼe mole tatau ia mo he tahi tagata ʼi te kele. ʼI te fakaofoofo ʼo te gāue ʼaia, ʼe mata faikehe kia tatou te mole leleiʼia ʼa te hahaʼi te ʼuhiga taputapu ʼo te maʼua ʼaē ʼe tupu mai te faʼahi ʼaia. ʼE nātou to te ʼu fisiʼi teu, ʼe nātou fakavai, ʼe nātou ʼai ki ai te meʼa fakagakokele, ʼe nātou fakamaʼa, ʼe nātou fai te ʼu gāue fuli ʼaia koteʼuhi ke nātou maʼu honatou ʼōloto ʼe matalelei. ʼE mole tonu koa la ke lahi age totatou temi pea mo tatatou faiga moʼo fakatupu he fānau ʼe matalelei?

²⁶ Kapau ʼe tonu ke maʼu e he taumatuʼa hana fānau, pea ko te fānau ʼe tonu pe foki mo nātou ke nātou maʼu hanatou ʼu mātuʼa ʼe nā fai fakalelei tonā ʼu maʼua. Ko te Kilisitiano ʼaē kua ina foaki tona maʼuli ki te ʼAtua, ʼe lagi lahi anai tona temi pea mo tana ʼu faiga ʼaē ka ina fakaʼaogaʼi moʼo akoʼi te Tohi-Tapu ki niʼihi ʼaki te fakaʼamu ʼaē ke nātou liliu ko he kau tisipulo, kae ʼe mole faʼa hoko tuʼumaʼu. ʼE mole tonu koa la ki te ʼu mātuʼa Kilisitiano ke nā tuku he temi lahi moʼo ‘akoʼi tana fānau totonu ʼi te akonaki pea mo te ako fakaʼatamai ʼa Sehova’? (Efesi 6:4) Kapau, ʼaki tanā ako, ʼe liliu tanā tamasiʼi ʼo kaugana agatonu kia Sehova ʼAtua, te Tupuʼaga ʼo te maʼuli, ʼe mole tonu koa la ke nā fiafia ai anai? Koia, ʼe nā maʼu ai anai te manatu ʼaē, neʼe fakapale ʼaupito ia nāua ʼi tanā fakatupu te fānau.—Tāʼaga Lea 23:24, 25.

27. ʼI takotou takitaki te tuputupu ʼo te tamasiʼi, he koʼe koa ʼe tonu ke fakatokagaʼi tona ʼuhiga ʼo ia?

²⁷ Ia Pesalemo 128:3, ʼe fakatatau te ʼu fānau ki he ʼu mukoʼi oliveto: “ ʼE hage anai tou ʼohoana ko he fuʼu vite ʼe fua fakavale ʼi te ʼu potu mamaʼo ʼo tou ʼapi. ʼE hage anai tou ʼu foha ko he ʼu vaʼa oliveto ʼe takatakai ʼaki tou laupapa.” ʼE feala ke tou haga ʼo fai ke fetogi te agaaga ʼo te ʼu fuʼu ʼakau. Ko ʼihi ʼe hohomo ohage ko he ʼā; ko ʼihi ʼe mafola ʼi te kele. Ko ʼihi ʼe fasifasiʼi tona ʼu aka ke nounou ohage la ko te ʼu bonsaïs. Moʼo fakahā te maʼuhiga ʼo te ʼuluaki ako ʼo te kiʼi tamasiʼi ʼo ʼuhiga mo tana tuputupu, ʼe ʼui e ʼihi: “Kapau ʼe feiā te agaaga ʼo te muko, pea ʼe feiā anai te agaaga ʼo te fuʼu ʼakau.” Kae ʼe tonu ke tou aga fakapotopoto ʼi te faʼahi ʼaia. Kapau ʼe tonu ke taki e te ʼu mātuʼa te tamasiʼi ke ina muliʼi he aga ʼe lelei, ʼe mole tonu leva ke nā ʼamanaki ke tatau te ʼuhiga ʼo te kiʼi tamasiʼi mo tana aga, mo te meʼa ʼaē neʼe nā fakatuʼutuʼu kiai. ʼE mole feala ke koutou fakatupu he ʼu fuaʼi fiku ʼi he fuʼu oliveto. Koutou ako takotou tamasiʼi ke ina fai te meʼa ʼaē ʼe lelei, kae ʼaua naʼa koutou faiga fakamālohi ke mulimuli ki he meʼa neʼe koutou fakatuʼutuʼu ke ina muliʼi, ʼo mole feala ai ke hā faʼifaʼitaliha tona ʼuhiga totonu ʼo ia pea mo tona ʼu kalitate. Koutou fakaʼaogaʼi he temi ke koutou ʼiloʼi te kiʼi tamasiʼi ʼaia, ʼaē neʼe koutou fakatupu. Pea ohage pe ko he kiʼi fuʼu ʼakau ʼe fakaʼeteʼete gataʼa, koutou taki fakalelei ia ia ke hāo pea mo nofo ʼi te ala ʼaē ʼe lelei, kae ʼaua naʼa koutou fefeka fau, naʼa fakatupu kovi ki te lolotoga tupu ʼo tona ʼu fealagia ki te fai ʼo te meʼa ʼaē ʼe lelei.

KO HE FAKAPALE ʼA SEHOVA

28. Koteā te ako ʼe feala ke tou maʼu ia Senesi 33:5, 13, 14 ʼaē ʼe talanoa ai ʼo ʼuhiga mo te aga ʼaē neʼe fai e Sakopo ki tana fānau?

²⁸ ʼI te ʼu temi ʼāfea, neʼe fakahā e Sakopo tana tokaga ʼaē ki tana fānau. Neʼe fakaʼui e Esau kia ia te faʼahiga haʼele ʼe vave fau ki te fānau, pea neʼe ʼui fēnei e Sakopo: “ ʼE ʼiloʼi e toku ʼaliki ʼe vaivai te ʼu fānau pea ko taku kavega ko te ʼu ōvi pea mo te ʼu pipi fafine ʼe nātou fakahuhu ʼonatou ʼuhi, pea kapau ʼe vave fau tatatou haʼele ʼi he ʼaho pe e tahi, pea ʼe mahino ia ʼe mamate anai te kiʼi faga manu. Ke fakalelei toku ʼaliki, ke muʼamuʼa la ia ʼi tana tagata kaugana, kae ke fakagafua mai kia te ʼau ke hoko atu taku haʼele ʼo mulimuli ki te haʼele ʼo te kiʼi faga manu ʼaē ʼi ʼoku muʼa pea mo te haʼele ʼo te kiʼi fānau.” Ki muʼa atu, neʼe felāveʼi mo Esau pea neʼe fai age e ia nei kia te ia te fehuʼi ʼaenī: “Ko ai ia nātou ʼaenā mo koe?” Pea neʼe tali fēnei age e Sakopo: “Ko te fānau ʼaē neʼe foaki mai e te ʼAtua ki tau tagata kaugana.” (Senesi 33:5, 13, 14) Ia ʼaho nei, ʼe tonu ki te ʼu mātuʼa ke nātou ʼofa ki tanatou fānau ohage ko Sakopo, pea ʼe toe tonu foki, ohage ko ia, ke nātou faka ʼuhiga te ʼu fānau ʼaia, ʼe ko he tapuakina mai ia Sehova. ʼIo, ʼi muʼa ʼo hana ʼohoana, ʼe tonu ki te tagata ke fakakaukau fakalelei, ke ina ʼiloʼi peʼe feala anai hana foaki te ʼu meʼa ʼaē ʼe ʼaoga ki tona famili. ʼE tuku mai e te Tohi-Tapu te tokoni ʼaenī: “Fakatokatoka muʼa tau ʼu meʼa fuli ʼi tuʼa pea mo ke gaohi tau ʼu gāueʼaga ke lelei; pea hoki ke laga leva tou ʼapi mo tou loto fale.” (Tāʼaga Lea 24:27, New English Bible) ʼO mulimuli ki te tokoni ʼaoga ʼaia, ʼe tonu ke teuteu fakatomuʼa he tagata, mo kapau ʼe ina loto ke fua lelei tona ʼohoana pea mo tona maʼuli faka famili. Pea ka faitama anai tona ʼohoana, ka neʼe mole ʼamanaki ki ai, ʼe ina tali fakalelei anai, ka mole ina faka ʼuhiga ʼe ko he kavega ʼe mamafa fau ʼi te faʼahi faka paʼaga.

29. He koʼe koa ʼe tonu ke fai he fakakaukau fakalelei ʼi muʼa ʼo he maʼu fānau?

²⁹ ʼE mahino mai ia, ʼe maʼuhiga ke fakakaukauʼi fakalelei ia muʼa ʼo te fai ʼo he tonu ke maʼu he tamasiʼi, ʼo mole gata pe ʼi te ʼuluaki tamasiʼi. ʼE faigataʼa koa ki te ʼu mātuʼa te fafaga, te akonakiʼi pea mo te akoʼi ʼo te ʼu fānau ʼaē kua nā maʼu? Koia, kapau ʼe nā fakaʼapaʼapa ki tonā Tupuʼaga pea kapau ʼe nā feʼofani, ʼe mahino ia, ʼe nā fakakaukau anai ki te lolomi ʼo nāua naʼa lahi fau tanā maʼu fānau.

30. (a) He koʼe koa ʼe feala ke tou ʼui ko te fānau, ʼi tona ʼaluʼaga moʼoni, ʼe ʼa te ʼAtua ia? (b) ʼE tonu anai ke lave feafeaʼi te meʼa ʼaia ki te manatu ʼa te ʼu mātuʼa?

³⁰ ʼI tona ʼaluʼaga moʼoni, ʼe ʼa ai takolua tamasiʼi? ʼE moʼoni, ʼe ʼa koulua, kae ʼi tona tahi ʼaluʼaga, ʼe ʼa te Tupuʼaga. Neʼe ina foaki atu kia koulua, ohage pe ko tana foaki ia koulua ki takolua ʼu mātuʼa. Kae ko koulua, neʼe mole ko he meʼa ʼāteaina ʼa takolua ʼu mātuʼa, pea neʼe mole tonu ke nā gaohi koulua, ʼo fakalogo pe ki te meʼa ʼaē ʼe nā loto kiai. Ko tona faka ʼuhiga la ʼaia, te ʼui ʼaē ʼe mole ʼa koulua te tamasiʼi. ʼE mole feala ki te ʼu mātuʼa ke nā ʼiloʼi te temi tonu ʼaē ʼe kamata tupu ai te kiʼi tamasiʼi, pea ʼe mole feala ke nā takitaki te tuputupu ʼo te kiʼi tamasiʼi ʼi te loto fatu ʼo tana faʼe. ʼE mole feala pe la hana sio pea mo mahino katoa ki te gāue fakaofoofo ʼaia. (Pesalemo 139:13, 15; Tagata Tānaki 11:5) Kapau ʼe hoko he tuʼutāmaki ki te kiʼi tamasiʼi, ohage la ʼe hoko he fatu tō, peʼe fānauʼi age kua mate, ʼe mole lava ki te ʼu mātuʼa ke nā toe fakamaʼuli ia ia. ʼAki he agavaivai, ʼe tonu ke mahino lelei kia nāua, ko te ʼAtua ʼe ko te Tupuʼaga ʼo te maʼuli fuli pe, pea ko tatou ko ʼana fānau. “ ʼE ʼa Sehova te kele pea mo te ʼu meʼa ʼaē ʼe fakafonu ʼaki, te kele maʼuli pea mo nātou ʼe nonofo ai.”—Pesalemo 24:1.

31, 32. (a) Koteā te maʼua ʼo te ʼu mātuʼa ia muʼa ʼo te ʼAtua? (b) Koteā anai tona ikuʼaga mokā ʼe nā fai fakalelei te maʼua ʼaia?

³¹ ʼE tonu ke koulua tokaga ki te ʼu tamaliki ʼaē ʼe koulua fakatupu, pea ʼe ʼi ai mo tokolua ʼu maʼua ki te Tupuʼaga ʼo ʼuhiga mo te faʼahiga ako ʼaē ʼe koulua fai kia nātou. Neʼe ina fakatupu te kele, ʼo ina fakatuʼutuʼu ke nofoʼi, pea neʼe ina tuku ki te ʼuluaki taumatuʼa te fealagia ʼaē ke nā fanaunau. Kae, ʼi tanā līaki te ʼAtua, neʼe nā kau mo te Fili ʼaē neʼe ina fakafihiʼi te faitotonu ʼo tana pule fakaʼatua ki tona famili, ʼaē ko te kau ʼaselo ʼi te lagi pea mo te ʼu meʼa ʼaē ʼi te kele. Kapau ʼe koulua akoʼi takolua fānau ke feala hanatou liliu ko he ʼu hahaʼi lalahi ʼe agatonu ki tonatou Tupuʼaga, ʼe feala anai kia koulua mo tokolua famili ke koutou fakahā ko te Fili ʼe loi pea ko Sehova ʼAtua ʼe moʼoni. Heʼe tou lau fēnei ia Tāʼaga Lea 27:11: “Ke ke poto ia koe, ê toku foha, pea ke ke fakafiafia toku loto, ke feala haku tali kia ia ʼaē ʼe manukinuki kia te ʼau.”

³² Kapau ʼe koulua fai tokolua ʼu maʼua ki takolua fānau pea mo tokolua maʼua ʼaē ki te ʼAtua, ʼe mahino anai kia koulua, neʼe koulua fai te meʼa ʼe maʼuhiga ʼi tokolua maʼuli. ʼE feala leva ke koulua faka ʼuhiga kia koulua te ʼu palalau fakafetaʼi ʼaē ʼe tuʼu ia Pesalemo 127:3: “Ko te fua ʼo te fatu ʼe ko he fakapale.”

[Nota]

[Paki]

Ko he ʼu felogoi lelei ʼi te temi nei ʼe nātou tekeʼi anai he fihifihia ʼa te ʼu mātuʼa pea mo te fānau ki muli age