ʼE Laga e Te Hahaʼi Te Tule Māʼoluga

KUA hili kiai ni ʼu taʼu loaloaga, pea kua kaugamālie te fānau ʼo te ʼu foha ʼo Noe. Pea kua lalahi mo tanatou ʼu fānau, pea kua toe fanaunau mo nātou ʼaia. Mole tuai pea kaugamālie te hahaʼi ʼi te kele.

Ko te tahi ia nātou ʼaia neʼe ko te mokopuna ʼo Noe neʼe higoa ko Nimelote. Neʼe ko te tagata agakovi neʼe ina kapu pea mo tāmateʼi te ʼu manu pea mo te hahaʼi. Neʼe fakanofo e Nimelote ia ia totonu ko he hau ke ina puleʼi te hahaʼi. Neʼe mole ʼofa te ʼAtua kia Nimelote.

ʼI te temi ʼaia, neʼe palalau te hahaʼi fuli ki te lea pe e tahi. Neʼe loto ia Nimelote ke nātou nonofo fakatahi ke feala ai hana puleʼi ia nātou. Pea ʼe koutou ʼiloʼi koa te meʼa ʼaē neʼe ina fai? Neʼe ina ʼui age ki te hahaʼi ke nātou laga he kolo pea mo he tule māʼoluga. ʼE koutou sisio kia nātou ʼi te paki ʼe nātou gaohi te ʼu piliki.

Neʼe mole leleiʼia e Sehova ʼAtua te laga ʼo te tule ʼaia. Neʼe loto te ʼAtua ke mavetevete te hahaʼi pea ke nātou ʼolo ʼo nofoʼi te kele katoa. Kae neʼe ʼui e te hahaʼi: ‘ ’Ōmai! Ke tou laga he kolo pea mo he tule māʼoluga ʼaupito ke aʼu tona tumutumu ki te lagi. Pea ʼe ʼiloa ai anai ia tatou!’ Neʼe loto te hahaʼi ke nātou faka maʼuhigaʼi pe ia nātou totonu, kae mole nātou faka maʼuhigaʼi te ʼAtua.

Koia neʼe tāʼofi ai e te ʼAtua te laga ʼo te tule. ʼE koutou ʼiloʼi pe koteā te meʼa ʼaē neʼe ina fai? Neʼe ina gaohi fakafokifā ke lea kehekehe te hahaʼi, ʼo mole kei nātou palalau ki he lea e tahi. Neʼe mole kei femahinoʼaki te hahaʼi laga fale. Koʼena la te tupuʼaga ʼaē ʼo te fakahigoaʼi ʼo tonatou kolo ko Papele, peʼe ko Papiloni, ko tona faka ʼuhiga “Kua maveuveu.”

ʼI te temi ʼaia neʼe kamata mavae ai te hahaʼi ʼi Papele, ʼo ʼolo fakatahi ia nātou ʼaē ʼe tatau tanatou lea ʼo nonofo ʼi te tahi ʼu potu ʼo te kele.