ʼE ʼOlo Te Famili Ki Esipito

MOLE kei matatāʼofi e Sosefo te ʼu meʼa ʼaē ʼi tona loto. Neʼe ina ʼui age ki tana ʼu tagata faifekau ke nātou mavae ʼi te kogafale. ʼI tana ʼāteaina pe ʼaē mo tona ʼu tēhina, neʼe tagi ia Sosefo. ʼE feala ke tou fakakaukauʼi te punamaʼuli ʼo tona ʼu tēhina, koteʼuhi neʼe mole nātou ʼiloʼi te tupuʼaga ʼo tana tagi. Pea neʼe ina ʼui age: ‘Ko ʼau ia Sosefo. ʼE kei maʼuli koa taku tāmai?’

ʼI te lahi ʼaupito ʼo te punamaʼuli ʼo tona ʼu tēhina neʼe mole kei feala ai hanatou palalau. Kua nātou matataku. Kae neʼe ʼui age e Sosefo: ‘Koutou ʼunuʼunu mai.’ ʼI tanatou ʼunuʼunu age, neʼe ina ʼui age: ‘Ko ʼau ia Sosefo, tokotou tēhina, ʼaē neʼe koutou fakatau ki Esipito.’

ʼE hoko atu te palalau ʼa Sosefo ʼo fēnei: ‘ ʼAua naʼa koutou ʼiʼita ʼi takotou fakatau ʼau. Neʼe ko te finegalo moʼoni ʼo te ʼAtua ke ʼau haʼu ki Esipito moʼo hāofaki ʼo te hahaʼi. Neʼe fakanofo ʼau e Falaone ke ʼau pule ki te fenua katoa. Koia ʼi te temi nei koutou foimo ʼolo ki taku tāmai pea koutou fakahā age ki ai te meʼa ʼaenī. Pea koutou ʼui age ki ai ke haʼu ʼo nofo ʼi henī.’

Pea neʼe fāʼufua ia Sosefo ki tona ʼu tēhina, pea neʼe ʼuma kia nātou fuli. ʼI te ʼiloʼi ʼaē e Falaone neʼe ʼōmai te ʼu tēhina ʼo Sosefo, neʼe ina ʼui age kia Sosefo: ‘Ke nātou toʼo he ʼu saliote pea ke nātou ʼolo ʼo ʼaumai tanatou tāmai pea mo tonatou ʼu famili pea ke nātou ʼōmai ki henī. ʼE ʼau foaki anai kia nātou te kele ʼaē ʼe lelei tokotahi ʼi te fenua ʼo Esipito.’

Pea neʼe nātou fai te meʼa ʼaia. ʼE feala ke koutou sio ʼi henī kia Sosefo ʼe faka felāveʼi ki tana tāmai ʼi tana kaku mai ki Esipito mo tona famili katoa.

Neʼe kaugamālie ʼaupito te famili ʼo Sakopo. ʼO fakatahitahi ia nātou fuli ʼe ko te toko 70 ʼaē neʼe ʼōmai ki Esipito, ko Sakopo pea mo tana fānau pea mo tona ʼu mokopuna. Kae neʼe ʼi ai foki mo tonatou ʼu ʼohoana pea lagi mo te ʼu hahaʼi faifekau e tokolahi. Ko nātou fuli ʼaia neʼe ʼōmai ki Esipito. Neʼe higoaʼi ia nātou ko te kau Iselaelite, koteʼuhi neʼe fetogi e te ʼAtua te higoa ʼo Sakopo ko Iselaele. Kua liliu te kau Iselaelite ko te hahaʼi makehe ʼaupito ʼa te ʼAtua, ohage ko te meʼa ka tou vakaʼi anai ki muli age.