Neʼe Nātou Fai Te Finegalo ʼo Te ʼAtua
Ko Te Loto Fakamolemole ʼe Ina Taki Ki Te Fakamaʼuli
KO TE ʼu foha e hogofulu ʼo Sakopo ʼaē neʼe nātou tutuʼu ia muʼa ʼo te ʼuluaki minisi ʼo Esipito, neʼe ʼi ai te meʼa neʼe nātou fai kae neʼe mole ʼiloʼi e he tahi. ʼI te ʼu taʼu ki muʼa atu, neʼe nātou fakatau tonatou tēhina ko Sosefo ke ʼalu ʼo maʼuli popūla, ʼo nātou fakatuʼutuʼu leva ke nātou tala ki tanatou tāmai, neʼe matehi Sosefo e te manu fekai.—Senesi 37:18-35.
Hili kiai taʼu e 20, neʼe hoko ai te hoge lahi, pea maʼua ai ki te ʼu tagata ʼaia ʼe toko hogofulu ke nātou ʼolo ki Esipito ʼo totogi ai hanatou fulumeto. Kae neʼe mole maui mālie tanatou fagona. He ko te ʼuluaki minisi ʼaē neʼe ina fakaʼaluʼalu te vaevae ʼo te meʼa kai, neʼe ina tukugakoviʼi nātou ʼo ina ʼui ʼe ko he ʼu malomu. Neʼe ina pilisoniʼi te tokotahi ia nātou pea ina fekauʼi tona ʼu tēhina ke nātou toe liliu kiō nātou ʼo ʼaumai tonatou kiʼi tēhina veliveli ko Pesamino. ʼI tanatou ʼosi fai te faʼahi ʼaia, neʼe fai ai leva e te ʼuluaki minisi hana fakatuʼutuʼu ke pilisoniʼi mo Pesamino.—Senesi 42:1–44:12.
Ko Suta, tahi ʼaia foha ʼo Sakopo, neʼe fakafeagai ki te faʼahi ʼaia. Neʼe ina ʼui fēnei, ‘kapau ʼe mole liliu Pesamino mo mātou, pea ʼe mate anai tamatou tāmai.’ Kae neʼe hoko ai leva te meʼa neʼe mole ʼamanaki kiai ia Suta pea mo tana ʼu kaugā fagona. ʼI tana ʼosi fakatotonu ke mavae fuli te hahaʼi ʼi te kogafale gata pe ki te ʼu foha ʼo Sakopo, neʼe tagi mālohi te ʼuluaki minisi. Pea ʼi te kua mālū ʼo tana mamahi, neʼe ina ʼui fēnei: “Ko ʼau Sosefo.”—Senesi 44:18–45:3.
ʼE Loto Fakamolemole Pea Mo Ina Faka ʼĀteaina Nātou
Neʼe fehuʼi fēnei age e Sosefo ki tona ʼu tēhina, “ ʼE kei maʼuli koa taku tāmai?” Neʼe mole gū he tahi. ʼE mahino papau ia, neʼe mole ʼiloʼi e te ʼu tēhina ʼa Sosefo pe koteā ʼaē neʼe tonu ke nātou ʼui age. Neʼe tonu koa ke nātou fiafia ʼaupito, peʼe nātou matataku? ʼE moʼoni, ko taʼu e 20 ʼi muʼa atu, neʼe nātou fakatau te tagata ʼaia ke ʼalu ʼo maʼuli popūla. Neʼe feala kia Sosefo ke ina pilisoniʼi nātou, mo fakaliliu ʼātea nātou ki tonatou fenua, peʼe ina matehi ia nātou! Koia ʼe tou mahino ai, ko te ʼu tēhina ʼo Sosefo “neʼe mole feala pe la hanatou tali kia ia, he neʼe nātou tuʼania ʼuhi ko ia.”—Senesi 45:3.
Neʼe foimo fakafimālieʼi atu aipe e Sosefo te ʼu tagata ʼaia. Neʼe ina ʼui fēnei age kia nātou, “Fakalelei age tokotou loto, kae koutou fakaōvi mai kia te ʼau.” Neʼe nātou fakalogo kia ia, pea neʼe ina ʼui age: “Ko ʼau Sosefo, tokotou tēhina, ʼaē neʼe koutou fakatau ki Esipito. ʼAua naʼa koutou lotomamahi peʼe koutou ʼiʼita he neʼe koutou fakatau ia ʼau ki henī; he neʼe fekauʼi ʼau e te ʼAtua ʼi muʼa ʼo koutou moʼo fakamaʼuli ʼo tatou.”—Senesi 45:4, 5.
Neʼe mole loto manavaʼofa feiā pe ia Sosefo ki tona ʼu tēhina. Kae neʼe kua sio ia ki te fakamoʼoni ʼo tanatou fakahemala. Ohage la, ʼi te temi ʼaē neʼe tukugakoviʼi ai e Sosefo tona ʼu tēhina ʼo ina ʼui ʼe ko he ʼu malomu, neʼe ina logo ki tanatou palalau ʼaenī: “ ʼE mahino papau ia, ʼe tou lākahala ʼo ʼuhiga mo totatou tēhina . . . Ko te tupuʼaga la ʼaia ʼo te hoko mai ʼo te mamahi ʼaenī kia tatou.” (Senesi 42:21) Tahi ʼaē meʼa, neʼe lotolelei ia Suta ke kaugana ia ia ka mole ko Pesamino, ke feala ke toe liliu te tama ʼaia ki tana tāmai.—Senesi 44:33, 34.
Koia, neʼe ʼi ai te tupuʼaga ʼo te loto fakamolemole ʼa Sosefo. ʼE mahino papau ia, neʼe mahino kia ia ʼe fakamaʼuli anai tona famili katoa mo kapau neʼe ina fai te faʼahi ʼaia. Koia la ʼaē, neʼe kole age ai e Sosefo ki tona ʼu tēhina ke nātou liliu ki tanatou tāmai ko Sakopo ʼo ʼui age kia ia: “Koʼeni te meʼa ʼaē neʼe ʼui e tou foha ko Sosefo: ‘Neʼe hinoʼi ʼau e te ʼAtua ke ʼau pule ki Esipito katoa. Hifo mai kia te ʼau. ʼAua naʼa ke tuai. Pea ʼe tonu anai ke ke nofo ʼi te fenua ʼo Koseni, pea ʼe tonu anai ke ke haga nofo mo ʼau, ia koe pea mo tou ʼu foha pea mo te ʼu foha ʼo tou ʼu foha, mo tau ʼu faga manu veliveli pea mo tau ʼu faga manu lalahi pea mo te ʼu meʼa fuli ʼaē ʼe ke maʼu. Pea ʼe ʼau foaki atu ai anai hau meʼa kai.’ ”—Senesi 45:9-11.
Ko Te Sosefo Lahi
ʼE feala ke fakahigoaʼi ia Sesu Kilisito ko te Sosefo Lahi, heʼe ʼi ai te ʼu faʼahi ʼe tatau ai te ʼu tagata ʼaia e lua. Ohage ko Sosefo, neʼe gaohi koviʼi Sesu e tona ʼu tēhina, te hōloga tonu ʼo Apalahamo. (Vakaʼi ia Gāue 2:14, 29, 37.) Kae ko te ʼu tagata ʼaia e lua, neʼe hoko kia nāua te fetogi maʼuhiga. ʼAki te temi, neʼe fetogi te ʼuhiga kaugana ʼo Sosefo he neʼe liliu ko te ʼuluaki minisi, te tuʼulaga ʼaē ʼe hoa kia Falaone. ʼO toe feiā pe, neʼe fakatuʼuake Sesu e Sehova mai te mate, pea ina hikihiki ia ia ki te tuʼulaga māʼoluga “ ʼi te faʼahi mataʼu ʼo te ʼAtua.”—Gāue 2:33; Filipe 2:9-11.
ʼI tona ʼuhiga ʼuluaki minisi, neʼe feala ke vaevae e Sosefo te meʼa kai ki te hahaʼi fuli ʼaē neʼe nātou ʼōmai ki Esipito ʼo totogi he fulumeto. Ia ʼaho nei, ko te Sosefo Lahi ʼe ʼi ai tana kaugana agatonu mo poto, pea ʼaki te tagata kaugana ʼaia ʼe ina tufa te meʼa kai fakalaumālie “ ʼi tona lakaga tonu.” (Mateo 24:45-47; Luka 12:42-44) ʼE mahino ia, ko nātou ʼaē ʼe nātou ʼōmai kia Sesu “ ʼe mole nātou toe fia kakai anai pea ʼe mole nātou toe fia ʼiʼinu anai . . . heʼe ko te Akeno, ʼaē ʼe ʼi te lotomalie ʼo te ʼafioʼaga, ʼe ina fafaga anai ia nātou, pea ʼe ina taki anai ia nātou ki he ʼu matapuna vai ʼo te maʼuli.”—Fakahā 7:16, 17.
Te Meʼa ʼAē ʼe Tou Ako Mai Ai
ʼE foaki mai e Sosefo he faʼifaʼitaki lelei ʼaupito ʼo ʼuhiga mo te loto fakamolemole. Kanapaula neʼe fakamāuʼi nātou e Sosefo ʼo mulimuli pe ki te lao, kanaʼauala neʼe ina fakatūʼa nātou ʼuhi ko tanatou fakatau ia ia ke ʼalu ʼo maʼuli popūla. ʼI te tahi faʼahi, neʼe feala pe ke galoʼi e Sosefo tanatou hala ʼi tana ʼofa ʼaē kia nātou. Kae neʼe mole ina fai te ʼu meʼa ʼaia. Neʼe ina ʼahiʼahiʼi tona ʼu tēhina ke ina ʼiloʼi ai pe kua nātou fakahemala. ʼOsi ʼaia, pea neʼe mahino kia ia te fakamalotoloto ʼo tonatou lotomamahi, pea neʼe ina fakamolemole age kia nātou.
ʼE feala ke tou faʼifaʼitakiʼi ia Sosefo. Ka agahala mai he tahi kia tatou pea mo ina fakahā kua fetogi tona loto, pea ʼe tonu ke tou fakamolemole kia ia. ʼE mahino ia, ʼe mole tonu ke tou tuku tatatou ʼofa ki he tahi ke ina fakakiviʼi tatou, ʼo mole kei feala hatatou sio ki he agahala mamafa. Kae ʼi te tahi faʼahi, ʼe mole tonu ke tou tuku totatou lotokovi ke ina fakakiviʼi tatou, ʼo mole kei feala hatatou sio kua fakahemala moʼoni. Koia, tou “haga fekātakiʼaki pea mo fefakamolemoleʼaki ʼaki he lotolelei.” (Kolose 3:13) Kapau ʼe tou fai te faʼahi ʼaia, pea ʼe tou faʼifaʼitaki anai ki totatou ʼAtua ko Sehova, ʼaē ʼe “fakamolemole gafua.”—Pesalemo 86:5; Mikea 7:18, 19.