ʼE Liliu Ia Sosue Ko Te Tagata Takitaki

ʼE FIA hū ia Moisese mo te kau Iselaelite ki Kanaane. Koia neʼe ina kole fēnei ai: ‘Faka fealagia mai, Sehova, ke ʼau fakalaka ʼi Solotane, pea ke ʼau sio ki te fenua lelei.’ Kae neʼe ʼui age e Sehova: ‘Kua feʼauga! ʼAua naʼa ke toe palalau mai ki te meʼa ʼaia!’ ʼE koutou ʼiloʼi koa la te tupuʼaga ʼo te palalau feiā ʼa Sehova?

Neʼe palalau feiā ʼuhi ko te meʼa ʼaē neʼe hoko ʼi te ʼaho ʼaē neʼe tāʼi ai e Moisese te maka. Tou manatuʼi, neʼe mole nā faka maʼuhigaʼi mo Alone ia Sehova. Neʼe mole nā ʼui age ki te hahaʼi neʼe ko Sehova ʼaē neʼe ina foaki age te vai mai te maka. Ko te tupuʼaga la ʼaia ʼo te ʼui age ʼaē e Sehova ʼe mole ina faka fealagia anai kia nāua ke nā hū ki Kanaane.

Koia hili kiai ni ʼu māhina ki te mate ʼo Alone, neʼe ʼui age e Sehova kia Moisese: ‘Toʼo ia Sosue, pea ke ʼaumai ia ia kia muʼa ʼo te pelepitelo ko Eleasale pea mo te hahaʼi. Pea ia muʼa ʼo nātou fuli ʼaia, ʼui age ki te hahaʼi fuli ʼe ko Sosue ko tonatou tagata takitaki foʼou.’ Neʼe mulimuli ia Moisese ki te meʼa ʼaē neʼe ʼui age e Sehova, ohage ko takotou sio kiai ʼi te paki.

Pea neʼe ʼui age e Sehova kia Sosue: ‘Ke ke mālohi, pea ʼaua naʼa ke mataku. ʼE ke takitaki anai te kau Iselaelite ki te fenua ʼo Kanaane ʼaē neʼe ʼau fakapapauʼi age kia nātou, pea ʼe ʼau nofo anai mo koe.’

Ki muli age neʼe ʼui e Sehova kia Moisese ke hake ki te tumutumu ʼo te Moʼuga ko Nepo ʼi te fenua ʼo Moape. ʼI te faʼahi ʼaia neʼe feala ai ke sio ia Moisese ki te fenua matalelei ʼo Kanaane ʼaē ʼe tuʼu ʼi tuʼa atu ʼo Solotane. Pea ʼui age e Sehova: ‘Koʼeni te fenua ʼaē neʼe ʼau fakapapau ʼe ʼau foaki anai ki te fānau ʼa Apalahamo, mo Isaake pea mo Sakopo. ʼE ʼau tuku ke ke sio kiai, kae ʼe mole ke hū anai kiai.’

Neʼe mate ia Moisese ʼi te tumutumu ʼo te Moʼuga ko Nepo. Neʼe ko tona taʼu 120. Neʼe kei mālohi, pea neʼe kei lelei tana sio. Neʼe lotomamahi ʼaupito te hahaʼi pea mo nātou fetāgihi ʼuhi ko te mate ʼo Moisese. Kae neʼe nātou fiafia ʼi tanatou maʼu tonatou tagata takitaki foʼou ʼaē ko Sosue.