Ko Te Hau Agalelei Fakaʼosi ʼi Iselaele

NEʼE ko te taʼu valu pe ʼaia ʼo Osiasi ʼi te temi ʼaē neʼe hau ai ki te ʼu telepi e lua ʼo te potu toga ʼo Iselaele. Neʼe kei tamasiʼi ia ʼi te temi ʼaē neʼe hau ai. Koia ʼi te kamata neʼe tokoni kia ia te ʼu tagata kua matutuʼa ʼo ʼuhiga mo te takitaki ʼo te fenua.

ʼI te taʼu fitu ʼo te nofo hau ʼa Sosiasi neʼe ina kamata kumi ai ia Sehova. Neʼe ina muliʼi te faʼifaʼitaki ʼo te ʼu hau agalelei ohage ko Tavite, mo Sosafate pea mo Esekiasi. Pea ʼi tona temi tūpulaga, neʼe fai e Sosiasi te ʼu meʼa ʼaki he lototoʼa.

Talu mai fualoa neʼe kua tokolahi ʼaupito te kau Iselaelite ʼaē kua nātou fai te ʼu aga ʼaē ʼe kovi. Neʼe nātou tauhi ki te ʼu ʼatua loi. Neʼe nātou tulolo ki te ʼu tamapua. Koia neʼe kamata tauʼi ai e Sosiasi mo tana ʼu tagata te tauhi hala ke pulihi ʼi te fenua. Neʼe ko he toe gāue, koteʼuhi neʼe lahi ʼaupito te hahaʼi ʼaē neʼe tauhi ki te ʼu ʼatua loi. ʼE koutou sio kia Sosiasi pea mo tana ʼu tagata ʼi te paki ʼe nātou maumauʼi te ʼu tamapua.

Ki muli mai, neʼe fekauʼi e Sosiasi te ʼu tagata e toko tolu ke nātou toe fakafoʼou te fale lotu ʼo Sehova. Neʼe tānaki paʼaga te hahaʼi pea neʼe nātou foaki ki te ʼu tagata ʼaia moʼo totogi ʼaki te gāue ʼaē ka nātou fai. Lolotoga tanatou gāue ʼi te fale lotu, neʼe maʼu ai e te pelepitelo lahi ko Ilikia te meʼa maʼuhiga ʼaupito. Neʼe ko te tohi ʼo te lao ʼa Sehova ʼaē neʼe tohi e Moisese kua fualoa ʼi muʼa atu. Neʼe kua fualoa te puli ʼo te tohi ʼaia.

Neʼe ʼave te tohi ʼaia kia Sosiasi, pea neʼe ina ʼui age ke lau age ʼi ʼona muʼa. Lolotoga tana fakalogo, neʼe tokagaʼi e Sosiasi ʼe mole mulimuli te hahaʼi ki te lao ʼa Sehova. ʼI te lahi ʼaupito ʼo tona lotomamahi ʼuhi ko te faʼahi ʼaia, neʼe ina haeʼi tona kofu, ohage pe ko takotou sio kiai ʼi te paki. Neʼe ina ʼui fēnei: ‘ ʼE ʼita ia Sehova kia tatou, koteʼuhi neʼe mole mulimuli tatatou ʼu kui ki te ʼu lao ʼaē ʼe tuʼu ʼi te tohi ʼaenī.’

Neʼe fakatotonu e Sosiasi ki te pelepitelo lahi ko Ilikia ke ina vakaʼi pe koteā te meʼa ʼaē ka fai e Sehova kia nātou. Neʼe ʼalu ia Ilikia ki te fafine ko Ulita, neʼe ko he fafine polofeta, pea neʼe ina fakalavelave age ki ai. Neʼe fakahā age e te fafine ʼaia te logo ʼaē neʼe haʼu mai ia Sehova ke ina ʼave kia Sosiasi: ‘ ʼE fakatūʼa anai ia Selusalemi pea mo te hahaʼi fuli, koteʼuhi neʼe nātou atolasio ki te ʼu ʼatua loi, pea kua lahi te agakovi ʼi te fenua. Kae ʼuhi ko koe Sosiasi, ʼi tau fai te meʼa ʼaē ʼe lelei, ʼe mole hoko anai te fakatūʼa ʼaia ʼi tou temi maʼuli.’