ʼE Feala Hakotou Mālo Logope Hakotou Faʼahiga Ako

KO NICHOLAS neʼe agatuʼu talu mai tana kei veliveli.a ʼAki te temi, ko tana ʼu fihifihia neʼe ina taki ia ia ki te fakaʼaogaʼi ʼo te toloke pea mo te ʼinu kava fakavale. ʼE fakamahino fēnei e Nicholas: “Neʼe lahi te ʼinu kava ʼo taku tāmai, pea neʼe lahi ʼaupito te ʼu mamahi ʼaē neʼe ina fakatupu kia ʼau pea mo toku tokolua.”

Ka kita sioʼi te ʼu mātuʼa ʼa Malinda, neʼe ko he ʼu hahaʼi lotu neʼe fakaʼapaʼapaʼi ʼi tonatou kolo. Pea neʼe nā tauhi mālohi ki te lotu. ʼI temi nei, ʼi tona taʼu 30, ʼe lāuga fēnei ia Malinda, “ko ʼihi faʼahi ʼo tanā tauhi neʼe mamafa kia ʼau pea neʼe maumau ai taku fakakaukau faka tamasiʼi.” ʼE ina toe ʼui fēnei: “Kua fualoa ʼaupito taku logoʼi ʼe mole he meʼa ke ʼau falala kiai pea ʼe mole ʼau ʼaoga ki he meʼa.”

Ko ai ʼaē ʼe mole ina lava tokagaʼi te tokolahi ʼo te tamaliki ʼaē neʼe maumauʼi tonatou maʼuli e te agamālohi, tonatou gaohi koviʼi, te līʼakina ʼo nātou e tanatou ʼu mātuʼa peʼe ko ʼihi faʼahi kovi? ʼE feala ke loloto te ʼu lavea ʼaē ʼe nofo ʼi te loto ʼa he tamasiʼi ʼe mole fiafia. Kae ʼe tonu koa ki te ʼu potu ʼaia ke nātou maumauʼi ʼo talu ai te maʼuli ʼo he tahi kua ina maʼu te moʼoni ʼo te Folafola ʼa te ʼAtua pea mo ina maʼu he fiafia lahi ʼaupito? Logope te faʼahiga ako neʼe fakahoko age kia nāua, ʼe feala koa kia Nicholas pea mo Malinda ke nā liliu ko he ʼu hahaʼi agatonu? Koutou tokagaʼi age muʼa te faʼifaʼitaki ʼo te Hau Sutea ko Sosiasi.

Ko He Faʼifaʼitaki Mai Te Tohi-Tapu

Neʼe nofo hau ia Sosiasi ʼi Suta lolotoga taʼu e 31 ʼi te fitu sēkulō ʼi muʼa ʼo totatou temi. (659-629 ʼi muʼa ʼo totatou temi) ʼI te temi ʼaē neʼe fakanofo hau ai ia Sosiasi, ʼi te ʼosi fakapogi ʼo tana tāmai, neʼe fakalialia ʼaupito te faʼahiga maʼuli ʼi Suta. Neʼe lahi ʼaupito ʼi Suta pea mo Selusalemi te hahaʼi ʼaē neʼe tauhi kia Paale pea mo nātou neʼe fai fuakava ʼaki te ʼatua Amonite ko Malakami. Neʼe ʼui e Sofonia, ko he polofeta ʼo te ʼAtua ʼi te temi ʼaia, ko te ʼu tama ʼaliki ʼo Suta neʼe ko “te ʼu laione gugulu,” pea ko ʼana tuʼi fakamāu neʼe ko “te ʼu lupo ʼo te pōʼuli.” Koia ʼaē neʼe mafola ai te agamālohi pea mo te aga fakakākā ʼi te fenua. Tokolahi neʼe nātou ʼui ʼi ʼonatou loto: “ ʼE mole fai anai e Sehova he meʼa ʼe lelei, pea ʼe mole ina fai anai he meʼa ʼe kovi.”—Sofonia 1:3–2:3; 3:1-5.

Neʼe feafeaʼi te faʼahiga pule ʼa Sosiasi? ʼE tohi fēnei e te tagata fai fakamatala faka Tohi-Tapu ko Esitalasi: “Neʼe fai [e Sosiasi] te meʼa ʼaē ʼe totonu kia mata ʼo Sehova pea neʼe haʼele ʼi te ala ʼo Tavite tana kui; pea neʼe mole fakatafa ki te toʼomataʼu peʼe ki te toʼohema.” (2 Fakamatala 34:1, 2) ʼE mahino ia neʼe fua lelei kia Sosiasi tana fai te meʼa ʼaē ʼe totonu kia mata ʼo te ʼAtua. Kae neʼe feafeaʼi koa tona maʼuli ʼi tana kei veliveli?

Neʼe Akoʼi Koa Pe Neʼe Gaohi Koviʼi?

ʼI te temi ʼaē neʼe tupu ai ia Sosiasi ʼi te taʼu 667 ʼi muʼa ʼo totatou temi, ko Amone tana tāmai neʼe taʼu 16, pea ko tana kui ko Manase neʼe hau ʼi Suta. Neʼe kau ia Manase ʼi te ʼu hau ʼaē neʼe agakovi ʼaupito tanatou puleʼi ia Suta. ʼI tana fakatuʼu te ʼu ʼaletale maʼa Paale, “neʼe lahi ʼaupito te ʼu meʼa kovi ʼaē neʼe ina fai ia mata ʼo Sehova.” Neʼe ina momoli tona ʼu foha ʼi te afi, mo fai te ʼu meʼa fakatemonio, mo ina fakaʼaogaʼi te meʼa fai fakakikite, mo ina fai te ʼu meʼa fai fakalauʼakau, pea neʼe lahi tana ligi toto. Neʼe toe ʼaumai foki e Manase ki te ʼapi ʼo Sehova te fakatātā neʼe togi ʼo te pou taputapu ʼaē neʼe ina fai. Neʼe ina fakaneke ia Suta pea mo Selusalemi “ke nātou kovi age ʼi te ʼu puleʼaga ʼaē neʼe fakaʼauha e Sehova ia muʼa ʼo te ʼu foha ʼo Iselaele.”—2 Fakamatala 33:1-9.

ʼI te kovi ʼaupito ʼo te aga ʼa Manase, neʼe tuku ai e Sehova ke ʼave ia ia ʼo pilisoniʼi ʼi Papiloni, ʼe kau ki te ʼu kolo ʼaliki ʼo te hau Asilia. ʼI tana nofo popūla neʼe fakahemala ia Manase, pea neʼe agavaivai ai ʼo ina kole kia Sehova ke fakamolemole age kia ia. Neʼe logoʼi e te ʼAtua tana kole pea neʼe ina toe fakanofo ia ia ki tona tuʼulaga hau ʼi Selusalemi. Pea neʼe fai ai e Manase te ʼu fetogi ʼo fua lelei.—2 Fakamatala 33:10-17.

Neʼe malave feafeaʼi te agakovi pea mo te fakahemala ʼa Manase ki tona foha ko Amone? Neʼe liliu ia ʼo agakovi age. ʼI te temi ʼaē neʼe fakahemala ai ia Manase pea mo tana faigaʼi ke ina fakamaʼa te fenua mai tana ʼu aga uli, neʼe mole mulimuli kiai ia Amone. ʼI tana heka ki te hekaʼaga hau ʼi tona taʼu 22, “neʼe fai [e Amone] te meʼa ʼaē ʼe kovi kia mata ʼo Sehova, ohage pe ko tona fai e tana tāmai ko Manase.” Neʼe mole agavaivai ifo ia muʼa ʼo Sehova, kae “neʼe faka lesili e Amone tana agakovi.” (2 Fakamatala 33:21-23) Neʼe kei taʼu ono ia Sosiasi ʼi te temi ʼaē neʼe liliu ai ia Amone ko te hau ʼo Suta. ʼE mahino ia neʼe fakamataku te temi ʼaē neʼe kei tamasiʼi ai ia Sosiasi!

Neʼe fakaʼosi te temi hau agakovi ʼo Amone hili kiai taʼu e lua, ʼi te temi ʼaē neʼe fakafeagai ki ai tana ʼu tagata kaugana pea mo nātou fakapogi ia ia. Kae neʼe matehi te ʼu fili ʼaia e te hahaʼi ʼo te fenua, pea neʼe nātou fakanofo hau tona foha, ia Sosiasi.—2 Fakamatala 33:24, 25.

Logope te ʼu ʼaluʼaga kovi ʼo te temi ʼaē neʼe kei tamasiʼi ai, neʼe fakatuʼutuʼu e Sosiasi ke ina fai te meʼa ʼaē ʼe lelei kia mata ʼo Sehova. Neʼe lelei tona temi hau koia ʼaē ʼe ʼui fēnei ai e te Tohi-Tapu: “ ʼI muʼa atu ʼo ia, neʼe mole ʼi ai he hau ohage ko ia, neʼe liliu mai kia Sehova ʼi tona loto katoa, mo tona nefesi katoa pea mo tona mālohi katoa, ʼo mulimuli ki te lao katoa ʼa Moisese; pea ʼi tana ʼosi mate, neʼe mole ʼi ai he tahi neʼe tatau mo ia.”—2 Hau 23:19-25.

Ko he faʼifaʼitaki lelei ʼaē neʼe tuku e Sosiasi kia nātou ʼaē neʼe nātou maʼuli mamahi ʼi te temi ʼaē neʼe kei nātou liliki ai! Koteā ʼaē ʼe tou ako mai tana faʼifaʼitaki? Koteā ʼaē neʼe tokoni kia Sosiasi ke ina filifili te meʼa ʼaē ʼe totonu pea mo haga fai te meʼa ʼaia?

Koutou Faiga Ke Koutou ʼIloʼi Ia Sehova

Ko te faʼahi lelei ʼaē neʼe tokoni kia Sosiasi ʼi tana kei veliveli, neʼe ko te fakahemala ʼo tana kui ko Manase. ʼE mole fakahā mai e te Tohi-Tapu pe neʼe feafeaʼi tana ʼu felogoi, pe neʼe taʼu fia ia Sosiasi ʼi te temi ʼaē neʼe fetogi ai e Manase tana aga. Mai te ʼaluʼaga ʼaē neʼe mālohi te ʼu vāhaʼa faka famili ʼa te kau Sutea, koia neʼe lagi faigaʼi e Manase ke ina puipui tona mokopuna mai te ʼu aga fakahehema ʼi ʼona ʼu tafaʼaki, ʼo ina fakahū ki te loto ʼo tona mokopuna he fakaʼapaʼapa ki te ʼAtua moʼoni ko Sehova, pea mo tana folafola. Ei neʼe fua lelei te ʼu pulapula ʼo te moʼoni ʼaē neʼe to e Manase ki te loto ʼo Sosiasi, ʼo lagi fakatahi kiai mo tana ʼu aga lelei. ʼI te valu taʼu ʼo tana nofo hau ki Suta, neʼe faigaʼi e Sosiasi, ʼaē kua taʼu 15, ke ina ʼiloʼi pea mo fai te finegalo ʼo Sehova.—2 Fakamatala 34:1-3.

Lagi ko te felogoi fakalaumālie ʼaē neʼe maʼu e ʼihi hahaʼi ʼi tanatou kei liliki, neʼe ko honatou kāiga, peʼe ko he tahi ʼe nātou feʼiloʼiʼaki, peʼe ko he vāhaʼa fale. Kae kapau ʼe fakavai te pulapula ʼaia neʼe to, ʼe feala pe ke fua ki muli age. Ko Malinda, ʼaē neʼe tou palalau ki ai ʼi te kamata, neʼe ʼi ai te tagata kua matuʼa pea mo agalelei neʼe vāhaʼa fale mo ia neʼe ina ʼaumai tuʼumaʼu Te Tule Leʼo mo te Réveillez-vous ! ki tona ʼapi. ʼI tana manatuʼi te tagata ʼaia, ʼe ina ʼui fēnei: “Ko te meʼa ʼaē neʼe malave tāfito kia ʼau, ko tana mole kau ki te ʼu lafeti. Neʼe maʼuhiga kia ʼau koteʼuhi ko te Halloween pea mo ʼihi atu lafeti, neʼe ko he ʼu lakaga ʼaia neʼe fakahoko e taku ʼu mātuʼa te ʼu toʼotoʼoga ʼi tanā tauhi lotu.” Hili kiai te ʼu taʼu e hogofulu, neʼe fakaafe ia Malinda e tona kaumeʼa ke kau ki he fono faka Kilisitiano ʼi te Fale ʼo Te Puleʼaga ʼo te kau Fakamoʼoni ʼa Sehova, pea neʼe ina manatuʼi te tagata ʼaia ʼo tona vāhaʼa fale ʼo ina tali ai te fakaafe ʼaia. Neʼe tokoni te faʼahi ʼaia kia ia ki tana kumi ʼo te moʼoni.

Koutou Agavaivai Ia Muʼa ʼo Te ʼAtua

Neʼe fakaʼiloga te temi hau ʼo Sosiasi ʼaki te ʼu fetogi faka lotu maʼuhiga ʼo te fenua ʼo Suta. ʼI tana ʼosi faigaʼi ia taʼu e ono ke ina molehi te tauhi tamapua pea mo te fakamaʼa ʼo te fenua ʼo Suta, neʼe toe gaohi leva e Sosiasi te ʼapi ʼo Sehova. ʼI te lolotoga fai ʼo te gāue ʼaia, neʼe maʼu te meʼa maʼuhiga e te Pelepitelo Lahi ko Ilikia! Neʼe ina maʼu “te tohi ʼo te lao ʼa Sehova.” Neʼe ʼavage e Ilikia te tohi maʼuhiga ʼaia kia Safani te sikalaipe, pea neʼe ina fakamatala age ki te hau te meʼa ʼaē neʼe hoko. ʼAki te ʼu meʼa ʼaia neʼe hoko, neʼe tupu ai koa he fialahi ʼa te hau ko Sosiasi ʼaē neʼe taʼu 25?—2 Fakamatala 34:3-18.

ʼE tohi fēnei e Esitalasi, “ ʼi te logo ʼa te hau ki te ʼu folafola ʼa te lao, neʼe ina haeʼi atu aipe tona kofu.” Neʼe ko he fakaʼiloga ʼaia ʼo tona lotomamahi koteʼuhi neʼe mahino kia ia neʼe mole he tahi ʼi tana ʼu kui neʼe ina fakahoko fuli te ʼu fakatotonu ʼa te ʼAtua. Neʼe ko he fakaʼiloga moʼoni ʼo tana agavaivai! Neʼe fekauʼi atu aipe e te hau he ʼu tagata e toko nima ke nātou ʼolo ki te fafine polofeta ko Ulita ke ina fakafehuʼi ia Sehova. Neʼe toe liliu mai te ʼu tagata ʼaia mo te fakamatala ʼaenī: ‘ ʼE hoko anai he malaʼia ʼuhi ko te talagataʼa ʼa te hahaʼi ki te Lao ʼa Sehova. Kae ʼuhi ko koe, Hau ko Sosiasi, neʼe ke agavaivai, koia ʼe ʼavaifo anai koe ʼi te tokalelei pea ʼe mole ke sio anai ki te malaʼia.’ (2 Fakamatala 34:19-28) Neʼe fiafia ia Sehova ʼi te aga ʼa Sosiasi.

Logope he faʼahiga meʼa neʼe lagi hoko kia tatou ʼi tatatou kei veliveli, kae ʼe feala mo tatou ke tou agavaivai ia muʼa ʼo te ʼAtua moʼoni, ko Sehova, pea mo fakahā he aga fakaʼapaʼapa kia te ia mo tana Folafola, te Tohi-Tapu. Ko Nicholas, ʼaē neʼe tou palalau ki ai ʼi te kamataʼaga ʼo te alatike, neʼe ina fai te faʼahi ʼaia. ʼE ina ʼui fēnei: “Logope la neʼe kovi ʼaupito te ʼaluʼaga ʼo toku maʼuli ʼuhi ko taku fakaʼaogaʼi te toloke pea mo te lahi ʼo taku ʼinu kava, kae neʼe ʼau fia ʼiloʼi te Tohi-Tapu pea mo maʼu he ʼuhiga ʼo toku maʼuli. Moʼo fakaʼosi, neʼe ʼau felāveʼi mo te kau Fakamoʼoni ʼa Sehova, ʼo ʼau fetogi toku faʼahiga maʼuli, pea neʼe ʼau hū ki te moʼoni.” Ei, ʼe feala ke tou maʼu he aga fakaʼapaʼapa ki te ʼAtua mo tana Folafola, logope he faʼahiga meʼa ʼe hoko mai kia tatou.

Koutou Fakaʼaogaʼi Te Fakatuʼutuʼu ʼa Sehova

Neʼe toe fakaʼapaʼapa lahi ia Sosiasi ki te kau polofeta ʼa Sehova. Neʼe mole kumi tokoni pe ki te fafine polofeta ko Ulita, kae neʼe mulimuli tāfito ki te ʼu fakatuʼutuʼu ʼa te ʼu polofeta ʼo tona temi. Ohage la, ko Selemia pea mo Sofonia neʼe nā maʼumaʼua ki te tauteaʼi ʼo te tauhi tamapua ʼaē neʼe fai ʼi Suta. ʼE mahino ia neʼe tokagaʼi e Sosiasi te logo ʼaē neʼe nā tala, koia ʼaē neʼe fakafeagai mālohi ai ki te tauhi hala!—Selemia 1:1, 2; 3:6-10; Sofonia 1:1-6.

Ko te “pule,” ia Sesu Kilisito, neʼe ina hinoʼi te kiʼi kūtuga ʼo tana kau tisipulo fakanofo—“te tagata kaugana agatonu mo poto”—ke ina foaki te meʼa fakalaumālie ʼi tona temi totonu. (Mateo 24:45-47, MN ) ʼAki te ʼu tohi faka Tohi-Tapu pea mo te ʼu fakatuʼutuʼu ʼo te kokelekasio, ʼe fakatokaga mai e te kalasi ʼo te tagata kaugana te ʼu fua lelei ʼaē ʼe tou maʼu mo kapau ʼe tou fakalogo ki te ʼu tokoni ʼo te Tohi-Tapu, pea mo ʼihi fakatuʼutuʼu ʼaoga ki tona faʼahiga maʼuliʼi ʼi totatou maʼuli ʼo te ʼaho fuli. Koia ʼe ʼaoga ʼaupito ke tou fakaʼaogaʼi te fakatuʼutuʼu ʼa Sehova moʼo tokoni kia tatou ke toʼo te ʼu aga kovi ʼaē kua tauʼaka ia tatou! Talu mai tana kei veliveli, mo te fehiʼa ʼa Nicholas kia nātou fuli ʼe ʼi ai tonatou tuʼulaga pule. ʼO hoko ai mo tana ako te moʼoni, ʼaki tona vaivaiʼaga ʼaia neʼe mole feala hana tauhi katoa kia Sehova. Neʼe mole ko he meʼa faigafua kia ia hana fetogi tana aga ʼaia. Kae ʼaki te temi neʼe ina lavaʼi. ʼO feafeaʼi? ʼE fakamahino fēnei e Nicholas, “ ʼaki te tokoni ʼa te ʼu tagata ʼāfea lotomahino e lua, neʼe ʼau fakamoʼoni ai ki toku vaivaiʼaga ʼaia pea neʼe ʼau kamata maʼuliʼi te ʼu tokoni faka Tohi-Tapu ʼaē neʼe nā fai mai ʼaki te ʼofa.” ʼE ina toe ʼui fēnei: “Logope la ʼe kei ʼau ʼita ʼi ʼihi temi, kae kua ʼau lolomi taku agatuʼu.”

Neʼe kumi tokoni mo Malinda ki te kau tagata ʼāfea, ʼi te temi ʼaē neʼe ʼi ai te ʼu tonu maʼuhiga neʼe tonu ke ina fai ʼi tona maʼuli. ʼO ʼuhiga mo tana mole falala ki he meʼa pea mo tana meʼa noaʼi ia ia, neʼe ina maʼu tāfito te ʼu alatike maʼuhiga ʼi Te Tule Leʼo pea mo te Réveillez-vous ! ʼE ina ʼui fēnei: “ ʼI ʼihi temi ʼe ʼi ai pe he kiʼi koga veliveli, peʼe ko he palakalafe peʼe ko he laini pe e tahi ʼi te alatike, ʼe malave ia ʼau. Kua hili kiai taʼu e hiva, neʼe ʼau kamata tānaki te ʼu alatike feiā ki te kaupepa ke feala haku maʼu gafua.” ʼI te temi nei, ko ʼana ʼu kaupepa e tolu ʼe maʼu ai te ʼu alatike e 400!

ʼE mole tonu ki te hahaʼi ke nātou maʼuli mamahi ʼuhi he neʼe mole lelei tonatou maʼuli faka famili. ʼAki te tokoni ʼa Sehova ʼe feala pe ke nātou mālo ʼi te faʼahi fakalaumālie. Ohage pe ko he tahi neʼe akoʼi lelei, ʼe mole faka ʼuhiga leva ʼe nofo agatonu anai ia ia, ʼo toe feiā ki he tahi neʼe maʼuli mamahi ʼi te temi ʼaē neʼe kei tamasiʼi ai, kae ʼe feala ke liliu ko he tahi ʼe manavasiʼi ki te ʼAtua.

ʼI te maʼu ʼo te tohi ʼo te Lao lolotoga te temi ʼaē neʼe toe gaohi ai te fale lotu, ‘neʼe fakahoko [e Sosiasi] te fuakava ia muʼa ʼo Sehova, ke mulimuli kia Sehova pea mo fakalogo ki ai ʼaki tona loto katoa pea mo tona nefesi katoa.’ (2 Fakamatala 34:31) Pea neʼe mulimuli lelei ki tana fakapapau ʼaia ʼo kaku ki tona mate. ʼO feiā mo Malinda mo Nicholas, ʼe nā fia nonofo agatonu kia Sehova ʼAtua pea mo mālo ohage ko he ʼu hahaʼi ʼe nonofo agatonu. ʼOfa pe mo koutou ke koutou pipiki maʼu ki te ʼAtua pea mo tauhi agatonu kia te ia. Tou falala ʼe lava lelei anai te faʼahi ʼaia, koteʼuhi ʼe fakapapauʼi fēnei mai e Sehova: “ ʼAua naʼa ke mataku, heʼe ʼau nofo mo koe. ʼAua naʼa ke sio ki hē mo hē, koteʼuhi ko ʼau tou ʼAtua. ʼE ʼau fakaloto mālohiʼi anai koe. ʼE ʼau tokoni moʼoni anai kia te koe. Ei, ʼe ʼau puke mālohi anai koe ʼaki toku nima mataʼu ʼo te faitotonu.”—Isaia 41:10, 13.

[Kiʼi nota]

[Paki ʼo te pasina 26]

Logope tona maʼuli fakamataku ʼi tana kei veliveli, kae neʼe faiga ia Sosiasi ke ina ʼiloʼi ia Sehova pea neʼe maʼuli fīmālie

[Paki ʼo te pasina 28]

ʼE feala ke tokoni atu te kau tagata ʼāfea ke koutou tauʼi he aga ʼe kovi kua tauʼaka loloto

[Paki ʼo te pasina 28]

ʼE feala ke tokoni atu “Te Tule Leʼo” pea mo te “Réveillez-vous !” ke koutou taupau takotou agatonu