ʼI Te Moʼuga ʼo Oliveto

KOʼENI ia Sesu ʼi te Moʼuga ʼo Oliveto. Ko te ʼu tagata e toko fā ʼaē ʼe nonofo mo ia, ʼe ko tana ʼu ʼapositolo. Ko te tautēhina ko Atelea pea mo Petelo, pea mo te tautēhina ko Sake pea mo Soane. ʼE koutou sio ki muli atu, neʼe ko te fale lotu ʼo te ʼAtua ʼaē ʼi Selusalemi.

Kua hili ʼaho e lua ki te ʼaho ʼaē neʼe hū ai ia Sesu ki Selusalemi ʼi te ʼuhiʼi asino. Neʼe ko te Feliatolu, pea neʼe ʼalu ia Sesu ki te fale lotu ka kei uhu. Neʼe faiga te ʼu pelepitelo ke nātou puke ia Sesu ʼo tāmateʼi. Kae neʼe nātou matataku ʼi te fai ʼo te meʼa ʼaia koteʼuhi neʼe ʼofa te hahaʼi kia Sesu.

Neʼe fakahigoaʼi fēnei e Sesu te ʼu takitaki lotu: ‘ ʼAē faga gata pea mo faga ʼuhiʼi gata!’ Pea neʼe ʼui age e Sesu ʼe fakatūʼa anai ia nātou e te ʼAtua ʼuhi ko te ʼu agakovi ʼaē neʼe nātou fai. ʼI te ʼosi hake ʼa Sesu ki te Moʼuga ʼo Oliveto, neʼe kamata fakafehuʼi ia ia e tana ʼu ʼapositolo e toko fā. ʼE koutou ʼiloʼi koa pe koteā te meʼa ʼaē neʼe nātou fehuʼi age kia Sesu?

Neʼe fakafehuʼi ia ia e te ʼu ʼapositolo ʼo ʼuhiga mo te ka haʼu. Neʼe nātou ʼiloʼi ʼe fakagata anai e Sesu te ʼu agakovi fuli ʼaē ʼe hoko ʼi te kele. Kae neʼe nātou fia ʼiloʼi pe ko te temi fea ʼaē ka ina fakahoko ai te faʼahi ʼaia. Ko te temi fea ʼaē ka haʼu ai ia Sesu ʼo pule ʼi tona ʼuhiga Hau?

Neʼe ʼiloʼi e Sesu, ko tana ʼu tisipulo ʼi te kele, ʼe mole feala anai ke nātou sio kia te ia ʼi tana toe liliu mai. Koteʼuhi ʼe nofo anai ia ʼi selo, pea ʼe mole feala anai tanatou sio kia te ia. Koia neʼe tala ai e Sesu ki tana ʼu ʼapositolo te ʼu meʼa ʼaē ka hoko anai ʼi te kele mokā Hau anai ʼi selo. Koteā koa te ʼu meʼa ʼaia?

Neʼe ʼui e Sesu ʼe hoko anai te ʼu tau lahi, ko te tokolahi ʼe nātou mahahaki anai pea mo pakupaku, ʼe ʼāsili kovi anai te fai fakapō, pea ʼe ʼi ai anai mo te ʼu mafuike lalahi. Tahi ʼaē meʼa neʼe ʼui e Sesu ʼe faka mafola anai te logo lelei ʼo te puleʼaga ʼo te ʼAtua ʼi te ʼu potu fuli ʼo te kele. ʼE tou sio koa ki te ʼu meʼa ʼaia ʼi totatou temi? Ei! Pea ʼe feala ke tou tui papau kua Hau ia Sesu ʼi selo. Kua vave aʼu mai te temi ʼaē ka ina pulihi ai te ʼu meʼa kovi fuli pe ʼaē ʼe hoko ʼi te kele.