ʼI Te Kogafale ʼAē Neʼe Fakamaʼumaʼu

ʼI TE ʼosi mavae ʼa Petelo pea mo Soane ʼi te falemaka ʼaē neʼe tuku ai te sino ʼo Sesu, neʼe nofo tokotahi ia Malia. Neʼe tagi, pea neʼe fakasiosio ki te loto falemaka, ohage ko te meʼa neʼe tou sio kiai ʼi te paki ʼo te pasina ʼi muʼa atu. Neʼe sio ia ki te ʼu ʼaselo e toko lua! Neʼe nā fehuʼi age ki ai: ‘He koʼe ʼe ke tagi?’

Neʼe tali age e Malia: ‘Neʼe nātou toʼo toku ʼAliki pea ʼe mole ʼau ʼiloʼi pe neʼe nātou ʼave kifea.’ Pea neʼe maliu age ia Malia pea sio ia ki te tagata, ʼo ina fehuʼi age ki ai: ‘Ko ai ʼaē ʼe ke kumi?’

Neʼe manatu ia Malia ʼe ko te tagata gaohi ʼōloto, pea neʼe lagi ko ia ʼaē neʼe ina ʼave te sino ʼo Sesu. Koia neʼe ina ʼui age: ‘Kapau neʼe ke ʼave ia ia, pea ke fakahā mai pe neʼe ke ʼave ia ia kifea.’ Kae ko te tagata ʼaia neʼe ko Sesu totonu. Neʼe ina kofuʼi te tahi sino fakatagata ʼo mole ʼiloʼi ai ia ia e Malia. Kae ʼi tana toʼo age te higoa ʼo Malia, neʼe ʼiloʼi ai e Malia ʼe ko Sesu. Pea neʼe lele ai ʼo ina ʼui age fēnei ki te ʼu tisipulo: ‘Neʼe ʼau sio ki te ʼAliki!’

Ki muli age ʼi te ʼaho pe ʼaia, ʼi te lolotoga fagona ʼa te ʼu tisipulo e toko lua ki te kolo ko Emausi, neʼe kaugā fagona te tagata mo nāua. Neʼe lotomamahi te ʼu tisipulo ʼaia heʼe kua matehi ia Sesu. Kae ʼi tanatou haʼele, neʼe lahi te ʼu meʼa neʼe fakamahino age kia nāua e te tagata ʼaki te Tohi-Tapu moʼo fakafimālieʼi tonā loto. Pea ʼi te temi ʼaē neʼe nātou kakai ai, neʼe hoki ʼiloʼi ai e te ʼu tisipulo ko te tagata ʼaia ʼe ko Sesu. Pea neʼe puli atu aipe ia Sesu, pea neʼe ʼolo fakavilivili atu aipe te ʼu tisipulo ʼaia e toko lua ki Selusalemi ʼo nā tala ki te ʼu tisipulo neʼe nā sio ki ai.

ʼI te lolotoga ʼo te temi ʼaia, neʼe toe hā foki ia Sesu kia Petelo. Ko ʼihi neʼe nātou fiafia ʼi tanatou logo ki te meʼa ʼaia. ʼI te tau atu ʼa te ʼu tisipulo ʼaia e toko lua ki Selusalemi pea nā maʼu atu te kau ʼapositolo, pea nā fakamatala age kia nātou te hā age ʼa Sesu kia nāua ʼi te ala. Pea ʼi tanā lolotoga fakamatala te ʼu meʼa ʼaia, ʼe koutou ʼiloʼi pe koteā te meʼa fakapunamaʼuli ʼaē neʼe hoko?

ʼE koutou sio ki te paki. Neʼe hā ia Sesu ʼi te kogafale, logope la neʼe fakamaʼu te matapā. Neʼe fiafia ʼaupito te ʼu tisipulo! Neʼe mole koa la ko he ʼaho fakafiafia ʼaia? ʼE feala koa hakotou fakahā mai pe neʼe hā tuʼa fia ia Sesu ki tana ʼu tisipulo? Neʼe hā tuʼa nima koa?

Neʼe mole nofo te ʼapositolo ko Tomasi mo nātou ʼi te temi ʼaia ʼaē neʼe hā ai ia Sesu. Pea neʼe tala age e te ʼu tisipulo ki ai: ‘Neʼe mātou sio ki te ʼAliki!’ Kae neʼe ʼui age e Tomasi ʼe hoki tui anai mo kapau ʼe sio tonu kia Sesu. Kae ʼi te ʼosi ʼo ʼaho e valu pea fakatahitahi te ʼu tisipulo ʼi te kogafale fata, pea ʼi te temi ʼaia neʼe nofo ai ia Tomasi mo nātou. Fokifā pe kua hā age ia Sesu ʼi te kogafale ʼaia, pea neʼe hoki tui ai leva ia Tomasi.