Kapite 128

Kua Maʼuli Ia Sesu!

ʼI TANA sio ʼaē ʼe gaʼasi te falemaka ʼo Sesu, neʼe lele ia Malia Maketalena ʼo fakahā kia Petelo pea mo Soane. Kae ko te ʼu fafine ʼaē, neʼe nonofo ōvi pe nātou ʼi te falemaka. Mole tuai, mo te hā age ʼa te ʼaselo pea ina fakaafe nātou ke nātou hū ki loto.

ʼI te loto falemaka, neʼe sisio te ʼu fafine ki te tahi ʼaselo, pea ʼui age e te tahi ʼaselo: “ ʼAua naʼa koulua manavasiʼi, heʼe ʼau ʼiloʼi e koulua kumi ia Sesu, ʼaē neʼe haʼi ki te pou. ʼE mole ʼi henī ia, heʼe kua fakatuʼuake ia, ohage pe ko te meʼa ʼaē neʼe ina ʼui. Koulua ʼōmai ʼo sisio ki te potu ʼaē neʼe takoto ai. Pea ke koulua foimo ʼolo ʼo ʼui age ki ʼana tisipulo kua fakatuʼuake mai te kau mate.” Pea, ʼaki te manavasiʼi mo te fiafia lahi, neʼe feleleʼi ai foki te ʼu fafine ʼaia.

Pea ʼi te moʼi temi pe ʼaia, ʼi te maʼu ʼaē e Malia ia Petelo pea mo Soane neʼe ina tala age kia nāua: “Kua ʼosi toʼo te ʼAliki ʼi te falemaka fakamanatu, pea ʼe mole mātou ʼiloʼi pe neʼe ʼave kifea.” Pea feleleʼi atu aipe te ʼu ʼapositolo toko lua. Ko Soane ʼaē ʼe lele vave — heʼe lagi ʼe kei tūpulaga age ia nāua — neʼe ʼuluaki kaku ia ki te falemaka, kae kua ʼosi mavae te ʼu fafine mai te koga meʼa ʼaia; ʼe mole kei ʼi ai he tahi ʼi ʼona tafaʼaki. Pea fakasiosio atu ia Soane ʼo vakaʼi te loto falemaka, ʼo sio atu ia ki te ʼu moʼi takatakaiga kie, kae neʼe nofo ia ʼi tuʼa.

Kae ʼe kaku atu pe ia Petelo ki te hū ki te loto falemaka. ʼO sio ia ki te ʼu moʼi takatakaiga kie ʼe hilihili ʼi ai, ʼo feiā foki mo te kie ʼaē neʼe kofukofu ʼaki te ʼulu ʼo Sesu, pea kua pelupelu ʼo tuku ʼi te tahi faʼahi. ʼI te temi leva ʼaia, kua hū mo Soane ki te falemaka, pea tui ai ki te meʼa ʼaē neʼe tala age e Malia. Kae ko Petelo mo Soane neʼe mole nā mahino kua fakatuʼuake ia Sesu, logope la tana kua tautau fakahā age kia nāua ʼe hoko anai te faʼahi ʼaia. ʼI tanā lotolotolua, neʼe nā ʼolo ai ki tona ʼu ʼapi, ʼo nā tuku ai ia Malia ʼaē neʼe toe liliu age ki te falemaka.

Kae ʼi te temi ʼaia, neʼe ʼolo fakavilivili te ʼu fafine ʼaē ʼo fakahā ki te kau tisipulo ko Sesu kua fakatuʼuake, ohage ko tona fakatotonu age kia nāua e te ʼu ʼaselo. ʼI te lolotoga ʼo tanā feleleʼi ʼi tonā mālohi katoa, neʼe haʼu ia Sesu ʼo faka felāveʼi mai kia nāua pea ina ʼui age: “Mālo”! Neʼe nā tō ifo ki ʼona vaʼe, ʼo nā hu kia te ia. ʼOsi ʼaia pea ʼui maʼa Sesu kia nāua: “ ʼAua naʼa koulua manavasiʼi! Koulua ʼolo ʼo tala te logo ki ʼoku tēhina, ke nātou ʼolo ai ki Kalilea; pea ʼe nātou sisio anai ʼi ai kia te ʼau.”

ʼI te kiʼi moʼi temi ki muʼa atu, ʼi te temi ʼaē neʼe hoko ai te mafuike pea mo te hā ʼo te ʼu ʼaselo, ko te kau solia ʼaē neʼe leʼo neʼe nātou matataku pea neʼe kua nātou liliu ohage ko he kau mamate. ʼI tanatou toe ōfo ake, neʼe nātou ʼolo ki te kolo pea nātou fakahā ki te kau pelepitelo pule te meʼa ʼaē neʼe hoko. ʼI te ʼosi fono ʼa te kau “tagata ʼāfea” ʼo te kau Sutea, neʼe fai ai te tonu ʼaenī: ʼe tonu ke faigaʼi ke pulihi noaʼi te faʼahi ʼaia ʼo totogi te kau solia. Neʼe fai age kia nātou te fakatotonu ʼaenī: “Koutou tala fēnei: ‘Neʼe haʼu ʼana tisipulo ʼi te pōʼuli pea neʼe nātou kaihaʼa ia ia, kae lolotoga tamatou momoe.’ ”

Kae, ʼi te feala ʼaē ke matehi he tagata solia loma ʼi hana māʼumoea ʼi te potu ʼaē ʼe leʼo ai, neʼe fai age e te kau pelepitelo te fakapapau ʼaenī: “Pea kapau leva ʼe aʼu te meʼa nei ki te ʼu taliga ʼo te kovana, pea ʼe mātou fakalotoʼi anai ia [ia] pea ʼe mātou hāofaki anai koutou mai he ʼu tūʼa.” ʼI te maʼuhiga ʼo te paʼaga ʼo te totogi ʼaē neʼe foaki, neʼe mulimuli te kau solia ki te ʼu fakatotonu ʼaia. Koia ko te logo loi ʼaē ʼo ʼuhiga mo te kaihaʼa ʼo te sino ʼo Sesu neʼe lahi ʼaupito tona mafola ʼi te kau Sutea.

Ko Malia Maketalena ʼaē neʼe nofo ʼi te falemaka, neʼe mole kei ina faʼa kātakiʼi tona lotomamahi. ʼE ʼifea ʼapē koa ia Sesu? Neʼe falele atu ki muʼa ʼo fakasiosio ki te loto falemaka, pea sio atu ia ki te ʼu ʼaselo e lua ʼaē ʼe teu hina, kua toe hā mai! Ko te tahi ʼe heka ʼi te ʼulu pea ko te tahi ʼi te ʼu vaʼe ʼo te faʼahi ʼaē neʼe fakatakoto ai te sino ʼo Sesu. “Fafine, he koʼe ʼe ke tagi?” Ko tanā fehuʼi age ʼaia.

“Kua ʼave toku ʼAliki, ko te tali age ʼaia ʼa Malia, pea ʼe mole ʼau ʼiloʼi pe neʼe ʼave kifea.” ʼOsi ʼaia pea maliu mai pea sio ia ki te tagata ʼe ina toe fai age te fehuʼi: “Fafine, he koʼe ʼe ke tagi!” Kae ko ia ʼaia neʼe ina toe ʼui age: “Ko ai ʼaē ʼe ke kumi?”

ʼI tana manatu ʼaē ko te tagata taupau ʼōloto ʼaē ʼe palalau mo ia, neʼe ina ʼui age ki ai: “ ʼAliki, kapau neʼe ke ʼave ia ia, fakahā mai kia te ʼau pe neʼe ke tuku kifea pea ʼe ʼau toʼo anai ia ia.”

“Malia!” ko te palalau leʼolahi age ʼaia ʼa te tagata. ʼI te temi pe ʼaia, ʼi te agaaga ʼo tana faʼahiga palalau ʼaē kua māhani ki ai, neʼe ina ʼiloʼi atu aipe ko Sesu pea neʼe palalau leʼolahi ia ʼo fēnei: “Rabbouni! ” (ko tona faka ʼuhiga ko te “Faiako! ”). ʼI te lahi ʼo tona fiafia, neʼe tapiki ia kia te ia. Kae neʼe tala age e Sesu ki ai: “Tuku tau tapiki mai kia te ʼau. Heʼe mole heʼeki ʼau hake ki taku Tāmai. Kae ʼalu ki toku ʼu tēhina pea ke ʼui age kia nātou: ‘ ʼE ʼau hake ki taku Tāmai pea ko takotou Tāmai, pea ki toku ʼAtua pea ko tokotou ʼAtua.’ ”

Koʼena leva mo Malia kua lele mo ia ki te koga meʼa ʼaē ʼe fakatahitahi ai te kau ʼapositolo pea mo te kau tisipulo. ʼO ina toe fakakau atu mo tana fakamoʼoni ki te ʼu fakamoʼoni ʼaē neʼe fai e te ʼu fafine ʼaē, ʼo nātou tala neʼe nātou sisio kia Sesu kua fakatuʼuake. Logope la te ʼu logo ʼaia, ohage pe ko tanatou mole tui ki te ʼu fafine ʼaē, ʼe ʼiloga mai ia neʼe mole tui te ʼu tagata ʼaia kia Malia. Mateo 28:3-15; Maleko 16:5-8; Luka 24:4-12; Soane 20:2-18.

▪ ʼI tana maʼu atu ʼaē ʼe gaʼasi te falemaka, koteā te meʼa neʼe fai e Malia Maketalena, pea koteā te meʼa neʼe hoko ki te ʼu fafine ʼaē?

▪ Neʼe feafeaʼi te aga ʼa Petelo pea mo Soane ʼi tana maʼu atu ʼaē ʼe gaʼasi te falemaka?

▪ Ko ai ʼaē neʼe felāveʼi mo te ʼu fafine ʼi tanā ʼolo ʼo logologo te fakatuʼuake ʼaē ʼo Sesu ki te kau tisipulo?

▪ Koteā te meʼa ʼaē neʼe hoko ki te kau solia ʼaē neʼe leʼo, pea koteā te meʼa neʼe fai e te kau pelepitelo ʼi tanatou maʼu te logo mai te kau solia ʼaia?

▪ Koteā te meʼa ʼaē neʼe hoko ʼi te nofo tokotahi ʼa Malia Maketalena ʼi te falemaka, pea neʼe feafeaʼi te aga ʼa te kau tisipulo ʼi te fakahā age ʼaē e te ʼu fafine te meʼa ʼaē neʼe nātou sisio kiai?