‘E Mooni! Ko Te Aliki Kua Tuuʼake!’

Koutou fakakaukauʼi age muʼa te lotomamahi lahi ʼo te kau tisipulo ʼa Sesu ʼi te matehi ʼo tonatou ʼAliki. Neʼe kua puli tanatou ʼamanaki, ohage pe ko te mate ʼo te sino ʼaē neʼe tuku e Sosefo ʼo Alimatea ki te falemaka. Pea neʼe mole kei ʼi ai he ʼamanaki ʼe faka ʼāteaina anai e Sesu te kau Sutea mai te pule ʼa Loma.

KANAPAULA neʼe ko tona fakaʼosi ʼaia, pea ʼe mahino ia ʼe mole kei ʼi ai anai ni ʼu tisipulo ʼa Sesu, ohage ko te pulinoa ʼa te ʼu tisipulo ʼa te tokolahi ʼaē neʼe nātou lau ia nātou ko he ʼu Mesia. Kae neʼe maʼuli ia Sesu! Ohage ko tona ʼui e te Tohi-Tapu, neʼe tuʼa lahi tana hā ki tana ʼu tisipulo, ʼi te hili pe ʼo tona mate. Neʼe tupu ai te ʼui fēnei ʼa ʼihi: “E mooni! Kua tuuʼake te Aliki!”—Luka 24:34.

Neʼe tonu ke hāofaki e te kau tisipulo tanatou tui ʼaē ʼe ko Sesu te Mesia. ʼI tanatou fai ʼaia, neʼe nātou fakahā tāfito ai ko tona fakatuʼuake mai te kau mate ʼe ko he fakamoʼoni mālohi ki tona ʼuhiga Mesia. Koia, “nee fai e te kau apositolo te fakamooni ki te tuuake a te Aliki Sesu aki he malohi fakamataku.”—Gaue 4:33.

Kapau neʼe feala ki he tahi ke ina fakamoʼoni ko te fakatuʼuake ʼaia neʼe ko he loi—ʼo lagi ina kole ki he tahi ʼi te kau tisipulo ke ina fakamoʼoni ʼe ko he loi peʼe ina fakahā neʼe tuku pe te sino ʼo Sesu ʼi te falemaka—pea neʼe faihala te Lotu Faka Kilisitiano talu mai te kamata. Kae neʼe mole hoko te faʼahi ʼaia. ʼI tanatou ʼiloʼi ʼaē kua maʼuli ia Kilisito, neʼe ʼolo ai te kau tisipulo ʼa Sesu ki te ʼu potu fuli pe ʼo nātou tala ai tona fakatuʼuake, pea tokolahi neʼe nātou tui ki te kua fakatuʼuake ʼo Kilisito.

He koʼe ʼe feala ke koutou tui mo koutou ki te fakatuʼuake ʼo Sesu? Koteā te fakamoʼoni ʼe ina fakahā mai neʼe hoko moʼoni te faʼahi ʼaia?

He Koʼe ʼe Tonu Ke Tou Vakaʼi Te ʼu Fakamoʼoni?

Ko te ʼu Evaselio fuli e fā ʼe fakamatala ai te fakatuʼuake ʼo Sesu. (Mateo 28:1-10; Maleko 16:1-8; Luka 24:1-12; Soane 20:1-29)a Ko te tahi ʼu koga ʼo te Koga Tohi-Tapu Kilisitiano Faka Keleka ʼe talanoa fakalelei ki te fakatuʼuake ʼo Kilisito mai te kau mate.

Ko te tupuʼaga la ʼaia ʼo te tala ʼo te fakatuʼuake ʼo Sesu e tana ʼu tisipulo! Kapau ko te ʼAtua neʼe ina fakatuʼuake moʼoni ia ia ki te maʼuli, pea ʼe ko te logo fakaofoofo lahi tokotahi ʼaia ʼi te malamanei. Ko tona faka ʼuhiga ʼe maʼuli te ʼAtua. Pea ʼe faka ʼuhiga ʼe maʼuli ia Sesu ʼi te temi nei.

ʼE malave feafeaʼi te faʼahi ʼaia kia tatou? Neʼe faikole fēnei ia Sesu: “Ko te mauli heegata aeni, ke natou iloi koe, te Atua e tahi mo mooni pea mo ia ae nee ke fekaui mai, ia Sesu Kilisito.” (Soane 17:3) Ei, ʼe feala ke tou maʼu te ʼatamai mālama ʼaē ʼe ina fakamaʼuli ʼo ʼuhiga mo Sesu pea mo tana Tāmai. Kapau ʼe tou maʼuliʼi te ʼatamai mālama ʼaia, tatau aipe peʼe tou mamate, kae ʼe feala ke fakatuʼuake tatou, he neʼe fakatuʼuake ia Sesu. (Soane 5:28, 29) ʼE feala ke tou maʼu te ʼamanaki ʼaē ke tou maʼuli ʼo heʼegata ʼi te palatiso ʼi te kele, ʼo tou fakalogo ki te Puleʼaga ʼo te ʼAtua ʼaē ʼi selo ʼaē ʼe puleʼi e tona ʼAlo ʼi tona kolōlia, ia Sesu Kilisito, te Hau ʼo te ʼu hau.—Isaia 9:6, 7; Luka 23:43; Apokalipesi 17:14.

Koia, ko te fehuʼi ʼaē pe neʼe fakatuʼuake moʼoni koa ia Sesu mai te mate ʼe ko he fehuʼi maʼuhiga. ʼE malave ki totatou maʼuli ʼi te temi nei pea mo tatatou ʼu ʼamanaki ki te ka haʼu. Koia ʼe mātou fakaafe atu koutou ke koutou vakaʼi te ʼu faʼahi e fā ʼaē ʼe nātou fakamoʼoni ai neʼe mate ia Sesu pea kua fakatuʼuake.

Neʼe Mate Moʼoni Ia Sesu ʼi Te Pou

Ko ʼihi hahaʼi lotolotolua ʼe nātou ʼui, logola neʼe tutuki ia Sesu, kae neʼe mole mate moʼoni ia ʼi te pou. ʼE nātou ʼui neʼe meihiʼi mate, pea neʼe toe maʼuli ake he neʼe momoko tona falemaka. Kae ʼe fakahā e te ʼu tohi fuli ʼaē ʼe tou maʼu, ko te sino ʼo Sesu neʼe kua mate ʼi te temi ʼaē neʼe tuku ai ki te falemaka.

Mai tona ʼaluʼaga ʼaē neʼe matehi Sesu ia muʼa ʼo te hahaʼi, koia neʼe ʼi ai te ʼu hahaʼi neʼe nātou sio mata ki te kua mate moʼoni ʼa Sesu ʼi te pou. Neʼe fakamoʼoni tona kua mate e te ofisie ʼaē neʼe ina matehi ia ia. Ko te ofisie ʼaia neʼe kua faiva ʼi tana gāue, he neʼe tonu ke ina ʼiloʼi lelei pe kua mate ia Sesu. Tahi ʼaē meʼa, neʼe tuku age e te Kovana Loma ko Posio Pilato ke ʼavaifo te sino ʼo Sesu e Sosefo ʼo Alimatea, ʼi te temi pe ʼaē neʼe fakahā ai kua mate moʼoni Sesu.—Maleko 15:39-46.

Neʼe Gaʼasi Te Falemaka

Ko te gaʼasi ʼo te falemaka neʼe ko te ʼuluaki fakamoʼoni ʼaia ki te kau tisipulo kua fakatuʼuake ia Sesu, pea neʼe mole fakafihiʼi te faʼahi ʼaia. Neʼe tuku ia Sesu ki te falemaka foʼou, neʼe mole heʼeki fakaʼaoga. Neʼe tuʼu ōvi ʼi te koga meʼa ʼaē neʼe tutuki ai pea neʼe faigafua pe te sio ʼa te hahaʼi ki tona tuʼuʼaga. (Soane 19:41, 42) ʼE fakamatala e te ʼu Evaselio fuli, ʼi te temi ʼaē neʼe ʼōmai ai te ʼu kaumeʼa ʼo Sesu ki te falemaka ʼi te lua ʼaho ʼo tana ʼosi mate, neʼe kua puli tona sino.—Mateo 28:1-7; Maleko 16:1-7; Luka 24:1-3; Soane 20:1-10.

Neʼe punamaʼuli ʼaupito te ʼu fili ʼo Sesu ʼo feiā mo tona ʼu kaumeʼa ʼi te kua gaʼasi ʼo te falemaka. Neʼe kua fualoa te faiga ʼo tona ʼu fili ke nātou sio ki tona mate pea mo tona ʼavaifo. ʼI tanatou ʼosi fai tanatou fakatuʼutuʼu, neʼe nātou vakavakaʼi lelei ke ʼi ai he ʼu tagata leʼo ke nātou leʼoleʼo te falemaka. Kae ʼi te uhu ʼo te ʼuluaki ʼaho ʼo te vāhaʼa, neʼe kua gaʼasi.

Neʼe toʼo koa e te ʼu kaumeʼa ʼo Sesu tona sino mai te falemaka? Kailoa, heʼe fakahā e te ʼu Evaselio neʼe nātou lotomamahi ʼaupito ʼi tona ʼosi mate. Pea tahi ʼaē meʼa, ʼe mole tali anai e tana ʼu tisipulo ke fakatagaʼi kovi nātou pea mo matehi nātou ki he meʼa ʼe nātou ʼiloʼi ʼe ko he kākā.

Ko ai ʼaē neʼe ina toʼo te sino ʼi te falemaka? ʼE mahino ia, neʼe mole ko te ʼu fili ʼo Sesu ʼaē neʼe nātou toʼo te sino. Tatau aipe pe neʼe ko nātou, kae ʼe mahino ia neʼe lagi nātou toʼo ki muli age moʼo fakahā te loi ʼo te tala ʼa te kau tisipulo kua fakatuʼuake ia Sesu pea kua maʼuli. Kae neʼe mole hoko he meʼa feiā, he neʼe ko te ʼAtua ʼaē neʼe ina fai te meʼa ʼaia.

Hili kiai ni ʼu vāhaʼa, neʼe mole fakafisi mālohi te ʼu fili ʼo Sesu ʼi te temi ʼaē neʼe fakamoʼoni fēnei ai ia Petelo: “Hahai o Iselaele, koutou fagono mai kia kupu aeni: Ko Sesu Nasaleti, ko he tagata nee fakamooni e te Atua ia koutou aki he u milakulo, mo he u gaue manamana pea mo he u fakailoga, nee ina fakahoko aki iaʼia i te lotolotoga o koutou, o hagepe ko tautou iloi. Ko te tagata aia, nee fakanofo o fai ki te tuutuuni mo te poto heegata o te Atua, nee koutou tamatei i tautou tuku iaʼia ki te u nima o te kau pagani ke [“tutuki ki te pou,” MN ]. Nee fakatuuake ia e te Atua i tana fakaʼateaina iaʼia mai te u kafo o te mate, koteuhi nee mole feala ke taofi ia e te mate. Koteuhi e tala e Tavite o uhiga mo ia: ‘Nee au mamata tuumau ki te Aliki i oku mua . . . e malolo anai mo toku kakano i te falala. Koteuhi e mole ke liaki anai toku mauli i te nofoaga o te mate, pe e mole ke tuku anai tau agatonu ke mamata ki te fakapopo o te sino.’ ”—Gaue 2:22-27.

Neʼe Sio Te Tokolahi Kia Sesu Kua Fakatuʼuake

ʼI te tohi ʼo Gaue, neʼe ʼui fēnei e te tagata tohi Evaselio ko Luka: “[Ki te kau ʼapositolo] nee ha mauli [Sesu] i te hili o tona pasio i he u fakamooni kehekehe, lolotoga aho e fagofulu nee natou mamata kia te ia pea nee folafola ia kia mea o uhiga mo te Puleaga o te Atua.” (Gaue 1:2, 3) Tokolahi te kau tisipulo neʼe nātou sio ʼi te ʼu lakaga kehekehe kia Sesu kua fakatuʼuake—ʼi te ʼōloto, ʼi te ala, lolotoga te taumafa, ʼi te Tai ʼo Tipeliate.—Mateo 28:8-10; Luka 24:13-43; Soane 21:1-23.

Neʼe fakafihiʼi e te hahaʼi sivi Tohi-Tapu te moʼoni ʼo te ʼu hā ʼaia ʼa Sesu. Neʼe nātou ʼui neʼe faʼu e te hahaʼi faitohi te ʼu fakamatala, peʼe nātou lau ʼe mole ʼalutahi te ʼu fakamatala ʼaia. ʼI tona ʼuhiga moʼoni, ko te ʼu kehekehe veliveli ʼi te ʼu fakamatala ʼo te ʼu Evaselio ʼe fakamoʼoni ai neʼe mole nātou felogoi fakafūfū moʼo fai tanatou ʼu tohi. ʼE tuputupu tatatou ʼatamai mālama ʼo ʼuhiga mo Sesu, mokā hilifaki e te tagata faitohi he tahi ʼu manatu ʼe ina fakakatoa te tahi ʼu fakamatala ʼo te ʼu meʼa ʼaē neʼe hoko ʼi te maʼuli ʼo Kilisito ʼi te kele.

Ko te ʼu hā ʼa Sesu ʼi tona ʼosi fakatuʼuake, neʼe ko he avea koa ʼo tana kau tisipulo? Ko te ʼu manatu feiā ʼe mole honatou tafitoʼaga, koteʼuhi neʼe ko te tokolahi ʼaē neʼe nātou sio kia te ia. Ia nātou ʼaia, neʼe ʼi ai te ʼu tagata gelu, te ʼu hahaʼi fafine, te ofisie, pea mo te ʼapositolo lotolotolua ko Tomasi, ʼaē neʼe hoki tui ʼi te temi ʼaē neʼe sio ai ki te fakamoʼoni papau ʼaē kua fakatuʼuake ia Sesu mai te kau mate. (Soane 20:24-29) ʼE lahi te ʼu lakaga, neʼe mole ʼiloʼi atu aipe e te ʼu tisipulo ʼa Sesu tonatou ʼAliki ʼaē kua fakatuʼuake. ʼI te tahi ʼaho, neʼe ko te toko 500 ʼaē neʼe nātou sio ki ai, pea neʼe kei maʼuli te tokolahi ʼi te temi ʼaē neʼe talanoa ai te ʼapositolo ko Paulo ki te meʼa ʼaia, moʼo fakamoʼoni ʼo ʼuhiga mo te fakatuʼuake.—1 Kolonito 15:6.

ʼE Malave Ki Te Hahaʼi Te Kua Maʼuli ʼa Sesu

Ko te fakatuʼuake ʼo Sesu ʼe mole ko he faʼahi pe ke tou tokagaʼi peʼe fakafihiʼi. Ko tona kua maʼuli neʼe malave lelei ki te hahaʼi ʼi te potu fuli pe. Talu mai te ʼuluaki sēkulō, ko te hahaʼi tokolahi ʼaē neʼe nātou meʼa noaʼi te Lotu Faka Kilisitiano pe neʼe nātou fakafeagai kiai, kua nātou liliu ʼo tui papau ʼe ko te lotu moʼoni ʼaia. Koteā ʼaē neʼe ina fetogi ia nātou? Ko te ako ʼo te Tohi-Tapu, neʼe ina fakamoʼoni kia nātou neʼe fakatuʼuake e te ʼAtua ia Sesu ke maʼuli ʼi selo ohage ko he laumālie kua faka kolōlia. (Filipe 2:8-11) Neʼe nātou tui kia Sesu pea mo te fakatuʼutuʼu ʼa Sehova ʼAtua ke ina foaki te maʼuli ʼaki te sakilifisio faitotogi ʼa Kilisito. (Loma 5:8) Neʼe maʼu e te hahaʼi ʼaia te fiafia moʼoni ʼi tanatou fai te finegalo ʼo te ʼAtua pea mo tanatou maʼuliʼi te ʼu akonaki ʼa Sesu.

Ohage la ko te maʼuli ʼa he Kilisitiano ʼi te ʼuluaki sēkulō. Neʼe mole kita liliu ai ʼo ʼiloa, peʼe mālohi, peʼe maʼu koloā. Kailoa ia, tokolahi ʼi te kau Kilisitiano ʼo te ʼuluaki sēkulō, neʼe nātou ‘fiafia ʼi te faʼao ʼo tonatou ʼu koloā’ ʼuhi ko tanatou tui. (Hepeleo 10:34) ʼE fakamaʼua e te Lotu Faka Kilisitiano he maʼuli faka sakilifisio pea ko te tokolahi ʼe nātou mamate maletile ʼuhi ko te ʼu fakataga.

ʼI muʼa ʼo tanatou liliu ko he ʼu tisipulo ʼa Kilisito, neʼe maʼu e ʼihi he ʼu fakaʼamu, ohage la ke nātou liliu ʼo ʼiloa pea mo maʼu koloā. Ko Saulo ʼo Talesi, neʼe akoʼi e te tagata faiako ʼiloa ʼo te Lao, ko Kamaliele, pea neʼe tokagaʼi e te kau Sutea tana lakalaka ki muʼa. (Gaue 9:1, 2; 22:3; Kalate 1:14) Kae neʼe liliu ia Saulo ko te ʼapositolo ko Paulo. Ko ia pea mo te tokolahi neʼe nātou fakafisi ki te ʼiloa pea mo te mālohi ʼaē neʼe foaki age e te mālama ʼaenī. Koteā tona tupuʼaga? Ke feala hanatou faka mafola te logo ʼo te ʼamanaki moʼoni ʼaē neʼe fakatafito ki te ʼu fakapapau ʼa te ʼAtua, pea mo te kua fakatuʼuake ʼo Sesu Kilisito mai te kau mate. (Kolose 1:28) Neʼe nātou lotolelei ke nātou maʼuli mamahi maʼa he faʼahi neʼe nātou ʼiloʼi ʼe moʼoni.

ʼE toe tatau te faʼahi ʼaia ki te lauʼi miliona hahaʼi ia ʼaho nei. ʼE feala ke koutou maʼu nātou ʼi te ʼu kokelekasio ʼa te kau Fakamoʼoni ʼa Sehova ʼi te kele katoa. ʼE fia fakaafe atu koutou e te kau Fakamoʼoni ki te fakamanatu ʼi te taʼu fuli ʼo te mate ʼo Kilisito, pea ʼe fai anai ʼi te ʼAhotapu, ʼaho 8 ʼo ʼApelili 2001, ʼi te ʼosi tō ʼo te laʼā. ʼE nātou tali fiafia anai koutou ʼi te toʼotoʼoga ʼaia pea mo tanatou ʼu fono fuli ke koutou ako te Tohi-Tapu ʼi tonatou ʼu Fale ʼo Te Puleʼaga.

He koʼe koa ʼe mole koutou ako he tahi ʼu meʼa, ʼo mole gata pe ki te mate pea mo te fakatuʼuake ʼo Sesu, kae ke koutou toe ʼiloʼi foki mo tona maʼuli pea mo tana ʼu akonaki? ʼE ina fakaafe tatou ke tou ʼolo age kia te ia. (Mateo 11:28-30) Koutou faiga ʼi te temi nei ke koutou maʼu te ʼatamai mālama totonu ʼo ʼuhiga mo Sehova ʼAtua pea mo Sesu Kilisito. Kapau ʼe koutou fai te faʼahi ʼaia, pea ʼe feala anai ke koutou maʼu te maʼuli heʼegata ʼi te Puleʼaga ʼo te ʼAtua ʼaē ʼe pule ai tona ʼAlo ʼofaina.

[Kiʼi nota]

[Paki ʼo te pasina 7]

ʼE fiafia moʼoni te lauʼi miliona hahaʼi ʼi tanatou liliu ko he ʼu tisipulo ʼa Sesu Kilisito

[Haʼuʼaga ʼo te paki pasina 6]

From the Self-Pronouncing Edition of the Holy Bible, containing the King James and the Revised versions