Kapite 2

Faka Kolōliaʼi Ia Sehova, Te ʼAtua Moʼoni

1. (a) Ko ai te ʼAtua moʼoni? (b) ʼE tonu ke lave feafeaʼi ki totatou maʼuli ia te ʼu faʼahiga meʼa ʼaē ʼe tou ʼiloʼi ʼo ʼuhiga mo ia?

KI TONA ʼu tēhina Kilisitiano, neʼe faitohi ia Paulo ʼapositolo ʼo fakahā age kia nātou, kapau ʼe lahi ni ʼatua loi, “ko te ʼAtua pe e tahi, te Tāmai . . . pea ʼe ko te ʼAliki pe e tahi, ko Sesu Kilisito.” (1 Ko. 8:5, 6) Ko te “ ʼAtua pe e tahi” ʼaē neʼe palalau ki ai ia Paulo ko Sehova, te Tupuʼaga ʼo meʼa fuli. (Teu. 6:4; Fakh. 4:11) Ko te hahaʼi ʼaē ʼe ia nātou te loto fakafetaʼi ʼi tanatou akoʼi tona ʼu kalitate pea mo te ʼu meʼa fuli ʼaē neʼe ina fai maʼa te malamanei ʼe nātou fia ʼōmai kia te ia. Koteā tona ikuʼaga? Kia nātou ʼaia ʼe tonu ke nātou faka kolōliaʼi ia Ia ʼaē ʼe nātou vikiʼi mo tonatou loto katoa, mo tanatou ʼu palalau pea mo tanatou ʼu gāue. ʼI te tuputupu ʼo tonatou ʼofa ʼaē ki te ʼAtua, ʼe hake ʼi tonatou loto tanatou fia palalau ki niʼihi ʼo ʼuhiga mo Ia, pea ʼe nātou faʼifaʼitaki ki ai ʼo fai pe ki tonatou fealagia. ʼE fakaloto mālohiʼi tatou e te Tohi-Tapu ki te faʼahi ʼaia ʼo fēnei: “Koutou liliu ko he kau faʼifaʼitaki ʼo te ʼAtua, ohage ko he fānau ʼofaina, pea ke koutou haga haʼele ʼi te ʼofa.” (Ef. 5:1, 2) Moʼo maʼuliʼi ʼo te tokoni ʼaia, ʼe tonu ke tou ako ke tou ʼiloʼi te ʼuhiga moʼoni ʼo Sehova.

Te ʼUhiga ʼo Sehova

2. Koteā ʼihi ʼu kalitate fakaofoofo ʼo te ʼAtua ʼe tupu ai tatatou fia faka kolōliaʼi ia ia?

² ʼI te ʼu pasina ʼo te Tohi-Tapu, ʼe lahi te ʼu talanoa fakahagatonu ʼe hā mai ai kia tatou te ʼu kalitate fakaofoofo ʼo te ʼAtua. Ka koutou lau te ʼu talanoa ʼaia, koutou toʼo he temi moʼo fakakaukauʼi ʼo te ʼu kalitate ʼaia, ke feala ai hakotou ʼiloʼi tona ʼuhiga moʼoni pea mo tona maʼuhiga kia koutou. Ohage la: “Ko te ʼAtua ʼe ʼofa.” (1 Soane 4:8) “Ko tona ʼu ala fuli ʼe faitotonu.” (Teu. 32:4) ‘ ʼE maʼu ia te ia te poto.’ (Sopo 12:13) ʼE “mālohi ia ʼaki te māfimāfi.” (Is. 40:26) Ka koutou metitasio ki te ʼu kalitate ʼaia ʼo te ʼAtua, ko takotou fakafetaʼi ʼe mole ina uga koa la koutou ke koutou fakavikiviki kia te ia?

3. Koteā ʼihi ʼu agaaga ʼo Sehova ʼe taulekaleka ʼaupito?

³ Ko te Tohi-Tapu ʼe ina toe fakahā lelei mai te ʼuhiga taulekaleka ʼo Sehova ʼi tana ʼui mai ʼaē ko ia ko te “ ʼAtua agaʼofa pea mo fakamolemole gafua, tuai ʼi te ʼita pea mohu ʼi te loto ʼofa pea mo te moʼoni.” (Ek. 34:6) “Ko Koe, Ê Sehova, ʼe ke agalelei pea ʼe ke fakamolemole gafua.” (Pes. 86:5) “ ʼO ʼuhiga mo Sehova, ko tona ʼu mata ʼe taka ʼi te kele katoa, ke ina fakahā tona mālohi kia nātou ʼaē ʼe katoa tonatou loto kia te ia.” (2 Fkma. 16:9) “Ko te ʼAtua ʼe mole fakapulepule, kae . . . ʼi te fenua fuli pe ko te tagata ʼaē ʼe manavasiʼi kia te ia pea mo maʼuli ʼi te faitotonu ʼe ina leleiʼia.” (Gāue 10:34, 35) Ko Sehova “ ʼe ina foaki ki te hahaʼi fuli ʼaki te manavaʼofa” pea ko ia ko te “ ʼAtua fiafia.” (Sake 1:5; 1 Tim. 1:11) Ko he meʼa fakaloto mālohi hatatou kaugana ki te ʼAtua mole hona fakatatau pea mo ina tokagaʼi tatou ʼaki te ʼofa!

4. (a) Ko te faʼahiga pipiki feafeaʼi ʼaē ʼe fakamaʼuaʼi e Sehova, pea he koʼe ʼe maʼuhiga ʼaupito? (b) Koteā te fakaafe ʼaē ʼe fai mai ʼi te Pesalemo 34:3?

⁴ ʼO ʼalutahi mo tona ʼu kalitate ʼaia ʼe toe ʼui foki ko ia “te ʼAtua ʼe ina fakamaʼua ke pipiki ʼāteaina pe kia te ia.” (Ek. 20:5) Kapau ʼe tou loto ke ina leleiʼia tatatou gāue, ʼe tonu ke tou pipiki ʼāteaina pe kia te ia. ʼE mole feala foki ke tou toe ʼofa ki te mālama ʼaenī ʼaē ʼe ʼatua kia Satana (1 Soane 2:15-17; 2 Ko. 4:3, 4). Ko Sehova ʼe sio kia ia ʼaē ʼe mole ina maʼuliʼi fakahagatonu te faitotonu. ʼE ina ʼiloʼi lelei te meʼa ʼaē ʼe tou fai, ʼo feiā foki mo te ʼu meʼa ʼaē ʼi totatou loto pea mo te faʼahiga tagata ʼaē ʼe tou faiga ke tou hoko ki ai. Kapau ʼe tou ʼofa fakamalotoloto ki te faitotonu, ʼe tokoni anai Sehova kia tatou. (Sel. 17:10; Taag. 15:9) ʼUhi ko te ʼuhiga ʼaia ʼo Sehova, koia kua lauʼi miliona te tagata mo te fafine ʼi te malamanei katoa kua nātou tali fakafiafia te fakaafe ʼaenī ʼa te tagata fai pesalemo: “Koutou faka kolōliaʼi Sehova mo ʼau, pea ke tou fakahikihiki fakatahi tona huafa.” (Pes. 34:3) Neʼe kua koutou tali koa te fakaafe ʼaia?

5. Koteā te meʼa ʼaē ʼe tokoni anai kia tatou ke ʼaoga lahi kia tatou tatatou vakavakaʼi te ʼuhiga ʼo Sehova?

⁵ Ko takotou fia palalau ʼo ʼuhiga mo te ʼAtua ʼe tuputupu anai pea ʼe faigafua anai takotou faʼifaʼitaki kia te ia mo kapau ʼe koutou fakakaukau lelei ki tona ʼu kalitate taulekaleka. (1) Koutou kumi pe koteā te ʼuhiga totonu ʼo te ʼu kalitate takitokotahi, ohage ke koutou faigaʼi ke koutou ʼiloʼi pe koteā tonatou kehekehe mo he tahi kalitate, (2) koutou vakaʼi pe neʼe feafeaʼi tona fakahā e Sehova pea ko ai ʼaē neʼe ina fakahā ki ai, pea (3) koutou fakakaukauʼi peʼe feafeaʼi hakotou maʼuliʼi totonu te kalitate ʼaia peʼe feafeaʼi anai tona lave ki takotou faʼahiga sio ʼaē ki te ʼu meʼa fuli.

6. ʼI hakotou vakaʼi te ʼofa, koutou fakahā mai peʼe feafeaʼi hakita fakakaukau ki te ʼu kalitate ʼo Sehova. Ki te faʼahi ʼaia, koutou tali ki te ʼu fehuʼi ʼaenā ʼe fai ʼi te fakaʼosi ʼo te palakalafe ʼo koutou fakaʼaogaʼi te ʼu vaega ʼaenā ʼe tuʼu ai.

⁶ Tou toʼo he faʼifaʼitaki e tahi. ʼI te ʼui mai ʼa te Tohi-Tapu “ko te ʼAtua ʼe ʼofa,” koteā tona faka ʼuhiga? (1 Soane 4:8) ʼE lahi foki te ʼu faʼahiga ʼofa. ʼI te koga tohi ʼaia, ko te kupu faka Keleka ʼaē ko te agapê, ʼaē ʼe ina faka ʼuhiga te faʼahiga ʼofa ʼaē ʼe māʼoluga ʼaupito, ʼaē ʼe fakahā totonu e Sehova. Ko te ʼofa ʼaia ʼe ko te fakahā katoa ʼaia ʼo te mole manatu pe ʼaē kia kita. Koutou fakamaʼumaʼu te faʼahi ʼaia pea ke koutou tali ki te ʼu fehuʼi ʼaenā ʼe tuʼu ʼi lalo ʼo koutou fakaʼaogaʼi te ʼu vaega ʼaē ʼe tuʼu ʼi ai.

E feafeaʼi te hā ʼo te kalitate ʼaia ʼi te ʼu meʼa fuli ʼaē neʼe fakatupu e Sehova? (Gāue 14:16, 17)

Koteā te faʼahi makehe ʼaē ʼe hā ai te ʼofa ʼo Sehova ki te malamanei? (Soane 3:16) Neʼe aga feiā koa ia Sehova ʼuhi ko te agalelei ʼa te tagata? (Lom. 5:8)

Koteā te fua ki totatou maʼuli ʼo te meʼa ʼaē neʼe fai e Sehova ʼaki ia tona ʼAlo? (2 Ko. 5:14, 15, 18, 19)

ʼE lava feafeaʼi kia tatou kau Kilisitiano hatatou fakahā ʼe tou maʼu te faʼahiga ʼofa ʼaia ki ʼotatou ʼu tēhina (1 Ko. 13:4-7; 1 Soane 4:10, 11; 3:16-18)

Ko ai ʼaē ʼe tonu ke tou fai ki ai te faʼahiga ʼofa ʼaia, pea ʼo feafeaʼi? (Mat. 5:43-48; 28:19, 20; Kal. 6:10)

7. ʼI te lolotoga ʼo takotou ako takitokotahi, e feafeaʼi hakotou maʼu niʼihi ʼu manatu feiā ʼo ʼuhiga mo ʼihi kalitate ʼo Sehova?

⁷ ʼE koutou toe fia vakavakaʼi feiā koa niʼihi ʼatu kalitate ʼo Sehova? ʼI te lolotoga ʼo takotou ako takitokotahi, he koʼe ʼe mole koutou kamata ʼaki te “faitotonu” pea mo te “poto,” ʼosi ʼaia pea koutou vakaʼi “te loto ʼofa” pea mo te “manavaʼofa.” ʼI takotou fakaʼaogaʼi te ʼu kumiʼaga ʼo te ʼu tohi fuli neʼe fai e te Sosiete Watch Tower pea mo he kumiʼaga ʼo te ʼu vaega faka Tohi-Tapu, ʼe lahi ʼaupito te ʼu puani ʼaoga ʼe koutou maʼu ai anai.

Koutou Tokoni Ki Te Hahaʼi Ke Nātou Ako Te Moʼoni ʼo ʼUhiga Mo Te ʼAtua

8. (a) Ko te ʼu ʼatua feafeaʼi ʼaē ʼe atolasio ki ai te mālama? (b) Ko ai ʼaē ʼe ʼi muli ʼo te maveuveu ʼaia, pea he koʼe ʼe koutou tali feiā?

⁸ Tokolahi te hahaʼi, ʼaē ʼe mole atolasio ki te ʼAtua moʼoni, ʼe nātou foaki he tauhi ki niʼihi ʼatu ʼatua ʼe lauʼi miliona. ʼI te fā sēkulō, neʼe taupau e te Keletiate te tui ki te “Tahitolu,” ʼaē neʼe kua fualoa atu tona akonakiʼi e te kau Papiloni, e te kau Esipito, e te kau Initia pea mo te kau Putisi. ʼO mole gata ʼaki pe ki te ʼatua ʼaia, ʼe atolasioʼi e te hahaʼi te ʼu pule Fenua mālohi, te ʼu tagata faigaoʼi, pea mo te hahaʼi fai hiva ʼe ʼiloa, ohage ko he ʼu ʼatua. Ko te paʼaga, mo te manatu pe ʼaē kia kita pea mo te holi fakasino kua liliu ia ko he ʼu ʼatua ʼe fai ki ai he tauhi fakamalotoloto. Kae ko ai koa ʼaē ʼi muli ʼo te ʼu meʼa fuli ʼaia? “Ko te ʼatua ʼo te tuʼu ʼo te ʼu faʼahiga meʼa ʼaenī,” ko Satana te Tevolo. (2 Ko. 4:4; 1 Ko. 10:20) ʼAki te ʼu faʼahiga kākā kehekehe, ʼe ina faigaʼi ke ina fakamaliu mai te hahaʼi mai ia Sehova peʼe ko he fakamavaevae ʼo nātou ʼi tanatou tauhi.

9. Koteā te puleʼaki lelei ʼe ʼaoga moʼo tokoni ki he tahi ke ina ako te moʼoni ʼo ʼuhiga mo te ʼAtua?

⁹ E feafeaʼi koa hatatou tokoni ki te ʼu hahaʼi ʼaia, tatau aipe, peʼe nātou ʼui ko nātou ko te kau Kilisitiano peʼe kailoa, ke nātou ʼiloʼi te moʼoni ʼo ʼuhiga mo te ʼAtua? Ko te puleʼaki lelei ʼe tonu ke tou fakahā age kia nātou ʼaki he aga ʼe lelei peʼe feafeaʼi te fakahā totonu e te Tohi-Tapu ia te ʼAtua moʼoni pea mo tona ʼuhiga ʼo ia. Kae ʼe tonu foki ke tou fakamoʼoni ʼatatou ʼu palalau, ʼaki he aga ʼe ʼiloga lelei mai ai te ʼu kalitate ʼo te ʼAtua.—1 Pe. 2:12.

10. Kapau ʼe tou palalau mo he tahi ʼe tui ki te Tahitolu, he koʼe ʼe mole lelei hatatou ʼui age ʼe tou ʼiloʼi te meʼa ʼaē ʼe tui ia ki ai?

¹⁰ Kae, koteā anai te meʼa ka koutou fai mokā ʼe fakafihiʼi koutou e he tahi ʼe kau ki te ’Ēkelesia ʼo te Keletiate ʼo ina ʼui atu ko tana tui ki te “Tahitolu” ʼe fakamoʼoni kiai te Tohi-Tapu? ʼUluaki, ʼe tonu ke koutou ʼiloʼi, kapau neʼe ʼui e te ’Ēkelesia ʼe moʼoni ia te “Tahitolu,” ʼe tokolahi te hahaʼi ʼe ʼi ai tanatou ʼu tonu takitokotahi ʼo ʼuhiga mo te faʼahi ʼaia. Koutou fakaafe te tagata ʼaia ke ina fakahā mai tana manatu, ʼosi ʼaia pea koutou tokoni ki ai ke ina vakaʼi peʼe tatau te meʼa ʼaē ʼe tui ki ai mo te meʼa ʼaē ʼe talanoa kiai tana Tohi-Tapu. ʼI te temi totonu, koutou fakaloto mālohiʼi ia ia ke ina vakaʼi peʼe tatau te akonaki ʼaē ʼe fakamoʼoni ki ai tona ’Ēkelesia pea mo te Folafola ʼa te ʼAtua.

11. ʼI he vakaʼi takitahi ʼo te ʼu puani ʼaē e nima, koutou fakaʼaogaʼi te ʼu fehuʼi pea mo te ʼu vaega faka Tohi-Tapu ʼaē ʼe tuʼu ʼi te palakalafe moʼo fakahā ko te akonaki ʼo te “Tahitolu” ʼe mole tuʼu ia ʼi te Tohi-Tapu.

¹¹ ʼI tatatou manatuʼi tatatou fia tokoni ki te hahaʼi ʼaē ʼe fakamalotoloto, koutou vakaʼi peʼe feafeaʼi anai hakotou faiga ʼo fakakaukauʼi nātou ʼaki te ʼu manatu ʼe tuʼu ʼi lalo ʼo fakaʼaoga te ʼu vaega ʼaē ʼe tohi ai:

(1) Ko ʼihi ia nātou ʼaē ʼe tui ki te Tahitolu ʼe nātou fakamoʼoni mai ʼe ʼi ai te ʼu ʼipotasi fakaʼatua e tolu (te Tāmai, mo te ʼAlo mo te Laumālie Maʼoniʼoni), kae ko te ʼAtua pe e tahi.

Kae ʼe fakahā mai koa, ʼi te koga tohi ʼo Gāue 2:4, 17 ko te “laumālie maʼoniʼoni” ko he ʼipotasi?

He koʼe ʼe ʼaoga ke tou vakaʼi pe ko te tokofia ʼaē ʼe palalau ki ai te ʼu vaega ʼaenī? (Soane 17:20-22; Gāue 7:56; Fakh. 7:10)

(2) Ko ʼihi ʼe nātou tui ko te ʼu ʼipotasi ʼo te “Tahitolu” ʼe tatau tonatou kolōlia, ʼe mole he tahi ʼe lahi age peʼe veliveli age ʼi he tahi ia nātou, ʼe nātou tauʼaki tatau mo nātou tauʼaki heʼegata.

ʼE fakamoʼoni koa te Tohi-Tapu ki te manatu ʼaia? (Moʼo tali kiai, koutou vakaʼi ia Soane 14:28; Mateo 24:36; Fakahā 3:14.)

(3) ʼE ʼi ai ʼihi ʼe nātou fakaʼaogaʼi ia Soane 1:1 moʼo fakamoʼoni ʼaki ʼo te “Tahitolu”. ʼE nātou ʼui ʼe tonu ke fakaliliu fēnei te vaega ʼaia: “Ko te Folafola neʼe ko te ʼAtua,” ka mole “ ʼatua.”

Kae ko te tokofia koa ʼaē ʼe palalau ki ai ia Soane 1:1? ʼE tolu peʼe lua? Tahi ʼaē meʼa, he koʼe ʼe fakafeagai ia Soane 1:18 ki te akonaki ʼo te “Tahitolu”?

ʼI te tohi faka Keleka, ko te kupu ʼaē ʼe fakaliliu ko te “ ʼAtua” peʼe “ ʼatua” ʼe mole tuʼu ʼi ʼona muʼa te mataʼi tohi “te” ka na ʼaua la neʼe lau fēnei: “te ʼAtua”. ʼI te mole tuʼu ia muʼa ʼo te kupu ʼaia te mataʼi tohi “te,” ʼe faka ʼuhiga ia ko te natula, ohage ko tona tuʼu ia Gāue 28:6. (Ko te Tohi-Tapu Bible du Centenaire ʼe ina fakaliliu fēnei ia Soane 1:1: “Pea ko te Folafola neʼe ko he tahi ʼe natula ʼatua,” ko tona faka ʼuhiga ʼe ina maʼu te ʼu kalitate fakaʼatua ohage ko te ʼAtua.)

(4) Ko nātou ʼaē ʼe tui ki te “Tahitolu” ʼe nātou toe ʼui mai foki ko te kupu faka Hepeleo ʼaē ia Senesi 1:1, 26 ʼaē ʼe fakaliliu ko te “ ʼAtua” ko te kupu “Elohim,” ko te faka ʼuhiga totonu ʼo te kupu ʼaia ko te “ ʼu ʼAtua.”

He koʼe ʼe mole ko he manatu tonu ʼaia moʼo fakamoʼoni ʼe ʼi ai he ʼu ʼipotasi fakaʼatua e tolu ʼi he “ ʼAtua e tahi”?

Ka na pau la ʼe talanoa ia Senesi 1:1 ki he “Tahitolu,” koteā la te ʼui kia Kau Fakamāu 16:23 ʼaē ʼe tou maʼu ai ia te kupu élohim ʼaē ʼe faka ʼuhiga ki te “ ʼatua,” pea mo te palalau faka Hepeleo ʼaē ʼe hoa mai ki ai ʼaē ʼe faka ʼuhiga ki te tokotahi kae mole ki he tokolahi?

Kae koteā te tupuʼaga ʼo te fakaʼaoga ʼo te kupu faka Hepeleo ʼaē ʼe faka ʼuhiga ki te tokolahi ʼo fakaliliu ko te ʼAtua ʼi te ʼu vaega ʼaia? Ki te kau Hepeleo, neʼe ko he faʼahiga palalau moʼo fakahā ʼaki ʼo te lahi ʼo te ʼuhiga fakaʼaliki. Ka na pau la ko te kupu ʼaia neʼe ina hinoʼi ki te tokolahi, ka na ʼaua la ko te ʼu palalau ʼaē ʼe hoa mai ki ai ʼe toe faka ʼuhiga pe ki te tokolahi, kae neʼe mole tuʼu feiā ia ʼi te ʼu vaega ʼaenī neʼe tou talanoa ki ai.

(5) ʼI te haga ʼa te ʼu ’Ēkelesia ʼo hikihiki ki muʼa ia Sesu (pea ko te huafa ʼo Sehova ʼe lahi te ʼu fakaliliu ʼo te Tohi-Tapu kua pulihi ai), ko ʼihi ʼe nātou manatu pe kia Sesu mokā palalau ʼaē ki te ʼAtua.

Kae koteā te faʼifaʼitaki neʼe tuku mai e Sesu kia tatou ʼo ʼuhiga mo te tauhi? (Luka 4:8)

12. He koʼe neʼe tonu te palalau ʼa Sesu ki tana Tāmai ʼi tana ʼui ʼaē ko ia “tokotahi pe ko te ʼAtua moʼoni”?

¹² Logope la te fakahigoa ʼo Sesu ʼi te Tohi-Tapu ko te “ ʼatua,” peʼe “ ʼAtua mālohi,” neʼe ina faka kolōliaʼi aipe tana Tāmai, ʼo talanoa ki ai ʼo ina ʼui fēnei “ko toku ʼAtua pea ko tokotou ʼAtua.” (Soane 1:1; 20:17; Is. 9:6) ʼE tatau tana manatu mo Moisese ʼaē neʼe ina ʼui fēnei ʼi muʼa atu: “Ko Sehova ko te ʼAtua moʼoni; ʼe mole he tahi ʼatu ʼatua ko ia pe.” (Teu. 4:35) ʼI kehekehe leva ʼo Sehova pea mo ʼihi ʼatu “ ʼatua” ʼaē ʼe atolasio ki ai te tagata, ohage la ko te ʼu tamapua, peʼe ko he ʼu tagata kua faka ʼuhiga ko te ʼu ʼatua pea mo Satana te Tevolo! Ohage ko tona ʼui e Sesu, ko Sehova “tokotahi pe ko te ʼAtua moʼoni.”—Soane 17:3.

“Tou Haʼele ʼi Te Huafa ʼo Sehova”

13, 14. Koteā te faka ʼuhiga ʼo te ʼu palalau ʼaenī “ke ʼiloʼi” ia Sehova pea mo ‘haʼele ʼi te huafa ʼo Sehova’?

¹³ ʼI te kua fualoa ʼaupito ʼo tanatou fakapōʼuli ki te ʼuhiga totonu ʼo te ʼAtua; tokolahi te hahaʼi ʼi te temi nei kua fiafia ʼi tanatou hoki sio ʼaē ki te huafa ʼo te ʼAtua, ko Sehova, ʼi tanatou Tohi-Tapu. (Ek. 6:3) Kae ko te ʼatamai mālama ʼaia ʼe hoki ina foaki pe anai he ʼu lelei ʼo fualoa kia nātou mo kapau ʼe nātou ‘haʼele ʼi te huafa ʼo Sehova ʼo talu ai.’ (Mi. 4:5) Ko tona faka ʼuhiga totonu ʼe mole gata ʼaki pe takita ʼiloʼi ia te huafa ʼo Sehova peʼe ko hakita ʼui ko kita ko te Fakamoʼoni ʼa Sehova.

¹⁴ ʼI tana fakahā ia te maʼuhiga ʼo te huafa ʼo te ʼAtua, ʼe ʼui fēnei e te Pesalemo 9:10: “Ko nātou ʼaē ʼe nātou ʼiloʼi tou huafa ʼe nātou falala anai kia te koe, . . . Ê Sehova!” Koteā tona faka ʼuhiga? ʼE mole gata ʼaki pe tatatou ʼiloʼi ia te huafa ʼo Sehova, heʼe feala pe ke tou ʼiloʼi tona huafa kae mole tou falala kia Sehova. Ko te “ ʼiloʼi” ʼo te huafa ʼo te ʼAtua ko tona faka ʼuhiga ʼi henī ke tou mahino pe ko te ʼAtua feafeaʼi ia Sehova, mo te fakaʼapaʼapa ki tana pule pea mo fakalogo ki tana ʼu fakatotonu. ʼO tatau aipe, mo te “haʼele ʼi te huafa ʼo Sehova” ko tona faka ʼuhiga ke tou foaki totatou maʼuli kia te ia, pea mo fakafofoga ia ia ʼo tou liliu ʼo atolasio kia te ia pea mo faka ʼalutahi totatou maʼuli mo tona finegalo. (Luka 10:27) ʼE koutou fai koa te meʼa ʼaia?

15. Kapau ʼe tou fia gāue kia Sehova ʼo talu ai, koteā te meʼa ʼaē ʼe ʼaoga ke tou fai ʼo mole gata ʼaki pe ʼi tatatou fai ohage pe ko he maʼua?

¹⁵ Kapau ʼe tou fia gāue kia Sehova ʼo heʼegata, pea ʼe mole tonu ke tou fai ʼaki pe ohage ko he maʼua. Neʼe fai e te ʼapositolo ko Paulo te palalau fakaloto mālohi ʼaenī kia Timoteo, ʼaē kua fualoa tana gāue kia Sehova: “Haga faigaʼi ke ke maʼu te aga faka lotu.” (1 Tim. 4:7) Ko te aga faka lotu, ko te pipiki katoa ki te ʼAtua, ʼaē ʼe haʼu mai te loto. ʼE tupu mai tatatou fakafetaʼi ʼaē kia te ia. Ko te tahi faka ʼuhiga ʼo te “aga faka lotu” ko he fakaʼapaʼapa lahi kia Sehova. ʼE fakaʼiloga ʼaki ia te pipiki mo te loto ʼofa ki te ʼAtua ʼaē ʼe haʼu mai he loto fakafetaʼi ki te ʼAtua pea mo te ʼu meʼa fuli neʼe ina fai. Ko te “aga faka lotu” la ʼaia, ʼaē ʼe tou holi ai ke lahi te fakaʼapaʼapa ʼa te hahaʼi fuli ki tona huafa. Kapau ʼe tou fia haʼele ʼi te huafa ʼo Sehova, te ʼAtua moʼoni ʼo talu ai, pea ʼe tonu ke tou maʼuliʼi te “aga faka lotu,” ke liliu ia ko he meʼa ʼe tou faigaʼi ʼi totatou maʼuli.—Pes. 37:4; 2 Pe. 3:11.

Toe Fakamanatu

● E feafeaʼi te agaaga ʼo Sehova? Ko te ʼu lelei feafeaʼi ʼaē ʼe tou maʼu mo kapau ʼe tou mālama lelei ki tona ʼu kalitate takitahi?

● E feafeaʼi hatatou tokoni ki niʼihi ke nātou ako te moʼoni ʼo ʼuhiga mo te ʼAtua?

● Koteā te faka ʼuhiga ʼo te ʼu palalau ʼaenī “ke ʼiloʼi” ia Sehova pea mo ‘haʼele ʼi tona huafa’?